Magpakighusay Ka sa Imo Utod

Liturhiya sang Pulong

(Huwebes, Hunyo 11, 2020)

San Bernabe, Apostoles

Ang Pagbasa gikan sa mga:

Binuhatan sang mga Apostoles 11:21-26; 13:1-3

   Madamo nga mga tawo ang nagtuo kag nagliso sa Ginoo. 

   Nag-abot ini nga balita sa iglesia sa Jerusalem, gani ginpadala nila si Bernabe sa Antioquia. Sang pag-abot niya didto nakita niya kon daw ano ang pagbendisyon sang Dios sa mga tawo. Nalipay sia sang iya nakita, kag ginlaygayan niya sila nga magmatutom kag magmalig-on sa Ginoo sa ila bug-os nga tagipusoon. Si Bernabe maayo nga tawo, nga napun-an sang Espiritu Santo kag sang pagtuo. Madamo nga mga tawo ang nadala sa Ginoo. 

   Dayon nagkadto si Bernabe sa Tarso sa pagpangita kay Saulo. Sang makita niya si Saulo, gindala niya sia sa Antioquia. Sa sulod sang isa ka tuig nagpakig-upod sila sa mga katapo sang iglesia kag nagpanudlo sila sa madamo nga mga tawo. Didto sa Antioquia ang mga gintuton-an amo ang nahauna nga gintawag nga mga Cristianos. 

   May mga propeta kag mga manunodlo sa iglesia sa Antioquia nga amo sanday Bernabe, Simeon nga ginatawag Nigro, Lucio nga taga-Cirene, Manaen nga nagdaku kaupod ni Herodes nga Gobernador, kag Saulo. Sang nagaalagad sila sa Ginoo kag nagapuasa, nagsiling sa ila ang Espiritu Santo, “Paina para sa akon si Bernabe kag si Saulo, sa pagtuman sang hilikuton nga natigana ko sa ila.” Nagpuasa sila kag nagpangamuyo, kag sang matungtongan nila ang duha sang ila mga kamot, ila sila ginpalakat.

Salmo sa Pagsabat:

Mga Salmo 98:1, 2-3, 3-4, 5-6

(S) Ang Ginoo nagpakilala sa mga pungsod sang iya gahom sa pagluwas.

Magkanta sing bag-o nga ambahanon sa Ginoo kay nakahimo sia sang makatilingala nga mga butang! Paagi sa iya kaugalingon nga gahom kag balaan nga kusog, nagdaog sia. (S)

Ginbantala sang Ginoo ang iya pagdaog, ginpakilala niya sa mga pungsod ang iya gahom sa pagluwas. Gintuman niya ang iya saad sa mga tawo sang Israel, nga may mapinadayunon nga gugma kag pag-unong sa ila. (S)

Ang tanan nga katawuhan bisan diin nakakita sang pagdaog sang aton Dios! Magkanta kamo sa kalipay sa Ginoo, O bug-os nga duta; dayawa sia sa mga ambahanon kag mga paghinugyaw! (S)

Magkanta kamo sing mga pagdayaw sa Ginoo nga ginaupdan sang mga arpa, magtukar kamo sang sonata sa mga arpa! Upod sa mga trumpeta kag mga korneta, maghinugyaw kamo sa atubangan sang Ginoo, ang hari! (S)

Aleluya:

Juan 13:34

   Ginahatag ko sa inyo ang isa ka bag-o nga sugo: maghigugmaanay kamo subong nga ako nagahigugma sa inyo.

Ang Pagbasa sang Santos nga Ebanghelyo suno kay:

San Mateo 5:20-26

   Gani ginasingganan ko kamo, nga sarang lang kamo makasulod sa Ginharian sang langit kon ang inyo katutom sa pagtuman sang ginapaabot sang Dios sa inyo maglabaw sa katutom sang mga manunodlo sang Kasugoan kag sang mga Fariseo.” 

   “Inyo nabatian ang ginsiling sang una sa inyo mga katigulangan, ‘Indi ka magpatay sang tawo. Ang bisan sin-o nga makapatay pagadalhon sa hukmanan.’ Pero karon nagasiling ako sa inyo nga ang bisan sin-o nga nagakaakig sa iya utod, pagadalhon sa hukmanan; kag ang bisan sin-o nga nagapakalain sa iya utod, sa pagsiling sa iya, ‘Hoy, waay ka pulos!’ pagadalhon sa Pinakamataas nga Hukmanan; kag ang bisan sin-o nga nagasiling sa iya utod, ‘Hoy, buang!’ may katalagman nga magpaimpiyerno. Gani kon nagadala ikaw sang imo dulot sa Dios kag madumdoman mo nga ang imo utod may aligutgot sa imo, bayai anay ang imo dulot sa atubangan sang altar kag magpakighusay sa imo utod, kag ugaling magbalik ka kag maghalad sang imo dulot sa Dios. 

   “Kon may tawo nga magsumbong sa imo sa hukmanan, magpakighusay ka sa iya samtang may tion pa kag wala pa kamo makakadto sa hukmanan, kay kon didto na kamo, iya ikaw itugyan sa hukom kag ang hukom magatugyan sa imo sa gwardya, kag isulod ka sa bilangguan. Nagasiling ako sa imo, magapabilin ka didto tubtob mabayaran mo ang tanan mo nga multa.”

Hunyo 10 | Hunyo 12