Ikaduha nga Estasyon - Ang Pangamuyo sa Getsemane

Ikaduha nga Estasyon

Ang Pangamuyo sa Getsemane

V.              Nagasimba kag nagadayaw kami sa lmo, O Jesus

R.              Kay bangod sang Imo Krus gintubos Mo ang kalibutan

Subong sang masami nga ginahimo niya, si Jesus nagkadto sa bukid sang mga Olivo, kag ang iya mga gintuton-an nag-upod sa iya. Sang pag-abot niya didto nagsiling sia sa ila, “Pangamuyo kamo agod indi kamo madaog sang panulay.” Dayon nagpalayo sia sa ila sa antad nga sarang malambot kon habuyan sing bato, kag nagluhod sia kag nagpangamuyo. Siling niya, “O amay, kon buot mo, ilikaw ining kupa sa akon. Pero indi ang akon kabubot-on, kundi ang imo kabubot-on ang tumanon.” May isa ka anghel gikan sa langit nga nagpakita sa iya kag nagpabakod sa iya. Sa daku nga kalisod nagpangamuyo sia sing hugot pa gid. Ang iya mga balhas daw dalagku nga tinulo sang dugo nga nagatupa sa duta. Sa tapos si Jesus makapangamuyo nagbalik sia sa mga gintuton-an kag nakita niya nga nagakatulog sila tungod kay linapyo sila sang tama gid nga pagpangasubo. (Lc. 22:39-45)

Pangamuyo

Malawig kag makangilidlis ang gab-i sadto, O Ginoo. Kag wala sang bisan isa sa lmo gintuton-an ang may kabakod sa pagpabilin upod sa imo nga agonia. Ang lmo lamang kusog amo ang imo determinasyon sa pagtuman sang binubuot sang Imo Amay bisan anano pa ang katumbas." Kag ang imo isahanon nga agonia nagapadayon kutob sining panahon, yara sa kasubo sang mga katawhan nga wala sing abyan, wala sing puloy-an, wala sing paglaum, wala sing buas-damlag... Ang amon sosyedad na puno sang kasubong nga katawhan apang nagapakuno-kuno lang kami subong nga wala sing nakita kag nagakatulog kami samtang sila nagakalamatay, ang mga biktima sang pagpatumbaya.

Lider: Amay namon nga yara ka sa langit

Pagdayawon ang Imong ngalan

Umabot sa amon ang Imong ginharian

Matuman ang Imo pagbuot diri sa duta siling sang sa langit.

 Tanan: Hatagan mo kami niyan sing kan-on namon sa matag-adlaw

Kag patawaron mo kami sang mga sala namon

Siling nga ginapatawad namon ang mga nakasala sa amon

Kag dili mo kami ipadaog sa panulay

Hinonoo luwason mo kami sa kalaut. Amen.

Lider: Maghimaya ka Maria

puno ka sing grasya

ang Ginoo yara sa imo

dayawon ka labi sa mga babaye nga tanan

kag dayawon man ang bunga sang imo tiyan nga si Jesus.

Tanan: Santa Maria Iloy sang Dios

ig-ampo mo kami nga makasasala

niyan kag sa oras sang amon ikamatay. Amen.

Lider: Himaya sa Amay, sa Anak kag sa Espiritu Santo.

Tanan: Subong sang ginsugoran

sa karon, sa gihapon, sa tuig sa mga katuigan. Kabay pa.

V. Ginoo, nakasala kami kag nagahinulsol kami,

R. Malooy ka sa amon.

Sa tion sang pangamuyo

Pagbatunon ang buot mo

Kinahanglan sang tanan

Gapadayon ka Ginoo

Sa pag-ampo sa Amay Mo

Tanduga kami Jesus.

DIYOS NAMON SANG KALUOY

 1. Dios namon sang kalooy, Ikaw ang amon nga Amay

Magbubuhat, manunubos kag Ginoo sang mga tanan.

Koro: Jesus, malooy ka sa amon

Patawaron mo kami

Ang sala ginadumtan namon

Dili na magliwat kami

2. Namatay si Jesukristo, Didto sa kalbaryo

Agud kita pamawi-on sa daku nga kasubo.

Nahauna nga Estasyon <<   >> Ikatatlo nga Estasyon