"Sin-o ang Labing Daku sa Ginharian sang Dios"

Liturhiya sang Pulong

(Martes, Pebrero 26, 2019)

Ang Pagbasa gikan sa Libro ni:

Sirac 2:1-11

Anak ko, kon ikaw nagahandom sa pag-alagad sang Ginoo, ihanda ang imo kaugalingon sa pagtilaw. Magmanginsinsero ka, magpakalig-on, kag indi ka magpakulba kon mag-abot ang mga kalalat-an. Magdangop ka sa Dios, kag indi sia pagsikwaya, agod ikaw padunggan sa katapusan sang imo mga inadlaw. Bisan ano ang matabo sa imo, batona ini; kag magmapinasensyahon ka kon wala sing kasigurohan. Ang imo kubos nga kahimtangan, kay ang bulawan ginatilawan sa kalayo, kag ang Ginoo nagatilaw sang mga tawo paagi sa kalayo sang pagpaubos. Magsalig ka sa iya kag sia magabulig sa imo; sunda ang tadlong nga banas kag maglaom sa iya. Kamo nga nagatahod sa Ginoo, maghulat sang iya kaluoy; indi ka magpalayo, basi ikaw mapukan. Kamo nga nagatahod sa Ginoo, magsalig sa iya, kag indi niya kamo pagbalibaran sang inyo balos. Kamo nga nagatahod sa Ginoo, magpaabot sang maayo nga mga butang, subong sang walay katapusan nga kalipay kag kaluoy. Talupangda ang nagligad nga mga kaliwatan kag tan-awa: May yara bala nga nagsalig sa Ginoo nga napaslawan? May nagsalig bala sing malig-on sa iya kag iya ginpatumbayaan? Ukon may nagtawag bala sa iya kag wala niya ginsapak? Kay ang Ginoo mabinatyagon kag maluloy-on; nagapatawad sia sang mga sala, kag nagapangluwas sa adlaw sang kalisdanan.

Salmo sa Pagsabat:

Mga Salmo 37:3-4, 18-19, 27-28, 39-40

(S) Itugyan ang imo kaugalingon sa Ginoo, kay sia magabulig sa imo.

Magsalig ka sa Ginoo, kag maghimo sing maayo; magkabuhi ka sa duta kag indi ka maano. Pangitaa ang imo kalipay sa Ginoo, kag ihatag niya sa imo ang imo gid ginahandom. (S)

Ang Ginoo nagatatap sa mga nagatuman sa iya kag mangin-ila ang duta sa walay katubtoban. Indi sila magaantos sa tion sang kalalat-an, kag indi sila makulangan sa tion sang tiggulotom. (S)

Likawi ang malaut kag himoa ang maayo, kag magakabuhi ka sa duta sa walay katubtoban; kay ang Ginoo nagahigugma sang matarong, kag wala sia nagabiya sa iya matutom nga mga tawo. Iya sila ginaapinan sa gihapon, pero ang mga kaliwat sang malaut pagatabugon. (S)

Ang Ginoo nagaluwas sang matarong nga mga tawo, kag iya sila ginaapinan sa tion sang kagamo. Iya sila ginabuligan kag ginatabangan, ginaluwas niya sila sa mga malaut, kag nagadangop sila sa iya agod apinan. (S)

Aleluya:

Galacia 6:14

Ang akon lamang mapabugal amo ang krus sang Ginoo; tungod sa Iya, ang kalibutan patay para sa akon kag ako patay man para sa kalibutan.

Ang Pagbasa sang Santos nga Ebanghelyo suno kay:

San Marcos 9:30-37

Naghalin sila sa sadto nga lugar kag nagpadayon sa paglakat nga nagaagi sa Galilea. Indi luyag ni Jesus nga mahibaluan kon diin sia, kay nagapanudlo sia sa iya mga gintuton-an nga nagasiling, “Ang Anak sang Tawo igatugyan sa mga tawo nga magapatay sa iya, pero sa tapos ang tatlo ka adlaw, pagabanhawon sia.” Wala sila makahangop kon ano ang kahulogan sini, pero nahadlok sila sa pagpamangkot sa iya. Nag-abot sila sa Capernaum, kag sang nakasulod na si Jesus sa balay, nagpamangkot sia sa iya mga gintuton-an, “Ano bala ang ginbaisan ninyo sa dalanon?” Pero wala sila magsabat sa iya kay man ang ila ginbaisan amo kon sin-o sa ila ang labing daku. Naglingkod si Jesus kag gintawag niya ang dose ka mga apostoles kag nagsiling sa ila, “Kon sin-o ang luyag mangin-una sa tanan, dapat magpaulihi sa tanan kag manginsuloguon sang tanan.” Nagkuha sia sing isa ka bata kag ginpatindog sa atubangan nila. Ginkugos niya ini kag nagsiling sa ila, “Ang tawo nga nagabaton sang isa sining mga bata sa akon ngalan, nagabaton sa akon, kag ang nagabaton sa akon, wala lamang nagabaton sa akon, kundi nagabaton man sang nagpadala sa akon.”

Pebrero 25 | Pebrero 27