"Ang Cristo Magagikan sa Kaliwat ni David"

Liturhiya sang Pulong

(Biyernes, Hunyo 5, 2020)

San Bonifacio, Obispo kag Martir

Ang Pagbasa gikan sa Ikaduha nga Sulat ni San Pablo nga Apostol, sa kay:

Timoteo 3:10-17

   Pero ikaw imo nagsunod sang akon pagtulon-an, pagginawi kag tinutoyo sa kabuhi; nakita mo ang akon pagtuo, pagpailob, paghigugma, pagbatas, mga paghingabot sa akon kag ang akon mga pag-antos. Nahibaluan mo ang tanan nga natabo sa akon sa Antioquia, sa Iconio kag sa Listra, kon daw ano ang akon pagbatas sang mga paghingabot! Pero sa sini tanan ginluwas ako sang Ginoo. Ang tanan nga luyag magkabuhi sing diosnon sa paghiusa kay Cristo Jesus pagahingabuton. Pero ang malaut nga mga tawo kag ang mga malimbungon magamalain pa gid. Patalangon nila ang iban kag sila patalangon man. Pero ikaw imo, magpadayon sa mga kamatuoran nga gintudlo sa imo kag imo ginatuohan sing malig-on. Kay nakahibalo ka kon sin-o ang imo mga manunodlo, kag dumdoma nga sugod sang bata pa ikaw, nakahibalo na ikaw sang Balaan nga mga Kasulatan, nga makahatag sa imo sing kaalam padulong sa kaluwasan paagi sa pagtuo kay Cristo Jesus. Kay ang bug-os nga Kasulatan ginbugna sang Dios kag mapuslanon sa pagtudlo sang kamatuoran, sa pagsabdong sang sala, sa pagtadlong sang mga sayop, kag sa pagtudlo sang matarong nga pagkabuhi, agod nga ang tawo nga nagaalagad sa Dios masangkapan kag mangintakos sa paghimo sang tanan nga sahi sang maayo nga buhat.

Salmo sa Pagsabat:

Mga Salmo 119:157, 160, 161, 165, 166, 168

(S) O Ginoo, may bug-os nga kalig-onan sila nga mga nagahigugma sang imo kasugoan.

Madamo ang akon mga kaaway kag mga manugpigos, pero wala ako nagakalipat sa pagtuman sang imo mga kasugoan. (S)

Ang alibutod sang imo kasugoan kamatuoran, kag ang tanan mo nga matarong nga mga pagsulondan nagapadayon sa walay katubtoban. (S)

Ang gamhanan nga mga tawo nagahingabot sa akon sing indi matarong pero ang imo kasugoan amo ang akon ginatahod. (S)

Ang mga nagahigugma sang imo kasugoan may bug-os nga kalig-onan, kag wala sing may makapukan sa ila. (S)

O Ginoo, nagahulat ako sa imo sa pagluwas sa akon, kag ginahimo ko ang imo ginasugo. (S)

Ginatuman ko ang imo mga sugo kag mga pagtudlo; makita mo ang tanan ko nga ginahimo. (S)

Aleluya:

Juan 14:23

   Ang nagahigugma sa akon magatuman sang akon pulong, kag ang akon Amay magahigugma sa iya kag kami magakadto sa iya.

Ang Pagbasa sang Santos nga Ebanghelyo suno kay:

San Marcos 12:35-37

   Sang nagapanudlo si Jesus sa templo, nagpamangkot sia, “Paano bala ang pagsiling sang mga manunodlo sang Kasugoan nga ang Cristo magagikan sa kaliwat ni David? Kay ang Espiritu Santo nagbugna kay David sa pagsiling:
     ‘Ang Ginoo nagsiling sa akon Ginoo,
     Lingkod ka diri sa akon tuo,
     Tubtob nga mabutang ko
     Ang imo mga kaaway
     Sa idalom sang imo mga tiil.’
Karon, paano bala ang pagkahimo nga ang Cristo kaliwat ni David, kon si David mismo nagtawag sa iya nga ‘Ginoo’?”
   Ang madamo nga mga tawo nanamian magpamati kay Jesus. 

Hunyo 4 | Hunyo 6