"Nahadlok si Herodes sa kay Juan - ang Matarong kag Balaan nga Tawo"

Liturhiya sang Pulong

(Sabado, Agosto 29, 2020)

Ang Pagkasakit ni San Juan Bautista, Martir

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 1:26-31

   Karon, mga kautoran, panumdoma ninyo kon ano kamo anay sang pagtawag sang Dios sa inyo. Suno sa panghunahona sang mga tawo mga pila man lang sa inyo ang maalam, ukon gamhanan, ukon dungganon. Ginpili sang Dios sing hungod ang ginakabig sang kalibutan nga kabuangan, sa pagpakahuya sang maalam nga mga tawo, kag sang ginakabig sang kalibutan nga maluya, sa pagpakahuya sang gamhanan nga mga tawo. Ginpili sang Dios ang ginakabig sang kalibutan nga kubos, talamayon, kag wala sing pulos, sa pagpakawalay pulos sang ginakabig sang kalibutan nga importante. Ini nagakahulogan nga wala sing tawo nga makapabugal sa atubangan sang Dios. Pero ang Dios naghiusa sa inyo kay Cristo Jesus kag naghimo sa iya nga aton kaalam. Paagi kay Cristo ginpakamatarong kita sa atubangan sang Dios, kag nahimo kita nga balaan nga mga tawo sang Dios kag nanginhilway. Gani, subong sang ginasiling sang kasulatan, “Ang bisan sin-o nga luyag magpabugal, dapat magpabugal sang ginhimo sang Ginoo.”

Salmo sa Pagsabat:

Mga Salmo 33:12-13, 18-19, 20-21

(S) Bulahan ang mga tawo nga ginpili sang Dios nga mangin-iya kaugalingon.

Bulahan ang pungsod nga ang iya Dios amo ang Ginoo; bulahan ang mga tawo nga ginpili sang Ginoo nga mangin-iya kaugalingon! Gikan sa langit nagatan-aw ang Ginoo, kag makita niya ang tanan nga mga katawuhan. (S)

Ang Ginoo nagabantay sa mga nagakahadlok sa iya, sa mga nagasalig sa iya mapinadayunon nga gugma. Ginaluwas niya sila sa kamatayon; ginabuhi niya sila sa tion sang tiggulotom. (S)

Ang aton paglaom yara sa Ginoo; sia ang aton manugbulig kag mangangapin. Nagakalipay kita tungod sa iya; sa iya balaan nga ngalan nagasalig kita. (S)

Aleluya:

San Mateo 5:10

   Bulahan ang mga ginahingabot tungod kay ginatuman nila ang ginapaabot sang Dios sa ila, kay ila ang Ginharian sang langit! 

Ang Pagbasa sang Santos nga Ebanghelyo suno kay:

San Marcos 6:17-29

   Si Herodes mismo amo ang nagmando nga ipadakop si Juan, ipagapos kag ipabilanggo. Ginhimo niya ini tungod kay Herodias nga iya ginpangasawa bisan ini sia asawa sang iya utod nga si Felipe. Pirme lang sia ginahambalan ni Juan Bautista, “Indi matarong ang imo pagpangasawa sang asawa sang imo utod!”

   Gani gindumtan ni Herodias si Juan kag gintuyo niya nga patyon, pero indi sia makahimo sini tungod kay Herodes. Nahadlok si Herodes sa kay Juan tungod kay nahibal-an niya nga si Juan matarong kag balaan nga tawo. Gani, gin-apinan niya si Juan nga indi maano. Naluyag sia magpamati kay Juan wala sapayan nga nagakatublag sia sa kada pagpamati niya sa iya.

   Sang ulihi nag-abot gid ang kahigayunan nga ginahulat ni Herodias. Kaadlawan yadto ni Herodes kag naghiwat sia sing isa ka punsyon para sa mataas nga mga punoan sang banwa, mga opisyales sang mga soldado kag lutaw nga mga pumoluyo sang Galilea. Ang anak nga babayi ni Herodias nagsulod kag nagsaot, kag naglingaw sa kay Herodes kag sang iya mga dinapit. Gani ang hari nagsiling sa dalagita, “Pangayo ka sang bisan ano kay ihatag ko sa imo.” Kag nagsiling pa sia, “Ginasumpa ko nga ihatag ko sa imo ang bisan ano nga pangayuon mo, bisan pa ang katunga sang akon ginharian.”

   Tungod sini naggwa ang dalagita kag nagpamangkot sa iya iloy, “Ano bala ang pangayuon ko?”

   Ang iloy nagsabat, “Ang ulo ni Juan Bautista.”

   Gilayon nagdalidali sa pagbalik ang dalagita sa hari kag nagsiling, “Gusto ko nga ihatag mo sa akon sa gilayon ang ulo ni Juan Bautista sa isa ka bandihado!”

   Nagpasubo gid ini sa hari, pero indi na sia makabalibad tungod kay nagpanumpa sia sa atubangan sang iya mga dinapit. Gani ginsugo niya sa gilayon ang isa ka soldado sa pagdala sa iya sang ulo ni Juan. Nagkadto ang soldado sa prisuhan kag ginpugotan si Juan. Kag gindala niya ang ulo nga natungtong sa isa ka bandihado kag ginhatag ini sa dalagita nga amo ang naghatag sini sa iya iloy. Sang mabatian ini sang mga gintuton-an ni Juan, ginkadtuan nila kag ginkuha ang iya bangkay kag ginlubong. 

Agosto 28 | Agosto 30

Ang Tawo nga Nagadula sang Iya Kabuhi Bangod sa Akon Makakita Sini

Liturhiya sang Pulong

(Biyernes, Agosto 7, 2020)

San Sixto, Santo Papa

Kag ang Iya mga Kaupdanan, Mga Martires

Ang Pagbasa gikan sa Libro ni:

Nahum nga Propeta 2:1, 3, 3:1-3, 6-7

   Ninive, ginsalakay ikaw! Ang gahom nga magalaglag sa imo Nag-abot na. Kadtoi ninyo ang mga pamakod Bantayi ang mga dalan! Maghanda sa pag-away!

   Ang kaaway nga mga soldado Nagadala sing pula nga mga taming Kag nagabayu sing pula. Nagahanda sila sa pagsalakay! Ang ila mga karuwahi nagakirab Kangay sang kalayo! Ang ila mga kabayo nagatuwak!

   Tapos na ang siyudad Nga butigon kag nagapamatay, Puno sang manggad Pagaatihon kag pagapanguhaon! Pamatii ang huganas sang putik, Ang dinagaldal sang rueda Ang dinalagan sang mga kabayo. Ang dinagaldal sang mga karuwahi! Ang mga manugkabayo nag-atake, Ang mga espada nag-idlab, Ang mga bangkaw nagkilan Mataas ang tinumpokan sang mga patay Mga patay nga indi maisip Matapakan ini sang mga tawo!

   Uligyaton ko ikaw Kag tabunan ko ikaw sing higko. Ang mga tawo magatulok sa imo Nga may kakugmat. Ang tanan magaisol Sa pagkakita nila sa imo. Magasiling sila, ‘Ang Ninive guba! Sin-o bala ang magakaluoy sa iya? Sin-o bala ang magalipay sa iya?’ ”

Kalantahon sa Pagsabat:

Deuteronomio 32:35-36, 39, 41

(S) Ako nagapatay kag nagahatag sang kabuhi.

Magaabot ang tion nga mapukan sila, kag ang ila kalaglagan madali na lang. Ang Ginoo magaluwas sa iya mga tawo, kon makita niya nga madulaan sila sing kusog. Kaluoyan niya ang mga nagaalagad sa iya. (S)

Ako kag ako lamang amo ang Dios; wala sang iban nga dios nga matuod. Ako nagapatay kag nagahatag sang kabuhi, ako ang nagapilas kag nagaayo. (S)

Bairon ko ang akon nagaidlak nga espada, kag pat-uron ko nga magapangibabaw ang katarungan. Timalusan ko ang akon mga kaaway, kag silutan ang mga nagadumot sa akon. (S)

Aleluya:

San Mateo 5:10

   Bulahan ang mga ginahingabot Tungod kay ginatuman nila Ang ginapaabot sang Dios sa ila, Kay ila ang Ginharian sang langit!

Ang Pagbasa sang Santos nga Ebanghelyo suno kay:

San Mateo 16:24-28

   Dayon si Jesus nagsiling sa iya mga gintuton-an, “Ang bisan sin-o nga luyag magsunod sa akon, dapat niya kalimtan ang iya kaugalingon, magpas-an sang iya krus kag magsunod sa akon. Kay ang tawo nga buot magluwas sang iya kaugalingon nga kabuhi madula sini, pero ang tawo nga nagadula sang iya kabuhi bangod sa akon makakita sini. Ano bala ang makuha sang tawo kon maangkon niya ang bug-os nga kalibutan kag madula niya ang iya kabuhi? Wala gid! Wala sing sarang mahatag ang tawo agod mabuhi sia liwat. Kay ang Anak sang Tawo madali na lang magkari sa himaya sang iya Amay kaupod sa iya mga anghel, kag dayon magahatag sia sing balos sa tagsa ka tawo suno sa iya mga binuhatan. Dumdoma ninyo ini! May iban diri sa inyo nga indi mapatay tubtob nga makita nila ang Anak sang Tawo nga nagakari subong Hari.”

Agosto 6 | Agosto 8

Ang Reaksyon ni Herodes kay Juan Bautista

Liturhiya sang Pulong

(Sabado, Agosto 1, 2020)

San Alfonso Maria de Ligorio, Obispo kag Doktor sang Simbahan

Ang Pagbasa gikan sa Libro ni:

Jeremias nga Propeta 26:11-16, 24

   Dayon ang mga pari kag mga propeta nagsiling sa mga pangulo kag sa mga tawo, "Ini nga tawo takos pamatbatan sang kamatayon, tungod kay naghambal sia batok sa aton siyudad. Kamo gid nakabati sa iya.”

   Dayon nagsiling ako, "Ang Ginoo nagpadala sa akon sa paghambal sang tanan nga inyo nabatian nga akon ginsiling batok sa sini nga Templo kag sa sini nga siyudad. Dapat ninyo bayluhan ang inyo pagginawi kag ang mga butang nga inyo ginahimo, kag tumana ang ginasiling sang Ginoo nga inyo Dios. Dayon magabaylo sia sang iya hunahona nahanungod sa kalaglagan nga iya ginsiling nga ipadala niya sa inyo. Nahanungod sa akon, yara ako sa inyo mga kamot! Himoa ninyo sa akon ang bisan ano nga ginahunahona ninyo nga nagakaigo kag matarong. Pero tandai ninyo ini: kon patyon ninyo ako, kamo kag ang mga tawo sa sini nga siyudad may salabton sa pagpatay sang isa ka tawo nga wala sing sala, kay ang Ginoo amo ang nagpadala sa akon sa pagsiling sini tanan nga mga butang sa inyo.”

   Dayon ang mga pangulo kag ang mga tawo nagsiling sa mga pari kag sa mga propeta, “Ini nga tawo indi dapat pamatbatan sing kamatayon, kay naghambal sia sa aton sa ngalan sang Ginoo nga aton Dios.”

   Tungod kay ginbuligan ako ni Ahicam, anak ni Sapan, wala ako gintugyan sa mga tawo kag ginpatay. 

Salmo sa Pagsabat:

Mga Salmo 69:15-16, 30-31, 33-34

(S) Sabta ako, O Ginoo, sa tion nga luyag mo.

Luwasa ako agod indi ako magsalop sa lunang; bantayi ako agod nga indi ako maano sa akon mga kaaway, kag sa madalom nga tubig. Indi pagpalapawa ang baha sa akon, indi pag-itugot nga malumos ako sa kadadalman, ukon magsalop sa lulobngan. (S)

Pero imol ako kag nagaantos sa kasakit, itib-ong ako O Dios, kag luwasa ako! Dayawon ko ang Dios sa isa ka ambahanon, ibantala ko ang iya pagkagamhanan paagi sa pagpasalamat sa iya. (S)

Kon makita ini sang mga imol, magakalipay sila; ang nagasimba sa Dios mapalig-on. Ang Ginoo nagapamati sa mga imol, kag wala niya ginakalimti ang iya mga tawo nga nabilanggo. (S)

Aleluya:

San Mateo 5:10

   Bulahan ang mga ginahingabot kay ginatuman nila ang ginapaabot sang Dios sa ila, kay ila ang Ginharian sang langit.

Ang Pagbasa sang Santos nga Ebanghelyo suno kay:

San Mateo 14:1-12

   Sa sadto nga tion si Herodes nga pangulo sang Galilea nakabati nahanungod kay Jesus. Nagsiling sia sa iya mga opisyales, “Ini sia amo si Juan Bautista nga nabanhaw. Tungod sini may gahom sia sa paghimo sang mga milagro.” 

   Kay ginpadakop ni Herodes si Juan, ginpusasan sia kag ginsulod sa bilangguan. Ginhimo niya ini tungod kay Herodias nga asawa ni Felipe nga iya utod. Kay si Juan Bautista nagsiling kay Herodes, “Batok sa kasugoan ang imo pagpuyo upod sina nga babayi!” Ipapatay kuntani ni Herodes si Juan, ugaling nahadlok sia sa mga Judio tungod kay ginakabig nila nga sia isa ka propeta. 

   Sa kaadlawan ni Herodes, ang anak nga babayi ni Herodias nagsaot sa atubangan sang mga bisita sa bagay nga nakunyag gid si Herodes. Tungod sini nagsiling sia, “Nagasumpa ako nga bisan ano ang imo pangayuon sa akon ihatag ko sa imo!” 

   Sa sudyot sang iya iloy nagsiling sia kay Herodes, “Ihatag sa akon karon gid ang ulo ni Juan Bautista nga nabutang sa bandihado!” 

   Si Herodes nagkasubo, pero tungod sang iya sinumpaan sa atubangan sang madamo nga mga bisita nga kaupod niya sa lamisa nagsugo sia nga tumanon ang pangayo sang lin-ay. Gani ginpapugotan niya si Juan sa bilangguan. Ang ulo gindala nga natungtong sa bandihado kag ginhatag sa lin-ay kag iya ini gindala sa iya iloy. Karon nag-abot ang mga gintuton-an ni Juan, ila ginkuha ang bangkay kag ginlubong. Dayon naglakat sila kag ginsugiran si Jesus. 

Hulyo 31 | Agosto 2

Wala Ako Magkari sa Pagdala sing Paghidait kundi sang Espada

Liturhiya sang Pulong

(Lunes, Hulyo 13, 2020)

San Enrique, Hari

Ang Pagbasa gikan sa Libro ni:

Isaias nga Propeta 1:10-17

   O Jerusalem, ang imo mga pangulo kag ang imo mga pumoluyo kaangay sang sa Sodoma kag Gomorra. Pamatii ang ginasiling sang GINOO sa inyo. Talupangda ang ginatudlo sang aton Dios sa inyo. Nagasiling sia, "Nagahunahona bala kamo nga naluyagan ko ini tanan nga mga halad nga ginadulot ninyo sa akon? Natak-an na ako sang mga karnero nga inyo ginasunog subong mga halad kag sang sapay sang inyo pinatambok nga mga sapat. Wala ako malipay sang dugo sang mga baka nga toro, mga karnero kag mga kanding. Wala na ako sing kinahanglan sang inyo mga dulot nga wala sing pulos. Ginasum-oran ako sang baho sang insyenso nga inyo ginadulot. Indi na ako makaagwanta sang inyo mga Piesta sa Lati, sang inyo mga Inugpahuway kag sang inyo mga pagtililipon. Ini tanan ginadagtaan tungod sang inyo mga sala. "Kon magbayaw kamo sang inyo mga kamot sa pagpangamuyo indi ako magsapak sa inyo. Bisan daw ano kadamo sang inyo mga pangamuyo, indi ako magpamati kay ang inyo mga kamot may dagta sang sala. Magpaninlo kamo sang inyo kaugalingon. Untati ninyo ini tanan nga kalautan nga inyo ginahimo sa akon atubangan. Untati na ninyo ang paghimo sing malaut, kag himoa ninyo ang matarong. Pangitaa ninyo ang katarungan—buligi ninyo ang mga ginapigos, ihatag sa mga ilo ang ila mga kinamatarong, kag apini ang mga balo."

Salmo sa Pagsabat:

Mga Salmo 50:8-9, 16-17, 21 kag 23

(S) Luwason ko gid ang tanan nga nagatuman sa akon.

Wala ako nagasaway sa imo tungod sang imo mga halad kag sang mga halad nga sinunog nga imo pirme ginahalad sa akon. Wala ako kinahanglan sang toro nga mga baka gikan sa inyo mga pastuhan, ukon mga kanding gikan sa inyo mga kahayupan. (S)

Ngaa bala nagahambal ka nahanungod sang akon kasugtanan? Indi ka magpatudlo sa akon, ginasikway mo ang akon mga sugo. (S)

Ini tanan ginhimo mo, kag naghipos lang ako, gani nagpanghunahona ka nga kaangay ako sa imo. Pero karon sabdungon ko ikaw, kag ipaathag ini nga butang sa imo. Ang mga pagpasalamat amo ang halad nga nagapadungog sa akon, kag luwason ko gid ang tanan nga nagatuman sa akon.” (S)

Aleluya:

Mateo 5:10

   Bulahan ang mga ginahingabot Tungod kay ginatuman nila Ang ginapaabot sang Dios sa ila, Kay ila ang Ginharian sang langit! 

Ang Pagbasa sang Santos nga Ebanghelyo suno kay:

San Mateo 10:34-11:1

   “Indi kamo maghunahona nga nagkari ako sa kalibutan sa pagdala sing paghidait. Wala ako magkari sa pagdala sing paghidait kundi sang espada. Nagkari ako sa pagpaaway sang anak nga lalaki batok sa iya amay, sang anak nga babayi batok sa iya iloy, sang umagad nga babayi batok sa iya ugangan nga babayi. Ang mapait nga kaaway sang tawo amo ang mga katapo sang iya panimalay. 

   “Ang nagahigugma sang iya amay ukon iya iloy sing labi pa sa akon, indi takos sa akon; ang nagahigugma sa iya mga kabataan sing labi pa sa akon, indi takos sa akon. Ang wala nagapas-an sang iya krus kag nagasunod sa akon, indi takos sa akon. Ang nagapaniguro sang iya kabuhi madulaan sini; kag ang nagadula sang iya kabuhi tungod sa akon makita niya ini.” 

   “Ang nagabaton sa inyo nagabaton sa akon; kag ang nagabaton sa akon nagabaton man sang nagpadala sa akon. Ang nagabaton sang mensahero sang Dios tungod kay mensahero sia sang Dios may parti sang balos nga para sa mensahero sang Dios. Ang nagabaton sang matarong nga tawo tungod kay sia matarong may parti sang balos nga para sa matarong. Dumdoma ninyo ini! Ang nagapainom sang bisan isa lamang ka baso nga mabugnaw nga tubig sa isa sining akon pinakakubos nga gintuton-an, tungod kay gintuton-an ko sia, magabaton gid sang iya balos.”

   Sa tapos masingganan ni Jesus ang iya dose ka mga apostoles kon ano ang ila himuon naghalin sia sa sadto nga duog sa pagpanudlo kag pagwali sa palibot nga mga banwa.

Hulyo 12 | Hulyo 14