"Ang Isa nga Nagabaton sa Akon"

Liturhiya sang Pulong

(Huwebes, Mayo 16, 2019)

Ang Pagbasa gikan sa:

Binuhatan sang mga Apostoles 13:13-25

   Halin sa Pafo, nagpanakayon si Pablo kag ang iya kaupdanan kag nagdungka sila sa Perge sa Panfilia. Didto ginbayaan sila ni Juan Marcos nga nagpauli sa Jerusalem. Halin sa Perge nagpadayon sila tubtob nga nakalambot sila sa Antioquia sa Pisidia, kag sang Adlaw nga Inugpahuway nagkadto sila sa sinagoga kag nagpungko didto. Sa tapos mabasa ang Kasugoan ni Moises kag ang mga sinulatan sang mga propeta, ang mga opisyales sang sinagoga may ginsugo sa pagsiling sa ila sang masunod: “Mga utod, luyag namon nga maghambal kamo sa mga tawo kon may yara kamo nga inughambal nga makapabakod sa ila.” Nagtindog si Pablo, nagsinyas sa ila nga maghipos kag nagsiling: 
   “Mga kasimanwa ko nga mga Israelinhon kag tanan nga mga Gentil nga yari diri nga nagasimba sa Dios, pamatii ninyo ako! Ang Dios sining mga tawo sang Israel nagpili sang aton mga katigulangan kag nagpadaku sa ila samtang nga didto sila nagapuyo subong nga mga dumoluong sa Egipto. Ginpagwa sila sang Dios sa Egipto paagi sa iya daku nga gahom, kag sa sulod sang 40 ka tuig ginbatas niya sila sa desierto. Ginlaglag niya ang pito ka mga pungsod sa Canaan kag ginhimo niya ang iya mga tawo nga Israel nga tag-iya sang kadutaan sa sulod sang 450 ka tuig. 
   “Sa tapos sini ginhatagan niya sila sing mga hukom tubtob sa panahon ni Samuel nga propeta. Kag sang nagpangayo sila sang isa ka hari, ginhatag sang Dios sa ila si Saul nga anak ni Cis, halin sa tribo ni Benjamin. Nanginhari sia nila sa sulod sang 40 ka tuig. Sang mapahalin sia, ginhimo sang Dios si David nga hari nila. Amo ini ang ginsiling sang Dios nahanungod sa iya, ‘Si David nga anak ni Jese amo ang tawo nga akon naluyagan, kay isa sia ka tawo nga nagatuman sang tanan nga ginasugo ko sa iya.’ Si Jesus, isa sang mga kaliwat ni David, amo ang ginhimo sang Dios nga Manlulowas sang Israel suno sa iya ginsaad. Sa wala pa makasugod si Jesus sang iya bulohaton, nagwali si Juan sa tanan nga mga tawo sa Israel nga magbiya sila sa ila mga sala kag magpabautiso. Kag sang nagahingapos na si Juan sang iya bulohaton, nagsiling sia sa mga tawo, ‘Sa inyo abi, sin-o bala ako? Indi ako ang ginapaabot ninyo. Pero tandai ninyo! Nagakari sia nga ulihi lang sa akon, pero indi ako takos sa paghubad sang higot sang iya mga sandalyas.’

Salmo sa Pagsabat:

Mga Salmo 89:2-3, 21-22, 25 kag 27

(S) O Ginoo, magakanta ako sa gihapon nahanungod sa Imo mapinadayunon nga gugma. 

Nakahibalo ako nga ang imo gugma magapadayon sa walay katapusan, nga ang imo katutom wala sing katapusan subong sang langit. Nagsiling ka, "Naghimo ako sing kasugtanan sa tawo nga akon ginpili, nagsaad ako sa akon alagad nga si David. (S)
Ang Akon kusog manginyara sa iya sa gihapon, ang akon gahom magapabakod sa iya. Ang iya mga kaaway indi gid magdaog batok sa iya, ang mga malaut indi makalutos sa iya. (S)
Pasangkaron ko ang iya ginharian halin sa Dagat sang Mediteraneo tubtob sa Suba sang Eufrates. (S)
Pagahimuon ko sia nga akon panganay nga anak nga lalaki, ang labing gamhanan sa tanan nga mga hari. (S)

Aleluya:

Bugna 1:5

O Jesukristo, ang matutom nga saksi ang panganay nga Anak nga ginbanhaw, naghigugma kag naghugas Ka sang sala paagi sa Imo dugo.

Ang Pagbasa sang Santos nga Ebanghelyo suno kay:

San Juan 13:16-20

   Nagasiling ako sa inyo sang matuod: wala sing ulipon nga labaw pa sa iya agalon, kag wala sing sinugo nga labaw pa sa nagsugo sa iya. Karon nahibaluan na ninyo ini nga kamatuoran. Bulahan kamo kon inyo ini buhaton!

   “Wala ako nagahambal nahanungod sa inyo tanan. Kilala ko ang akon mga ginpili. Pero kinahanglan matuman ang kasulatan nga nagasiling, ‘Ang tawo nga nagsalo sa akon pagkaon, nagkontra sa akon.’ Karon ginasugid ko ini sa inyo sa wala pa mahanabo, agod nga kon mahanabo ini, magatuo kamo nga ‘Ako Amo Ako’. Nagasiling ako sa inyo sang matuod: ang nagabaton sang akon ginapadala, nagabaton man sa akon, kag ang nagabaton sa akon, nagabaton sang nagpadala sa akon.”

Mayo 15 | Mayo 17