"Ginoo, Dugangi ang Amon Pagtuo!"

Liturhiya sang Pulong

(Domingo, Oktubre 6, 2019)

San Bruno, Pari

Ang Pagbasa gikan sa Libro ni:

Habacuc nga Propeta 1:2-3; 2:2-4

   O Ginoo, daw ano pa kadugay ang akon pagpanawag sa pagpangayo sing bulig kag mamati ka, kag magluwas sa amon gikan sa palugos? Ngaa ginapakita mo ako sini nga kagamo kag kalautan? Ang kalaglagan kag panglugos yara sa palibot ko, kag may inaway kag binaisay bisan diin.
   Amo ini ang ginsabat sang Ginoo sa akon: "Isulat sing maathag sa tapitapi nga lunang ang akon ipahayag sa imo, agod nga sa isa lang ka pagtan-aw mabasahan ini. Isulat ini, kay indi pa ini tion nga matuman ini. Pero ang tion magaabot sa indi madugay, kag ang ginapahayag ko sa imo matuman.
   Ayhan daw madugay ini mag-abot, pero hulata ini kay matuman gd ini, kag indi na ini magdugay. Kag amo ini ang mensahi: 'Ang malaut indi mabuhi, pero ang matarong magakabuhi kay matutom sila sa Dios.' "

Salmo sa Pagsabat:

Mga Salmo 95:1-2, 6-7, 8-9

(S) Kon karon nga adlaw mabatian ninyo ang tingog sang Ginoo, indi ninyo pagpatig-aha ang inyo mga tagipusoon.

Kari kamo, dayawon ta ang Ginoo! Magkanta kita sing malipayon sa aton mangangapin kag manlulowas! Magpalapit kita sa iya atubangan nga may pagpasalamat, kag magkanta sing masadya nga mga ambahanon sang pagdayaw! (S)
Kari kamo, magyaub kita kag magsimba sa iya; magluhod kita sa atubangan sang Ginoo nga aton Manunoga! Sia amo ang aton Dios, kag kita ang mga tawo nga iya ginaatipan, ang mga panong nga iya ginapahalab. Karon pamatii ninyo ang iya ginasiling. (S)
“Indi kamo magpakatig-a subong sang inyo mga katigulangan didto sa Meriba, subong sang didto sila sa desierto sa Masa. Didto gintilawan kag ginsulay  nila ako, bisan nakita na nila ang akon ginhimo para sa ila. (S)

2. Ang Pagbasa gikan sa Ikaduha nga Sulat ni San Pablo nga Apostol, sa kay:

Timoteo 1:6-8, 13-14

   Tungod sini ginpahanumdom ko ikaw sa pagpadabdab sang bugay nga ginhatag sang Dios sa imo, sang pagtungtong ko sang akon mga kamot sa imo ulo. Kay ang Espiritu nga ginhatag sang Dios sa aton wala nagapatalaw sa aton, kundi nagapuno sa aton sing gahom kag paghigugma kag pagpugong sang kaugalingon. Gani, indi ka magkahuya sa pagpanaksi tungod sa aton Ginoo, kag indi ka man magkahuya tungod sa akon nga binilanggo tungod sa iya. Sa baylo, magpakigbahin ka sa mga pag-antos tungod sang Maayong Balita, suno sa kusog nga ginahatag sang Dios sa imo para sini.
   Tumana ang akon maayo nga mga gintudlo sa imo subong imo sulondan, kag tipigi ang pagtuo kag paghigugma nga nangin-aton sa aton paghiusa kay Cristo Jesus. Tipigi ang maayo nga mga butang nga gintugyan sa imo paagi sa gahom sang Espiritu Santo nga nagapuyo sa aton. 

Aleluya:

1 Pedro 1:25

   Ang pulong sang Ginoo nagapadayon sa gihapon. Amo ini ang pulong nga gindala sa inyo sang Maayong Balita.

Ang Pagbasa sang Santos nga Ebanghelyo suno kay:

San Lucas 17:5-10

   Ang mga apostoles nagsiling sa Ginoo, “Dugangi ang amon pagtuo.” Ang Ginoo nagsabat, “Kon may pagtuo kamo subong ka daku sang binhi sang mostasa makasiling kamo sa sining kahoy nga sikomoro, ‘Gabuta ang imo mga gamot kag itanom ang imo kaugalingon sa dagat!’ kag magatuman ini sa inyo.”
   “Abi ang isa sa inyo may suloguon nga nagaarado ukon nagabantay sang mga karnero. Kon magpauli sia halin sa uma, nagasiling bala kamo sa iya, ‘Dali, kaon na’? Wala gid kamo nagasiling sini. Sa baylo, nagasiling kamo sa iya, ‘Ihanda ang akon panihapon, mag-ilis ka kag magsirbe sa akon samtang nagakaon kag nagainom ako. Magkaon kag mag-inom ka ugaling kon tapos na ako.’ Indi bala nga wala gid kamo sing pasalamatan sa suloguon kon ang ginahimo niya amo lamang ang ginasugo sa iya? Subong man ini sa inyo; sa tapos ninyo mahimo ang tanan nga ginsugo sa inyo, magsiling kamo, ‘Mga suloguon man lang kami. Gintuman lamang namon ang amon katungdanan.’ ” 

Oktubre 5 | Oktubre 7

"Ang Inyo Ngalan Nasulat sa Langit"

Liturhiya sang Pulong

(Sabado, Oktubre 6, 2018)

San Bruno, Pari

Ang Pagbasa gikan sa Libro ni:

Job 42:1-3, 5-6, 12-16

Dayon si Job nagsabat sa Ginoo. O Ginoo nakahibalo ako nga ikaw labi ka gamhanan, nga makahimo ka sang tanan nga luyag mo. Nagapamangkot ka kon ngaa nakapangahas ako sa pagpangduhadoha sa imo kaalam nga kon sa bagay ako kulang sa ihibalo. Naghambal ako sang mga butang nga wala ko mahangpi, nahanungod sang mga katingalahan nga labaw sa akon mahibaluan. Sang una ang nahibal-an ko lamang nahanungod sa imo amo ang ginsugid sang iban sa akon, pero karon nakita ko gid ikaw sang akon mga mata. Gani nahuya ako sang tanan nga ginhambal ko kag nagahinulsol ako nga nagapungko sa yab-ok kag sa abo. Ang Ginoo nagpabugana sang naulihi nga bahin sang kabuhi ni Job labaw pa sang iya pagpabugana sang una. Si Job may 14,000 ka mga karnero, 6,000 ka mga kamelyo, 2,000 ka mga baka, kag 1,000 ka mga asno. May pito sia ka mga anak nga lalaki kag tatlo ka mga anak nga babayi. Ang magulang gid ginhingalanan niya kay Jemima, ang ikaduha kay Kesia, kag ang kamanghuran kay Keren-Hapok. Wala na sing mga babayi sa bug-os nga kalibutan nga pareho katahom sang mga anak ni Job. Ang ila amay naghatag sa ila sang ila palanublion upod sa ila mga tuod nga lalaki. Sa tapos sini si Job nagkabuhi sing 140 pa ka tuig, kag nakakita pa sia sang iya mga apo kag mga apo sa tuhod.

Salmo sa Pagsabat:

Mga Salmo 119:66, 71, 75, 91, 125, 130

(S) Mag-upod ka sa akon, kag tudloi ako sang imo kasugoan. 
Hatagi man ako sing kaalam kag ihibalo, kay nagasalig ako sa imo mga sugo. (S)
Ang akon silot maayo para sa akon, kay ini nagtudlo sa akon sa pagtuon sang imo mga sugo. (S)
O Ginoo, nakahibalo ako nga ang imo mga pagsulondan matarong, kag ginsilutan mo ako kay ikaw matutom. (S)
Ang tanan nga mga butang nagapadayon, tubtob karon tungod sang imo sugo, kay ini tanan imo mga alagad. (S)
Alagad mo ako, gani hatagi ako sang paghangop, agod akon mahibaluan ang imo pagtulon-an. (S)
Ang kasaysayan sang imo mga pagtulon-an nagahatag sing kapawa, kag nagahatag sing kaalam sa mga wala sing tinun-an. (S)

Aleluya:

Mateo 11:25

Bulahan ikaw, O Amay, Ginoo sang langit kag duta kay ginpahayag mo sa mga di-maalam ang mga misteryo sang Ginharian.

Ang Pagbasa sang Santos nga Ebanghelyo suno kay:

San Lucas 10:17-24

Ang 72 nagbalik nga puno sang kalipay. Nagsiling sila, “Ginoo, bisan pa ang mga yawa nagtuman sa amon tungod sa imo ngalan!” Si Jesus nagsabat sa ila, “Nakita ko si Satanas nga nahulog subong sang kilat gikan sa langit. Pamatii ninyo ini! Ginhatag ko sa inyo ang gahom sa pagtapak sa mga man-og kag mga iwiiwi, kag sang tanan nga gahom sang Kaaway, kag wala sing bisan ano nga makahalit sa inyo. Pero indi kamo magkalipay tungod kay ang malaut nga mga espiritu nagatuman sa inyo, kundi magkalipay kamo kay ang inyo ngalan nasulat sa langit.” Sa amo nga takna si Jesus nga puno sing kalipay sang Espiritu Santo nagsiling, “O Amay, Ginoo sang langit kag duta, nagapasalamat ako sa imo kay ang imo gintago sa mga maalam kag may tinun-an imo ginpakita sa indi mga maalam. Huo, Amay, kay amo ini ang ginpakamaayo mo. “Gintugyan sa akon sang Amay ang tanan nga butang. Wala sing may nakakilala sa Anak luas sa Amay, kag wala sing may nakakilala sa Amay luas sa Anak kag sa mga luyag sang Anak ipahayag ang Amay.” Dayon si Jesus nag-atubang sa iya mga gintuton-an kag nagsiling sini sa ila lamang, “Bulahan kamo nga makakita sang mga butang nga inyo ginatan-aw. Nagasiling ako sa inyo nga madamo sang mga propeta kag mga hari ang naghandom sa pagtan-aw sang inyo ginatan-aw karon, pero indi sila makakita, kag sa pagpamati sa inyo ginapamatian, pero wala sila makabati.” 

Oktubre 5 | Oktubre 7