Liturhiya sang Pulong
Ang Dedikasyon sang mga Simbahan ni San Pedro kag ni San Pablo, mga Apostoles
Nahauna nga Balasahon - Bugna 4:1-11
Salmo sa Pagsabat - Mga Salmo 150:1-2, 3-4, 5-6
Aleluya - Juan 15:16
Ebanghelyo - Lucas 19:11-28
"Indi Sila Luyag nga Ako Manginhari Nila"
Ang Pagbasa gikan sa Libro sang:
Bugna kay San Juan nga Apostol 4:1-11
Sa tapos sini, may nakita ako nga isa pa gid ka palanan-awon, kag may nakita ako nga isa ka puwertahan nga naabrihan sa langit.
Kag ang tingog nga daw tunog sang trumpeta nga akon man anay nabatian nga naghambal sa akon, nagsiling, “Saka ka diri kag ipakita ko sa imo ang tanan nga mahanabo sa tapos sini.” Sa gilayon gingamhan ako sang Espiritu. Didto sa langit may trono, kag sa sini nga trono may nagalingkod. Ang iya guya nagabadlak subong sang malahalon nga mga bato nga kaangay sang haspe kag kornalina, kag sa palibot sang trono may balangaw nga ang iya kolor esmeralda. Sa palibot sang trono, may 24 pa gid ka mga trono, nga ginalingkuran sang 24 ka mga katigulangan, nga nagabayu sing puti, kag may mga korona nga bulawan. Gikan sa trono, may nagakirab nga kilat, ginahod, kag dinaguob. May pito ka mga sulo nga nasindihan, nga nagasiga sa atubangan sang trono. Ini sila amo ang pito ka mga espiritu sang Dios. Sa atubangan sang trono, may yara nga daw salaming nga dagat nga matin-aw subong sang kristal.
Sa palibot sang trono, sa tagsa ka kilid, may apat ka buhi nga mga tinuga nga daw pulos lang mga mata sa atubangan kag sa likod. Ang nahauna nga tinuga nga buhi daw leon, ang ikaduha daw tinday nga baka, ang ikatlo daw tawo ang iya guya, kag ang ikap-at daw agila nga nagalupad. Ang kadaisa sining apat ka mga tinuga nga buhi may anom ka mga pakpak, kag daw pulos lang sila mga mata, sa gwa kag sa sulod. Sa adlaw kag gab-i wala sila nagauntat sa pagkanta nga nagasiling:
“Balaan, balaan, balaan,
Ang Ginoong Dios nga Makagagahom,
Nga amo anay, amo karon,
Kag amo ang magakari.”
Kon ang apat ka buhi nga mga tinuga magkanta sa paghimaya, sa pagpadungog, kag sa pagpasalamat sa nagalingkod sa trono, nga nagakabuhi sa wala sing katapusan, ang 24 ka mga katigulangan nagaluhod sa atubangan sang nagalingkod sa trono, kag nagasimba sa iya nga nagakabuhi sa wala sing katapusan. Ginabutang nila ang ila mga korona sa atubangan sang trono, kag nagasiling:
“O Ginoo kag Dios namon!
Takos ikaw sa pagbaton
Sang himaya, kadungganan, kag gahom.
Kay gintuga mo
Ang tanan nga mga butang,
Kag sa imo kabubot-on
Gintuga mo sila
Kag ginhatagan sing kabuhi.”
Salmo sa Pagsabat:
Mga Salmo 150:1-2, 3-4, 5-6
(S) Balaan, Balaan, Balaan, ang Ginoong Dios nga Makagagahom.
Dayawa ninyo ang Ginoo! Dayawa ninyo ang Dios sa iya Templo! Dayawa ninyo ang iya kusog sa langit! Dayawa ninyo sia tungod sang gamhanan nga mga buhat nga iya ginhimo! Dayawa ninyo ang iya indi matupongan nga pagkagamhanan! (S)
Dayawa ninyo sia sa mga trumpeta! Dayawa ninyo sia sa mga arpa kag mga lira! Dayawa ninyo sia sa mga bumbo kag sinaot! Dayawa ninyo sia sa mga arpa kag plawta! (S)
Dayawa ninyo sia sa mga platilyos! Dayawa ninyo sia sa matunog nga mga platilyos! Dayawa ninyo ang Ginoo, tanan kamo nga buhi nga mga tinuga! Dayawa ninyo ang Ginoo! (S)
Aleluya:
San Juan 15:16
Ako ang nagpili sa inyo, kag nagsugo sa inyo sa paglakat kag sa pagpamunga sing madamo, ang sahi sang bunga nga nagapadayon, siling sang Ginoo.
Ang Pagbasa sang Santos nga Ebanghelyo suno kay:
San Lucas 19:11-28
Sang nagapamati pa ang mga tawo nagsugid si Jesus sa ila sing isa ka palaanggiran kay malapit na sia sa Jerusalem, kag naghunahona sila nga ang Ginharian sang Dios manug-abot na. Gani nagsiling sia, “May isa ka dungganon nga tawo nga nagkadto sa malayo nga pungsod sa pagbaton sing isa ka ginharian kag dayon magapauli. Sa wala pa sia makalakat, gintawag niya ang iya napulo ka mga suloguon kag ginhatagan ang tagsatagsa sa ila sing P100 kag ginsingganan, ‘Patikanga ninyo ini tubtob nga mag-abot ako.’ Karon, ang iya mga kasimanwa nagdumot sa iya, gani nagpaapas sila sing mga tawo nga magasiling, ‘Indi kami luyag nga ini nga tawo maghari sa amon.’
“Ang dungganon nga tawo ginhimo nga hari kag nagbalik sia. Sa gilayon ginpatawag niya ang iya mga suloguon nga ginhatagan niya sing kuwarta, agod nga mahibaluan niya kon pila ang naganansya sang tagsatagsa sa ila. Ang nahauna nag-abot kag nagsiling, ‘Amoy, nakaganansya ako sing P1,000 sa P100 nga ginhatag mo sa akon.’ Nagsiling sia sa iya, ‘Maayo gid! Maayo ka nga suloguon! Tungod kay matutom ka sa diutay nga mga butang, magagahom ka sa napulo ka siyudad.’ Ang ikaduha nga suloguon nag-abot kag nagsiling, ‘Amoy, nakaganansya ako sing P500 sa P100 nga ginhatag mo sa akon.’ Nagsiling sia sa sini nga suloguon, ‘Magagahom ka sa lima ka siyudad.’ Ang isa pa ka suloguon nag-abot kag nagsiling, ‘Amoy, yari ang imo kuwarta. Gintago ko ini nga naputos sa panyo. Nahadlok ako sa imo kay maid-id ka nga tawo. Ginakuha mo ang indi imo, kag ginaani mo ang wala mo masab-og.’ Nagsiling sia sa iya, ‘Wala ka pulos nga suloguon! Ang imo mismo ginsiling amo ang magakondenar sa imo. Nakahibalo ikaw nga maid-id ako nga tawo, nga nagakuha sang indi akon kag nagaani sang wala ko masab-og. Ti, ngaa bala wala mo pag-ipatago sa bangko ang akon kuwarta? Kuntani sa akon pagbalik makuha ko ang akon kuwarta nga may saka na.’ Kag nagsiling sia sa mga nagatilindog didto, ‘Kuhaa ninyo sa iya ang kuwarta kag ihatag sa suloguon nga nakaganansya sing P1,000.’ Nagsiling sila sa iya, ‘Amoy, may P1,000 na sia!’
Nagsabat sia, ‘Nagasiling ako sa inyo nga ang may yara na, hatagan pa, pero ang wala iya, bisan ang diutay nga iya kuhaon pa. Karon, nahanungod sining akon mga kaaway nga indi luyag nga ako manginhari nila, dalha sila diri sa akon atubangan kag pamatya sila.’ ” Sa tapos makahambal sini si Jesus, nag-una sia sa ila pa Jerusalem.
No comments:
Post a Comment