Magpakabakod Ka, ang Imo Pagtuo Nag-ayo sa Imo

Liturhiya sang Pulong

(Lunes, Hulyo 6, 2020)

Santa Maria Goretti, Birhen kag Martir

Ang Pagbasa gikan sa Libro ni:

Oseas nga Propeta 2:16, 17-18, 21-22

   Gani pagadalhon ko sia liwat sa desierto. Didto pangaluyagan ko sia liwat paagi sa mahigugmaon nga mga pulong. Magasabat sia sa akon didto subong sang iya ginhimo sang pamatan-on pa sia, sang pagpalagyo niya gikan sa Egipto. Kag sa liwat pagatawgon niya ako nga iya bana, kag indi na niya ako pagtawgon nga iya Baal.

   O Israel, pangasaw-on ko ikaw, himuon ko ang husto kag ang matarong, higugmaon ko ikaw kag kaluoyan sa gihapon, kag ikaw mangin-akon sa walay katubtoban. Magatuman ako sang akon saad kag himuon ko nga mangin-akon ikaw, kag makilala mo nga ako ang Ginoo.

   

Salmo sa Pagsabat:

Mga Salmo 145:2-3, 4-5, 6-7, 8-9

(S) Ang Ginoo mahigugmaon kag maluloy-on.

Sa tagsa ka adlaw magapasalamat ako sa imo; dayawon ko ikaw sa wala sing katubtoban. Ang Ginoo gamhanan, kag dapat gid dayawon sing labi, ang iya pagkagamhanan indi mahangpan. (S)

Ang imo ginhimo pagadayawon halin sa isa ka kaliwatan pakadto sa isa; ibantala nila ang imo gamhanan nga mga buhat. Ang mga tawo magahambal sang imo himaya kag pagkahalangdon, kag magpamalandong ako sa imo makatilingala nga mga binuhatan. (S)

Ang mga tawo magahambal sang imo gamhanan nga mga buhat, kag ako magabantala sang imo pagkagamhanan. Magasugid kag magakanta sila nahanungod sang imo kaayo. (S)

Ang Ginoo mahigugmaon kag maluloy-on, indi madali mangakig kag puno sang mapinadayunon nga paghigugma. Maayo sia sa tanan kag maluloy-on sa tanan nga iya ginhimo. (S)

Aleluya:

2 Timoteo 1:10

   Ang aton Manlulowas nga si Cristo Jesus gindula ang gahom sang kamatayon kag paagi sa Maayong Balita iya ginpahayag ang kabuhi nga wala sing katapusan.

Ang Pagbasa sang Santos nga Ebanghelyo suno kay:

San Mateo 9:18-26

   Sang si Jesus nagahambal sini sa ila, may isa ka pangulo nga Judio nga nagpalapit sa iya, nagluhod sa iya atubangan kag nagsiling, “Ang akon anak nga babayi bag-o gid lang mapatay, pero kadtoi kag tanduga kag mabuhi sia.” 

   Gani si Jesus nagtindog kag nagsunod sa iya, kag nag-upod man ang iya mga gintuton-an. 

   May isa ka babayi nga nagaantos tungod sang pagpanggwa sang dugo sa sulod sang dose ka tuig nga nagpalapit sa likod nayon ni Jesus kag gintandog ang sidsid sang iya kunop. Ang babayi nagsiling sa iya kaugalingon, “Kon matandog ko lang ang iya kunop magaayo ako.” 

   Nagliso si Jesus kag nakita niya ang babayi kag nagsiling, “Anak magpakabakod ka! Ang imo pagtuo nag-ayo sa imo.” Sa gilayon nag-ayo sia. 

   Dayon nagsulod si Jesus sa balay sang pangulo nga Judio. Sang makita niya ang mga musikero para sa lubong kag ang mga tawo nga nagaginahod, nagsiling sia, “Gwa kamo anay! Ang dalagita indi patay, kundi nagakatulog lang!” 

   Kag nagkadlaw sila sa pagyaguta sa iya. Sang nakagwa ang mga tawo, si Jesus nagsulod sa kuwarto sang dalagita kag gin-uyatan niya sia sa kamot, kag nagbangon sia. Ang balita nahanungod sini naglapnag sa sadto nga lugar. 

Hulyo 5 | Hulyo 7

"Magaabot ang Adlaw nga Amo na ina ang ila Pagpuasa"

Liturhiya sang Pulong

(Sabado, Hulyo 6, 2019)

Santa Maria Goretti, Birhen kag Martir

Ang Pagbasa gikan sa Libro sang:

Genesis 27:1-5, 15-29

   Si Isaac tigulang na kag indi na makakita. Ginpatawag niya ang iya magulang nga anak nga si Esau kag nagsiling sa iya, “Toto!” 

   Nagsabat sia, “Ano, tay?”

   Si Isaac nagsiling, “Tigulang na ako kag ayhan sa indi madugay mapatay na ako. Karon, kon mahimo kuhaa ang imo mga hinganiban ang imo pana kag mga baslay, magkadto ka sa latagon kag magdakop sing isa ka sapat para sa akon. Lutoi ako sing manamit nga pagkaon nga akon nauyonan, kag dalha diri sa akon. Sa tapos ako makakaon ihatag ko sa imo ang akon katapusan nga bendisyon sa wala pa ako mapatay.”

   Si Rebeca nagapamati sang nagahambal si Isaac sa iya anak nga si Esau. Gani sang makalakat si Esau sa latagon sa pagdakop sing sapat para sa iya amay,

   Dayon ginkuha ni Rebeca ang labing maayo nga mga bayu ni Esau nga iya gintago sa balay, kag ginpasuksok niya ini kay Jacob. Ginbutang ni Rebeca ang mga panit sang kanding sa mga butkon ni Jacob kag sa iya liog nga wala sing bulbol. Kag ginhatag niya kay Jacob ang manamit nga pagkaon, upod ang tinapay nga iya ginluto.

   Dayon si Jacob nagkadto sa iya amay kag nagsiling, “Tay!” 

   Nagsabat sia, “Ano? Sin-o ka bala anak ko?”

   Si Jacob nagsabat, “Si Esau ako, ang magulang mo nga anak. Ginhimo ko ang ginsiling mo sa akon. Kon mahimo magpungko ka kag magkaon sang pagkaon nga gindala ko sa imo, agod mabendisyunan mo ako.”

   Si Isaac nagsiling, “Paano mo nakuha ini sing madali, toto?” 

   Si Jacob nagsabat, “Ang Ginoo nga imo Dios nagbulig sa akon sa pagpangita sini.”

   Si Isaac nagsiling kay Jacob, “Palapit ka sa akon agod mahikap ko ikaw, kon bala ikaw gid matuod ang akon anak nga si Esau.” Si Jacob nagpalapit sa iya amay kag ginhikap sia sang iya amay kag nagsiling, “Ang imo tingog daw tingog ni Jacob, pero ang imo mga butkon daw iya ni Esau.” Wala niya makilala si Jacob, kay ang iya sini mga butkon bulbolon pareho sang iya ni Esau. Bendisyunan na niya kuntani si Jacob, pero nagpamangkot sia, “Ikaw gid bala ang anak ko nga si Esau?” 

   Nagsabat sia, “Huo.”

    Nagsiling si Isaac, “Dalhi ako sang imo linuto. Sa tapos ako makakaon sini bendisyunan ko ikaw.” Gindalhan sia ni Jacob sing linuto, kag bino nga ilimnon. Dayon ang iya amay nagsiling sa iya, “Toto, palapit ka kag haluki ako.” Sang pagpalapit niya sa paghalok sa iya amay nasimhutan ni Isaac ang iya mga bayu, gani ginbendisyunan niya sia nga nagasiling, “Ining kahamot sang akon anak kaangay sang kahamot sang latagon nga ginbendisyunan sang Ginoo. 

Ginbendisyunan niya sia. (27:27)

Kabay nga ang Dios maghatag sa imo sang tun-og sang langit, kag maghimo sang imo mga kaumhan nga mapatubason. Kabay nga hatagan niya ikaw sang madamo nga mga kalan-on kag bino. Kabay nga ang mga kapungsoran mangin-imo mga alagad, kag ang mga katawuhan magsaludo sa atubangan mo. Kabay nga maggahom ka sa imo mga himata, kag kabay nga ang mga kaliwat sang imo iloy magsaludo sa imo atubangan. Kabay nga ang nagapakamalaut sa imo pagapakamalauton, kag ang nagabendisyon sa imo pagabendisyunan.”

Salmo sa Pagsabat:

Mga Salmo 135:1-2, 3-4, 5-6

(S) Dayawa ninyo ang Ginoo, kay sia maayo.

Dayawa ninyo ang iya ngalan, kamo nga mga alagad sang Ginoo, nga nagatindog sa balay sang Ginoo, sa santuaryo sang aton Dios. (S)

Dayawa ninyo ang Ginoo, kay sia maayo; magkanta kamo sing mga pagdayaw sa iya ngalan, kay sia maalwan. Ginpili niya si Jacob nga mangin-iya, ang mga tawo sa Israel nga mangin-iya kaugalingon. (S)

Nakahibalo ako nga ang aton Ginoo gamhanan; gamhanan pa sia sa tanan nga mga dios. Ginahimo niya ang bisan ano nga luyag niya sa langit kag sa duta, sa mga dagat kag sa mga kadadalman sa idalom. (S)

Aleluya:

Juan 10:27

Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Mateo 9:14-17

   Karon ang mga sumolunod ni Juan Bautista nagkadto kay Jesus nga nagapamangkot, “Ngaa nga kami kag ang mga Fariseo nagapuasa sing masunson, pero ang imo mga gintuton-an wala gid nagapuasa?”

   Si Jesus nagsabat, “Magakasubo bala ang mga inagda sa kasal samtang ang nobyo kaupod pa nila? Pero magaabot ang adlaw nga ang nobyo pagakuhaon sa ila kag amo na ina ang ila pagpuasa.

   “Wala sing bisan sin-o nga nagatukap sing bag-o nga panapton sa daan nga bayu kay ina nga tukap magabingkas sang bayu, kag ang iya gisi magadaku pa gid. Wala man sing bisan sin-o nga nagasulod sang bag-o nga bino sa daan nga sulodlan nga panit, kay kon himuon niya ini ang panit nga sulodlan sang bino mabusdik, kag ang bino mauyang kag ang sulodlan nga panit indi na mapuslan. Sa baylo sini, ginasulod ang bag-o nga bino sa bag-o nga sulodlan nga panit, kag ini sila magadugay.”

Hulyo 5 | Hulyo 7