"Maghigugmaanay Kamo subong nga Ako Nagahigugma sa Inyo"

Liturhiya sang Pulong

(Domingo, Mayo 19, 2019)

1. Ang Pagbasa gikan sa:

Binuhatan sang mga Apostoles 14:21-27

   Ginwali ni Pablo kag ni Bernabe ang Maayong Balita sa Derbe kag madamo ang ila nakonbertir. Sa tapos sini nagbalik sila sa Listra kag nagpadayon sa Iconio, kag dayon nagkadto sila sa Antioquia sang Pisidia. Ginpabakod nila ang mga tumoluo kag ginpaisog sila sa pagpadayon sa pagtuo. Sa ila pagpanudlo nagsiling sila, “Madamo nga mga kabudlayan ang aton dapat pagaagihan sa pagsulod sa Ginharian sang Dios.” Nagpili sila sa tagsa ka iglesia sing mga katigulangan nga magdumala sa ila kag paagi sa mga pagpangamuyo kag pagpuasa gintugyan nila sila sa Ginoo nga ila gintuohan.

   Kag sang nakaagi sila sa mga duog nga sakop sang Pisidia, nagkadto sila sa Panfilia. Nagwali sila sa Perge kag nagdulhog sila sa Atalia. Halin didto nagpanakayon sila pabalik sa Antioquia, ang duog sa diin gintugyan sila sa grasya sang Dios tungod sang bulohaton nga karon natapos na nila.

   Sang pag-abot nila sa Antioquia, gintipon nila ang tanan nga mga kautoran kag ginsugid nila ang tanan nga ginhimo sang Dios paagi sa ila, kag kon ano ang pagbukas sang Dios sang kahigayunan, agod magtuo ang mga Gentil.

Salmo sa Pagsabat:

Mga Salmo 145:8-9, 10-11, 12-13

(S) O Dios kag hari ko, dayawon ko ang Imo ngalan sing walay katapusan. 

Ang Ginoo mahigugmaon kag maluloy-on, indi madali mangakig kag puno sang mapinadayunon nga paghigugma. Maayo sia sa tanan kag maluloy-on sa tanan nga Iya ginhimo. (S)
Ang tanan mo nga mga tinuga, O Ginoo, magadayaw sa imo, kag ang imo mga tawo magapasalamat sa imo! Magahambal sila sang himaya sang imo ginharian, kag magasugid sila sang imo gahom. (S)
Agod ang tanan nga mga tawo makahibalo sang imo gamhanan nga mga buhat, kag sabg mahimayaon nga pagkahalangdon sang imo ginharian. Ang imo ginharian wala sing katapusan, kag ikaw hari sa walay katubtoban. (S)

2. Ang Pagbasa gikan sa:

Bugna kay San Juan 21:1-5

   Dayon nakita ko ang bag-o nga langit kag ang bag-o nga duta. Ang nahauna nga langit kag ang nahauna nga duta wala na kag ang dagat nawala. Kag nakita ko ang Balaan nga Siyudad, ang bag-o nga Jerusalem, nga nagapanaog halin sa langit gikan sa Dios, nga naaman kag handa na, subong sang isa ka nagatrahe nga nobya nga nagasugata sa iya bana. Nabatian ko ang mabaskog nga tingog nga nagahambal halin sa trono, “Karon, ang puloy-an sang Dios yara sa mga tawo! Magapuyo sia upod sa ila, kag sila mangin-iya mga tawo. Ang Dios gid magapakighiupod sa ila, kag sia mangin-ila Dios. Pagapahiran niya ang tanan nga mga luha sa ila mga mata. Wala na sing kamatayon, kasubo, paghibi, ukon kasakit. Ang daan nga mga butang wala na.”

   Dayon ang nagalingkod sa trono nagsiling, “Karon, ginabag-o ko ang tanan nga mga butang!” Nagsiling man sia sa akon, “Isulat ini nga mga pulong kay ini matuod kag masaligan.”

  

Aleluya:

San Juan 13:34

Isa ka bag-o nga sugo ginahatag Ko sa inyo siling sang Ginoo: Maghigugmaanay kamo subong nga ginhigugma Ko kamo. 

Ang Pagbasa sang Santos nga Ebanghelyo suno kay:

San Juan 13:31-33, 34-35

   Sang makahalin na si Judas, si Jesus nagsiling, “Karon ginahimaya ang Anak sang Tawo, kag paagi sa iya, ginahimaya ang Dios. Kag kon ang Dios ginahimaya paagi sa iya, dayon ang Dios mismo magahimaya sang Anak sang Tawo, kag himuon niya ini sa gilayon. Mga anak ko, indi na ako makapakig-upod sa inyo sing madugay. Magapangita kamo sa akon, pero isiling ko sa inyo ang ginsiling ko man sa mga Judio, ‘Kamo indi makakadto sa akon pagakadtuan.’ Ginahatag ko sa inyo ang isa ka bag-o nga sugo: maghigugmaanay kamo. Subong nga ako nagahigugma sa inyo, sa amo man nga bagay dapat kamo maghigugmaanay. Kon nagahigugmaanay kamo, ang tanan nga mga tawo makahibalo nga mga gintuton-an ko kamo.”

Mayo 18 | Mayo 20