Nobyembre 8, 2020, Ika-32 nga Domingo sang Tuig

Liturhiya sang Pulong

Nahauna nga Balasahon - Kaalam ni Salomon 6:12-16

Salmo sa Pagsabat - Mga Salmo 63:2, 3-4, 5-6, 7-8

Ikaduha nga Balasahon - 1 Tesalonica 4:13-18

Aleluya - Mateo 24:42A, 44

Ebanghelyo - Mateo 25:1-13

Ang Buangboang Indi Makasulod sa Punsyon sang Kasal sa Langit

1. Ang Pagbasa gikan sa Libro sang:

Kaalam ni Salomon 6:12-16

    Ang Kaalam nagasiga sing masanag kag wala ini nagapiraw; ang mga nagapalangga kag nagapangita sa iya, mahulas nga makaangkon sa iya. Madali sia nga mahibaluan sang bisan sin-o nga nagahandom sa iya. Pangitaa sia sing maaga pa gid kag indi ikaw mabudlayan makita mo sia sa atangan sang imo balay. Maangkon mo ang himpit nga paghangop kon may paghangad ka sa Kaalam. Kon pangitaon nimo sia sa labing madali maangkon nimo ang mahidaiton nga panghunahona, tungod kay ang Kaalam nagapangita sa mga takos mag-angkon sa iya, kag gani masalapuan niya ikaw bisan diin ikaw. Maluloy-on ini sia kag manginyara sia sa tagsa nimo ka panghunahona.

Salmo sa Pagsabat:

Mga Salmo 63:2, 3-4, 5-6, 7-8

(S) O Ginoo nga akon Dios, ang akon kalag ginauhaw sa imo.

O Dios, ikaw ang akon Dios, ginahidlaw ako sa imo. Ang akon bug-os nga kaugalingon nagahandom gid sa imo, ang akon kalag ginauhaw sa imo, kaangay sang kigas, lamgod, kag namalhan nga duta. (S)

Tugoti ako nga makita ko ikaw sa santuaryo, ipakita sa akon ang imo pagkagamhanan kag pagkamahimayaon. Ang imo mapinadayunon nga gugma maayo pa sang sa kabuhi, gani dayawon ko ikaw. (S)

Tubtob nga buhi ako magapasalamat ako sa imo; bayawon ko ang akon mga kamot sa pagpangamuyo sa imo. Ang akon kalag magapaayaw-ayaw kag mabusog, kag magakanta ako sa imo sang masadya nga mga ambahanon sa pagdayaw. (S)

Samtang nagahigda ako ginadumdom ko ikaw, sa bilog nga gab-i yara ka sa akon panghunahona, kay ikaw ang nagabulig sa akon sa gihapon. Sa landong sang imo mga pakpak nagakanta ako sa kalipay. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 4:13-18

    Mga kautoran, luyag namon nga mahibaluan ninyo ang kamatuoran nahanungod sa mga nagkalamatay, agod nga indi kamo magkasubo subong sang iban nga wala sing paglaom. Nagatuo kita nga si Jesus napatay kag nabanhaw. Gani nagatuo man kita nga pagadalhon sang Dios upod kay Jesus ang tanan nga nagkalamatay nga nagatuo sa iya. 

    Amo ini ang pagtulon-an sang Ginoo nga amon ginasugid sa inyo: kita nga mga buhi pa sa adlaw sang pag-abot sang Ginoo, indi mag-una sa ila nga mga nagkalamatay na. Kay sa singgit sang pagmando, sa tingog sang arkanghel kag sa tunog sang trumpeta sang Dios, ang Ginoo gid magapanaog gikan sa langit. Ang tanan nga nagkalamatay nga nagatuo kay Cristo pagabanhawon sing una. Dayon kita nga mga buhi pa sa sadto nga tion pagatipunon upod sa ila sa mga panganod sa pagsugata sa Ginoo sa kahawaan. Ti, manginkaupod kita sa Ginoo sing dayon. Gani, maglinipayay kamo sa sini nga mga pulong.

Aleluya:

San Mateo 24:42A, 44

   Magbantay kag maghanda kamo, kay sa takna nga wala ninyo ginapaabot, ang Anak sang Tawo magakari.

Ang Pagbasa sang Santos nga Ebanghelyo suno kay:

San Mateo 25:1-13

    Sadto nga panahon, si Jesus nagsiling sa iya mga gintuton-an sini nga palaanggiran: “Ang Ginharian sang langit mapaanggid sa napulo ka mga dalaga nga nagdala sang ila mga suga sa pagsugat sa nobyo. Ang lima sa ila mga buangboang kag ang lima mainandamon. Ang lima nga buangboang nagdala sang ila mga suga ugaling wala sila magbalon sing lana. Ang mga mainandamon nagdala sang ila mga suga kag nagbalon sing lana. Kadugay mag-abot ang nobyo, gani tinuyo ang mga dalaga kag natulogan.

   “Sang tungang gab-i na may nagsinggit, ‘Yari na ang nobyo! Dali kamo kag sugata ninyo sia!’ Ang napulo ka mga dalaga nagmata kag nag-aman sang ila mga suga. Dayon ang mga buangboang nagsiling sa mga mainandamon, ‘Hatagi kami sang inyo lana, kay nagapiraw na ang amon suga.’ Ang mga mainandamon nagsabat, ‘Indi mahimo, kay indi ini makaigo sa inyo kag sa amon. Kadto kamo sa tiyanggi kag magbakal kamo para sa inyo kaugalingon.’ Gani ang mga buangboang naglakat sa pagbakal sang lana, kag sang nakalakat sila amo man ang pag-abot sang nobyo. Ang lima nga nakaaman nag-upod sa iya sa punsyon, kag ginsirahan ang puwertahan.

   “Dugaydogay nag-abot ang iban nga mga dalaga kag nagpanawag, ‘Sir, sir! Pasudla kami!’ Pero ang nobyo nagsabat, ‘Wala ako makakilala sa inyo.’ ”

   Kag si Jesus nagsiling, “Gani magbantay kamo, kay wala kamo makahibalo sang adlaw ukon sang takna.” 

Nobyembre 7 | Nobyembre 9