"Ginahigugma mo bala ang Nabanhaw nga si Ginoong Jesus Labaw sa Tanan?"

Liturhiya sang Pulong

(Domingo, Mayo 5, 2019)

 1. Ang Pagbasa gikan sa:

Binuhatan sang mga Apostoles 5:27-32, 40-41

   Ginpasulod nila ang mga apostoles kag ginpaatubang sa Konsilyo, kag ang Pinakamataas nga Pari nagpamangkot sa ila nga nagasiling, “Ginmanduan gid namon kamo nga indi kamo magpanudlo sa ngalan sini nga tawo, pero tan-awa ang inyo ginhimo! Ginpalapnag ninyo ang inyo pagtulon-an sa bug-os nga Jerusalem kag nagasiling pa kamo nga kami ang may salabton sa iya kamatayon!”

   Nagsabat si Pedro kag ang iya mga kaupdanan, “Ang Dios amo ang dapat namon tumanon kag indi ang mga tawo. Ang Dios sang aton mga ginikanan nagbanhaw kay Jesus nga inyo ginpatay paagi sa paglansang sa krus. Kag ginbayaw sia sa tuo sang Dios subong nga Pangulo kag Manlulowas, sa paghatag sa mga tawo sang Israel sang kahigayunan sa paghinulsol agod nga mapatawad ang ila mga sala. Kami mga saksi sini nga mga butang—kami kag ang Espiritu Santo nga ginahatag sang Dios sa mga nagatuman sa iya.”

   Ginpatawag nila ang mga apostoles, ginpabunal kag ginpaandaman nga indi na gid sila maghambal sa ngalan ni Jesus, kag dayon ginbuy-an sila. Naghalin ang mga apostoles sa Konsilyo nga nagakalipay gid, kay ginkabig sila sang Dios nga takos sa pag-antos tungod sa ngalan ni Jesus.

Salmo sa Pagsabat:

Mga Salmo 30:2, 4, 5-6, 11-12, 13

(S) O Ginoo, bansagon ko ikaw, kay ginluwas mo ako.

Nagadayaw ako sa imo, O Ginoo, tungod kay ginluwas mo ako, kag wala ka magtugot nga hikayan ako sang akon mga kaaway. Ginpabalik mo ako halin sa kalibutan sang mga patay, kaupod ako sa mga nagpanaog sa kadadalman, pero ginbalik mo ang akon kabuhi. (S)
Magkanta kamo sing pagdayaw sa Ginoo, kamo nga matutom niya nga mga tawo! Dumdoma ninyo ang ginhimo sang Ginoo nga balaan, kag inyo sia pasalamatan! Ang iya kaakig wala nagadugay, pero ang iya kaayo nagapadayon sa bug-os nga kabuhi. Ayhan may paghinibi sa kagab-ihon, pero nagaabot ang kalipay sa kaagahon. (S)
Pamatii ako kag kaluoyi, O Ginoo! Buligi man ako, O Ginoo!” Ginbayluhan mo ang akon kalisod sang sinaot sa kalipay, gin-uba mo ang akon bayu sang paglalaw, kag imo ako ginpasuksokan sang bayu sang kalipay. O Ginoo, ikaw ang akon Dios, magapasalamat ako sa imo sa wala sing katapusan. (S)

2. Ang Pagbasa gikan sa:

Bugna kay San Juan 5:11-14

   Nagtan-aw ako liwat, kag nabatian ko ang mga anghel, nga linibo kag minilyon sila tanan. Ang mga anghel, ang apat ka buhi nga mga tinuga, kag ang mga katigulangan, nagtindog sa palibot sang trono, kag nagkanta sing mabaskog: 

“Ang Cordero nga gin-ihaw

Takos sa pagbaton sang gahom,

Manggad, kaalam, kag kusog,

Kadungganan, himaya kag pagdayaw!” 

   Kag nabatian ko ang tagsa ka tinuga sa langit, sa duta, sa idalom sang duta, sa dagat—ang tanan nga yara sa ila—nga nagakanta: 

“Sa iya nga nagalingkod sa trono, 

Kag sa Cordero, 

Ang pagdayaw kag kadungganan, 

Himaya kag gahom, 

Sa walay katubtoban!” 

   Ang apat ka buhi nga mga tinuga nagsabat, “Kabay pa!” Kag ang mga katigulangan nagluhod kag nagsimba.

Aleluya:

Nabanhaw si Kristo, ang tagtuga sang tanan, kag nagkaluoy sa tanan nga mga katawohan. 

Ang Pagbasa sang Santos nga Ebanghelyo suno kay:

San Juan 21:1-19

   Sa tapos sini nga mga hitabo si Jesus nagpakita liwat sa iya mga gintuton-an didto sa Linaw sang Tiberias. Amo ini ang paagi sang iya pagpakita. Si Simon Pedro, si Tomas nga gintawag ang Kapid, si Natanael nga taga-Cana sa Galilea, ang mga anak ni Zebedeo, kag ang duha pa gid ka mga gintuton-an ni Jesus nagatilipon didto. Si Simon Pedro nagsiling sa ila, “Mangisda ako.” 

   Nagsiling sila sa iya, “Maupod kami sa imo.” Gani naglakat sila kag nagsakay sa sakayan, pero sa sadto nga gab-i wala gid sila sing may nakuha. Sang nagabutlak na ang adlaw, si Jesus didto nagatindog sa baybayon, pero ang mga gintuton-an wala makakilala nga si Jesus yadto. Dayon nagsiling sia sa ila, “Mga anak, may kuha bala kamo?” 

   “Wala gid,” sabat nila. 

   Nagsiling sia sa ila, “Iladlad ninyo ang inyo sahid sa tuo nayon sang sakayan, kag may makuha kamo.” Gani ginladlad nila ang sahid kag indi sila makasarang sa pagbatak, kay sa pagkadamo sang ila nakuha nga isda. 

   Ang gintuton-an nga hinigugma ni Jesus nagsiling sa kay Pedro, “Ang Ginoo ini!” Sang pagkabati ni Simon Pedro nga ang Ginoo yadto, gintampi niya ang iya bayu (kay gin-uba niya ini) kag nagsugbo sa tubig. Ang iban nga mga gintuton-an nga yadto sa sakayan nagdungka nga nagabutong sang sahid nga puno sang mga isda, kay ang ila kalayuon sa baybayon mga 50 man lang ka dupa. Sang pagtakas nila, may nakita sila nga nagatumpok nga baga nga may ginasugba nga isda kag may tinapay nga natungtong didto. Dayon si Jesus nagsiling sa ila, “Dala kamo diri sang isda nga bag-o lang ninyo nakuha.” 

   Si Simon Pedro nagsaka sa sakayan kag ginbutong niya ang sahid pa higad nga puno sang dalagku nga mga isda nga ang kadamuon 153 ka bilog. Wala magisi ang sahid bisan tama ini kadamo. 

Ginbutong niya ang sahid pa higad nga puno sang dalagku nga mga isda. (21:11)

Si Jesus nagsiling sa ila, “Dali kamo kag magpamahaw.” Wala gid sing isa sang mga gintuton-an nga nangahas sa pagpamangkot sa iya kon sin-o sia, kay nakilala nila nga sia amo ang Ginoo. Gani nagpalapit si Jesus, nagkuha sang tinapay, kag ginhatagan sila. Amo man ang ginhimo niya sa isda. 

   Ikatlo na ini nga pagpakita ni Jesus sa iya mga gintuton-an sa tapos sia mabanhaw. 

   Sang nakakaon na sila, nagsiling si Jesus kay Simon Pedro, “Simon, anak ni Juan, ginahigugma mo bala ako sing labi sini sa ila?” 

   Nagsabat sia, “Huo, Ginoo, nakahibalo gid ikaw nga ako nagahigugma sa imo.” 

   Si Jesus nagsiling sa iya, “Tatapa ang akon mga cordero.” Sa liwat si Jesus nagsiling sa iya, “Simon, anak ni Juan, ginahigugma mo bala ako?” 

   Nagsabat sia, “Huo, Ginoo, nakahibalo gid ikaw nga ako nagahigugma sa imo.” 

   Si Jesus nagsiling sa iya, “Tatapa ang akon mga karnero.” Sa ikatlo ka bes nagsiling si Jesus, “Simon, anak ni Juan, ginahigugma mo bala ako?” 

   Si Pedro nagkasubo kay katatlo na sia pamangkuton ni Jesus, “Ginahigugma mo bala ako?” Kag nagsiling si Pedro sa iya, “Ginoo, ikaw nakahibalo sang tanan, kag ikaw nakahibalo gid nga ako nagahigugma sa imo!” 

   Si Jesus nagsiling sa iya, “Tatapa ang akon mga karnero. Nagasiling ako sa imo sang matuod: sang ikaw bataon pa, nagawagkos ka sang imo kaugalingon kag nagakadto sa bisan diin nga luyag mo; pero kon tigulang ka na, untayon mo ang imo mga kamot, kag iban na ang magawagkos sa imo kag magadala sa imo sa diin indi ka luyag magkadto.” (Ginsiling ini ni Jesus sa pagpahayag kon sa ano nga paagi mapatay si Pedro, kag magahimaya sa Dios.) Dayon nagsiling si Jesus sa iya, “Sunod ka sa akon!”

Mayo 4 | Mayo 6