"Kon indi ko Makita - indi ako Magtuo"

Liturhiya sang Pulong

(Domingo, Abril 28, 2019)

1. Ang Pagbasa gikan sa:

Binuhatan sang mga Apostoles 5:12-16

Madamo nga mga milagro kag katingalahan nga mga buhat ang ginhimo sang mga apostoles sa mga tawo. Nagtipon sing tingob ang mga tumoluo sa Portico ni Salomon. Wala sing may nangisog sa pagsimpon sa ila grupo, bisan pa nga ginatahod sila sang mga tawo. Pero nagadugang nga nagadugang ang mga nagtuo sa Ginoo, mga lalaki kag mga babayi. Tungod sang mga binuhatan sang mga apostoles, ang mga masakiton gindala sa dalan kag ginbutang sa higdaan kag mga banig agod nga kon mag-agi si Pedro maagyan sila bisan na lang sang iya landong. 

. . . agod nga kon mag-agi si Pedro maagyan sila bisan na lang sang iya landong. (5:15)

Madamo nga mga tawo ang nag-abot halin sa mga kabanwahanan sa palibot sang Jerusalem. Gindala nila ang ila mga masakiton kag ang may malaut nga mga espiritu kag ini sila tanan nag-alayo.

Salmo sa Pagsabat:

Mga Salmo 118:2-4, 13-15, 22-24

(S) Magpasalamat sa Ginoo kay maayo Sia kag ang Iya gugma nagapadayon sa gihapon. 

Magsiling ang mga tawo sang Israel, "Ang iya gugma nagapadayon sa gihapon." Magsiling ang mga pari sang Dios, "Ang Iya gugma nagapadayon sa gihapon." Magsiling ang tanan nga nagasimba sa iya, "Ang Iya gugma nagapadayon sa gihapon." (S)
Ginsalakay ako sing mabaskog kag daw malutos na ako, pero gintabangan ako sang Ginoo. Ang Ginoo nagahimo sa akon nga gamhanan kag makusog; Sia amo ang akon manluluwas! Pamatii ang paghinugyaw sang pagdaog sa tolda sang mga tawo sang Dios. Ang gamhanan nga kusog sang Ginoo naghimo sini. (S)
Ang bato nga ginsikway sang mga manunokod, nanginpamakod nga bato. Ang Ginoo amo ang naghimo sini, daw ano ka makatilingala ini tan-awon! Daw ano katahom sini nga adlaw nga ginhatag sa aton sang Ginoo; magkalipay kita kag maghinugyaw! (S)

2. Ang Pagbasa gikan sa Libro sang:

Bugna ni San Juan 1:9-11, 12-13, 17-19

Ako si Juan, nga inyo utod, kag sa paghiusa kay Jesus, nagapakig-ambit ako sa inyo sa pag-antos, kag sa iya Ginharian, kag sa pagbatas. Gintapok ako sa isla sang Patmos, tungod sang akon pagbantala sang pulong sang Dios kag sang kamatuoran nga ginpahayag ni Jesus. Sa adlaw sang Ginoo gingamhan ako sang Espiritu, kag nabatian ko ang mabaskog nga tingog nga daw tunog sang trumpeta, nga nagahambal sa likod ko. Amo ini ang iya ginsiling, “Isulat ang imo makita, kag ipadala ang libro sa sining pito ka mga iglesia: sa Efeso, Smirna, Pergamo, Tiatira, Sardis, Filadelfia, kag Laodicea.” Nagliso ako sa pagtan-aw kon sin-o ang nagahambal sa akon. May nakita ako nga pito ka mga kandilerohan nga bulawan. Sa tunga sang mga kandilerohan may nagatindog nga daw isa ka tawo nga nagabayu sing malaba tubtob sa iya tiil, kag may wagkos nga bulawan sa iya dughan. Sang pagkakita ko sa iya, natumba ako sa iya tiilan subong sang patay nga tawo. Gintandog niya ako sang iya tuo nga kamot kag ginsingganan, “Indi ka magkahadlok! Ako ang nahauna kag ang katapusan. Ako ang nagakabuhi! Napatay ako, pero tan-awa, karon nagakabuhi ako sa walay katapusan. May gahom ako sa kamatayon kag sa kalibutan sang mga patay. Gani isulat ang mga butang nga imo makita, ang mga butang karon, kag ang mga butang nga mahanabo sa ulihi.

Aleluya:

Juan 20:29 

Nagatuo ka bala, Tomas, kay nakita mo ako?, siling sang Ginoo. Bulahan ang mga nagatuo bisan wala sila makakita.

Ang Pagbasa sang Santos nga Ebanghelyo suno kay:

San Juan 20:19-31

Sang sirom na sadto nga adlaw nga amo ang nahauna nga adlaw sang simana, nagtipon sa isa ka balay ang mga gintuton-an kag nagpanarangka sila, kay nahadlok sila sa mga pangulo sang mga Judio. Dayon si Jesus nag-abot kag nagtindog sa tunga nila. Nagsiling sia, “Paghidait sa inyo.” Sang makasiling sia sini, ginpakita niya sa ila ang iya mga kamot kag ang iya kilid. Daku gid ang kalipay sang mga gintuton-an sang makita nila ang Ginoo. Dayon si Jesus nagsiling liwat sa ila, “Paghidait sa inyo. Subong nga ang Amay nagpadala sa akon, ako man nagapadala sa inyo.” Ginsiling niya ini, kag ginhuypan niya sila kag ginsingganan, “Batuna ninyo ang Espiritu Santo. Kon ginapatawad ninyo ang mga sala sang bisan sin-o, ti ginapatawad sila; kon wala ninyo ginapatawad sila, ti wala man sila ginapatawad.” Ang isa sang mga dose ka gintuton-an, si Tomas nga gintawag ang Kapid, wala didto sang pag-abot ni Jesus. Gani ginsugiran sia sang iban nga mga gintuton-an, “Nakita namon ang Ginoo!” Si Tomas nagsiling sa ila, “Kon indi ko makita ang agi sang mga lansang sa iya mga kamot, kag magulo ko ang akon tudlo sa agi sang mga lansang, kag magulo ko ang akon kamot sa iya kilid, indi ako magtuo.” Sang makaligad ang isa ka simana, ang mga gintuton-an nagtipon liwat sa sulod sang balay kag si Tomas kaupod na nila. Ang mga puwertahan natrangkahan, pero si Jesus nag-abot kag nagtindog sa tunga nila kag nagsiling, “Paghidait sa inyo.” Dayon nagsiling sia kay Tomas, “Idab-ot diri ang imo tudlo, kag tan-awa ang akon mga kamot. Dayon idab-ot ang imo kamot kag igulo sa akon kilid. Indi ka na magpangduhadoha, kundi magtuo!” 

"Tan-awa ang akon mga kamot . . . Indi ka na magpangduhadoha, kundi magtuo!" (20:27)

Si Tomas nagsabat sa iya, “Ginoo ko kag Dios ko!” Si Jesus nagsiling sa iya, “Nagatuo ka bala kay nakakita ka sa akon? Bulahan ang mga nagatuo bisan wala sila makakita!” Madamo pa gid nga gamhanan nga mga buhat ang ginhimo ni Jesus sa atubangan sang iya mga gintuton-an nga wala masulat sa sini nga libro. Ginsulat ini agod magtuo kamo nga si Jesus amo ang Cristo, ang Anak sang Dios, kag paagi sa sini nga pagtuo may kabuhi kamo sa iya ngalan.

Abril 27 | Abril 29