"Ginbayaan namon ang Tanan kag Nagsunod kami sa Imo"

Liturhiya sang Pulong

(Martes, Marso 5, 2019)

Ang Pagbasa gikan sa Libro ni:

Sirac 35:1-12

Ang pagtuman sang kasugoan kaangay sang madamo nga mga dulot; ang pagtuman sang mga sugo amo ang paghalad sang dulot sa paghidait. Ang pagbalos sang kaayo amo ang isa ka dulot nga kalan-on, kag ang paghatag sing limos amo ang isa ka dulot sa pagdayaw. Sikwaya ang kalautan kag malipay ang Ginoo sikwaya ang pagkadi-matarong kag patawaron ka. Indi ka mag-atubang sa Ginoo nga wala sing dala; tumana ini nga mga halad, kay amo ini ang sugo. Kon ang matarong nga tawo magdala sang iya dulot nga sapat sa altar, ang hamot sini nagatub-ok sa atubangan sang Labing Mataas. Ang halad sang matarong nga tawo ginabaton; ang handumanan sini indi gid malimtan. Magmaalwan ka sa imo pagsimba sa Ginoo kag idulot ang nahauna nga mga bunga sang imo pinangabudlayan nga wala sing hawidhawid. Ihatag sing malipayon ang tanan mo nga mga dulot kag magkasadya ka sa paghalad sang imo ikanapulo. Maghatag ka sa Labing Mataas subong sang iya paghatag sa imo, kag subong kaalwan suno sa imo masarangan. Kay ang Ginoo nagabalos sing maayo pagabalusan ka sing pito ka pilo. Indi ka magdulot sa iya sing isa ka hamham, kay indi niya ini pagbatunon, kag indi ka magsalig sa indi matarong nga halad; kay ang Ginoo isa ka hukom nga wala sing pinilian.

Salmo sa Pagsabat:

Mga Salmo 50:5-6, 7-8, 14 kag 23

(S) Luwason ko gid ang tanan nga nagatuman sa akon.

Nagsiling sia, “Tipuna sa akon ang matutom ko nga mga tawo, ang mga naghimo sang kasugtanan sa akon paagi sa isa ka halad.” Ginapahayag sang kalangitan nga ang Dios matarong, nga sia gid amo ang hukom! (S)
Pamati kamo, mga tawo ko, kag magahambal ako, magasaksi ako batok sa imo, O Israel. Ako ang Dios, ang imo Dios. Wala ako nagasikway sa imo tungod sang mga halad kag sang mga halad nga sinunog nga imo pirme ginahalad sa akon. (S)
Ihalad sa Dios ang mga pagpasalamat, kag ihatag sa Makagagahom ang tanan nga mga dulot nga inyo ginsaad. Ang mga nagapasalamat amo ang halad nga nagapadungog sa akon, kag luwason ko gid ang tanan nga nagtuman sa akon. (S)

Aleluya:

Mateo 11:25

O Amay, Ginoo sang langit kag duta! Nagapasalamat ako sa imo tungod kay ginpahayag mo sa di-maalam, ang mga misteryo sang Ginharian. 

Ang Pagbasa sang Santos nga Ebanghelyo suno kay:

San Marcos 10:28-31

Dayon si Pedro nagsiling, “Tan-awa bala, ginbayaan namon ang tanan kag nagsunod kami sa imo.” Si Jesus nagsiling sa ila, “Huo matuod, kag tungod sini ginasiling ko sa inyo nga ang bisan sin-o nga nagabiya sang iya balay, ukon mga utod nga lalaki ukon babayi, ukon iloy, ukon amay, ukon mga kabataan, ukon mga kadutaan tungod sa akon kag sa Maayong Balita, magabaton sia sa sini nga panahon sing ginatos ka pilo: mga balay, mga utod nga lalaki ukon babayi, mga iloy, mga kabataan kag mga kadutaan, kag mga paghingabot man. Kag sa palaabuton nga panahon magabaton sia sang kabuhi nga dayon. Pero madamo nga mga nahauna karon nga mangin-ulihi, kag mga naulihi karon nga manginnahauna.”

Marso 4 | Marso 6