"Indi gani Ikaw Makakita sang Puling nga daw Tablon Kadaku sa imo Mata?"

Liturhiya sang Pulong

(Domingo, Marso 3, 2019)

1. Ang Pagbasa gikan sa Libro ni:

Sirac 27:4-7

Uyoga ang ayagan, kag ang sagbot mabilin; amo man ang sala sang isa ka tawo mapahayag kon maghambal sia. Ang horno nagatilaw sang obra sang maninihon amo man ang paghambalanay nagatilaw sang isa ka tawo. Subong nga ang bunga sang kahoy nagapahayag, sang talamnan sa diin ini nagtubo, amo man ang hambal sang tawo, nagapakita sang iya ginabatyag. Indi pagdayawa ang isa ka tawo tubtob mabatian mo sia nga nagahambal, kay amo ini ang pagtilaw sang mga tawo.

Salmo sa Pagsabat:

Mga Salmo 92:2-3, 13-14, 15-16

(S) Maayo ang magpasalamat sa imo, O Ginoo.

Daw ano kaayo ang magpasalamat sa Ginoo, sa pagkanta sing mga pagdayaw sa imo, O Dios nga Labing Mataas, sa pagbantala sang imo mapinadayunon nga gugma sa tagsa ka aga, kag sang imo katutom sa tagsa ka gab-i. (S)
Ang matarong magalambo subong sang mga palma, magatubo sila subong sang sedro sang Libano. Kaangay sila sang mga kahoy nga gintanom sa balay sang Ginoo, nga nagalambo sa Templo sang aton Dios. (S)
Nagapamunga pa sa iya katigulangon, kag sa gihapon malagtom kag mabakod. Nagapakita ini nga ang Ginoo matarong, wala sing sayup sa iya nga akon mangangapin. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:54-58

Gani kon ang pagkamamalatyon masukloban sang pagkadi-mamalatyon, kag kon ang mapatay pa masukloban sang indi na mapatay, ti, manginmatuod ang kasulatan nga nagasiling, “Ang Kamatayon gindaog na!” “O Kamatayon, Diin na bala ang imo pagdaog? O Kamatayon, Diin na bala Ang imo gahom sa pagsakit?” Ang gahom sang kamatayon sa pagsakit nagagikan sa sala, kag ang gahom sang sala nagagikan sa Kasugoan. Pero salamat sa Dios nga nagahatag sa aton sing pagdaog paagi sa kay Ginoong Jesu-Cristo! Gani, hinigugma ko nga mga utod, magmalig-on kamo nga indi malingkang. Magmapisan kamo sa inyo hilikuton para sa Ginoo, kay mahibaluan gid ninyo nga ang inyo pagpangabudlay para sa Ginoo may pulos gid.

Aleluya:

Filipos 2:15, 16

Magsiga kamo sa tunga nila subong sang mga bituon sa kalangitan, samtang ginatanyag ninyo sa ila ang pulong sang kabuhi.

Ang Pagbasa sang Santos nga Ebanghelyo suno kay:

San Lucas 6:39-45

Kag si Jesus naghatag sa ila sini nga palaanggiran: “Ang isa ka bulag indi makatuytoy sa isa man ka bulag, kon himuon niya ini, sila nga duha madagdag sa kanal. Wala sing eskuwela nga maglabaw pa sa iya maestro; pero kon matapos na ang iya kurso manginsubong na sia sang iya maestro. “Ngaa bala ginamulalongan mo ang diutay nga puling sa mata sang imo utod, pero wala mo ginasapak ang puling nga daw tablon kadaku sa imo kaugalingon nga mata? Paano ang pagkasiling mo sa imo utod, ‘Utod, ipakuha sa akon ang diutay nga puling sa imo mata,’ nga indi gani ikaw makakita sang puling nga daw tablon kadaku sa imo mata? Salimpapaw! Kuhaa anay ang puling nga daw tablon kadaku sa imo mata, kag dayon makakita ka kag makuha mo ang diutay nga puling sa mata sang imo utod.” “Ang maayo nga kahoy wala nagapamunga sing malain nga bunga, kag ang malain nga kahoy wala nagapamunga sing maayo nga bunga. Ang tagsa ka kahoy makilala mo sa iya bunga. Wala kamo nagapamupo sing higos sa talungon, kag wala man kamo nagapamupo sing ubas sa sapinit. Ang maayo nga tawo nagapagwa sang maayo nga mga butang nga yara sa iya tagipusoon, kag ang malain nga tawo nagapagwa sang malain nga mga butang nga yara sa iya tagipusoon. Kay kon ano ang sulod sang tagipusoon sang tawo amo man ina ang iya ginahambal.”

Marso 2 | Marso 4