"Ang Akon mga Karnero Nagapamati sa Akon Tingog"

Liturhiya sang Pulong

(Domingo, Mayo 12, 2019)

1. Ang Pagbasa gikan sa:

Binuhatan sang mga Apostoles 13:14, 43-52

   Halin sa Perge nagpadayon sila tubtob nga nakalambot sila sa Antioquia sa Pisidia, kag sang Adlaw nga Inugpahuway nagkadto sila sa sinagoga kag nagpungko didto.

   Sang makahalin na ang mga tawo, si Pablo kag si Bernabe ginsunod sang madamo nga mga Judio kag mga Gentil nga nakonbertir sa pagtuloohan sang mga Judio. Naghambal ang mga apostoles sa ila kag ginpaisog sila sa pagpadayon sa pagkabuhi sa grasya sang Dios.

   Sang madason nga Adlaw nga Inugpahuway halos ang tanan nga mga pumoluyo sang banwa nagtipon sa pagpamati sang pulong sang Ginoo. Sang makita sang mga Judio ang kadamuon sang mga tawo, nahisa gid sila kag naghambal sila batok sa mga ginpanghambal ni Pablo kag ginpakahuy-an nila sia. Pero nagdugang pa gani ang kaisog ni Pablo kag ni Bernabe sa paghambal kag nagsiling sila, “Kinahanglan gid man nga iwali sing una sa inyo ang pulong sang Dios. Pero tungod kay ginasikway ninyo ini, kag wala ninyo ginakilala nga takos kamo sa pagbaton sang kabuhi nga wala sing katapusan, bayaan namon kamo kag magkadto sa mga Gentil. Kay amo ini ang sugo nga ginhatag sang Ginoo sa amon: 

‘Ginbutang ko ikaw 

Nga manginkapawa sa mga Gentil, 

Nga mangin-alagyan sang kaluwasan 

Para sa bug-os nga kalibutan.’”

   Sang pagkabati sang mga Gentil sini nalipay sila kag gindayaw nila ang mensahi sang Ginoo, kag yadtong mga ginpili para sa kabuhi nga walay katapusan nangintumoluo.

Naglapnag ang pulong sang Dios sa sadto nga duog. Ugaling ginsudyot sang mga Judio ang kinilala nga mga tawo sa amo nga siyudad, kag subong man ang mga Gentil nga mga babayi sa mataas nga mga katipunan nga nagasimba sa Dios. Ginsugdan nila ang paghingabot kay Pablo kag kay Bernabe, kag gintabog nila sila pa gwa sa ila duta. Gintaktak sang mga apostoles ang yab-ok sa ila mga tiil batok sa ila, kag nagpadayon sila pa Iconio. Ang mga gintuton-an sa Antioquia napun-an sang kalipay kag sang Espiritu Santo.

Salmo sa Pagsabat:

Mga Salmo 100:1-2, 3, 5

(S) Banwa kita sang Dios kag panong niya kita. 

Magkanta nga may kalipay sa Ginoo, O bug-os nga kalibutan! Magsimba sa Ginoo sing masinadyahon; magpalapit sa iya atubangan nga may malipayon nga mga ambahanon! (S)
Indi pagkalimti nga ang Ginoo Dios! Ginhimo niya kita, kag iya kita; iya kita mga tawo kag iya kita mga karnero. (S)
Ang Ginoo maayo; ang iya gugma wala sing katapusan kag ang iya katutom nagapadayon sa tanan nga panahon. (S)

2. Ang Pagbasa gikan sa:

Bugna kay San Juan 7:9, 14-17

   Sa tapos sini nagtan-aw ako, kag may madamo nga mga tawo, nga wala sing isa nga sarang makaisip sa ila. Nagikan sila sa tagsa ka rasa, tribo, pungsod, kag linggwahe, kag nagtindog sila sa atubangan sang trono kag sang Cordero. Nagabayu sila sing puti kag malaba, kag may mga palma sila nga ginauyatan.

   Nagsabat ako, “Tiyoy, wala ako makahibalo. Ikaw ang nakahibalo.” 
   Nagsiling sia sa akon, “Amo ini ang mga tawo nga nakaluwas sa daku nga paghingabot. Ginlabhan nila ang ila mga bayu kag ginpaputi nila sa dugo sang Cordero. Gani nagatindog sila sa atubangan sang trono sang Dios kag nagaalagad sa iya sa adlaw kag sa gab-i sa iya templo. Ang nagalingkod sa trono magaapin sa ila sang iya presensya. Indi na gid sila paggutomon ukon pag-uhawon. Indi na sila masunog sang adlaw ukon sang kasingkal sang init. Kay ang Cordero, nga yara sa tunga sang trono, amo ang ila manugbantay, kag magatuytoy sa ila sa mga tuboran sang tubig nga buhi, kag ang Dios magapahid sang tagsa ka tulo sang luha sa ila mga mata.”

Aleluya:

Juan 10:14

Ang Ginoo nagasiling: “Ako amo ang maayo nga manugbantay, kag nakilala Ko ang Akon mga karnero, kag sila nakakilala sa Akon."

Ang Pagbasa sang Santos nga Ebanghelyo suno kay:

San Juan 10:27-30

   Ang akon mga karnero nagapamati sa akon tingog. Kilala ko sila kag nagasunod sila sa akon. Ginahatagan ko sila sang kabuhi nga wala sing katapusan, kag indi gid sila mapatay. Wala sing may makaagaw sa ila sa akon mga kamot. Ginhatag sila sa akon sang Amay nga gamhanan sa tanan, kag wala sing may makaagaw sa ila sa kamot sang Amay. Ako kag ang Amay isa.”

Mayo 11 | Mayo 13