"Kon ang imo Kamot kag Mata Manginkabangdanan sang imo Pagbiya sa Akon"

Liturhiya sang Pulong

(Huwebes, Pebrero 28, 2019)

Ang Pagbasa gikan sa Libro ni:

Sirac 5:1-8

Indi mo pag-ibug-os ang imo tagipusoon sa imo kuwarta, kag magsiling “Bastante na ako sini.” Indi pagpasundi ang tagsa ka balatyagon nga makahatag sa imo sing kabulosgan, kag indi magpasugot sa mga handom sang imo tagipusoon. Indi ka magsiling, "Sin-o pa bala ang makagahom sa akon?" Kay pat-od gid nga ang Ginoo magatimalos sa imo. Indi ka magsiling, "Nakasala ako, pero wala man ako maano;" tungod lamang ina kay tuman ka mapainulobon ang Ginoo. Indi ka magsalig nga patawaron ka kag magpagusto ka na lang sa pagpakasala. Indi ka magsiling, "Tama sia ka maluloy-on, patawaron niya ang akon mga sala, bisan tama kadamo.” Maluloy-on sia kag maakigon, kag ang mga makasasala makabatyag sang iya nagabalingaso nga kaakig. Magbalik ka gilayon sa Ginoo; indi ka magpabuyanboyan tubtob sa madason nga adlaw, basi ang kaakig sang Ginoo magtupa sing hinali sa imo, kag mapatay ka sa tion sang pagtimalos. Indi ka magsalig sa pagkabutang nga nakuha sa indi matarong nga paagi, kay indi ini mapuslan
sa adlaw sang kalalat-an.

Salmo sa Pagsabat:

Mga Salmo 1:1-2, 3, 4 kag 6

(S) Bulahan ang tawo nga nagasalig sa Ginoo.

Bulahan ang tawo nga nagasikway sang laygay sang mga malaut, nga wala nagasunod sa ginahimo sang mga makasasala, nga wala nagabuylog sa mga nagayaguta sa Dios. Sa baylo naluyag sia magbasa sang kasugoan sang Ginoo kag nagatuon sini sa adlaw kag gab-i. (S)

Kaangay sia sang kahoy nga nagatubo sa higad sang sapa, nagapamunga ini sa nagakaigo nga panahon, kag ang iya mga dahon wala nagakalaya. Matigayon niya ang tanan nga iya ginahimo! (S)

Indi kaangay sini ang mga malaut! Kaangay sila sang labhang nga ginpalid sang hangin. Ang Ginoo nagatuytoy kag nagaapin sang matarong nga mga tawo, pero ang mga malaut nagapadulong sa ila kalaglagan. (S)

Aleluya:

1 Tesalonica 2:13

Batuna ninyo ang pulong sang Dios, indi subong pulong sang tawo, kundi subong pulong sang Dios.

Ang Pagbasa sang Santos nga Ebanghelyo suno kay:

San Marcos 9:41-50

Dumdoma ninyo ini! Ang bisan sin-o nga nagapainom sa inyo sing tubig, tungod kay iya kamo ni Cristo magabaton gid sing balos.” “Ang bisan sin-o nga manginkabangdanan sang pagbiya sining magamay nga mga kabataan nga nagatuo sa akon, maayo pa nga ihigot ang galingan nga bato sa iya liog kag itagbong sia sa dagat. Gani, kon ang imo kamot manginkabangdanan sang imo pagbiya sa akon, utda ini! Maayo pa nga magsulod ka sa langit nga wala na ang isa mo ka kamot sang sa duha ang imo kamot kag itagbong ka sa impiyerno sa kalayo nga wala nagakapalong. Didto ‘ang ila ulod wala nagakapatay kag ang kalayo wala nagakapalong.’ Kag kon ang isa mo ka tiil manginkabangdanan sang imo pagbiya sa akon, utda ini! Maayo pa nga magsulod ka sa langit nga isa lang ang imo tiil sang sa duha ang imo tiil kag itagbong ka sa impiyerno. Didto ‘ang ila ulod wala nagakapatay kag ang kalayo wala nagakapalong.’ Kag kon ang imo mata manginkabangdanan sang imo pagbiya sa akon, lukata ini! Maayo pa nga magsulod ka sa Ginharian sang Dios nga isa lang ang imo mata sang sa duha ang imo mata kag itagbong ka sa impiyerno. Didto ‘ang ila ulod wala nagakapatay kag ang kalayo wala nagakapalong.’ “Kay ang tanan pagaasinan paagi sa kalayo. Ang asin maayo, pero kon madula ang iya kaarat paano ini mapaasin liwat? Asini ang inyo kaugalingon, kag magpakighidait kamo sa isa kag isa.”

Pebrero 27 | Marso 1