"Kari Kamo sa Akon kag Papahuwayon Ko Kamo"

Liturhiya sang Pulong

(Miyerkules, Disyembre 11, 2019)

San Damaso I, Santo Papa

Ang Pagbasa gikan sa Libro ni:

Isaias nga Propeta 40:25-31

   Sa kay sin-o bala mapaanggid

   Ang balaan nga Dios? 

   May isa bala nga kaangay sa iya? 

   Tangla ka sa langit! 

   Sin-o bala ang nagtuga 

   Sang mga bituon nga imo makita? 

   Sia nga nagapangulo sa ila 

   Kaangay sang hangaway; 

   Nahibaluan niya ang ila kadamuon, 

   Kag ginatawag niya sila tanan 

   Sa ila ngalan! 

   Ang iya gahom tama kadaku—

   Wala gid sing isa sa ila nga madula! 

   O Israel, ngaa karon nagareklamo ka 

   Nga ang Ginoo wala makahibalo 

   Sang imo mga kabudlayan, 

   Ukon nagakabalaka sa paghatag 

   Sa imo sang kalinong? 

   Wala ka bala makahibalo? 

   Wala ka bala makabati? 

   Ang Ginoo amo 

   Ang walay katubtoban nga Dios; 

   Gintuga niya ang bug-os nga kalibutan.

   Wala sia ginakapoy 

   Ukon ginaluyahan. 

   Wala sing may makatungkad 

   Sang iya mga hunahona. 

   Ginahatagan niya sing kusog 

   Ang mga maluya kag ginakapoy. 

   Bisan ang mga pamatan-on ginaluyahan; 

   Ang mga pamatan-on nga lalaki ginakapoy. 

   Pero ang mga nagasalig 

   Sa bulig sang Ginoo 

   Makaangkon sang bag-o nga kusog. 

   Magatimbuok sila kaangay sang mga agila; 

   Kon magdalagan sila, 

   Indi sila pagkapuyon; 

   Kon maglakat sila, 

   Indi sila pagluyahan. 

Salmo sa Pagsabat:

Mga Salmo 103:1-2, 3-4, 8 kag 10

(S) Dayawa ang Ginoo, O kalag ko.

Dayawa ang Ginoo, O kalag ko! Dayawa ang iya balaan nga ngalan, bug-os ko nga tagipusoon! Dayawa ang Ginoo, O kalag ko, kag indi pagkalimti kon daw ano ang iya kaayo. (S)

Ginapatawad niya ang tanan ko nga mga sala kag ginaayo niya ang tanan ko nga mga balatian; ginaluwas niya ako sa lulobngan kag ginalikupan niya ako sang gugma kag kaluoy. (S)

Ang Ginoo maluloy-on kag mahigugmaon, indi dali mangakig, kag puno sing mapinadayunon nga gugma. Ang iya silot kulang pa sang nagakabagay sa aton, ukon nagabalos sa aton tungod sang aton mga sala kag kasaypanan. (S)

Aleluya:

   Tan-awa! Ang Ginoo magaabot sa pagluwas sang iya banwa; bulahan ang mga nakahanda sa iya pagkari.

Ang Pagbasa sang Santos nga Ebanghelyo suno kay:

San Mateo 11:28-30

   “Kari kamo sa akon, tanan kamo nga ginabudlayan kag ginabug-atan, kag papahuwayon ko kamo. Itakod ang akon gota sa inyo kag magtuon kamo sa akon, kay ako malulo kag mapainuboson sing tagipusoon, kag makapahuway kamo. Ang akon gota mahapos, kag ang akon karga mamag-an.”

Disyembre 10 | Disyembre 12

Kugoson sang Dios sa Iya mga Butkon

Liturhiya sang Pulong

(Martes, Disyembre 11, 2018)

San Damaso I

Ang Pagbasa gikan sa Libro ni:

Isaias nga Propeta 40:1-11

Ang inyo Dios nagasiling, "Lipaya ang akon mga tawo, lipaya sila! Paisuga ang mga tawo sa Jerusalem. Singgana sila nga nag-antos sila sing malawig, kag ang ila mga sala ginpatawad na. Ginsilutan ko sila sing lubos tungod sang tanan nila nga mga sala." May isa ka tingog nga nagasinggit, "Mag-aman kamo sing dalan sa desierto para sa Ginoo! Hawani ang dalan sa desierto para sa aton Dios! Ang tagsa ka nalupyakan, pagatampukan, ang tagsa ka bukid pagatapanon. Ang mga kabakuloran manginkapatagan; ang mga kudolkudol pagatapanon. Dayon ang himaya sang Ginoo ipahayag, kag ang tanan nga mga tawo makakita sini. Ang Ginoo gid amo ang nagsaad sini." Ang isa ka tingog nagasinggit, "Ibantala!" Nagpamangkot ako, “Ano ang akon ibantala?" "Ipahibalo nga ang tanan nga mga tawo kaangay sang mga hilamon; indi sila maglawig pa sang sa mga bulak sa latagon. Ang mga hilamon nagakalaya kag ang mga bulak nagakalayong kon ang Ginoo magpadala sang hangin sa paghuyop sa ila. Kag ang mga tawo pareho man kaluya sang sa hilamon! Huo, ang mga hilamon nagakalaya kag ang mga bulak nagakalayong, pero ang pulong sang Dios nagapadayon!” O Jerusalem, taklad ka sa isa ka mataas nga bukid; ibantala ang maayong balita! O Sion, magsinggit ka sing tudo; ibantala ang maayong balita! Maghambal ka kag indi magkahadlok! Sugiri ang mga banwa sang Juda nga ang ila Dios nagapakari! Ang Ginoo magakari sa paghari nga may gahom, nga upod sa iya ang mga tawo nga iya ginluwas. Magaatipan sia sang iya panong kaangay sang isa ka manugbantay; tipunon niya sing tingob ang mga cordero, kag kugoson niya sila sa iya mga butkon; tuytuyan niya sing mahinay ang ila mga inang.

Salmo sa Pagsabat:

Mga Salmo 96:1-2, 3 kag 10, 11-12, 13

Magkanta kamo sing bag-o nga ambahanon sa Ginoo! Mag-amba kamo sa Ginoo, O bug-os nga duta! Magkanta kamo sa Ginoo, kag dayawa ninyo sia! Isugid adlaw-adlaw ang maayong balita nga sia nagluwas sa aton! Ibantala ang iya himaya sa mga kapungsoran, ang iya gamhanan nga mga binuhatan sa tanan nga katawuhan. Singgana ang tanan nga mga kapungsoran, “Ang Ginoo amo ang hari!” Ang duta napahamtang sing malig-on kag indi mauyog; sia magahukom sang tanan nga katawuhan sa katarungan.” Magkasadya kamo, O langit kag duta! Magadaguhob ka, O dagat, kag ang tanan nga mga tinuga nga yara sa imo; magkasadya kamo, O mga latagon, kag ang tagsa ka butang nga yara sa inyo! Dayon ang mga kahoy sa kagulangan magahinugyaw sa kasadya sa atubangan sang Ginoo, kay nagakari sia sa paggahom sang duta. Pagagamhan niya ang tanan nga katawuhan sang kalibutan sa katarungan kag kamatuoran.

Aleluya:
Malapit na ang adlaw sang Ginoo. Tan-awa! Magakari Sia sa pagluwas sa aton.

Ang Pagbasa sang Santos nga Ebanghelyo suno kay:

San Mateo 18:12-14

“Ano bala sa inyo? Ano bala ang himuon sang isa ka tawo nga may 100 nga mga karnero kag ang isa sa ila nadula? Bayaan niya ang 99 didto sa bakulod nga nagahalab kag iya pangitaon ang nadula nga karnero. Nagasiling ako sa inyo, kon iya makita ini, ang iya kalipay tungod sining isa labi pa sang iya kalipay sa 99 nga wala madula. Subong man ang inyo Amay sa langit indi luyag nga ang isa sining magamay nga mga kabataan madula.”

Disyembre 10 | Disyembre 12