Nobyembre 20, 2020, Biyernes sang Ika-33 nga Semana sang Tuig

Liturhiya sang Pulong

Nahauna nga Balasahon - Bugna 10:8-11

Salmo sa Pagsabat - Mga Salmo 119:14, 24, 72, 103, 111, 131

Aleluya - Juan 10:27

Ebanghelyo - Lucas 19:45-48

"Ang mga Tawo Nawili sa Pagpamati sa Iya"

Ang Pagbasa gikan sa Libro sang:

Bugna kay San Juan nga Apostol 10:8-11

    Dayon ang tingog nga akon nabatian gikan sa langit naghambal liwat sa akon nga nagasiling, “Lakat kag kuhaa ang linukot nga tulon-an nga nahumlad, nga yara sa kamot sang anghel nga nagatindog sa dagat kag sa duta.” 

    Nagkadto ako sa anghel kag ginpangayo ko sa iya ang diutay nga linukot nga tulon-an. Nagsiling sia sa akon, “Kuhaa ini kag kauna. Magaaslom ini sa imo tiyan, pero daw dugos ini katam-is sa imo baba.” 

    Ginkuha ko ang diutay nga linukot nga tulon-an sa iya kamot kag akon ini ginkaon. Daw dugos ini katam-is sa akon baba, ugaling sang matulon ko na ini, nag-aslom ini sa akon tiyan. Dayon ginsingganan ako, “Sa liwat dapat mo iwali ang pulong sang Dios nahanungod sa madamo nga mga pungsod, mga rasa, mga linggwahe, kag mga hari.”

Salmo sa Pagsabat:

Mga Salmo 119:14, 24, 72, 103, 111, 131

(S) Daw ano katam-is sang lalim sang Imo pagsulondan.

Nagakalipay ako sa pagsunod sang imo mga sugo, labi sang sa pag-angkon sang madamo nga mga manggad. (S)

Ang imo mga pagtudlo nagahatag sa akon sing kalipay; sila amo ang akon mga manuglaygay. (S)

Ang kasugoan nga imo ginahatag labi pa sa akon sang sa tanan nga pilak sa kalibutan. (S)

Daw ano katam-is sang lalim sang imo mga pagsulondan; matam-is pa sila sang sa dugos! (S)

Ang imo mga sugo amo ang akon mga pagkabutang nga wala sing katubtoban, sila amo ang kalipay sang akon tagipusoon. (S)

Nagahawathawat ang akon ginhawa, sa paghandom sang imo mga sugo. (S)

Aleluya:

San Juan 10:27

   Ang akon mga karnero nagapamati sa akon tingog, siling sang Ginoo; kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Lucas 19:45-48 

   Si Jesus nagsulod sa templo kag iya ginpangtabog ang mga manugbaligya kag nagsiling sia sa ila, “Nasulat sa mga Kasulatan nga ang Dios nagsiling, ‘Ang akon balay manginbalay nga palangamuyoan.’ Pero ginhimo ninyo ini nga palanaguan sang mga makawat.”

   Adlaw-adlaw si Jesus nagpanudlo sa templo. Ang pangulo nga mga pari, ang mga manunodlo sang Kasugoan, kag ang mga pangulo sang banwa nagtinguha sa pagpatay sa iya, pero wala sila sing kahigayunan sa paghimo sini, kay ang mga tawo nawili sa pagpamati sa iya.

Nobyembre 19 | Nobyembre 21