Naghimbon sila sa Pagpatay kay Jesus

Liturhiya sang Pulong

(Sabado, Abril 13, 2019)

Ang Pagbasa gikan sa Libro ni:

Ezequiel nga Propeta 37:21-28

Dayon singgana sila nga ako, ang Ginoo nga Gamhanan, magakuha sang mga Israelinhon halin sa mga kapungsoran nga nagbihag sa ila, kag tipunon ko sila sing tingob kag dalhon pabalik sa ila kaugalingon nga duta. Himuon ko sila nga isa ka pungsod sa duta, sa mga kabukiran sang Israel. May isa lamang ka hari nga magagahom sa ila, kag indi na sila manginduha ka pungsod, ukon ginharian nga napihak. Indi na nila pagdagtaan ang ila kaugalingon sang makangilil-ad nga mga dios-dios, ukon mansahan ang ila kaugalingon sang sala. Luwason ko sila sa tanan nila nga pagpakasala kag pagluib sa akon. Tinluan ko sila, kag sila mangin-akon mga tawo kag ako mangin-ila Dios. Ang akon alagad nga si David mangin-ila hari. Magaisa sila sa idalom sang isa ka hari, kag tumanon nila sing matutom ang akon mga kasugoan. Magapuyo sila sa duta nga akon ginhatag sa akon alagad nga si Jacob, sa duta sa diin nagpuyo ang ila mga katigulangan. Didto sila magapuyo, kag subong man ang ila mga kabataan kag ang ila mga kaliwat sa walay katapusan. Ang akon alagad nga si David magahari sa ila sa walay katapusan. Magahimo ako sing kasugtanan nga magagarantiya sang ila kauswagan sa walay katapusan. Padamuon ko sila, kag ibutang ko ang akon Templo sa ila duta, sa diin magapabilin ini sa walay katapusan. Magapuyo ako didto upod sa ila kag ako mangin-ila Dios, kag sila mangin-akon mga tawo. Kon mabutang ko ang akon Templo didto, kag magpabilin sa tunga nila sa walay katapusan, ang mga kapungsoran makahibalo nga ako, ang Ginoo, naghimo sang Israel nga mangin-akon kaugalingon.”

Kalantahon sa Pagsabat:

Jeremias nga Propeta 31:10, 11-12, 13

(S) Ang Ginoo magabantay sa aton subong manugbantay sang iya panong. 

Ang Ginoo nagasiling, "Mga kapungsoran magpamati kamo sa akon kag ibantala ang akon mga pulong sa malayo nga mga baybayon. Ginpaalaplaag ko ang akon mga tawo, pero pagatipunon ko sila, kag magabantay sa ila subong sang pagbantay sang isa ka manugbantay sa iya mga panong. (S)
Ginhilway ko ang mga tawo sang Israel, kag ginluwas sila gikan sa isa ka gamhanan nga pungsod. Magakari sila kag magaamba tungod sa kalipay sa Bukid sang Sion, kag malipay sila sang akon mga regalo, nga trigo, bino, kag lana sang olivo, mga karnero kag baka. (S)
Dayon ang mga dalaga magasaot kag magakinalipay, kag ang mga lalaki, pamatan-on kag tigulang, magahinugyaw. Lipayon ko sila kag bayluhan ko ang ila kalisod sa kalipay, ang ila kasubo sa kasadya. (S)

Sa Wala pa ang Ebanghelyo:

Ezequiel 18:31 

Ang Ginoo nagasiling: Bayai ninyo ang tanan ninyo nga mga sala maghimo kamo para sa inyo kaugalingon sing isa ka bag-o nga kasingkasing kag bag-o nga espiritu.

Ang Pagbasa sang Santos nga Ebanghelyo suno kay:

San Juan 11:45-57

Ang kalabanan sang mga Judio nga nag-abot sa pagduaw kay Maria, nakakita sang ginhimo ni Jesus, kag nagtuo sila sa iya. Pero may iban sa ila nga nagbalik sa mga Fariseo kag nagsugid sang ginhimo ni Jesus. Gani ang mga Fariseo kag ang pangulo nga mga pari nagpakigkita sa konsilyo kag nagsiling, “Ano ang aton himuon, kay gamhanan nga mga buhat ang ginahimo sini nga tawo? Kon aton lang sia pabay-an, ang tanan magatuo sa iya, kag ang mga manugdumala nga Romanhon magakari kag magalaglag sang aton templo kag sang bug-os naton nga pungsod!” Ang isa sa ila nga ginahingalanan kay Caifas, ang Pinakamataas nga Pari sadto nga tuig, nagsiling, “Wala gid kamo sing may nahibal-an! Wala bala kamo makatalupangod nga maayo para sa inyo nga may isa nga kinahanglan mapatay tungod sa mga tawo, sang sa malaglag ang bug-os nga pungsod?” (Wala niya ini ginsiling nga iyaiya lang, kundi subong Pinakamataas nga Pari sina nga tuig, ginatagna niya nga si Jesus dapat mapatay para sa mga Judio. Indi lamang para sa ila, kundi man sa pagtipon sing tingob sang tanan nga nag-alaplaag nga mga anak sang Dios.) Gani sugod sadto nga adlaw, ang mga pangulo sang mga Judio naghimbon sa pagpatay kay Jesus. Gani si Jesus wala na magpasayangsayang sa Judea, kundi nagkadto sia sa isa ka banwa nga ginatawag Efraim malapit sa desierto. Didto nagtener sia upod sa iya mga gintuton-an. Malapit na ang Piesta sang Pascua, nga piesta sang mga Judio, kag madamo nga mga taga-uma ang nagpa-Jerusalem sa pagtuman sang kinabatasan nga pagpaninlo sa wala pa ang piesta. Ginpangita nila si Jesus, kag sang pagtipon nila sa templo nagpinamangkutanay sila, “Ano bala sa banta ninyo? Mamiesta ayhan sia ukon indi?” Ang pangulo nga mga pari kag ang mga Fariseo nagmando nga ang bisan sin-o nga nakahibalo kon diin si Jesus magsugid, agod madakop nila sia.

Abril 12 | Abril 14