"Ang Nagahigugma sang Iya Amay kag Iya Iloy sing Labi pa sa Akon Indi Takos sa Akon"

Liturhiya sang Pulong

(Domingo, Hunyo 28, 2020)

Ika-Trese nga Domingo sang Ordinaryo nga Panahon

1. Ang Pagbasa gikan sa Ikaduha nga Libro sang:

Mga Hari 4:8-11, 14-16

   Isa ka adlaw, si Eliseo nagkadto sa Sunem, sa diin nagapuyo ang manggaranon nga babayi. Gin-agda niya si Eliseo sa pagkaon upod sa iya, kag halin sadto sa tagsa ka tion nga magkadto didto si Eliseo nagakaon sia sa balay sadto nga babayi. Nagsiling sia sa iya bana, "Nahibal-an ko nga ining tawo nga nagahapit diri pirme sa aton isa ka balaan nga tawo sang Dios. Himuan naton sia sing isa ka kuwarto sa may atop, butangan naton sia sing higdaan, lamisa, pulongkoan kag suga, kag didto naton sia pahigdaon kon mag-abot sia diri."
   Sang ulihi, nag-abot si Eliseo sa Sunem kag nagsaka sia sa iya kuwarto sa pagpahuway.
   Nagpamangkot si Eliseo kay Giezi, "Ano karon ang akon himuon sa iya."
   Nagsabat si Giezi, "Wala sia sing anak nga lalaki kag ang iya bana tigulang na."
   Nagsugo si Eliseo, "Singgana sia nga magpalapit diri." Nag-abot ang babayi kag nagtindog sa puwertahan, kag si Eliseo nagsiling sa iya, "Sa sini nga panahon sa madason nga tuig magakugos na ikaw sang isa ka bata nga lalaki.”

Salmo sa Pagsabat:

Mga Salmo 89:2-3, 16-17, 18-19

(S) Magaamba ako sa gihapon, O Ginoo, sang imo malig-on nga paghigugma.

O Ginoo, magakanta ako gihapon nahanungod sang imo mapinadayunon nga gugma, sa tanan nga tion ibantala ko ang imo katutom. Nakahibalo ako nga ang imo gugma magapadayon sa walay katapusan, nga ang imo katutom wala sing katapusan subong sang langit. (S)
Bulahan ang mga tawo nga nagasimba sa imo sa mga ambahanon, nga nagakabuhi sa kapawa sang imo kaayo. Tungod sa imo nagakalipay sila sa bug-os nga adlaw, kag nagadayaw sa imo tungod sang imo kaayo. (S)
Ginahatagan mo kami sing dalagku nga mga pagdaog; sa imo kaayo ginapadaog mo kami, kay ikaw, O Ginoo, ang nagpili sang amon mangangapin; ikaw, ang Balaan nga Dios sang Israel, amo ang naghatag sa amon sang amon hari. (S)\

2. Ang Pagbasa gikan sa Sulat ni San Pablo nga Apostol, sa mga:

Taga-Roma 6:3-4, 8-11

   Kay nakahibalo gid kamo sini: sang ginbautisohan kita sa paghiusa kay Cristo Jesus, ginbautisohan man kita sa paghiusa sa iya kamatayon. Gani, sa aton pagpabautiso, ginlubong kita upod sa iya, kag nagpakig-ambit sang iya pagkamatay, agod nga, subong nga si Cristo ginbanhaw gikan sa mga minatay sang mahimayaon nga gahom sang Amay, kita man magkabuhi sang isa ka bag-o nga kabuhi.
   Kon napatay kita upod kay Cristo, nagatuo kita nga magakabuhi man kita upod sa iya. Kay nakahibalo kita nga ginbanhaw si Cristo gikan sa mga minatay kag indi na gid nga mas-a mapatay—ang kamatayon wala na sing gahom sa iya. Ang kamatayon nga iya ginkamatay sing makaisa gid lang, amo ang kamatayon sa sala, kag ang kabuhi nga iya karon ginakabuhi amo ang kabuhi sa Dios. Sa amo man nga bagay kabiga ninyo ang inyo kaugalingon subong mga patay sa sala, pero nagakabuhi sa Dios sa inyo paghiusa kay Cristo Jesus.

Aleluya:

1 Pedro 2:9

   Pero kamo inyo pinili nga rasa, harianon nga mga pari, balaan nga pungsod, mga tawo nga iya gid sang Dios, pinili sa pagbantala sang makatilingala nga mga buhat sang Dios, nga nagtawag sa inyo gikan sa kadudolman pakadto sa iya makatilingala nga kapawa.

Ang Pagbasa sang Santos nga Ebanghelyo suno kay:

San Mateo 10:37-42

   “Ang nagahigugma sang iya amay ukon iya iloy sing labi pa sa akon, indi takos sa akon; ang nagahigugma sa iya mga kabataan sing labi pa sa akon, indi takos sa akon. Ang wala nagapas-an sang iya krus kag nagasunod sa akon, indi takos sa akon. Ang nagapaniguro sang iya kabuhi madulaan sini; kag ang nagadula sang iya kabuhi tungod sa akon makita niya ini.”
   “Ang nagabaton sa inyo nagabaton sa akon; kag ang nagabaton sa akon nagabaton man sang nagpadala sa akon. Ang nagabaton sang mensahero sang Dios tungod kay mensahero sia sang Dios may parti sang balos nga para sa mensahero sang Dios. Ang nagabaton sang matarong nga tawo tungod kay sia matarong may parti sang balos nga para sa matarong. Dumdoma ninyo ini! Ang nagapainom sang bisan isa lamang ka baso nga mabugnaw nga tubig sa isa sining akon pinakakubos nga gintuton-an, tungod kay gintuton-an ko sia, magabaton gid sang iya balos.”

Hunyo 27 | Hunyo 29