"Kilalahon ang Tion sang Imo Pagkari"

Liturhiya sang Pulong

(Huwebes, Nobyembre 21, 2019)

Ang Paghalad sa Birhen Maria

Ang Pagbasa gikan sa Nahauna nga Libro sang mga:

Macabeo 2:15-29

   Ang mga opisyales nga gintugyanan sang hari sa pagpatuman sang pagbiya sa pagtuluohan nag-abot sa banwa sang Modein sa pagsugo sa ila sa paghalad. Madamo nga mga Israelinhon ang nagbuylog sa ila, pero si Matatias kag ang iya mga anak nga lalaki nagpalayo sa ila. Dayon ang mga opisyales nga salaligan sang hari naghambal sa kay Matatias, "Ikaw isa ka gamhanan nga pangulo kag ginataha sa sini nga banwa. May mga anak ikaw kag mga utod nga lalaki sa pagsakdag sa imo. Karon kari ka, kag mag-una sa pagtuman sang sugo sang hari subong sang ginhimo sang tanan nga mga pungsod, kag sang mga pangulo sang Juda kag sang mga nabilin nga buhi sa Jerusalem. Ikaw kag ang imo mga anak nga lalaki manginkatapo sang mga abyan sang hari. Hatagan kamo sing mataas nga kadungganan kag padyaan kamo sing madamo nga pilak kag bulawan kag iban pa nga mga regalo.”

   Pero si Matatias nagsabat sa mabaskog nga tingog, "Bisan ang tanan nga mga pungsod nga yara sa idalom sang gahom sang hari magtuman sa iya, nga ang tagsatagsa sa ila nagasikway sang pagtuluohan sang ila mga katigulangan kag nagatuman sa sugo sang hari, ako, kag ang akon mga anak nga lalaki kag mga utod nga lalaki sa gihapon magatuman sang kasugtanan sang amon mga katigulangan. Kabay nga ang Dios indi magtugot nga kami magsikway sang kasugoan kag sang mga sugo. Nahanungod sang sugo sang hari indi kami magtuman sini; indi kami magbiya sa amon pagtuluohan bisan diutay lang.”

   Sang makatapos sang hambal sia sini nga mga pulong, may isa ka Judio nga nagkadto sa atubangan sang tanan sa pagdulot sing halad sa altar sa Modein suno sa sugo sang hari. Sang makita sia ni Matatias, inugot-ugot gid sia; ang iya tagipusoon napuno gid sang kainit, kag ginpasundan niya ang iya kaakig, gindamhagan niya mg tawo kag ginpatay niya sia sa altar. Sadto mismo nga tion ginpatay man niya ang salaligan sang hari nga nagapatuman sa ila sa paghalad, kag ginguba niya ang altar. Sa iya kasidla sa kasugoan, ginhimo niya ang ginhimo ni Finees batok sa kay Simri, nga anak ni Salu. Dayon si Matatias naglibot sa banwa nga nagasinggit, “Ang tanan nga nagahigugma sang kasugoan kag nagatindog sa kasugtanan magsunod sa akon.” Dayon nagpalagyo sia sa kabukiran upod sa iya mga anak nga lalaki, kag ginbayaan nila ang tanan nga mga pagkabutang sa banwa. 

   Dayon madamo sang mga nagatinguha sa pagkabuhi suno sa kasugoan kag pagtuluohan ang nagkadto sa desierto kag didto nagpuyo.

Salmo sa Pagsabat:

Mga Salmo 50:1-2, 5-6, 14-15

(S) Luwason ko gid ang tanan nga nagatuman sa akon.

Ang makagagahom nga Dios, ang Ginoo, nagahambal, nagapanawag sia sa bug-os nga duta, halin sa sidlangan pa nakatundan. Ang Dios nagabanaag gikan sa Sion, ang siyudad nga himpit sa iya katahom. (S)

Nagasiling sia, “Tipona sa akon ang matutom ko nga mga tawo, ang mga naghimo sing kasugtanan sa akon paagi sa isa ka halad.” Ginapahayag sang kalangitan nga ang Dios matarong, nga sia gid amo ang hukom! (S)

Ihalad sa Dios ang mga pagpasalamat, kag ihatag sa Makagagahom ang tanan nga dulot nga inyo ginsaad. Tawga ako kon mag-abot ang kalisdanan; luwason ko ikaw, kag dayawon mo ako.” (S)

Aleluya:

Mga Salmo 95:8

   Karon, indi kamo magpakatig-a sang inyo tagipusoon, kundi pamatii ninyo ang pulong sang Ginoo.

Ang Pagbasa sang Santos nga Ebanghelyo suno kay:

San Lucas 19:41-44

   Sang malapit na gid si Jesus sa Jerusalem kag sang nakita niya ini, naghibi sia tungod sini nga siyudad. Nagsiling sia, “Kon nahibaluan mo lang kuntani karon nga adlaw kon ano ang kinahanglan agod may paghidait ka! Ugaling karon indi ka sini makakita. Magaabot ang adlaw nga ang imo mga kaaway magalibot sa imo sing mga trinsera, magakibon sa imo, kag magaatake sa imo sa atubangan, sa kilid kag sa likod. Laglagon ka nila lakip ang mga tawo sa sulod sang imo mga pader. Wala ka gid sing bato nga mabilin nga nagasampaw sa isa, tungod nga wala mo pagkilalaha ang tion sang pagkari sang Dios sa pagluwas sa imo!” 

Nobyembre 20 | Nobyembre 22

"Indi sila Luyag nga Ako Manginhari nila"

Liturhiya sang Pulong

(Mierkoles, Nobyembre 21, 2018)

Ang Paghalad sa Mahal nga Birhen Maria

Ang Pagbasa gikan sa Libro sang:

Bugna kay Juan 4:1-11

Sa tapos sini, may nakita ako nga isa pa gid ka palanan-awon, kag may nakita ako nga isa ka puwertahan nga naabrihan sa langit. Kag ang tingog nga daw tunog sang trumpeta nga akon man anay nabatian nga naghambal sa akon, nagsiling, “Saka ka diri kag ipakita ko sa imo ang tanan nga mahanabo sa tapos sini.” Sa gilayon gingamhan ako sang Espiritu. Didto sa langit may trono, kag sa sini nga trono may nagalingkod. Ang iya guya nagabadlak subong sang malahalon nga mga bato nga kaangay sang haspe kag kornalina, kag sa palibot sang trono may balangaw nga ang iya kolor esmeralda. Sa palibot sang trono, may 24 pa gid ka mga trono, nga ginalingkuran sang 24 ka mga katigulangan, nga nagabayu sing puti, kag may mga korona nga bulawan. Gikan sa trono, may nagakirab nga kilat, ginahod, kag dinaguob. May pito ka mga sulo nga nasindihan, nga nagasiga sa atubangan sang trono. Ini sila amo ang pito ka mga espiritu sang Dios. Sa atubangan sang trono, may yara nga daw salaming nga dagat nga matin-aw subong sang kristal. Sa palibot sang trono, sa tagsa ka kilid, may apat ka buhi nga mga tinuga nga daw pulos lang mga mata sa atubangan kag sa likod. Ang nahauna nga tinuga nga buhi daw leon, ang ikaduha daw tinday nga baka, ang ikatlo daw tawo ang iya guya, kag ang ikap-at daw agila nga nagalupad. Ang kadaisa sining apat ka mga tinuga nga buhi may anom ka mga pakpak, kag daw pulos lang sila mga mata, sa gwa kag sa sulod. Sa adlaw kag gab-i wala sila nagauntat sa pagkanta nga nagasiling: “Balaan, balaan, balaan, Ang Ginoong Dios nga Makagagahom, Nga amo anay, amo karon, Kag amo ang magakari.” Kon ang apat ka buhi nga mga tinuga magkanta sa paghimaya, sa pagpadungog, kag sa pagpasalamat sa nagalingkod sa trono, nga nagakabuhi sa wala sing katapusan, ang 24 ka mga katigulangan nagaluhod sa atubangan sang nagalingkod sa trono, kag nagasimba sa iya nga nagakabuhi sa wala sing katapusan. Ginabutang nila ang ila mga korona sa atubangan sang trono, kag nagasiling: “O Ginoo kag Dios namon! Takos ikaw sa pagbaton Sang himaya, kadungganan, kag gahom. Kay gintuga mo Ang tanan nga mga butang, Kag sa imo kabubot-on Gintuga mo sila Kag ginhatagan sing kabuhi.”

Salmo sa Pagsabat:

Mga Salmo 150:1-2, 3-4, 5-6

(S) Balaan, Balaan, Balaan, ang Ginoong Dios nga makagagahom!

Dayawa ninyo ang Ginoo! Dayawa ninyo ang Dios sa Iya Templo! Dayawa ninyo ang Iya kusog sa langit! Dayawa ninyo Sia tungod sang gamhanan nga mga buhat nga Iya ginhimo! Dayawa ninyo ang Iya indi matupongan nga pagkagamhanan! (S)
Dayawa ninyo sia sa mga trumpeta! Dayawa ninyo sia sa mga arpa kag mga lira! Dayawa ninyo sia sa mga bumbo kag sinaot! Dayawa ninyo sia sa mga arpa kag plawta! (S)
Dayawa ninyo Sia sa mga platilyos! Dayawa ninyo Sia sa matunog nga mga platilyos! Dayawa ninyo ang Ginoo, tanan kamo nga buhi nga mga tinuga! Dayawa ninyo ang Ginoo. (S)

Aleluya

Juan 15:16

Ako ang nagpili sa inyo, kag nagsugo sa inyo sa paglakat kag sa pagpamunga sing madamo, ang sahi sang bunga nga nagapadayon, siling sang Ginoo.

Ang Pagbasa sang Santos nga Ebanghelyo suno kay:

San Lucas 19:11-28

Sang nagapamati pa ang mga tawo nagsugid si Jesus sa ila sing isa ka palaanggiran kay malapit na sia sa Jerusalem, kag naghunahona sila nga ang Ginharian sang Dios manug-abot na. Gani nagsiling sia, “May isa ka dungganon nga tawo nga nagkadto sa malayo nga pungsod sa pagbaton sing isa ka ginharian kag dayon magapauli. Sa wala pa sia makalakat, gintawag niya ang iya napulo ka mga suloguon kag ginhatagan ang tagsatagsa sa ila sing P100 kag ginsingganan, ‘Patikanga ninyo ini tubtob nga mag-abot ako.’ Karon, ang iya mga kasimanwa nagdumot sa iya, gani nagpaapas sila sing mga tawo nga magasiling, ‘Indi kami luyag nga ini nga tawo maghari sa amon.’ “Ang dungganon nga tawo ginhimo nga hari kag nagbalik sia. Sa gilayon ginpatawag niya ang iya mga suloguon nga ginhatagan niya sing kuwarta, agod nga mahibaluan niya kon pila ang naganansya sang tagsatagsa sa ila. Ang nahauna nag-abot kag nagsiling, ‘Amoy, nakaganansya ako sing P1,000 sa P100 nga ginhatag mo sa akon.’ Nagsiling sia sa iya, ‘Maayo gid! Maayo ka nga suloguon! Tungod kay matutom ka sa diutay nga mga butang, magagahom ka sa napulo ka siyudad.’ Ang ikaduha nga suloguon nag-abot kag nagsiling, ‘Amoy, nakaganansya ako sing P500 sa P100 nga ginhatag mo sa akon.’ Nagsiling sia sa sini nga suloguon, ‘Magagahom ka sa lima ka siyudad.’ Ang isa pa ka suloguon nag-abot kag nagsiling, ‘Amoy, yari ang imo kuwarta. Gintago ko ini nga naputos sa panyo. Nahadlok ako sa imo kay maid-id ka nga tawo. Ginakuha mo ang indi imo, kag ginaani mo ang wala mo masab-og.’ Nagsiling sia sa iya, ‘Wala ka pulos nga suloguon! Ang imo mismo ginsiling amo ang magakondenar sa imo. Nakahibalo ikaw nga maid-id ako nga tawo, nga nagakuha sang indi akon kag nagaani sang wala ko masab-og. Ti, ngaa bala wala mo pag-ipatago sa bangko ang akon kuwarta? Kuntani sa akon pagbalik makuha ko ang akon kuwarta nga may saka na.’ Kag nagsiling sia sa mga nagatilindog didto, ‘Kuhaa ninyo sa iya ang kuwarta kag ihatag sa suloguon nga nakaganansya sing P1,000.’ Nagsiling sila sa iya, ‘Amoy, may P1,000 na sia!’ Nagsabat sia, ‘Nagasiling ako sa inyo nga ang may yara na, hatagan pa, pero ang wala iya, bisan ang diutay nga iya kuhaon pa. Karon, nahanungod sining akon mga kaaway nga indi luyag nga ako manginhari nila, dalha sila diri sa akon atubangan kag pamatya sila.’” Sa tapos makahambal sini si Jesus, nag-una sia sa ila pa Jerusalem. 

Nobyembre 20 | Nobyembre 22