"Ang Magbaton sang Ginharian sang Dios subong sang Isa ka Bata"

Liturhiya sang Pulong

(Sabado, Marso 2, 2019)

Ang Pagbasa gikan sa Libro ni:

Sirac 17:1-15

Ang Ginoo nagahimo sang tawo gikan sa duta kag sa duta man ginapabalik. Ginpat-od niya ang kalawigon sang kabuhi sang mga tawo, kag ginhatagan sila sing gahom sa tanan nga mga butang sa duta. Ginpabayoan niya sila sing kusog kaangay sang iya kaugalingon, kag ginhimo niya sila kaangay sa iya. Ginbutang niya sa tanan nga mga tinuga ang pagkahadlok sa tawo, kag ginhimo sia nga agalon sangmga kasapatan kag mga kapispisan. Ginhatagan niya sila sing baba kag dila, mga mata kag mga dulonggan, kag ginhatagan niya sila sing tagipusoon nga mahinangpanon ginhatagan niya sila sing ihibalo kag paghangop kag ginpahayag sa ila ang maayo kag malain. Gin-iwagan niya ang ila mga tagipusoon, sa pagpakita sa ila sang pagkadaku sang iya mga binuhatan. Pagdayawon nila ang iya balaan nga ngalan, nga nagabantala sila sang pagkadaku sang iya mga binuhatan. Ginhatagan man niya sila sing ihibalo kag ginhatagan sila sing kasugoan sang kabuhi. Naghimo sia sing walay katapusan nga kasugtanan upod sa ila, kag ginpahayag sa ila ang iya mga sugo. Nakita nila ang iya mahimayaon nga pagkahari, nabatian nila ang himaya sang iya tingog. Ginsingganan niya sila, "Mag-andam kamo sa tanan nga buhat nga malain." Kag gintudloan niya ang tagsa ka tawo sang iya katungdanan sa iya isigkatawo. Ang ila ginahimo indi malipdan sa iya mga mata, indi gid matago sa iya panulok.

Salmo sa Pagsabat:

Mga Salmo 103: 13-14, 15-16, 17-18

(S) Ang gugma sang Ginoo sa mga nagapadungog sa iya wala sing katapusan.

Subong nga ang Amay maluloy-on sa iya mga kaanakan, amo man ang Ginoo maluloy-on sa nagatahod sa iya. Nakahibalo sia kon sa ano kita nahimo, ginadumdom niya nga kita yab-ok. (S)
Nahanungod sa tawo ang iya kabuhi kaangay sang hilamon, nagatubo kag nagalambo sia subong sang bulak sa latagon. Dayon ginahuyop ini sang hangin, kag mawala, kag wala na sing may makakita sa iya liwat. (S)

Ginahuyop ini sang hangin, kag mawala. (103:16)

Pero ang gugma sang Ginoo sa mga nagapadungog sa iya wala sing katapusan, kag ang iya kaayo nagapadayon, sa tanan nga mga kaliwatan, sa mga nagatuman sang iya kasugtanan. (S)

Aleluya:

Mateo 11:25

O Amay, Ginoo sang langit kag duta! Nagapasalamat ako sa imo tungod kay ginpahayag mo sa mga di-maalam ang mga misteryo sang ginharian.

Ang Pagbasa sang Santos nga Ebanghelyo suno kay:

San Marcos 10:13-16

May mga tawo nga nagdala sing mga bata sa kay Jesus agod iya sila matandog, pero ginsaway sang mga gintuton-an ang mga tawo nga nagdala sa ila. Sang matalupangdan ini ni Jesus, naakig sia kag nagsiling sa iya mga gintuton-an, “Pabay-i ninyo ang mga kabataan nga magpalapit sa akon, kag indi ninyo sila pagpunggi, kay ang Ginharian sang Dios iya sang mga kaangay nila. Dumdoma ninyo ini! Ang bisan sin-o nga indi magbaton sang Ginharian sang Dios subong sang isa ka bata indi gid makasulod sa amo nga Ginharian.” Dayon ginkugos ni Jesus ang mga kabataan, iya gintungtong ang iya mga kamot sa tagsatagsa sa ila, kag iya sila ginbendisyunan.

Marso 1 | Marso 3