Liturhiya sang Pulong
Nahauna nga Balasahon - Genesis 1:1-19
Salmo sa Pagsabat - Mga Salmo 104:1-2A, 5-6, 10 kag 12, 24 kag 35C
Aleluya - Mateo 4:23
Ebanghelyo - Marcos 6:53-56
Ang Pagbasa gikan sa Libro sang:
Genesis 1:1-19
Sang magsugod ang Dios sa pagtuga sang kalibutan kag sang tanan nga yara sa kahawaan, ang duta wala pa sing kahusayan. Ang mabalod nga kadagatan nga nagatabon sang tanan nalikupan sang kadudolman kag ang mabaskog nga hangin nagahuyop sa ibabaw sang tubig. Dayon ang Dios nagsiling, "Magluntad ang kapawa!" Kag sa gilayon may kapawa. Kag ang Dios nanamian sang iya nakita. Dayon ginpain niya ang kapawa sa kadudolman kag gintawag niya ang kapawa nga "Adlaw," kag ang kadudolman nga "Gab-i." Nagligad ang gab-i, kag nag-aga—amo yadto ang nahauna nga adlaw.
Dayon ang Dios nagsiling, "Magluntad ang kahawaan nga magaseparar sang tubig sa duha ka duog." Kag nahimo ini. Gani ang Dios naghimo sang kahawaan nga nagseparar sang tubig sa ibabaw kag sang tubig sa idalom. Gintawag niya ang kahawaan nga "Langit." Nagligad ang gab-i kag nag-aga--amo yadto ang ikaduha nga adlaw.
Dayon ang Dios nagsiling, "Magtingob ang tubig sa idalom sang langit sa isa ka duog agod maggwa ang duta." Kag nahimo ini. Ang mamala nga duog gintawag niya nga "Duta," kag ang tubig nga nagtingob gintawag niya nga "Kadagatan." Kag ang Dios nanamian sang iya nakita. Dayon ang Dios nagsiling, "Magpatubo ang duta sang tanan nga sahi sang tanom, ang nagapatubas sing uyas kag ang nagapamunga." Kag nahimo ini. Gani ang duta nagpatubo sang tanan nga sahi sang tanom, ang nagapatubas sing uyas kag ang nagapamunga. Kag ang Dios nanamian sang iya nakita. Nagligad ang gab-i, kag nag-aga--amo yadto ang ikatlo nga adlaw.
Dayon ang Dios nagsiling, "Magpahayag ang mga suga sa langit sa pagseparar sang adlaw sa gab-i, kag sa pagtanda sang pagsugod sang mga inadlaw, mga tinuig, kag mga panahon sa pagsimba. Magasiga sila sa langit sa paghatag kapawa sa duta." Kag nahimo ini. Gani ang Dios naghimo sang duha ka dalagku nga mga suga, ang adlaw sa paggahom sa kaadlawon kag ang bulan sa paggahom sa kagab-ihon. Ginhimo man niya ang mga bituon. Ginbutang niya ang mga suga sa langit sa pag-iwag sa duta, sa paggahom sa kaadlawon kag sa kagab-ihon, kag sa pagseparar sang kapawa sa kadudolman. Kag ang Dios nanamian sang iya nakita. Nagligad ang gab-i kag nag-aga--amo yadto ang ikap-at nga adlaw.
Salmo sa Pagsabat:
Mga Salmo 104:1-2A, 5-6, 10 kag 12, 24 kag 35C
(S) Kabay nga magkalipay ang Ginoo sa iya mga binuhatan.
Dayawa ang Ginoo, O kalag ko! O Ginoo nga akon Dios, daw ano ka gamhanan sa imo! Napanaptan ikaw sang pagkahalangdon kag himaya; ginabayuan mo ang imo kaugalingon sang kapawa. Ginhumlad mo ang mga langit kaangay sang tolda. (S)
Ginpahamtang mo sing malig-on ang duta sa iya mga sadsaran, kag indi gid ini mapahalin sa iya duog. Ginlikupan mo ini sang kadagatan subong sang kunop, kag ang tubig nagtabon sang mga kabukiran. (S)
Ginpatubod mo ang mga tuboran pakadto sa mga kapatagan, kag nag-ilig ang tubig sa gin-utlan sang mga bakulod. (S)
Sa malapit nga mga kakahuyan ang mga pispis nagapugad kag nagaambahan. (S)
Madamo nga mga butang ang imo ginhimo, O Ginoo! Daw ano kaalam sang imo paghimo sa ila tanan! Ang duta napuno sang imo mga tinuga. (S)
Kabay nga malaglag ang mga makasasala sa duta; kabay nga ang malaut mawala na! (S)
Aleluya:
San Mateo 4:23
Si Jesus nagwali sang Maayong Balita sang Ginharian, kag nagpang-ayo sang tanan nga sahi sang mga masakit kag balatian sang mga tawo.
Ang Pagbasa sang Santos nga Ebanghelyo suno kay:
San Marcos 6:53-56
Sadto nga panahon: Nagtabok si Jesus kag ang iya mga gintuton-an sa linaw kag nagdungka sa Genezaret sa diin ginpundo nila ang sakayan. Sang pagtakas nila, sa gilayon nakilala sang mga tawo si Jesus. Gani ang mga tawo nagkadto sa palibot nga mga duog kag gindala nila sa iya ang mga masakiton nga nayayungan sa ila mga hiligdaan sa bisan diin nga duog nga mabatian nila nga didto si Jesus. Kag bisan diin sia magkadto, sa mga baryo, banwa ukon uma, ang mga tawo nagdala sang ila mga masakiton sa mga tiyendahan, kag nagpakiluoy sa iya nga kon mahimo makatandog ang mga balatianon bisan sa sidsid lamang sang iya kunop, kag ang tanan nga nagtandog sini nag-ayo.
No comments:
Post a Comment