"Indi Kamo Magkahadlok - kay Mahal pa Kamo Kaayo sa mga Magamay nga Pispis"

Liturhiya sang Pulong

(Domingo, Hunyo 21, 2020)

Ikadose nga Domingo sang Ordinaryo nga Adlaw

1. Ang Pagbasa gikan sa Libro ni:

Jeremias nga Propeta 20:10-13 

   Nabatian ko ang mga tawo nga nagahinuringhoring, “Si Kakugmat yara bisan diin! Isugid ta sia sa mga awtoridad!” Bisan ang akon suod nga mga abyan nagahulat sang akon pagkapukan. Nagasiling sila, “Ayhan sarang sia malimbungan, dayon madakop naton sia kag matimalusan.” Pero ikaw, O Ginoo, yara sa akon luyo, makusog kag gamhanan, kag ang tanan nga nagahingabot sa akon mapukan, indi gid sila magdaog. Mahuy-an gid sila sing daku, kay indi sila magmadinalag-on, ang ila kahuloy-an manginwalay katapusan, kag indi gid malimtan. Pero, O Ginoo nga Makagagahom, ginatilawan mo ang mga tawo sa matarong nga paagi, nahibaluan mo ang sulod sang ila mga tagipusoon kag hunahona. Gani patan-awa ako sang imo pagtimalos sa akon mga kaaway, kay gintugyan ko sa imo mga kamot ang akon kahimtangan. Mag-amba sa Ginoo! Dayawa ang Ginoo! Ginaluwas niya ang ginapigos sa gahom sang malaut nga mga tawo. 

Salmo sa Pagsabat:

Mga Salmo 69:8-10, 14, 17, 33-35

(S) Sabta ako, O Dios, sa tion nga luyag mo, tungod kay ginatuman mo ang imo saad sa pagluwas.

Tungod sa imo ginapasipalahan ako, kag ginpakahuy-an gid ako. Kaangay ako sang dumoluong sa akon mga utod, daw sumalayo ako sa akon panimalay. Ang akon katutom sa imo Templo daw kalayo nga nagadabadaba sa sulod nakon, ang mga pagpasipala nga ginpatuhoy sa imo nagtupa sa akon. (S)

Pero ako akon, magapangamuyo ako sa imo, O Ginoo, sa tion nga luyag mo, O Dios! Sabta ako, O Ginoo, tungod sang kaayo sang imo mapinadayunon nga gugma, balikda ako suno sa imo daku nga kaluoy! (S)

Kon makita ini sang mga imol, magakalipay sila; ang nagasimba sa Dios mapalig-on. Ang Ginoo nagapamati sa mga imol, kag wala niya ginakalimti ang iya mga tawo nga nabilanggo. Dayawa ang Dios, O langit kag duta, O mga dagat kag ang tanan nga mga nagapuyo sa inyo! (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 5:12-15

   Ang sala nagsulod sa kalibutan paagi sa isa ka tawo, kag ang iya sala nagdala sing kamatayon. Gani, ang kamatayon nagaabot sa tanan nga mga tawo, kay ang tanan nga mga tawo nagpakasala. Ang sala yari na sa kalibutan sa wala pa mahatag ang Kasugoan. Pero kon wala sing kasugoan, ang sala wala ginaisip batok sa tawo. Pero halin sang tiyempo ni Adam tubtob kay Moises, ang kamatayon naggahom sa tanan nga mga tawo, bisan pa sa mga wala makasala, subong sang ginhimo ni Adam sang paglapas niya sang sugo sang Dios. 

   Si Adam larawan sang isa nga magakari. Pero sila nga duha indi pareho. Kay ang regalo sang Dios indi mapaanggid sa sala ni Adam. Matuod gid nga tungod sang sala sadtong isa ka tawo, madamo ang napatay. Pero ang grasya sang Dios sobra pa sini kag amo man ang iya bugana nga regalo para sa madamo nga mga tawo, paagi sa grasya sang isa ka tawo nga amo si Jesu-Cristo. 

Aleluya:

Juan 15:26, 27

   Ang Espiritu sang kamatuoran magasaksi nahanungod sa akon, siling sang Ginoo; kag kamo man magapanaksi.

Ang Pagbasa sang Santos nga Ebanghelyo suno kay:

San Mateo 10:26-33

   “Gani, indi kamo magkahadlok sa mga tawo. Wala sing ginatabunan nga indi mabuksan, kag wala sing sekrito nga indi mabuyagyag. Ang ginasiling ko sa inyo sa madulom ihambal ninyo sa masanag, kag ang inyo mabatian sa hutik isinggit ninyo gikan sa atop sang mga balay. Indi kamo magkahadlok sa mga makapatay sang lawas pero indi makapatay sang kalag; sa baylo magkahadlok kamo sa Dios nga makalaglag sang lawas kag kalag didto sa impiyerno. Indi bala nga tagduha singko lang ang magamay nga pispis? Pero wala sing isa sa ila nga mahulog sa duta nga wala sing pahanugot sang inyo Amay. Kag kon nahanungod sa inyo, bisan pa ang mga buhok sa inyo ulo naisip tanan. Gani indi kamo magkahadlok, kay mahal pa kamo kaayo sa mga magamay nga pispis!”

   “Ang bisan sin-o nga magkilala sa akon sa atubangan sang mga tawo, kilalahon ko man sia sa atubangan sang akon Amay sa langit. Pero ang bisan sin-o nga indi magkilala sa akon sa atubangan sang mga tawo, indi ko man sia pagkilalahon sa atubangan sang akon Amay nga yara sa langit.” 

   

Hunyo 20 | Hunyo 22