JUAN - Kapitulo 2

1 2 3 4 5 6 7 8 9 10 11 12 13 14 15 16 17 18 19 20 21

 

Ang Kasal sa Cana

1 Sang makaligad ang duha ka adlaw, may ginhiwat nga kasal sa banwa sang Cana, sa Galilea. Ang iloy ni Jesus yadto didto,

2 kag si Jesus kag ang iya mga gintuton-an gin-agda man sa kasal.

3 Sang naurot na inom ang tanan nga bino, ang iloy ni Jesus nagsiling sa iya, "Naurotan sila sing bino."

4 Si Jesus nagsabat, "Ginang, indi na kinahanglan nga singganan mo pa ako kon ano ang akon himuon. Ang akon tion wala pa mag-abot."

5 Dayon, ang iloy ni Jesus nagsiling sa mga suloguon, "Himoa ninyo ang bisan ano nga isiling niya sa inyo."

6 Ang mga Judio may pagsulondan nahanungod sa pagpanghinaw, kag sa sini nga tinutoyo may anom didto ka mga tadyaw, ang tagsa ka tadyaw sarang masudlan sang apat ukon lima ka lata nga tubig.

7 Si Jesus nagsiling sa mga suloguon, "Pun-a ninyo sing tubig ang mga tadyaw." Ginpuno nila sing tubig ang mga tadyaw tubtob sa bibig,

8 kag dayon ginsingganan niya sila, "Karon, sandok kamo sa sinang tubig kag dalha sa manugdumala sang punsyon." Gindala nila ini sa manugdumala,

9 kag iya gindimdiman ang tubig nga nahimo nga bino. Wala sia makahibalo kon diin ini nga bino maghalin (pero nakahibalo iya ang mga suloguon nga nagsandok sang tubig.) Gani gintawag niya ang nobyo

10 kag ginsingganan, "Ang tanan nga mga tawo nagasirbe sang labing maayo nga bino una sa tanan kag kon tama na ang nainom sang mga dinapit, ginahatag nila ang ordinaryo nga bino. Pero ikaw iya nagasirbe sang labing maayo nga bino tubtob karon!"

11 Ini amo ang nahauna sang gamhanan nga mga buhat nga ginhimo ni Jesus sa Cana sang Galilea. Didto ginpahayag niya ang iya himaya, kag ang iya mga gintuton-an nagtuo sa iya.

12 Sa tapos sini si Jesus kag ang iya iloy, ang iya utod nga mga lalaki, kag mga gintuton-an nagpa-Capernaum, kag nagtenir sila didto sing pila ka adlaw.

Nagsulod si Jesus sa Templo

13 Nagahilapit na ang Piesta sang Pascua sang mga Judio, gani si Jesus nagpa-Jerusalem.

14 May nakita sia nga mga tawo didto sa templo nga nagabaligya sang mga baka, mga karnero, kag mga pating, kag ang mga manugbaylo man sang kuwarta nga yara sa ila mga lamisa.

15 Naghimo si Jesus sang inughanot nga lubid kag iya ginpanabog ang tanan nga mga sapat pa gwa sa templo, ang mga karnero kag mga baka. Ginpamaliskad niya ang mga lamisa sang mga manugbaylo sang kuwarta, kag ginwas-ag niya ang ila mga kuwarta;

16 kag ginmanduan niya ang mga manugbaligya sang pating, "Kuhaa ninyo ina diri! Indi ninyo paghimoa nga balaligyaan ang balay sang akon Amay!"

17 Nadumdoman sang iya mga gintuton-an nga ang kasulatan nagasiling, "Ang akon kabalaka sa imo balay, O Dios, nagadabdab sa sulod nakon subong sang kalayo."

18 Ang mga pangulo sang mga Judio nagpamangkot sa iya, "Anobala nga milagro ang imo mahimo sa pagpakita sa amon nga may katarungan ka sa paghimo sini?"

19 Si Jesus nagsabat, "Gub-a ninyo ining templo sang Dios kag sa sulod sang tatlo ka adlaw patindugon ko ini liwat."

20 Namangkot sila sa iya, "Ini nga templo ginpatindog sa sulod sang 46 ka tuig, kag patindugon mo bala ini sa sulod sang tatlo lamang ka adlaw?"

21 Pero ang templo nga ginsiling ni Jesus amo ang iya lawas.

22 Gani sang nabanhaw sia, nadumdoman sang iya mga gintuton-an nga ginhambal niya ini, kag nagtuo sila sa kasulatan kag sa mga pulong nga ginhambal ni Jesus.

Nakilala ni Jesus ang Tanan nga mga Tawo

23 Sang didto si Jesus sa Jerusalem sa Piesta sang Pascua, madamo ang mga nagtuo sa iya sang makita nila ang gamhanan nga mga buhat nga ginhimo niya.

24 Pero si Jesus wala magsalig sang iya kaugalingon sa ila, tungod kay nakilala gid niya sing maayo ang tanan nga mga tawo.

25 Wala na sing kinahanglan nga sugiran sia nahanungod sang mga tawo, kay nahibaluan gid niya kon ano ang yara sa ila mga tagipusuon.

JUAN - Kapitulo 1 <<< >>> JUAN - Kapitulo 3