Pebrero 28, 2021, Ika-2 nga Domingo sang Kwaresma

Liturhiya sang Pulong

Nahauna nga Balasahon - Genesis 22:1-2, 9A, 10-13, 15-18

Salmo sa Pagsabat - Mga Salmo 116:10, 15, 16-17, 18-19

Ika-2 nga Balasahon - Roma 8:31B-34

Sa Wala pa ang Ebanghelyo - Mateo 17:5

Ebanghelyo - Marcos 9:2-10

1. Ang Pagbasa gikan sa Libro sang:

Genesis 22:1-2, 9A, 10-13, 15-18

Sang ulihi ang Dios nagtilaw kay Abraham. Gintawag niya sia, “Abraham!” Si Abraham nagsabat, “Yari ako. Nagapamati akosa imo.”

Ang Dios nagsiling, “Dalha ang imo anak, ang imo bugtong nga anak nga si Isaac nga imo gid ginapalangga, kag magkadto ka sa duta sang Moria. Didto ihalad mo sia subong halad nga sinunog sa bukid nga akon itudlo sa imo.”

Sang makaabot sila sa duog nga ginsiling sang Dios, si Abraham naghimo sing altar, kag ginbangdaybangday niya ang mga gatong sa ibabaw sini. Dayon ginkuha niya ang sundang sa pagpatay sa iya. Pero ang anghel sang Ginoo nagpanawag sa iya gikan sa langit, “Abraham, Abraham!” Nagsabat sia, “Yari ako.”

Nagsiling sia, “Indi pagpatup-i ukon pag-anha ang bata. Karon nahibal-an ko na nga nagatuman ka sa Dios, kay wala mo pag-idumili sa akon ang imo bugtong nga anak.” Si Abraham nagpanghulonghulong kag nakita niya ang isa ka lalaki nga karnero nga ang iya mga sungay nagsangit sa mga kasiutan kag indi na makahalin. Ginkuha niya ini kag ginhalad subong halad nga sinunog sa baylo sang iya anak.

Ang anghel sang Ginoo nagtawag liwat kay Abraham gikan sa langit, “Amo ini ang ginasiling sang Ginoo: Nagasumpa ako sa akon ngalan nga hatagan ko ikaw sing madamo nga mga kaayuhan, kay ginhimo mo ini kag wala mo gindumili ang imo anak sa akon. Nagasaad ako nga hatagan ko ikaw singmadamo nga mga kaliwat subong kadamo sang mga bituon sa langit kag mga balas sa baybay. Ang imo mga kaliwat magadaog sang ila mga kaaway. Kag ang tanan nga mga pungsodsa kalibutan magapangayo nga bendisyunan ko sila subong sang pagbendisyon ko sa imo mga kaliwat,tungod kay nagtuman ka sang akon sugo.”

Salmo sa Pagsabat:

Mga Salmo 116:10, 15, 16-17, 18-19

(S) Magalakat ako sa atubangan sang Ginoo sa kadutaan sang mga buhi.

Nagpadayon ako sa pagtuo, bisan nga nagsiling ako, “Daku gid ang pag-antos ko.” (S)

Daw ano kasakit para sa Ginoo kon ang isa sang iya mga tawo mapatay! (S)

Alagad mo ako, O Ginoo; ginaalagad ko ikaw, subong sang ginhimo sang akon iloy. Ginhilway mo ako. Magadulot ako sa imo sang halad sang pagpasalamat, kag magapangamuyo ako sa imo. (S)

Sa pagtilipon sang tanan mo nga mga tawo, sa sulod sang imo Templo sa Jerusalem, ihatag ko sa imo ang akon ginsaad. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 8:31B-34

Mga utod: Kon ang Dios nagaapin sa aton, sin-o bala ang makapamatok sa aton? Wala niya gani ginpaiway ang iya Anak, kundi nga iya ginhalad para sa aton tanan! Kon ginhatag niya sa aton ang iya Anak, indi bala nga ihatag man niya sa aton sing maalwan ang tanan nga mga butang? Sin-o bala ang magasumbong sang pinili sang Dios? Ang Dios gid nagapahayag nga wala sila sing sala! May makakondenar bala sa ila? Si Cristo Jesus amo ang nagpakamatay, huo, sia amo ang ginbanhaw kag karon yara sa tuo sang Dios. Sia amo ang nagapakiluoy sa Dios para sa aton! 

Sa wala pa ang Ebanghelyo:

San Mateo 17:5

   Gikan sa panganod, nabatian ang tingog sang Amay: "Amo ini ang akon gid hinigugma nga anak, pamatii ninyo sia!"

Ang Pagbasa sang Santos nga Ebanghelyo suno kay:

San Marcos 9:2-10

   Sang makaligad ang anom ka adlaw, gindala ni Jesus si Pedro, si Santiago, kag si Juan upod sa iya sa isa ka mataas nga bukid nga silahanon lang. Samtang nagatan-aw sila, nagbalhin ang dagway ni Jesus, kag ang iya mga bayu nagmasilaw kag nagmaputi. Wala sing bisan sin-o sa kalibutan nga makapaputi sang bayu kaangay sini. Dayon nakita sang tatlo ka gintuton-an si Elias kag si Moises nga nagapakighambal sa kay Jesus. Si Pedro naghambal kag nagsiling kay Jesus, “Manunodlo, maayo gid nga yari kita diri. Mahimo kami sing tatlo ka tolda, isa para sa imo, isa para kay Moises, kag ang isa para kay Elias.” Si Pedro kag ang iya mga kaupdanan kinulbaan gid sa bagay nga wala na sia makahibalo kon ano ang iya isiling. Nagpakita ang isa ka panganod kag ginlandungan sila. Dayon may tingog nga nabatian gikan sa panganod, “Ini amo ang akon gid hinigugma nga Anak. Pamatii ninyo sia!” Sa gilayon nanghulonghulong sila, pero wala sila sing iban nga nakita luas lamang kay Jesus. Sang nagadulhog sila sa bukid si Jesus nagmando sa ila, “Indi kamo magpanugid bisan kay sin-o sang inyo nakit-an, tubtob nga mabanhaw ang Anak sang Tawo.” Gintuman nila ang ginsiling ni Jesus, pero sang silahanon lang nagpinamangkutanay sila, “Ano ang kahulogan sining ‘mabanhaw sia’?”

Pebrero 27 | Marso 1

Pebrero 27, 2021, Sabado, Nahauna nga Semana sang Kwaresma

Liturhiya sang Pulong

Nahauna nga Balasahon - Deuteronomio 26:16-19

Salmo sa Pagsabat - Mga Salmo 119:1-2, 4-5, 7-8

Sa Wala pa ang Ebanghelyo - 2 Corinto 6:2

Ebanghelyo - Mateo 5:43-48

Ang Pagbasa gikan sa Libro sang:

Deuteronomio 26:16-19

   Naghambal si Moises sa banwa sing subong sini: “Karon nga adlaw ang Ginoo nga inyo Dios nagamando sa inyo sa pagtumansang tanan niya nga mga kasugoan. Gani tumana ini sing matutom sainyo bug-os nga tagipusoon kag kalag. Karon nga adlaw ginkilalaninyoang Ginoo nga inyo Dios. Nagsaad kamo sa pagtumansa iya, sa pagbantay sang iya mga kasugoan kag sa paghimo sang tanan niya nga mga ginasugo. Karon nga adlaw ang Ginoonagbaton sa inyo subongiya kaugalingon nga mga tawo, suno sa iya ginsaad sa inyo. Ginsugo niya kamo sa pagtuman sang tanan niya nga mga kasugoan. Himuon niya kamo nga labi ka gamhanan sang sa iban nga pungsod nga iya gintuga.Mangin-iyakamo balaan nga mga tawo suno sa iya ginsaad, kag kamo magahatag singpagdayaw kag kadungganan sa iya ngalan.”

Salmo sa Pagsabat:

Mga Salmo 119:1-2, 4-5, 7-8

(S) Bulahan ang mga nagatuman sang kasugoan sang Ginoo.

Bulahan ang mga wala sing dagta sa ila kabuhi, nga nagakabuhi suno sa kasugoan sang Ginoo. Bulahan sila nga nagasunod sang iya mga sugo, nga nagatuman sa iya sa bug-os nila nga tagipusoon. (S)

O Ginoo, ginhatag mo sa amon ang imo mga kasugoan, kag nagsugo sa amon sa pagtuman sini sing matutom. Daku gid ang akon handom nga mangin matutom ako sa pagtuman sang imo mga pagsulondan! (S)

Sa akon pagtuon sang imo matarong nga mga pagsulondan, magadayaw ako sa imo sa putli nga tagipusoon. Magatuman ako sang imo mga kasugoan; indi gid ako pagptummbayai! (S)

Sa wala pa ang Ebanghelyo:

2 Taga-Corinto 6:2

   Amo ini ang nahamut-an nga tion; karon amo ang adlaw sang kaluwasan.

Ang Pagbasa sang Santos nga Ebanghelyo suno kay:

San Mateo 5:43-48

   Si Jesus nagsiling sa iya mga gintuton-an: “Inyo man nabatian ang ginsiling, ‘Higugmaa ang imo mga abyan, kag dumti ang imo mga kaaway.’ Pero karon nagasiling ako sa inyo: higugmaa ang inyo mga kaaway, kag magpangamuyo kamo para sa mga nagahingabot sa inyo, agod mangin-anak kamo sang inyo Amay nga yara sa langit. Kay wala sing kapin kag kulang ang pagpasilak niya sang iya adlaw sa mga malain kag mga maayo, kag pareho man lang ang iya paghatag sing ulan sa mga matarong kag di-matarong. Ti ngaa gid abi nga ang Dios maghatag sa inyo sing balos kon ang inyo ginahigugma amo man lang ang mga tawo nga nagahigugma sa inyo? Bisan ang mga manugsokot sang buhis nagahimo man sina! Kag kon ang ginabugno ninyo ang inyo man lang mga amigo, pinasahi gid bala ina? Bisan ang mga pagano nagahimo man sina! 

   Gani, magmanginhimpit kamo, subong nga ang inyo Amay sa langit himpit.”

Pebrero 26 | Pebrero 28

Pebrero 26, 2021, Biyernes, Nahauna nga Semana sang Kwaresma

 Liturhiya sang Pulong

Nahauna nga Balasahon - Ezequiel 18:21-28

Salmo sa Pagsabat - Mga Salmo 130:1-2, 3-4, 5-7, 7-8

Sa Wala pa ang Ebanghelyo - Ezequiel 18:31

Ebanghelyo - Mateo 5:20-26

Ang Pagbasa gikan sa Libro ni:

Ezequiel nga Propeta 18:21-28

   Ang Ginoong Dios nagsiling: “Kon ang malaut nga tawo mag-untat sa pagpakasala kag magtuman sang akon mga sugo, kon maghimo sia sang matarong kag maayo, indi sia mapatay, kundi magakabuhi gid sia. Ang tanan niya nga mga sala patawaron kag magakabuhi sia, tungod kay ginhimo niya ang matarong. Nagahunahona bala kamo nga nalipay ako magtan-aw nga mapatay ang isa ka malaut nga tawo? Indi, kundi luyag ko nga maghinulsol sia kag magkabuhi. 

   “Pero kon ang isa ka matarong nga tawo mag-untat sa paghimo sing maayo kag maghimo sang tanan nga kalautan kag makahuloya nga mga butang nga ginahimo sang malaut nga mga tawo, magapadayon bala sia sa pagkabuhi? Indi! Ang tanan niya nga hinimuan nga maayo indi na pagdumdomon. Mapatay sia tungod sang pagbiya niya sang iya pagtuo kag tungod sang iya mga sala. 

   “Pero nagasiling kamo, ‘Indi husto ang ginahimo sang Ginoo.’ Pamati kamo, mga Israelinhon. Nagahunahona bala kamo nga indi husto ang akon ginahimo? Kamo ang nagahimo sang indi husto. Kon ang matarong nga tawo mag-untat sa paghimo sing maayo, kag maghimo sing malain kag mapatay, tungod sang iya ginhimo nga malaut mapatay sia. Kon ang malaut nga tawo mag-untat sa pagpakasala kag maghimo sing matarong kag maayo, maluwas niya ang iya kabuhi. Kon matalupangdan niya ang iya ginahimo kag mag-untat sia sa pagpakasala, indi sia mapatay, kundi magakabuhi.

Salmo sa Pagsabat:

Mga Salmo 130:1-2, 3-4, 5-7, 7-8

(S) Kon imo tandaan ang mga kasal-anan, Ginoo, O Ginoo, sin-o bala ang makaluwas?

Nadulaan ako sing paglaum, gani nagapanawag ako sa imo, O Ginoo. Pamatii ang akon pagpanawag, O Ginoo, talupangda ang akon pagpangayo sing bulig! (S)

Kon ginalista mo ang amon mga sala, sin-o bala ang makalikaw sang pagsilot? Pero ikaw nagapatawad sa amon, agod nga magtahod kami sa imo. (S)

Nagapaabot ako sa Ginoo, nga may labi pa nga kalangkag sang sa pagpaabot sang mga manugbantay sang kaagahon. (S)

O Israel, magsalig ka sa Ginoo, kay ang iya gugma nagapadayon, kag handa sia magluwas sa gihapon. Luwason niya ang iya mga tawo nga Israel sa tanan nila nga mga sala. (S)

Sa wala pa ang Ebanghelyo:

Ezequiel nga Propeta 18:31

   Untati ang tanan nga kalautan nga inyo ginahimo, siling sang Ginoo, kag bag-uha ang inyo mga hunahona kag ang inyo tagipusoon.

Ang Pagbasa sang Santos nga Ebanghelyo suno kay:

San Mateo 5:20-26

   Si Jesus nagsiling sa iya mga gintuton-an: Gani ginasingganan ko kamo, nga sarang lang kamo makasulod sa Ginharian sang langit kon ang inyo katutom sa pagtuman sang ginapaabot sang Dios sa inyo maglabaw sa katutom sang mga manunodlo sang Kasugoan kag sang mga Fariseo.” 

   “Inyo nabatian ang ginsiling sang una sa inyo mga katigulangan, ‘Indi ka magpatay sang tawo. Ang bisan sin-o nga makapatay pagadalhon sa hukmanan.’ Pero karon nagasiling ako sa inyo nga ang bisan sin-o nga nagakaakig sa iya utod, pagadalhon sa hukmanan; kag ang bisan sin-o nga nagapakalain sa iya utod, sa pagsiling sa iya, ‘Hoy, waay ka pulos!’ pagadalhon sa Pinakamataas nga Hukmanan; kag ang bisan sin-o nga nagasiling sa iya utod, ‘Hoy, buang!’ may katalagman nga magpaimpiyerno. Gani kon nagadala ikaw sang imo dulot sa Dios kag madumdoman mo nga ang imo utod may aligutgot sa imo, bayai anay ang imo dulot sa atubangan sang altar kag magpakighusay sa imo utod, kag ugaling magbalik ka kag maghalad sang imo dulot sa Dios. 

   “Kon may tawo nga magsumbong sa imo sa hukmanan, magpakighusay ka sa iya samtang may tion pa kag wala pa kamo makakadto sa hukmanan, kay kon didto na kamo, iya ikaw itugyan sa hukom kag ang hukom magatugyan sa imo sa gwardya, kag isulod ka sa bilangguan. Nagasiling ako sa imo, magapabilin ka didto tubtob mabayaran mo ang tanan mo nga multa.”

Pebrero 25 | Pebrero 27

Pebrero 25, 2021, Huwebes, Nahauna nga Semana sang Kwaresma

Liturhiya sang Pulong

Nahauna nga Balasahon - Ester (Griego) 4c:12, 14-16, 23-25

Salmo sa Pagsabat - Mga Salmo 138:1-2, 2-3, 7-8

Sa Wala pa ang Ebanghelyo - Mga Salmo 51:12, 14

Ebanghelyo - Mateo 7:7-12

Ang Pagbasa gikan sa Libro ni:

Ester (Griego) 4c:12, 14-16, 23-25

   Sa daku nga pagkalisod, nagpangamuyo si Ester sa Ginoo. Nagpangamuyo sia sa Ginoong Dios sang Israel, "Ginoo ko kag hari, ikaw lamang ang Dios. Nagaisahanon ako kag wala ako sing sarang dangpan. Buligi ako! Sa karon nga ginataya ko ang akon kabuhi. O Ginoo, sa nadumdoman ko pa, gintudloan ako halin sang bata pa ako nga ginpili mo si Israel gikan sa tanan nga mga kapungsoran kag ang amon katigulangan nangin-imo pinili nga banwa sa wala sing katapusan. Gintuman mo sa ila ang tanan mo nga mga saad. 

   "Dumduma kami, O Ginoo. Kari ka sa amon sa sining tinion sang kagamo. O hari sang tanan nga mga dios kag manuggahom sang tanan nga umalagi nga gahom, hatagi ako sing kaisog. Hatagi ako sang nagakaigo nga mga tinaga nga igahambal ko sa sinang mabangis nga leon nga si Haring Asuero. Bayluhi ang iya balatyagon agod nga dumtan niya si Haman nga amon kaaway kag ang tanan nga nagadampig sa iya. Kari ka, O Ginoo, sa pagluwas sa amon kag tabangi ako. Nagaisahanon ako kag wala ako sing sarang dangpan luwas lamang sa imo.

Salmo sa Pagsabat:

Mga Salmo 138:1-2, 2-3, 7-8

(S) O Ginoo, sabta ako sa adlaw nga magapanawag ako sa imo.

Nagapasalamat ako sa imo, O Ginoo, sa bug-os ko nga tagipusoon; nagakanta ako sing pagdayaw sa imo sa atubangan sang mga dios. Nagasimba ako sa atubangan sang imo balaan nga Templo. (S)

Nagadayaw sang imo ngalan tungod sang imo mapinadayunon nga gugma kag katutom, kay nagpahayag ka nga ikaw kag ang imo mga sugo labaw sa tanan. Ginsabat mo ako sang nagpanawag ako sa imo; ginpabakod mo ako sang imo kusog. (S)

Ginaluwas mo ako paagi sa imo gahom. Tumanon mo ang tanan nga imo ginsaad sa akon, O Ginoo, ang imo gugma nagapadayon sa walay katapusan. Tapusa ang hilikuton nga imo ginsugoran. (S)

Sa Wala pa ang Ebanghelyo:

Mga Salmo 51:12, 14

   O Dios, tugaha sa akon ang isa ka matinlo nga tagipusoon, kag iuli sa akon ang kalipay sang imo kaluwasan.

Ang Pagbasa sang Santos nga Ebanghelyo suno kay:

San Mateo 7:7-12

   Si Jesus nagsiling sa iya mga gintuton-an: “Pangayo kag pagahatagan kamo, pangita kag makakita kamo, panuktok kag pagaabrihan kamo. Kay ang nagapangayo pagahatagan, kag ang nagapangita makakita, kag ang nagapanuktok pagaabrihan. May amay bala nga magahatag sing bato sa iya anak nga nagapangayo sing tinapay? Ukon magahatag bala sia sing man-og kon ginapangayuan sia sang isda? Gani kon kamo nga mga malaut makahibalo maghatag sing maayo nga mga butang sa inyo kabataan, daw ano pa gid ang inyo Amay nga yara sa langit. Magahatag sia sing maayo nga mga butang sa mga nagapangayo sa iya! 

   “Himoa sa iban ang luyag ninyo nga pagahimuon sa inyo. Amo ini ang kahulogan sang Kasugoan ni Moises kag ang pagtudlo sang mga propeta.”

Pebrero 24 | Pebrero 26

Pebrero 24, 2021, Miyerkules, Nahauna nga Senana sang Kwaresma

Liturhiya sang Pulong

Nahauna nga Balasahon - Jonas 3:1-10

Salmo sa Pagsabat - Mga Salmo 51:3-4, 12-13, 18-19

Sa Wala pa ang Ebanghelyo - Joel 2:12-13

Ebanghelyo - Lucas 11:29-32

Ang Pagbasa gikan sa Libro ni:

Jonas nga Propeta 3:1-10

   Ang Ginoo nagsiling kay Jonas, “Magkadto ka sa Ninive, inang daku nga siyudad kag iwali sa mga tawo ang mga pulong nga ginhatag ko sa imo.” “Gani si Jonas nagtuman sa Ginoo kag nagkadto sa Ninive. Ang isa ka daku nga siyudad nga ang iya kasangkaron nagakinahanglan sing tatlo ka adlaw nga paglakat, halin sa pihak pakadto sa pihak. Si Jonas nagsulod sa siyudad kag sang makalakat sia sing isa ka adlaw nagbantala sia, “Sa tapos ang 40 ka adlaw ang Ninive pagalaglagon!” 

   Ang mga tawo sang Ninive nagtuo sa pulong sang Dios, nagpamat-od sila nga ang tagsatagsa dapat magpuasa, kag ang tanan nga mga pumoluyo halin sa kadalagkuan tubtob sa labing kubos, magbayu sing sako, sa pagpakilala nga naghinulsol sila. 

   Sang pagkabati sang hari sa Ninive nahanungod sini, nanaog sia sa iya trono, gin-uba niya ang iya kapa, nagbayu sang sako kag nagpungko sa abo. Nagmando sia sa mga tawo sa Ninive nga nagasiling, “Amo ini ang mando gikan sa hari kag sa iya mga opisyales: Wala sing may magkaon bisan ano; tanan nga mga tawo, mga baka kag mga karnero ginadumilian sa pagkaon ukon pag-inom. 

   Ang tanan nga mga tawo kag mga kasapatan dapat magbayu sang sako. Ang tagsatagsa dapat magpangamuyo sing hanuot sa Dios kag ang tagsatagsa dapat magbiya sang iya malaut nga mga pagginawi kag sang mga sala nga iya ginahimo. Ayhan ang Dios magabaylo sang iya hunahona, kag indi na sia magkaakig, kag indi kita magkalamatay!” 

   Nakita sang Dios ang ila ginhimo; nakita niya ang ila pagbiyasang ila malaut nga mga pagginawi. Gani nagbaylo sia sang iya hunahona kag wala niya sila pagsiluti suno sa iya ginsiling nga silutan sila.

Salmo sa Pagsabat:

Mga Salmo 51:3-4, 12-13, 18-19

(S) O Dios, indi mo pagsikwayon ang mapainuboson nga tagipusoon.

Ginaako ko ang akon mga kasaypanan, ginakilala ko ang akon mga sala sa tanan nga tion. Nakasala ako sa imo, sa imo gid lang, kag ginhimo ko ang ginapakalain mo. Gani matarong ikaw sa imo paghukom sa akon; may katarungan ikaw sa pagkondenar sa akon. (S)

Iuli sa akon ang kalipay sang imo kaluwasan, kag himoa ang akon espiritu nga magmatinumanon. Dayon tudluan ko ang mga makasasala sang imo mga sugo, kag magabalik sila sa imo. (S)

O Dios, kaluoyi ang Sion kag buligi sia; patinduga liwat ang mga pader sang Jerusalem. Dayon magakalipay ikaw sa nagakaigo nga mga halad, kag sa tanan nga mga halad nga sinunog; kag ang mga baka nga toro pagaihalad sa imo altar. (S)

Sa Wala pa ang Ebanghelyo:

Joel nga Propeta 2:12-13

   Ang Ginoo nagasiling: "Magbalik kamo sa akon sing makinasingkasingon, kay ako labi ka maluloy-on.

Ang Pagbasa sang Santos nga Ebanghelyo suno kay:

San Lucas 11:29-32

   Sang nagatilipon ang mga tawo sa palibot ni Jesus, nagsiling sia, “Daw ano kalaut sang mga tawo karon nga panahon! Nagapangayo sila sing isa ka milagro, pero wala sing may ipakita sa ila, kundi ang milagro nga natabo kay Jonas. Subong nga si Jonas nangintanda para sa mga tawo sa Ninive, amo man ang Anak sang Tawo mangintanda para sa mga tawo sa sining panahon. Sa Adlaw sang Paghukom ang Rayna sang Bagatnan magatindog kag magasumbong sang mga tawo sining panahon, kay nagkari sia gikan sa malayo nga duog sa pagpamati sang kaalam ni Salomon, kag karon nagasiling ako sa inyo, may yari diri nga daku pa kay Salomon. Sa Adlaw sang Paghukom ang mga tawo sang Ninive magatindog kag magasumbong sa inyo, kay nagbiya sila sa ila mga sala sang pagkabati nila kay Jonas nga nagwali. Karon nagasiling ako sa inyo, may yari diri nga daku pa kay Jonas.”

Pebrero 23 | Pebrero 25

Pebrero 23, 2021, Martes, Nahauna nga Senana sang Kwaresma

Liturhiya sang Pulong

Nahauna nga Balasahon - Isaias 55:10-11

Salmo sa Pagsabat - Mga Salmo 34:4-5, 6-7, 16-17, 18-19

Sa Wala pa ang Ebanghelyo - Mateo 4:4B

Ebanghelyo - Mateo 6:7-15

Ang Pagbasa gikan sa Libro ni:

Isaias nga Propeta 55:10-11

   Ang Ginoo nagasiling: “Ang akon pulong kaangay sang yelo kag ulan nga nagahalin sa langit sa paghatag sing tubig sa duta. Magapatubo ini sang mga tanom; nagahatag ini sing binhi nga inugtanom kag kalan-on agod kaunon.

   Amo man ang pulong nga akon ginahambal-indi ini mapaslawan sa paghimo sang akonginaplano; magahimo ini sang tanan nga akon tinutoyo.

Salmo sa Pagsabat:

Mga Salmo 34:4-5, 6-7, 16-17, 18-19

(S) Ang Ginoo nagluwas sa mga matarong sa tanan nila nga kalisdanan.

Nagpangamuyo ako sa Ginoo kag ginsabat niya ako; ginkuha niya ang tanan ko nga mga kahadlok. Ang mga ginapigos nagasalig sa iya kag nagakalipay sila; indi gid sila mapaslawan. (S)

Ang mga makalulooy nagapanawag sa iya, kag nagasabat sia sa ila; ginaluwas niya sila sa tanan nila nga mga kalalat-an. Ang anghel sang Ginoo nagabantay sa tanan nga nagatahod sa iya, kag iya sila ginaluwas sa katalagman. (S)

Pero ginasumpong niya ang mga nagahimo sing malaut, sa bagay nga bisan ang ila mga kasimanwa nagakalipat sa ila. Ang mga matarong Nagapanawag sa Ginoo kag nagapamati sia,kag ginaluwas niya sila sa tanan nila nga mga kalisdanan. (S)

Ang Ginoo malapit sa mga napaslawan; ginaluwas niya ang mga nadulaan sing paglaom. Ang matarong may madamo nga mga pag-antos, pero ang Ginoo nagaluwas sa iya sa sini tanan. (S)

Sa Wala pa ang Ebanghelyo:

San Mateo 4:4

   Indi lamang sa tinapay mabuhi ang tawo kundi sa tagsa ka pulong nga ginahambal sang Dios.

Ang Pagbasa sang Santos nga Ebanghelyo suno kay:

San Mateo 6:7-15

   Si Jesus nagsiling sa iya mga gintuton-an: “Sa inyo pagpangamuyo indi kamo maggamit sang madamo nga mga pulong nga wala sing pulos subong sang ginahimo sang mga pagano, nga nagahunahona nga pagapamatian sila sang Dios tungod kay malawig ang ila mga pangamuyo. Indi kamo magmanginkaangay sa ila, kay ang inyo Amay nakahibalo na sang inyo kinahanglan sa wala pa kamo makapangamuyo. Gani dapat kamo magpangamuyo sing subong sini:

     ‘Amay namon nga yara sa langit,

     Pakabalaanon ang imo ngalan,

     Magkari ang imo Ginharian,

     Matuman ang imo kabubot-on

     Diri sa duta

     Subong man sang sa langit.

     Hatagi kami karon nga adlaw

     Sang kalan-on

     Nga amon kinahanglanon,

     Patawara kami sang amon mga sala,

     Subong nga ginapatawad man namon

     Ang mga nakasala sa amon.

     Indi kami pag-ipadaog

     Sa mga pagsulay,

     Kundi luwasa kami sa Malaut.’

   “Kay kon ginapatawad ninyo ang mga nakasala sa inyo, ang inyo Amay sa langit magapatawad man sang inyo mga sala. Pero kon wala ninyo ginapatawad ang mga nakasala sa inyo, ang inyo Amay sa langit indi man magpatawad sa inyo.”

Pebrero 22 | Pebrero 24

Pebrero 22, 2021, Ang Lingkoran ni San Pedro

Liturhiya sang Pulong

Nahauna nga Balasahon - 1 Pedro 5:1-4

Salmo sa Pagsabat - Mga Salmo 23:1-3, 3-4, 5, 6

Sa Wala pa ang Ebanghelyo - Mateo 16:18

Ebanghelyo - Mateo 16:13-19

Ang Pagbasa gikan sa Nahauna nga Sulat ni:

San Pedro 5:1-4

   Ako nga isa ka tigulang sang iglesia, nagapakiluoy sa mga katigulangan sang iglesia nga yara dira sa inyo. Saksi ako sang mga pag-antos ni Cristo, kag magapakig-ambit ako sa himaya nga igapahayag. Nagapakiluoy ako sa inyo: tatapa ninyo ang panong nga ginhatag sang Dios sa inyo, kag bantayi ninyo ini indi kay napilitan lang kamo, kundi sa inyo gid kinabubot-on, suno sa luyag sang Dios nga himuon ninyo. Himoa ninyo ang inyo mga bulohaton, indi tungod sang suhol, kundi kay may matuodtuod kamo nga handom sa pag-alagad. Indi kamo magpakaharihari sa mga gintugyan sa inyo nga tatapon, kundi magmanginsulondan kamo sang panong. Kag kon ang Pangulo nga Manugbantay magpahayag, batunon ninyo ang mahimayaon nga korona nga wala gid nagalubad ang iya kaidlak.

Salmo sa Pagsabat:

Mga Salmo 23:1-3, 3-4, 5, 6

(S) Ang Ginoo amo ang akon manugbantay; yara ang tanan nga ginakinahanglan ko.

Ang Ginoo amo ang akon manugbantay; yara ang tanan nga ginakinahanglan ko. Iya ako ginapapahuway sa mga latagon nga may malagtom nga hilamon, kag iya ako ginatuytoyan sa mga linaw sang matin-aw nga tubig. Ginahatagan niya ako sing bag-o nga kusog. (S)

Bisan pa nagaagi ako sa dalan nga tama kadulom, indi gid ako mahadlok, O Ginoo, kay ikaw nagaupod sa akon! Ang imo baston kag ang imo sungkod nagaapin sa akon. (S)

Ginabutangan mo ako sa lamisa sing madamo nga pagkaon, sa diin makit-an ako sang tanan ko nga mga kaaway, ginhisuan mo sing lana ang akon ulo sa pag-abiabi sa akon, kag ginpaawas mo ang akon kupa. (S)

Sa pagkamatuod, ang imo kaayo kag gugma mangin-akon samtang nga nagakabuhi pa ako, kag ang imo balay mangin-akon puloy-an sa walay katubtoban. (S)

Aleluya:

San Mateo 16:18

   Ikaw si Pedro kag sa sini nga bato pagatukoron Ko ang Akon iglesia, kag ang gahom sang kamatayon indi makadaog sa Iya.

Ang Pagbasa sang Santos nga Ebanghelyo suno kay:

San Mateo 16:13-19

   Nagkadto si Jesus sa kadutaan sang Cesarea Filipo sa diin nagpamangkot sia sa iya mga gintuton-an, “Sin-o bala ang Anak sang Tawo suno sa mga tawo?” Nagsabat sila, “May nagasiling nga si Juan Bautista. May iban nga nagasiling nga si Elias kag may iban pa gid nga nagasiling nga si Jeremias ukon iban nga mga propeta.”

   Si Jesus nagpamangkot sa ila, “Pero suno sa inyo, sin-o bala ako?”

   Si Simon Pedro nagsabat, “Ikaw ang Cristo, ang Anak sang Dios nga buhi.”

   Si Jesus nagsabat, “Bulahan ka, Simon, anak ni Juan! Kay ini nga kamatuoran wala ginpahayag sa imo sang tawo, kundi sang akon Amay sa langit. Kag ako nagasiling sa imo, ikaw si Pedro nga kon sayuron ‘Bato’ kag sa sini nga bato pagatukoron ko ang akon iglesia. Bisan ang gahom sang kamatayon indi makadaog sa iya. Ihatag ko sa imo ang mga yabi sang Ginharian sang langit, kag kon ano ang imo ginadumilian sa duta pagadumilian man didto sa langit, kag kon ano ang imo ginatugotan sa duta pagatugotan man didto sa langit.”

Pebrero 21 | Pebrero 23

Pebrero 21, 2021, Nahauna nga Domingo sang Kwaresma

Liturhiya sang Pulong

Nahauna nga Balasahon - Genesis 9:8-15

Salmo sa Pagsabat - Mga Salmo 25:4-5, 6-7, 8-9

Ika-2 nga Balasahon - 1 Pedro 3:18-22

Sa Wala pa ang Ebanghelyo - Mateo 4:4B

Ebanghelyo - Lucas 5:27-32

1. Ang Pagbasa gikan sa Libro sang:

Genesis 9:8-15

Karon ang Dios nagsiling kay Noe kag sa iya mga anak nga lalaki, “Karon magahimo ako sing kasugtanan sa inyo kag sa inyo mga kaliwat, kag sa tanan nga mga tinuga nga nagakabuhi—mga pispis, tanan nga mga sapat—ang tanan nga naggowa sa arka upod sa inyo. Sa sini nga mga pulong magahimo ako sing kasugtanan sa inyo: Indi ko na gid paglaglagon ang buhi nga mga tinuga paagi sa anaw. Indi na gid mag-anaw liwat sa paglaglag sang duta. Subong tanda sang walay katapusan nga kasugtanan nga akon ginahimo upod sa inyo kag sa tanan nga mga tinuga nga nagakabuhi, ginabutang ko ang akon balangaw sa mga panganod. Ini mangintanda sang akon kasugtanan sa kalibutan. Kon magpadala ako sing panganod sa ibabaw sang duta, kag ang balangaw magapakita sa mga panganod, dayon dumdomon ko ang akon saad sa imo kag sa tanan nga mga sapat, nga wala na sing anaw nga magalaglag sang tanan nga buhi nga mga tinuga.

Salmo sa Pagsabat:

Mga Salmo 25:4-5, 6-7, 8-9

(S) Ang imo mga dalan, O Ginoo, amo ang pagkaluoy kag pagkatarong para sa magatuman sang imo kasugtanan.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)

Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Patawara man ang akon mga sala kag kasaypanan sang akon pagkapamatan-on, tungod sang imo mapinadayunon nga gugma kag kaayo, dumdoma man ako, O Ginoo! (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S)

2. Ang Pagbasa gikan sa Nahauna nga Sulat ni:

San Pedro 3:18-22

Mga utod: Kay si Cristo mismo nagpanginmatay tungod sa inyo. Nagpakamatay sia sing makaisa gid lang tungod sang mga sala, isa ka matarong nga tawo para sa mga di-matarong, agod nga madala niya kamo sa Dios. Ginpatay sia sa lawas, pero ginbuhi sa espiritu. Kag sa iya espiritu nagkadto sia kag nagwali sa binilanggo nga mga espiritu. Ini sila amo ang mga espiritu sang mga wala magtuman sa Dios, sang paghulat sang Dios sing mapainulobon sa sadtong mga adlaw sang si Noe nagahimo sang iya arka. Pila gid lang ang naluwas sa tubig, ang walo nga didto sa arka. Ini nga tubig amo ang halimbawa sang pagbautiso, nga karon nagaluwas sa inyo, indi sa paghugas sang mga higko sa lawas, kundi paagi sa saad nga ginhimo sa Dios gikan sa matinlo nga konsyensya. Ang pagbautiso nagaluwas sa inyo paagi sa pagkabanhaw ni Jesu-Cristo, nga nagpalangit kag nagalingkod sa tuo sang Dios, nga nagagahom sang tanan nga mga anghel kag sang langitnon nga mga awtoridad kag mga gahom.

Sa Wala pa ang Ebanghelyo:

San Mateo 4:4B

Ang tawo mabuhi indi lamang sa tinapay, kundi sa tagsa ka pulong nga ginhambal sang Dios.

Ang Pagbasa sang Santos nga Ebanghelyo suno kay:

San Marcos 1:12-15

Sa gilayon ginpakadto sia sang Espiritu Santo sa desierto. Nagtener sia didto sing 40 ka adlaw kag ginsulay sia ni Satanas. May mga sapat man nga talunon didto, pero nag-abot ang mga anghel kag nagbulig sa iya. Sang nabilanggo na si Juan, si Jesus nagkadto sa Galilea kag nagwali sang Maayong Balita gikan sa Dios. Nagsiling sia, “Nag-abot na ang nagakaigo nga tion, kag ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.” 

Pebrero 20 | Pebrero 22

Pebrero 20, 2021, Sabado sa Tapos ang Badlis

Liturhiya sang Pulong

Nahauna nga Balasahon - Isaias 58:9-14

Salmo sa Pagsabat - Mga Salmo 86:1-2, 3-4, 5-6

Sa Wala pa ang Ebanghelyo - Ezequiel 33:11

Ebanghelyo - Lucas 5:27-32

Ang Pagbasa gikan sa Libro ni:

Isaias nga Propeta 58:9-14

Amo ini ang ginasiling sang Ginoo: Kon mangamuyo kamo, ako magapamati sa inyo. Kon manawag kamo sa akon ako magasabat. “Kon untatan na ninyo ang pagpamigos, pagtamay kag tagsa ka hambal nga malain; kon hatagan ninyo sing kalan-on ang ginagutom, kag busgon ninyo ang mga nawad-an, dayon ang kadudolman nga yara sa inyo palibot magasanag subong sang udtong adlaw. Kag tuytoyan ko kamo sa gihapon, kag busgon ko kamo sang maayo nga mga butang. Hatagan ko kamo sang kabakod kag maayong lawas. Manginkaangay kamo sang isa ka hardin nga bugana ang tubig, kaangay sang tuboran sang tubig nga wala nagakahubas. Ang imo mga tawo magapatindog liwat sang madugay na nga mga nagkalaguba, nga ipatindog liwat sa daan nga mga sadsaran. Manginbantog kamo subong mga tawo nga nagkaayo sang mga nagkalaguba, nga nagpatindog liwat sang naguba nga mga balay.” 

    Ang Ginoo nagasiling, “Kon pakabalaanon ninyo ang Adlaw nga Inugpahuway, kag mag-untat kamo sa pagpangita sang inyo kaugalingon nga kaayuhan sa sina nga adlaw; kon pakamahalon kag padunggan ninyo ang akon balaan nga adlaw nga indi kamo maglakat, indi mag-obra ukon indi maghambal sing walay pulos, dayon maagom ninyo ang kalipay sa pag-alagad sa akon. Padunggan ko kamo sa bug-os nga kalibutan; panag-iyahan ninyo ang duta nga ginhatag ko sa inyo amay nga si Jacob. Ako, ang Ginoo naghambal sini.”

Salmo sa Pagsabat:

Mga Salmo 86:1-2, 3-4, 5-6

(S) Tudloi ako, O Ginoo, sang luyag mo nga himuon ko, kag ako magatuman sa imo sing may katutom.

Pamatii ako, O Ginoo, kag sabta ako, kay maluya ako kag wala sing ikasarang. Luwasa ako sa kamatayon, kay ako mainunongon sa imo, luwasa ako, kay ako imo alagad kag nagasalig ako sa imo. (S)

Ikaw amo ang akon Dios. Kaluoyi ako, O Ginoo, nagapangamuyo ako sa imo sa bug-os nga adlaw. Lipaya man ang imo alagad, O Ginoo, kay ang akon pangamuyo nagalambot sa imo. (S)

O Ginoo, maayo ka kag mapinatawaron, puno sang mapinadayunon nga gugma tanan nga nagapangamuyo sa imo. Pamatii man, O Ginoo, ang akon pangamuyo, dungga ang akon pagpangayo sing bulig. (S)

Sa Wala pa ang Ebanghelyo:

Ezequiel nga Propeta 33:11

Wala Ako nagakalipay sa kamatayon sang makasasala, siling sang Ginoo, ang luyag ko nga mag-untat sia sa pagpakasala kag magkabuhi.

Ang Pagbasa sang Santos nga Ebanghelyo suno kay:

San Lucas 5:27-32

Sadto nga panahon: Nakita ni Jesus si Levi nga isa ka manugsokot sang buhis nga yara sa iya opisina. Nagsiling si Jesus sa iya, “Upod ka sa akon.” Nagtindog si Levi, ginbayaan niya ang tanan kag nag-upod sa iya. 

    Dayon si Levi naghiwat sing daku nga punsyon sa iya balay para kay Jesus, kag didto upod nila ang madamo nga mga manugsokot sang buhis kag iban pa nga mga bisita. May mga Fariseo kag mga manunodlo sang Kasugoan nga kaupod nila nga nagreklamo sa mga gintuton-an ni Jesus. Nagsiling sila, “Ngaa bala nga nagakaon kamo kag nagainom upod sa mga manugsokot sang buhis kag sa mga makasasala?” 

    Si Jesus nagsabat sa ila, “Ang maayo wala nagakinahanglan sang manugbolong, kundi ang nagamasakit lang. Wala ako nagkari sa pagtawag sang mga matarong, kundi sang mga makasasala sa paghinulsol.”

Pebrero 19 | Pebrero 21

Pebrero 19, 2021, Biyernes sa Tapos ang Badlis

Liturhiya sang Pulong

Nahauna nga Balasahon - Isaias 58:1-9

Salmo sa Pagsabat - Mga Salmo 51:3-4, 5-6, 18-19

Sa Wala pa ang Ebanghelyo - Amos 5:14

Ebanghelyo - Mateo 9:14-15

Ang Pagbasa gikan sa Libro ni:

Isaias nga Propeta 58:1-9

    Amo ini ang ginasiling sang Ginoo: “Magsinggit sing tudo suno sa imo masarangan! Pakilalaha ang akon mga tawo nga Israel sang ila mga sala! Nagasimba sila sa akon adlaw-adlaw, kag nagasiling sila nga ginatuman nila ang akon mga kasugoan kag nagahimo sing matarong. Nagapangamuyo sila nga bendisyunan ko sila kag hatagan sing matarong nga mga kasugoan.” 

    Ang mga tawo nagapamangkot, “Ngaa magpuasa kita kon ang Ginoo indi man lang makakita? Ngaa mag-antos kita kon wala man lang sia makatalupangod?” 

    Ang Ginoo nagasiling sa ila, “Ang matuod amo nga samtang nagapuasa kamo, ang inyo man lang kaugalingon nga kaayuhan ang inyo ginapangita kag ginapigos ninyo ang nagapamugon sa inyo. Nagapamintas kamo, pirme lang nagainaway kag nagabinaisay. Nagahunahona bala kamo nga pamatian ko ang inyo mga pangamuyo tungod sini nga pagpuasa? Kon magpuasa kamo, ginapaantos ninyo ang inyo kaugalingon, nagaduko kamo sing manubo pa sang sa dahon sang hilamon, kag nagabuklad sang sako kag nagasabwag singabo nga inyo higdaan. Amo bala ina ang inyo pagpuasa? Nagahunahona bala kamo nga nalipay ako sina? 

    Ang sahi sang puasa nga luyag ko amo ini: Kuhaa ninyo ang kadena sang pagpamigos kag gota sang pagkadimatarong, kag hilwaya ninyo ang mga ginapigos. Hatagi man ninyoang mga ginagutom sing kalan-on, kag abrihi ninyo ang inyo mga puloy-an sa mga imol nga wala sing balay. Hatagi sing bayu ang mga wala sing ginasuksok, kag indi magbalibad sa pagbulig sa inyo mga kaparyentihan. 

    “Dayon ang akon kaayo magasilak sa inyo kaangay sang nagabutlak nga adlaw, kag ang inyo mga pilas magaayogilayon. Magaupod ako pirme sa inyo kag magaluwas sa inyo; kon yara ako maapinan kamo sa bug-os ninyo nga palibot. Kon mangamuyo kamo, ako magapamati sa inyo. Kon manawag kamo sa akon, ako magasabat. 

Salmo sa Pagsabat:

Mga Salmo 51:3-4, 5-6, 18-19

(S) O, Dios indi pagsikwaya ang mapainuboson kag matinumanon nga tagipusoon.

Ginaako ko ang akon mga kasaypanan, ginakilala ko ang akon mga sala sa tanan nga tion. Nakasala ako sa imo, sa imo gid lang, kag ginhimo ko ang ginapakalain mo. Gani matarong ikaw sa imo paghukom sa akon; may katarungan ikaw sa pagkondenar sa akon. (S)

Malaut ako halin sa tion nga ginbun-ag ako, halin pa sang adlaw sang akon pagkatawo nanginmakasasala ako. Ang matutom nga tagipusoon amo ang imo ginapangita; pun-a sang imo kaalam ang akon panghunahona. (S) 

O Dios, kaluoyi ang Sion kag buligi sia; patinduga liwat ang mga pader sang Jerusalem. Dayon magakalipay ikaw sa nagakaigo nga mga halad, kag sa tanan nga mga halad nga sinunog; kag ang mga baka nga toro pagaihalad sa imo altar. (S)

Sa Wala pa ang Ebanghelyo:

Amos nga Propeta 5:14

    Tinguhaa ninyo ang paghimo sang matarong kag magakabuhi kamo; dayon ang Ginoong Dios mangin kaupod ninyo.

Ang Pagbasa sang Santos nga Ebanghelyo suno kay:

San Mateo 9:14-15

    Sadto nga panahon: Ang mga sumolunod ni Juan Bautista nagkadto kay Jesus nga nagapamangkot, “Ngaa nga kami kag ang mga Fariseo nagapuasa sing masunson, pero ang imo mga gintuton-an wala gid nagapuasa?” 

    Si Jesus nagsabat, “Magakasubo bala ang mga inagda sa kasal samtang ang nobyo kaupod pa nila? Pero magaabot ang adlaw nga ang nobyo pagakuhaon sa ila kag amo na ina ang ila pagpuasa.

    

Pebrero 18 | Pebrero 20

Pebrero 18, 2021, Huwebes sa Tapos ang Badlis

Liturhiya sang Pulong

Nahauna nga Balasahon - Deuteronomio 30:15-20

Salmo sa Pagsabat - Mga Salmo 1:1-2, 3, 4 kag 6

Aleluya - Mateo 4:17

Ebanghelyo - Lucas 9:22-25

Ang Pagbasa gikan sa Libro sang:

Deuteronomio 30:15-20

Si Moises naghambal sa mga tawo nga nagasiling: “Karon nga adlaw ginapapili ko kamo sa kauswagan kag kabuhi ukon kalaglagan kag kamatayon. Kon tumanon ninyo ang mga sugo sang GINOO nga inyo Dios, nga akon ginahatag sa inyo karon nga adlaw, kon ginahigugma ninyo sia, tumana ninyo sia, kag bantayi ang tanan niya nga mga kasugoan, dayon magauswag kamo kag mangin-isa ka pungsod nga may madamo nga mga tawo. Ang GINOO nga inyo Dios magabendisyon sa inyo sa duta nga madali na lang ninyo panag-iyahan. Pero kon indi kamo magtuman kag indi magpamati, kag magsimba sa iban nga mga dios, karon nga daan ginapaandaman ko nga malaglag kamo. Indi kamo magpuyo sing madugay sa sina nga duta sa tabok sang Jordan nga madali na lang ninyo panag-iyahan. Ginapapili ko kamo karon sa kabuhi ukon kamatayon, sa pagpakamaayo ukon pagpakamalaut sang Dios, kag saksi ko ang langit kag duta sa inyo pagapilion. Pilia ang kabuhi. Higugmaa ang GINOO nga inyo Dios, tumana sia kag magmatutom kamo sa iya, agod nga kamo kag ang inyo mga kaliwat magakabuhi sing malawig sa duta nga iya ginsaad nga ihatag sa inyo mga katigulangan nga amo sanday Abraham, Isaac kag Jacob.”

Salmo sa Pagsabat:

Mga Salmo 1:1-2, 3, 4 kag 6

(S) Bulahan ang tawo nga nagasalig sa Ginoo.

Bulahan ang tawo nga nagasikway sang laygay sang mga malaut, nga wala nagasunod sa ginahimo sang mga makasasala, nga wala nagabuylog sa mga nagayaguta sa Dios. Sa baylo, naluyag sia magbasa sang kasugoan sang Ginoo, kag nagatuon sini sa adlaw kag gab-i. (S)

Kaangay sia sang kahoy nga nagatubo sa higad sang sapa, nagapamunga ini sa nagakaigo nga panahon, kag ang iya mga dahon wala nagakalaya. Matigayon niya ang tanan nga iya ginahimo! (S)

Pero indi kaangay sini ang mga malaut! Kaangay sila sang labhang nga ginapalid sang hangin. Ang Ginoo nagatuytoy kag nagaapin sang matarong nga mga tawo, pero ang malaut nagapadulong sa ila kalaglagan. (S)

Bersikulo antis ang Ebanghelyo:

San Mateo 4:17

Magbiya kamo sang inyo mga sala, siling sang Ginoo; kay ang Ginharian sang langit malapit na.

Ang Pagbasa sang Santos nga Ebanghelyo suno kay:

San Lucas 9:22-25

Sadto nga panahon: Si Jesus nagsiling sa iya mga gintuton-an, “Kinahanglan mag-antos gid ang Anak sang Tawo kag pagasikwayon sang mga katigulangan sang mga Judio, sang pangulo nga mga pari, kag sang mga manunodlo sang Kasugoan. Pagapatyon sia kag pagabanhawon sa ikatlo nga adlaw.” Kag nagsiling sia sa tanan, “Kon sin-o ang luyag magsunod sa akon, dapat niya kalimtan ang iya kaugalingon, magpas-an sang iya krus adlaw-adlaw, kag magsunod sia sa akon. Kay ang luyag magluwas sang iya kaugalingon nga kabuhi, madula niya ini, pero ang nagadula sang iya kabuhi tungod sa akon, maluwas niya ini. May makuha bala ang tawo kon maangkon niya ang bug-os nga kalibutan, pero sia iya madula ukon mawala man lang?

Pebrero 17 | Pebrero 19

Pebrero 17, 2021, Miyerkules sang Pagbadlis

Liturhiya sang Pulong

Nahauna nga Balasahon - Joel 2:12-18

Salmo sa Pagsabat - Mga Salmo 51:3-4, 5-6, 12-13, 14 kag 17

Ika-2 nga Balasahon - 2 Corinto 5:20–6:2

Aleluya - Mga Salmo 95:8

Ebanghelyo - Mateo 6:1-6, 16-18

1. Ang Pagbasa gikan sa Libro ni:

Joel nga Propeta 2:12-18

Nagasiling ang Ginoo, “Pero bisan karon, maghinulsol kamo sa bug-os ninyo nga tagipusoon kag magbalik sa akon,nga may pagpuasa, paghibi kag pagpangasubo. Ipakita ang inyo buong nga tagipusoon sa inyo pagpangasubo, indi lamang sa paggisi sang inyo mga bayu.” Magbalik kamo sa Ginoo nga inyo Dios. Maayo sia kag puno sing kaluoy, indi sia madali maakig kag ginatuman niya ang iya ginsaad, handa sia sa gihapon sa pagpatawad kag indi sa pagsilot. Ayhan ang Ginoo nga aton Dios magabaylo sang iya panghunahona kag magapabugana sang aton mga patubas. Dayon makahalad kita sa iya sing mga trigo kag bino. Patunoga ang budyong sa bukid sang Sion, magmando sa pagpuasa, kag tawga ang katilingban sa pagsimba. Tipuna sing tingob ang mga tawo, kag amana sila sa isa ka balaan nga pagtilipon, dalha ang mga tigulang, kag tipuna ang mga kabataan, subong man ang mga lapsag. Bisan ang mga bag-ong kasal maggwa sa ila mga kuwarto kag magkari. Ang mga pari, nga nagaalagad sa Ginoo sa Templo, sa gin-utlan sang puwertahan kag sang altar, dapat maghibi kag magpangamuyo: “Kaluoyi ang imo mga tawo, O Ginoo. Indi pag-itugot nga tamayon kami kag yagutaon sang iban nga mga pungsod paagi sa ila pagsiling, ‘Diin na bala ang inyo Dios?’” Dayon ang Ginoo nagpakita nga nagkabalaka sia sa iya duta kag nagkaluoy sa iya mga tawo.

Salmo sa Pagsabat:

Mga Salmo 51:3-4, 5-6, 12-13, 14 kag 17

(S) Maluoy ka sa amon, O Ginoo, kay nakasala kami sa imo.

Ang aton Dios nagakari, pero indi sa hipos lang, nagauna sa iya ang nagaharahara nga kalayo, ginalibutan sia sang isa ka mabaskog nga bagyo. Ginatawag niya ang mga langit kag ang duta nga mga saksi sa pagtan-aw sang iya paghukom sang iya mga tawo. (S)

Nagasiling sia, “Tipona sa akon ang matutom ko nga mga tawo, ang mga naghimo sing kasugtanan sa akon paagi sa isa ka halad.” Ginapahayag sang kalangitan nga ang Dios matarong, nga sia gid amo ang hukom! (S)

“Kon ginagutom ako indi ko ikaw pagsugiran, tungod kay akon ang kalibutan kag ang tanan nga ara sa iya. Nagakaon bala ako sang karne sang baka, ukon nagainom sang dugo sang kanding? (S)

Ihalad sa Dios ang mga pagpasalamat, kag ihatag sa Makagagahom ang tanan nga dulot nga inyo ginsaad. (S)

Indi ka magpatudlo sa akon, ginasikway mo ang akon mga sugo. (S)

2. Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 5:20–6:2

Mga utod: Yari kami karon nagahambal para kay Cristo. Kag subong nga ang Dios gid nagapakiluoy sa inyo paagi sa amon, sa ngalan ni Cristo, nagapakiluoy man kami sa inyo nga pahanugotan ninyo ang Dios sa paghimo sa inyo nga mga abyan niya bisan nga sang una mga kaaway niya kamo! Si Cristo wala gid sing sala, pero ginpatungod sang Dios sa iya ang aton mga sala, agod sa aton paghiusa sa iya, maambit naton ang pagkamatarong sang Dios. 

    Gani, sa aton pagpangabudlay kaupod sa Dios, nagapakiluoy kami sa inyo nga indi ninyo pag-usikan ang grasya sang Dios nga inyo nabaton. Pamatii ninyo ang ginasiling sang Dios: 

        "Ginpamatian ko ikaw 

        sa nahamut-an nga tion, 

        ginbuligan ko ikaw 

        sa adlaw sang kaluwasan." 

    Magpamati kamo! Amo ini ang nahamut-an nga tion, karon amo ang adlaw sang kaluwasan!

Sa wala pa ang Ebanghelyo:

Mga Salmo 95:8

Karon nga adlaw indi kamo magpakatig-a, sa baylo pamatii ninyo ang ginasiling sang Ginoo.

Ang Pagbasa sang Santos nga Ebanghelyo suno kay:

San Mateo 6:1-6, 16-18

Sadto nga panahon: Si Jesus nagsiling sa iya mga gintuton-an, “Mag-andam kamo nga indi magpakitakita sa mga tawo sang inyo maayo nga ginahimo. Kay kon magpakitakita kamo wala na kamo sing balos sa inyo Amay nga yara sa langit. 

“Gani kon ikaw magpanglimos, indi mo ini pag-ipanugidsogid subong sang ginahimo sang mga salimpapaw sa mga sinagoga kag sa mga dalan. Ginahimo nila ini agod nga ang mga tawo magdayaw sa ila. Dumdoma ninyo ini! Nabaton na nila ang ila balos. Pero kon magbulig ka sa tawo nga nagakinahanglan, himoa nga bisan ang imo mahirop nga abyan indi makahibalo, kundi ikaw lamang. Kag ang imo Amay nga nagatan-aw sang imo ginahimo sa tago magabalos sa imo.” 

    “Kon magpangamuyo kamo, indi kamo magmanginkaangay sa mga tawo nga salimpapaw. Luyag sila magpangamuyo nga nagatindog sa mga sinagoga kag sa mga ginsang-an sang mga dalan, agod nga makita sila sang mga tawo. Dumdoma ninyo ini! Nabaton na nila ang ila balos. Pero kon magpangamuyo ka, sulod ka sa imo kuwarto, sirahi ang puwertahan kag magpangamuyo ka sa imo Amay nga indi makita. Kag ang imo Amay nga nagatan-aw sang imo ginahimo sa tago magabalos sa imo. 

    “Kag kon magpuasa kamo, indi kamo magpakita nga masinulob-on kamo subong sang mga salimpapaw, kay luyag sila magpakita sa ila guya sang ila kagutom agod nga ang mga tawo makahibalo nga nagapuasa sila. Dumdoma ninyo ini! Nabaton na nila ang ila balos. Kon magpuasa kamo, panghilam-os kag panghusay kamo, agod nga ang iban nga mga tawo indi makahibalo nga nagapuasa kamo, kundi ang inyo lamang Amay nga indi makita. Kag ang inyo Amay nga nagatan-aw sang inyo ginahimo sa tago magabalos sa inyo.”

Pebrero 16 | Pebrero 18

Pebrero 16, 2021, Martes, Ika-6 nga Semana sang Tuig

Liturhiya sang Pulong

Nahauna nga Balasahon -  Genesis 6:5-8; 7:1-5, 10

Salmo sa Pagsabat - Mga Salmo 29:1 kag 2, 3-4, 3 kag 9-10

Aleluya - Juan 14:23

Ebanghelyo - Marcos 8:14-21

Ang Pagbasa gikan sa Libro sang:

Genesis 6:5-8; 7:1-5, 10

    Sang makita sang GINOO nga ang mga tawo tama gid kalaut sa bug-os nga duta, kag ang ila mga panghunahona tama gid kahigko, naghinulsol sia nga gintuga niya ang mga tawo kag ginpapuyo sa duta. Daku gid ang iya paghinulsol, gani nagsiling sia, “Laglagon ko ang tanan nga mga tawo nga akon gintuga sa duta. Laglagon ko man ang tanan nga mga kasapatan kag ang tanan nga mga kapispisan, kay naghinulsol ako nga ginhimo ko sila.” Pero ang GINOO nalipay kay Noe. 

    Ang GINOO nagsiling kay Noe, “Sulod ka sa arka upod sa bug-os mo nga panimalay. Nakit-an ko nga ikaw lang sa sini nga mga tawo ang matarong. Dala ka sing pito ka paris sang tagsa ka matinlo nga sapat, pero isa lang ka paris sang tagsa ka di-matinlo nga sapat. Magdala ka man sing pito ka paris sang tagsa ka sari sang pispis. Himoa ini agod ang tagsa ka sari sang sapat kag pispis may mabilin nga buhi kag magamuad liwat sa duta. Sa tapos sang pito ka adlaw halin karon magapadala ako sing ulan sa duta sa sulod sing 40 ka adlaw kag 40 ka gab-i, sa paglaglag sang tanan nga buhi nga mga butang nga akon ginhimo.” Kag gintuman ni Noe ang tanan nga ginsugo sa iya sang GINOO. Sang makaligad ang pito ka adlaw nag-abot ang anaw sa duta.

Salmo sa Pagsabat:

Mga Salmo 29:1 kag 2, 3-4, 3 kag 9-10

(S) Ang Ginoo nagahatag sang paghidait sa iya banwa.

Dayawa ninyo ang Ginoo, Dayawa ninyo ang mahimayaon nga ngalan sang Ginoo, kon magpahayag ang Balaan, magsimba kamo. (S)

Ang tingog sang Ginoo mabatian sa mga kadagatan, kag ang Iya tingog mabatian sa mga kalalawran, ang tingog sang Ginoo mabatian sa iya bug-os nga kusog kag pagkahalangdon! (S)

Ang mahimayaon nga Dios nagadaguob, kag nagapataktak sang mga dahon sang kahoy, Ang Ginoo nagagahom sa madalom nga mga tubig, nagagahom Sia subong hari sa walay katapusan. (S)

Aleluya:

San Juan 14:23

    Ang nagahigugma sa Akon nagatuman sang Akon pulong, siling sang Ginoo; kag ang Akon Amay magahigugma sa iya kag kami magakadto sa Iya kag magakabuhi upod sa Iya.

Ang Pagbasa sang Santos nga Ebanghelyo suno kay:

San Marcos 8:14-21

    Sadto nga panahon: Nalipat ang mga gintuton-an sa pagdala sang tinapay luas sang isa ka bilog nga nadala nila sa sakayan. Ginpaandaman sila ni Jesus, “Mag-andam kamo kag magbantay sang inyo kaugalingon batok sa lebadora sang mga Fariseo kag ni Herodes.” 

    Nagbinaisay sila kag nagsiling, “Ginhambal niya ini tungod kay wala kita sing tinapay.” 

    Si Jesus nakahibalo sang ila ginabaisan, gani ginpamangkot niya sila, “Ngaa bala nga ginabaisan ninyo ang kakulang sing tinapay? Wala pa bala kamo makahibalo ukon makahangop? Mango gid bala kamo? May mga mata man kamo, kag indi bala kamo makakita? May mga dulonggan man kamo, kag indi bala kamo makabati? Wala bala kamo makadumdom sang ginpamihakpihak ko ang lima ka bilog nga tinapay para sa 5,000 ka mga tawo? Pila ka alat ang napuno sang nabilin nga inyo gintipon?” 

    Nagsabat sila, “Dose.” 

    Si Jesus nagpamangkot, “Kag sang ginpamihakpihak ko ang pito ka bilog nga tinapay para sa 4,000 ka mga tawo, pila bala ka alat ang napuno sang natipon ninyo nga sobra?” 

    Nagsabat sila, “Pito.” 

    Nagpamangkot sia sa ila, “Kag indi pa bala kamo makahangop?”

Pebrero 15 | Pebrero 17

Pebrero 15, 2021, Lunes, Ika-6 nga Semana sang Tuig

Liturhiya sang Pulong

Nahauna nga Balasahon -  Genesis 4:1-15, 25

Salmo sa Pagsabat - Mga Salmo 50:1 kag 8, 16-17, 20-21

Aleluya - Juan 14:6

Ebanghelyo - Marcos 8:11-13

Ang Pagbasa gikan sa Libro sang:

Genesis 4:1-15, 25

Karon si Adam naghiusa sa iya asawa, kag nagbusong sia. Nagbata sia sing lalaki kag nagsiling sia, “Nakabaton ako sing anak nga lalaki sa bulig sang GINOO.” Gani ginhingalanan niya ang iya bata kay Cain. Sang ulihi nagbata sia kay Abel nga isa man ka lalaki. Si Abel nanginmanugbantay sang mga karnero, pero si Cain iya mangungoma. Sang wala madugay, si Cain nagkuha sang isa ka bahin sang iya patubas kag ginhalad ini sa GINOO. Dayon si Abel nagdala sang panganay sang isa sang iya mga hayop, gin-ihaw niya ini, kag ang pinakamaayo nga bahin ginhatag niya nga halad. Ang GINOO nalipay gid kay Abel kag sa iya halad, pero wala niya pagbatuna si Cain kag ang iya halad. Si Cain nagsingkal sa kaakig kag nagpalamula ang iya guya. Dayon ang GINOO nagsiling kay Cain, “Ngaa naakig ka? Ngaa nagakusmod ka? Kon maayo ang ginhimo mo, kuntani manayanaya ang imo guya. Pero tungod nga malain ang ginhimo mo, ang sala pareho sang mabangis nga sapat nga nagahukmong sa imo puwertahan. Maluyag ini sa paggahom sa imo, pero kinahanglan dag-on mo sia.” 

    Dayon si Cain nagsiling sa iya utod nga si Abel, “Dali mamasyar kita.” Sang didto na sila sa latagon, ginpatay ni Cain ang iya utod. 

    Ang GINOO nagpamangkot kay Cain, “Diin ang imo utod nga si Abel?” Nagsabat sia, “Ambot! Ako bala ang manugbantay sang akon utod?” Karon ang GINOO nagsiling, “Ngaa ginhimo mo ining makasiligni nga butang? Ang dugo sang imo utod nagasinggit sa akon gikan sa duta subong sang isa ka tingog nga nagapangayo sang pagtimalos. Kag karon ginapakamalaut ka kag pagatabugon ka halin sa sini nga duta nga nagbuka sang iya baba sa pagbaton sang dugo sang imo utod gikan sa imo kamot. Kon magpananom ikaw, ang duta indi magpatubas sing bisan ano para sa imo, kag mangintiyugtiyog ikaw nga wala sing puloy-an sa duta.” Dayon si Cain nagsiling sa Ginoo, “Tama kabug-at ini nga silot. Karon ginatabog mo ako halin sa sini nga duta kag halin sa imo atubangan. Mangintiyugtiyog ako nga wala sing puloy-an sa sini nga duta, kag ang bisan sin-o nga makakita sa akon magapatay sa akon.” Pero ang GINOO nagsabat sa iya, “Indi, kay kon may magpatay sa imo, pito ka kabuhi ang itumbas sa imo kabuhi.” Gani ang GINOO nagbutang sing tanda kay Cain sa pagpaandam sa bisan kay sin-o nga masugata niya nga indi sia pagpatyon. 

    Si Adam kag ang iya asawa nagbata liwat sing lalaki. Si Eva nagsiling, “Ang Dios naghatag sa akon sing isa ka anak nga lalaki sa pagtal-os kay Abel nga ginpatay ni Cain.” Gani ginhingalanan niya sia kay Set.

Salmo sa Pagsabat:

Mga Salmo 50:1 kag 8, 16-17, 20-21

(S) Ihalad sa Dios ang mga pagpasalamat.

Ang Makagagahom nga Dios, ang Ginoo, nagahambal, nagapanawag Sia sa bug-os nga duta, halin sa sidlangan pa nakatundan. Wala ako nagasaway sa imo tungod sang imo mga halad kag sang mga halad nga sinunog nga imo pirme ginahalad sa Akon. (S)

Pero nagasiling ang Dios sa malaut, "Ngaa bala ginapabutyag mo ang Akon mga sugo? Ngaa bala naghambal ka nahanungod sang Akon kasugtanan? Indi ka magpatudlo sa Akon ginasikway Mo ang akon mga sugo. (S)

Handa ka sa pagsumbong bisan pa sang imo mga utod, kag imo sila ginapangitaan sing sala. Ini tanan ginhimo mo, kag naghipos lang Ako, gani nagpanghunahona Ka nga kaangay ako sa lmo. Pero karon sabdungon Ko ikaw, kag ipaathag ini nga butang sa imo. (S) 

Aleluya:

San Juan 14:6

Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa Akon.

Ang Pagbasa sang Santos nga Ebanghelyo suno kay:

San Marcos 8:11-13

Sadto nga panahon: May mga Fariseo nga nagpalapit kag nagpakigsuay sa kay Jesus. Luyag nila nga tilawan sia, gani nagpangayo sila sing isa ka milagro sa pagpakita nga may gahom sia halin sa Dios. Nagpanghakroy si Jesus sing malawig kag nagsiling, “Ngaa bala nga ang mga tawo karon nga mga inadlaw nagapangita sang isa ka milagro? Nagasiling ako sa inyo, nga wala sing milagro nga ipakita sa sini nga mga tawo!” Ginbayaan sila ni Jesus, nagbalik sia sa sakayan kag nagtabok sa pihak sang linaw.

Pebrero 14 | Pebrero 16

Pebrero 14, 2021, Ika-6 nga Domingo sang Tuig

Liturhiya sang Pulong

Nahauna nga Balasahon - Levitico 13:1-2, 44-46

Salmo sa Pagsabat - Mga Salmo 32:1-2, 5, 11

Ika-2 nga Balasahon - 1 Corinto 10:31-11:1

Aleluya - Lucas 7:16

Ebanghelyo - Marcos 1:40-45

Ang Pagbasa gikan sa Libro sang:

Levitico 13:1-2, 44-46

Ang Ginoo naghatag kay Moises kag kay Aaron sini nga mga pagsulondan. Ang bisan sin-o nga may katol sa panit, isa ka hubag ukon pagpalanghabal nga mahimo nga isa ka balatian nga makalalaton, pagadalhon sia sa pari nga kaliwat ni Aaron. Ang pari magalawag nga di-matinlo sia, tungod sang makalalaton nga balatian sa iya ulo.

Ang tawo nga may makalalaton nga balatian sa panit magsuksok sang gisi nga mga bayu, kag pabay-an niya ang iya buhok nga wala mahusay, tabunan niya ang iya guya halin sa baba paidalom, kag magsinggit, “Di-matinlo ako, di-matinlo ako!" Magapabilin sia nga di-matinlo tubtob nga wala pa sia mag-ayo sa iya balatian kag kinahanglan magpuyo sia sa gwa sang kampamento nga malayo sa iban nga mga tawo.

Salmo sa Pagsabat:

Mga Salmo 32:1-2, 5, 11

(S) Ikaw ang akon palanaguan, nagakanta ako sing mabaskog sang Imo kaluwasan.

Bulahan ang tawo nga ang iya mga sala ginpatawad, nga ang iya mga paglapas ginpanas. Bulahan ang tawo nga wala ginasumbong sang Ginoo nga nakahimo sing malaut nga binuhatan, nga hilway sa tanan nga paglimbong. (S)

Dayon ginkilala ko ang akon mga sala sa imo, wala ko gintago ang akon mgakasaypanan. Nagtapat ako sa pagtuad sang akon mga sala sa imo, kag ginpatawad mo ang akon mga paglapas. (S)

Tanan kamo nga mga matarong,magkalipay kag maghinugyaw, tungod sang mga binuhatan sang Ginoo! Tanan kamo nga nagatuman sa iya, magsinggit sa kalipay! (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 10:31-11:1

Mga utod: Kon amo ina, bisan nagakaon ukon nagainom kamo, ukon ano man ang inyo ginahimo, himoa ini tanan para sa himaya sang Dios. Magkabuhi kamo sa bagay nga indi kamo manginkasablagan sa mga Judio ukon sa mga Gentil ukon sa iglesia sang Dios. Sunda lang bala ninyo ang ginahimo ko. Sa akon ginahimo nagatinguha ako sa paglipay sang tanan, kag wala ako nagapangita sang akon kaayuhan, kundi sang kaayuhan sang tanan, agod nga maluwas sila. Iluga ninyo ako subong nga ako nagailog kay Cristo. 

Aleluya:

San Lucas 7:16

   Ang isa ka daku nga propeta nagpakita sa tunga naton, kag ang Dios nagkari sa pagluwas sang iya mga tawo.

Ang Pagbasa sang Santos nga Ebanghelyo suno kay:

San Marcos 1:40-45

   May isa ka aruon nga nagpalapit kay Jesus, nagluhod sa iya atubangan kag nagpangayo sing bulig. Siling niya: “Kon gusto mo, sarang mo ako maayo.” Si Jesus nagbatyag sing daku nga kaluoy, nagdab-ot sa iya, kag gintandog sia. Nagsabat sia sa iya, “Gusto ko! Mag-ayo ka!” Sa gilayon wala na ang iya aro kag nagtinlo ang iya panit. Ginpaandaman gid sia dayon ni Jesus kag ginpalakat gilayon. Siling ni Jesus: “Tandai, indi mo ini pag-isugid bisan kay sin-o kundi magkadto ka sa pari kag magpatan-aw ka sa iya. Magdulot ka dayon sing halad suno sa sugo ni Moises, sa pagpamatuod sa tanan nga ikaw nag-ayo na.” Pero naglakat ang tawo kag ginpanugid niya ang pag-ayo sa iya bisan diin sia magkadto. Madamo gid ang iya ginsugiran, sa bagay nga si Jesus indi na makasulod sing dayag sa bisan diin nga banwa. Gani nagtener sia sa baw-ing nga mga lugar, pero padayon gihapon ang pagkadto sang mga tawo sa iya halin sa nagakalainlain nga mga lugar.

Pebrero 13 | Pebrero 15

Pebrero 13, 2021, Sabado, Ika-5 nga Semana sang Tuig

Liturhiya sang Pulong

Nahauna nga Balasahon -  Genesis 3:9-24

Salmo sa Pagsabat - Mga Salmo 90:2, 3-4ABC, 5-6, 12-13

Aleluya - Mateo 4:4B

Ebanghelyo - Marcos 8:1-10

Ang Pagbasa gikan sa Libro sang:

Genesis 3:9-24

Ang GINOONG Dios nagtawag sa lalaki, “Diin ka?” Ang lalaki nagsabat, “Nabatian ko ikaw sa katamnan. Nahadlok ako kag nagpanago ako sa imo kay hubo ako.” 

    Ang Dios nagpamangkot, “Sin-o ang nagsiling sa imo nga hubo ka? Nagkaon ka bala sang bunga sang kahoy nga ginsiling ko sa inyo nga indi ninyo pagkaunon?” 

    Ang lalaki nagsabat, “Ang babayi nga ginhimo mo para sa akon amo ang naghatag sa akon sang bunga sang kahoy kag nagkaon ako.” 

    Ginpamangkot sang GINOONG Dios ang babayi, “Ngaa bala ginhimo mo ini?”

    Nagsabat sia, “Ang man-og nagganyat sa akon sa pagkaon sadto.” 

    Karon ang GINOONG Dios nagsiling sa man-og, “Pagasilutan ka tungod sini. Ikaw lamang sa tanan nga mga sapat ang magaantos sini nga silot. Sugod karon magasaog ka sa imo tiyan, kag yab-ok ang imo pagakaunon samtang nagakabuhi ka. Ikaw kag ang babayi magadumtanay. Ang mga tawo kag ang mga man-og manginkaaway sa wala sing katubtoban. Ang mga tawo magadugmok sang imo ulo, kag magabuntog ka sang ila mga tikod.” 

    Kag nagsiling sia sa babayi, “Dugangan ko ang imo pag-antos sa imo pagbusong kag ang imo kasakit sa imo pagbata, pero handumon mo gihapon ang imo bana, kag sia magagahom sa imo.” 

    Kag nagsiling sia sa lalaki, “Bangod kay nagpasugot ka sa imo asawa kag nagkaon sang bunga sang kahoy nga ginsiling ko sa imo nga indi pagakaunon, ang duta pagapakamalauton tungod sa imo. Magapangabudlay ka sing tudo sa bug-os mo nga pagkabuhi, agod makapatubas ini sing tuman nga pagkaon para sa inyo. Ang duta magapatubo sing hilamon kag tunokon nga mga kahuykahoy kag mapilitan ka sa pagkaon sing mga hilamon sa latagon. Kinahanglan magpabalhas ka kag maga-obra sing tudo gid agod makapatubas sing pagkaon ang duta, tubtob magbalik ka sa duta sa diin ka maghalin, kay ginhimo ka halin sa duta, kag sa duta ikaw magabalik.” 

    Ginhingalanan ni Adam ang iya asawa kay Eva kay sia ang iloy sang bug-os nga katawuhan. Kag ang GINOONG Dios naghimo sing mga bayu gikan sa panit sang sapat para kay Adam kag sa iya asawa, kag ginpabayuan niya sila. 

    Dayon ang GINOONG Dios nagsiling, “Karon ang tawo nanginsubong sa aton, kay makahibalo na sia kon ano ang maayo kag malain. Indi gid sia pagpakaunon sang bunga sang kahoy sang kabuhi, kay kon makakaon sia sini magakabuhi sia sing walay katubtoban.” Gani ang GINOONG Dios nagtabog sa iya halin sa katamnan sang Eden kag ginpadala sia sa pagpanguma sang duta sa diin sia gindihon. 

    Gintabog sang Dios ang tawo pa gwa, kag sa nasidlangan sang katamnan sang Eden may ginbutang sia nga mga sapat nga may mga pakpak kag ang nagadabdab nga espada nga nagabalabag sa tanan nga alagyan agod nga wala sing may makapalapit sa kahoy sang kabuhi.

Salmo sa Pagsabat:

Mga Salmo 90:2, 3-4, 5-6, 12-13

(S) Ginoo, Ikaw ang amon puloy-an halin sang una.

Sa wala pa matuga ang mga bukid, sa wala pa nimo mahimo ang kalibutan, ikaw Dios sa gihapon nga wala sing katapusan. (S)

Ginamanduan mo ang mga tawo sa pagbalik sa ila ginhalinan, ginahimo mo sila liwat nga duta. Ang isa ka libo ka tuig para sa imo subong lang sang isa ka adlaw; kaangay lang sila sang kahapon nga nagligad na, subong sang isa ka malip-ot nga takna sang kagab-ihon. (S)

Ginaanod mo ang mga tawo subong sang baha; subong sila sang damgo nga wala nagadugay. Subong sila sang hilamon nga nagaulhot kon aga, nagatubo kag nagalagtom, pero pagkahapon nagakalaya kag nagakapatay. (S)

Tudloi kami kon daw ano kalip-ot sang amon kabuhi, agod nga manginmainandamon kami. O Ginoo, tubtob pa bala san-o ikaw malugpayan? Kaluoyi man ang imo mga alagad! (S)

Aleluya:

San Mateo 4:4

Indi lamang sa tinapay mabuhi ang tawo, kundi sa tagsa ka pulong nga ginahambal sang Dios.

Ang Pagbasa sang Santos nga Ebanghelyo suno kay:

San Marcos 8:1-10

Sadto nga panahon: Nagtipon liwat ang madamo nga mga tawo. Sang wala na sila sing nabilin nga kalan-on, gintawag ni Jesus ang iya mga gintuton-an kag nagsiling sa ila, “Naluoy ako sa sini nga mga tawo, kay tatlo na ini ka adlaw ang ila pag-upod sa akon kag karon wala na sila sing kalan-on. Kon papaulion ko sila nga wala makakaon basi malipong sila sa dalanon kay malayo ang ginhalinan sang iban sa ila.” Ang iya mga gintuton-an nagpamangkot sa iya, “Diin bala kita sa sini nga desierto makakita sang kalan-on nga makaigo sa sini tanan nga mga tawo?” Nagpamangkot si Jesus, “Pila pa ka bilog ang inyo tinapay?” Nagsabat sila, “Pito.” Ginsugo niya ang mga tawo nga maglingkod sa duta. Dayon ginkuha niya ang pito ka bilog nga tinapay, nagpasalamat sia sa Dios, ginpamihakpihak niya ini kag ginhatag sa iya mga gintuton-an agod ipanagtag nila sa mga tawo, kag ginpanagtag ini sang mga gintuton-an. May pila man sila ka bilog nga magagmay nga isda. Nagpasalamat si Jesus tungod sini kag iya ginsugo ang iya mga gintuton-an nga ipanagtag man ini. Ang tanan nagkalaon kag nagkalabusog, kag ang kadamuon sang mga tawo mga 4,000. Sa tapos sini ang mga nabilin gintipon sang mga gintuton-an kag napuno ang pito ka alat. Ginpapauli ni Jesus ang mga tawo, kag sa gilayon nagsakay sia sa isa ka sakayan upod ang iya mga gintuton-an kag nagkadto sila sa distrito sang Dalmanuta.

Pebrero 12 | Pebrero 14