Higugmaa ang Inyo mga Kaaway kag Magpangamuyo Kamo sa Ila

Liturhiya sang Pulong

(Martes, Hunyo 16, 2020)

Martes sa Ika-onse nga Semana sang Ordinaryo nga Adlaw

Ang Pagbasa gikan sa Nahauna nga Libro sang:

Mga Hari 21:17-29

   Dayon ang Ginoo nagsiling kay Elias nga propeta halin sa Tisbe, “Kadto ka kay Haring Acab sa Samaria. Makita mo sia sa talamnan sang ubas ni Nabot nga magapanag-iya sini. Singgana sia nga ako, ang Ginoo, nagasiling sa iya, ‘Sa tapos mo mapatay ang tawo, karon kuhaon mo man bala ang iya pagkabutang?’ Singgana sia nga amo ini ang ginasiling ko, ‘Sa duog gid nga gindilapan sang mga ido ang dugo ni Nabot dira man pagadilapan sang mga ido ang imo dugo!’”
   Pagkakita ni Acab kay Elias nagsiling sia, “Nakita mo bala ako, kaaway ko?”
   Si Elias nagsabat, “Huo, nakita ko ikaw. Wala ka sing iban nga ginhimo kundi ang malaut sa atubangan sang Ginoo. Gani ang Ginoo nagasiling sa imo, ‘Padalhan ko ikaw sing kalalat-an. Pagasilhigon ko ikaw, kag dulaon ko ang tagsa ka lalaki sa imo panimalay, bata kag tigulang. Ang imo panimalay manginkaangay sang panimalay ni Haring Jeroboam nga anak ni Nabat kag ni Haring Baasa nga anak ni Ahias, kay ginpaakig mo ako sang imo pagdala sa Israel sa pagpakasala.’ Kag nahanungod kay Jezebel, ang Ginoo nagasiling nga ang mga ido magakaon sang iya lawas sa siyudad sang Jezreel. Kag ang bisan sin-o sang imo mga paryente nga mapatay sa siyudad pagakaunon sang mga ido, kag ang mapatay sa wayang pagakaunon sang mga uwak.”

   (Wala gid sing kaangay kay Acab nga naghatag sang bug-os niya nga kaugalingon sa paghimo sing kalautan sa atubangan sang Ginoo—kag ini tanan sa pagsugyot sang iya asawa nga si Jezebel. Nakahimo sia sing labing makahuloya nga sala sa iya pagsimba sa mga diosdios subong sang ginhimo sang mga Amornon nga gintabog sang Ginoo pa gwa samtang ang mga tawo sang Israel nagapasulod.)

   Sang pagkatapos ni Elias hambal, gingisi ni Acab ang iya mga bayu, gin-uba ini kag nagbayu sia sing sako. Indi sia magkaon, nagtulog sia nga nagabayu sing sako, kag nagluya ang iya lawas kag nagmasinulob-on.
   Ang Ginoo nagsiling sa propeta nga si Elias, “Nakita mo kon daw ano ang pagpaubos ni Acab sa akon atubangan? Tungod sini, indi ko sia pagpadalhan sing kalaglagan samtang buhi pa sia; padalhan ko sing kalaglagan ang panimalay ni Acab sa panahon sang iya mga anak nga lalaki.”

Salmo sa Pagsabat:

Mga Salmo 51:3-4, 5-6, 11 kag 16

(S) Maluoy ka sa amon, O Ginoo, kay nakasala kami sa imo.

Kaluoyi man ako, O Dios, tungod sang imo mapinadayunon nga gugma, panasa ang akon mga sala, tungod sang imo daku nga kaluoy! Hugasi sing lubos ang akon kalaut, kag tinloi ako sa akon sala! (S)

Ginaako ko ang akon mga kasaypanan, ginakilala ko ang akon mga sala sa tanan nga tion. Nakasala ako sa imo, sa imo gid lang, kag ginhimo ko ang ginapakalain mo. (S)
Piyunga ang imo mga mata sa akon mga sala, kag panasa ang tanan ko nga mga kalautan. Luwasa ang akon kabuhi, O Dios nga akon manlulowas, kag ibantala ko sing malipayon ang imo pagkamatarong. (S)

Aleluya:

Juan 13:34

   Ginahatag ko sa inyo ang isa ka bag-o nga sugo, maghigugmaanay kamo subong nga ako nagahigugma sa inyo.

Ang Pagbasa sang Santos nga Ebanghelyo suno kay:

San Mateo 5:43-48

   “Inyo man nabatian ang ginsiling, ‘Higugmaa ang imo mga abyan, kag dumti ang imo mga kaaway.’ Pero karon nagasiling ako sa inyo: higugmaa ang inyo mga kaaway, kag magpangamuyo kamo para sa mga nagahingabot sa inyo, agod mangin-anak kamo sang inyo Amay nga yara sa langit. Kay wala sing kapin kag kulang ang pagpasilak niya sang iya adlaw sa mga malain kag mga maayo, kag pareho man lang ang iya paghatag sing ulan sa mga matarong kag di-matarong. Ti ngaa gid abi nga ang Dios maghatag sa inyo sing balos kon ang inyo ginahigugma amo man lang ang mga tawo nga nagahigugma sa inyo? Bisan ang mga manugsokot sang buhis nagahimo man sina! Kag kon ang ginabugno ninyo ang inyo man lang mga amigo, pinasahi gid bala ina? Bisan ang mga pagano nagahimo man sina! Gani, magmanginhimpit kamo, subong nga ang inyo Amay sa langit himpit.”

Hunyo 15 | Hunyo 17