Enero 1, 2021, Santa Maria, Iloy sang Dios

Liturhiya sang Pulong

Nahauna nga Balasahon - Numeros 6:22-27

Salmo sa Pagsabat - Mga Salmo 67:2-3, 5, 6 kag 8

Ika-2 nga Balasahon - Galacia 4:4-7

Aleluya - Hebreo 1:1-2

Ebanghelyo - Lucas 2:16-21

1. Ang Pagbasa gikan sa Libro sang mga:

Numeros 6:22-27

   Ang Ginoo nagsugo kay Moises nga singganon si Aaron kag ang iya mga anak nga lalaki sa paggamit sang masunod nga mga pulong sa pagbendisyon sang mga tawo sang Israel:

   Kabay ang Ginoo magbendisyon sa inyo

   kag magtatap sa inyo;

   kabay ang Ginoo magmaluloy-on kag

   magmaalwan sa inyo;

   kabay ang Ginoo magmaayo sa inyo

   kag maghatag sa inyo sing paghidait.

   Kon gamiton nila ini nga bendisyon sa ila pagpangamuyo sa Ginoo para sa mga tawo sang Israel, bendisyonan niya sila.

Salmo sa Pagsabat:

Mga Salmo 67:2-3, 5, 6 kag 8

(S) Ang Dios magkaluoy kag magbendisyon unta sa aton.

Kaluoyi man kami, O Dios, kag bendisyoni kami; ipakita ang Imo kaayo sa amon, agod mahibaluan sang bug-os nga kalibutan ang Imo kabubut-on; kag ang tanan nga kapungsoran makakilala sang imo kaluwasan! (S)

Kabay nga magkasadya ang mga kapungsoran kag magkanta sa kalipay, kay ikaw nagahukom sing matarong sa mga katawohan; kag nagtuytoy sa tanan nga mga kapungsoran. (S)

Kabay ang mga katawohan magdayaw sa imo, O Dios, kabay ang tanan nga mga katawohan magdayaw sa imo! (S)

Ang duta nakapatubas; ang Dios, nga aton Dios, nagbendisyon sa aton. Ang Dios naghatag sa aton sing mga kaayuhan, kabay nga ang tanan nga mga tawo bisan diin magtahod sa iya. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Galacia 4:4-7

   Mga utod, sang pag-abot sang nagakaigo nga tion, ginpadala sang Dios ang iya kaugalingon nga Anak. Natawo sia sa isa ka tawuhanon nga iloy, kag nagkabuhi sa idalom sang Kasugoan sang mga Judio, sa paghilway sang mga yara sa idalom sang Kasugoan, agod nga mangin-anak kita sang Dios.

   Sa pagpakita nga kamo mga anak niya, ang Dios nagpadala sang Espiritu sang iya Anak sa aton mga tagipusoon, ang Espiritu nga nagapanawag, “Amay, Amay ko.” Gani indi na kamo ulipon, kundi anak. Kag tungod kay anak niya kamo, ang Dios magahatag sa inyo sang tanan nga iya ginatigana sa iya mga anak.

Aleluya:

Hebreo 1:1-2

   Sadto anay, naghambal ang Dios sa aton mga ginikanan sa nagakalainlain nga mga tion kag sa madamo nga mga bagay, paagi sa mga propeta. Karon, sa sining katapusan nga panahon, naghambal Sia sa aton, paagi sa Iya Anak.

Ang Pagbasa sang Santos nga Ebanghelyo suno kay:

San Lucas 2:16-21

   Gani, nagdalidali sila sa pagkadto sa Betlehem kag nakita nila si Maria kag si Jose, kag ang bata nga nagahigda sa isa ka pasungan. Sang makita nila ang bata, ginpanugid nila ang ginhambal sa ila sang anghel nahanungod sini nga bata.

   Ang tanan nga nakabati sini natingala gid sang ginpanugid sa ila sang mga manugbantay sang karnero. Pero gintipigan ni Maria ini nga mga butang kag ginpamalandungan sa iya kaugalingon.

   Ang mga manugbantay sang karnero nagbalik nga nagahimaya kag nagadayaw sa Dios tungod sang tanan nga ila nabatian kag nakit-an; subong gid ini sang ginhambal sa ila sang anghel.

   Sa ikawalo nga adlaw, sang mag-abot na ang tion nga pagatulion ang bata, ginhingalanan sia kay Jesus, ang ngalan nga ginhatag sa iya sang anghel sa wala pa sia ginbusong sang iya iloy.

Disyembre 31 | Enero 2

Disyembre 16, 2020, Miyerkules sang Ika-3 nga Semana sang Adbiento (Misa de Aguinaldo)

Liturhiya sang Pulong

Nahauna nga Balasahon - Isaias 56:1-3, 6-8

Salmo sa Pagsabat - Mga Salmo 67:2-3, 5, 7-8

Ebanghelyo - Juan 5:33-36

Ang mga Saksi sa kay Jesus

Ang Pagbasa gikan sa Libro ni:

Isaias nga Propeta 56:1-3, 6-8

Ang Ginoo nagasiling sa iya mga tawo, "Sa indi madugay luwason ko kamo. Gani himoa ang matarong kag nagakaigo. Bendisyunan ko ang mga nagapakabalaan sang Adlaw nga Inugpahuway, kag wala nagalapas sini. Pagabendisyunan ko ang mga wala nagahimo sing malaut.”

Ang isa ka dumoluong nga nagbuylog sa mga tawo sang Ginoo indi magsiling, "Ang Ginoo indi magtugot sa akon sa pagsimba upod sa iya mga tawo.” Ang isa ka tawo nga ginkapon indi gid magsiling nga indi sia manginkatapo sang mga tawo sang Dios.

Kag ang Ginoo nagasiling sa mga dumoluong nga nanginkatapo sang iya mga tawo, nga nagahigugma kag nagaalagad sa iya, nga nagapakabalaan sang Adlaw nga Inugpahuway kag nagatuman sing matutom sang  iya kasugtanan, "Dalhon ko kamo sa Sion, ang akon balaan nga bukid, hatagan ko kamo sing kalipay sa akon balay nga palangamuyoan, kag akon batunon ang mga dulot nga inyo ginahalad sa akon altar. Ang akon Templo pagatawgon nga isa ka balay nga palangamuyoan sang mga tawo sang tanan nga mga kapungsoran."

Ang Ginoo nga Dios, nga nagdala pauli sang iya mga tawo nga Israel halin sa kabihagan, nagsaad nga sia magadala sang iban nga mga katawuhan sa pagbuylog sa ila. 

Salmo sa Pagsabat:

Mga Salmo 67:2-3, 5, 7-8

(S) Kabay nga ang mga katawuhan magdayaw sa imo, O Dios; kabay nga ang tanan nga mga katawuhan magdayaw sa imo!

Kaluoyi man kami, O Dios, kag bendisyuni kami; ipakita ang imo kaayo sa amon, agod mahibaluan sang bug-os nga kalibutan ang imo kabubot-on; kag ang tanan nga kapungsoran makakilala sang imo kaluwasan! (S)

Kabay nga magkasadya ang mga kapungsoran kag magkanta sa kalipay, kay ikaw nagahukom sing matarong sa mga katawuhan, kag nagtuytoy sa tanan nga mga kapungsoran. (S)

Ang duta nakapatubas; ang Dios, nga aton Dios, nagbendisyon sa aton. Ang Dios naghatag sa aton sing mga kaayuhan, kabay nga ang tanan nga mga tawo bisan diin magtahod sa iya. (S)

Aleluya:

    Kari ka, O Ginoo, sa pagduaw sa amon sing mahidaiton agod nga magakalipay kami sa himpit nga tagipusoon.

Ang Pagbasa sang Santos nga Ebanghelyo suno kay:

San Juan 5:33-36

Si Jesus nagsiling sa mga Hudiyo: "May ginpadala kamo sa pagpamangkot kay Juan, kag nagsugid sia sang kamatuoran. Indi kay kinahanglan ko ang panaksi sang tawo, kundi ginahambal ko lamang ini agod nga maluwas kamo. Si Juan kaangay sang isa ka suga nga nasindihan kag nagasiga, kag sa malip-ot nga tion naluyagan ninyo ang pagkalipay sa iya kapawa. Pero may nagasaksi nahanungod sa akon nga labi pa sang panaksi nga ginhatag ni Juan: ang mga buhat nga ginhimo ko, ang mga buhat nga ginhatag sang akon Amay nga himuon ko, ini nagasaksi nahanungod sa akon kag nagapamatuod nga ang Amay nagpadala sa akon. 

Disyembre 15 | Disyembre 16 (Misa sa Matag-adlaw)

Kadaku sang Imo Pagtuo! Matuman ang Imo Ginapangabay suno sa Imo Luyag

Liturhiya sang Pulong

(Domingo, Agosto 16, 2020)

Ika-20 nga Domingo sang Tuig

1. Ang Pagbasa gikan sa Libro ni:

Isaias nga Propeta 56:1, 6-7

   Ang Ginoo nagasiling sa iya mga tawo, "Sa indi madugay luwason ko kamo. Gani himoa ang matarong kag nagakaigo.

   Kag ang Ginoo nagasiling sa mga dumoluong nga nanginkatapo sang iya mga tawo, nga nagahigugma kag nagaalagad sa iya, nga nagapakabalaan sang Adlaw nga Inugpahuway kag nagatuman sing matutom sang  iya kasugtanan, "Dalhon ko kamo sa Sion, ang akon balaan nga bukid, hatagan ko kamo sing kalipay sa akon balay nga palangamuyoan, kag akon batunon ang mga dulot nga inyo ginahalad sa akon altar. Ang akon Templo pagatawgon nga isa ka balay nga palangamuyoan sang mga tawo sang tanan nga mga kapungsoran."

Salmo sa Pagsabat:

Mga Salmo 67:2-3, 5, 6, 8

(S) Kabay nga ang tanan nga mga katawohan magadayaw sa Imo, O Dios.

Agod mahibaluan sang bug-os nga kalibutan ang imo kabubot-on; kag ang tanan nga kapungsoran makakilala sang imo kaluwasan! Kabay nga magkasadya ang mga kapungsoran kag magkanta sa kalipay, kay ikaw nagahukom sing matarong sa mga katawuhan, kag nagtuytoy sa tanan nga mga kapungsoran. (S)

Kabay ang mga katawuhan magdayaw sa imo, O Dios, kabay ang tanan nga mga katawuhan magdayaw sa imo! (S)

Ang duta nakapatubas; ang Dios, nga aton Dios, nagbendisyon sa aton. (S)

Ang Dios naghatag sa aton sing mga kaayuhan, kabay nga ang tanan nga mga tawo bisan diin magtahod sa iya. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Roma 11:13-15, 29-32

   Karon nagahambal ako sa inyo nga mga Gentil: samtang apostol pa ako sa mga Gentil, magapabugal ako sang akon bulohaton. Ayhan magakahisa sa akon ang akon mga kasimanwa, kag tungod sini maluwas ang iban sa ila. Kay sang ginsikway sila, ang kalibutan nangin-abyan sang Dios. Ano pa gid ayhan kon mabaton na sila? Manginkabuhi ini para sa mga patay! Kay ang Dios wala nagabaylo sang iya panghunahona nahanungod sa iya ginapili kag ginabendisyunan. Sang una kamo nga mga Gentil wala magtuman sa Dios, pero karon nabaton ninyo ang kaluoy sang Dios kay ang mga Judio wala magtuman. Sa amo man nga bagay, tungod sang kaluoy nga inyo nabaton, ang mga Judio karon wala nagatuman sa Dios, agod nga ila man mabaton karon ang kaluoy sang Dios. Kay ginhimo sang Dios ang tanan nga mga tawo nga binilanggo sang pagkadi-matinumanon, agod nga mapakita niya sa tanan ang iya kaluoy. 

Aleluya:

San Mateo 4:23

   Si Jesus nagwali sang Maayong Balita sang Ginharian, kag nagpang-ayo sang tanan nga sahi sang mga balatian sang mga tawo. 

Ang Pagbasa sang Santos nga Ebanghelyo suno kay:

San Mateo 15:21-28

   Naghalin si Jesus sa sadto nga duog kag nagkadto sa kadutaan malapit sa mga siyudad sang Tiro kag Sidon. May isa ka babayi nga taga-Canaan nga nagapuyo didto, nga nagpalapit sa iya nga nagasinggit, “Sir, kaliwat ni David! Kaluoyi ako! Ang akon anak nga babayi ginagamhan sang yawa kag malubha ang iya kahimtangan.” 

   Pero si Jesus wala gid magsabat sa iya. Ang iya mga gintuton-an nagpalapit sa iya kag nagpangabay gid nga nagasiling, “Pahalina sia! Nagasunodsunod sia sa aton kag nagagahod!” 

   Dayon si Jesus nagsabat, “Ako ginpadala para lamang sa nadula nga mga karnero sang Israel.” 

   Dayon nagkadto ang babayi sa iya atubangan kag nagluhod nga nagasiling, “Sir, buligi ako!” 

   Nagsabat si Jesus, “Indi nagakabagay nga kuhaon ang pagkaon sang mga kabataan kag ihaboy sa mga ido.” 

   Nagsabat sia, “Matuod ina, Sir, pero bisan ang mga ido nagakaon sang usik nga nagakalahulog sa lamisa sang ila mga agalon.” 

   Dayon nagsabat si Jesus sa iya, “Babayi, kadaku sang imo pagtuo! Matuman ang imo ginapangabay suno sa imo luyag.” Sa amo gid nga tion nag-ayo ang iya anak nga babayi. 

Agosto 15 | Agosto 17