“Magaluwas Sia sang Iya mga Tawo sa ila mga Sala”

Liturhiya sang Pulong

(Lunes, Disyembre 24, 2018)

Misa sa Bisperas sang Pagkatawo

1. Ang Pagbasa gikan sa Libro ni:

Isaias nga Propeta 62:1-5 

Magahambal ako sa pagpaisog sa Jerusalem; indi ako maghipos tubtob nga indi sia maluwas, kag ang iya pagdaog magadabdab kaangay sang isa ka sulo sa kagab-ihon. O Jerusalem, ang mga kapungsoran makakita sa imo nga madinalag-on! Ang tanan nila nga mga hari makakita sang imo himaya. Pagatawgon Ikaw sa bag-o nga ngalan, isa ka ngalan nga ang Ginoo gid ang naghatag. Mangin kaangay ikaw sang isa ka matahom nga korona para sa Ginoo. Indi na ikaw pagtawgon nga "Sinikway,” ukon ang imo duta pagtawgon nga "Ang Binayaan nga Asawa!" Ang imo bag-o nga ngalan pagatawgon “Ang Dios Nalipay sa Imo!” ang imo duta pagatawgon nga "Nakasal sing Malipayon,” tungod kay ang Ginoo nalipay sa imo, kag manginkaangay sia sang isa ka bana sa imo duta. Ang Ginoo magakuha sa imo subong iya asawa, kag manginmalipayon kamo nga duha subong ka malipayon sang isa ka asawa kag bana. 

Salmo sa Pagsabat:

Mga Salmo 89:4-5; 16-17; 26 kag 29 

(S) O Ginoo, magakanta ako gihapon nahanungod sang imo mapinadayunon nga gugma. 

Nagsiling ka, "Naghimo ako sing kasugtanan sa tawo nga akon ginpili; nagsaad ako sa akon alagad nga si David, ang isa sang imo mga kaliwat manginhari sa wala sing katubtoban; tipigan ko ang imo ginharian sa wala sing katapusan." (S) 

Bulahan ang mga tawo nga nagasimba sa imo sa mga ambahanon, nga nagakabuhi sa kapawa sang imo kaayo. Tungod sa imo nagakalipay sila sa bug-os nga adlaw, kag nagadayaw sa imo tungod sang imo kaayo. (S)

Magasiling sia sa akon, ‘Ikaw ang akon Amay kag akon Dios; Ikaw ang akon Mangangapin kag Manluluwas.' Pagahimuon ko sia nga akon panganay nga anak nga lalaki, ang Iabing gamhanan sa tanan nga mga hari. (S)

2. Ang Pagbasa gikan sa mga:

Binuhatan sang mga Apostoles 13:16-17; 22-25 

Nagtindog si Pablo, nagsinyas sa ila nga maghipos kag nagsiling: “Mga kasimanwa ko nga mga Israelinhon kag tanan nga mga Gentil nga yari diri nga nagasimba sa Dios, pamatii ninyo ako! Ang Dios sining mga tawo sang Israel nagpili sang aton mga katigulangan kag nagpadaku sa ila samtang nga didto sila nagapuyo subong nga mga dumoluong sa Egipto. Ginpagwa sila sang Dios sa Egipto paagi sa iya daku nga gahom. Sang mapahalin sia, ginhimo sang Dios si David nga hari nila. Amo ini ang ginsiling sang Dios nahanungod sa iya, ‘Si David nga anak ni Jese amo ang tawo nga akon naluyagan, kay isa sia ka tawo nga nagatuman sang tanan nga ginasugo ko sa iya.’ Si Jesus, isa sang mga kaliwat ni David, amo ang ginhimo sang Dios nga Manlulowas sang Israel suno sa iya ginsaad. Sa wala pa makasugod si Jesus sang iya bulohaton, nagwali si Juan sa tanan nga mga tawo sa Israel nga magbiya sila sa ila mga sala kag magpabautiso. Kag sang nagahingapos na si Juan sang iya bulohaton, nagsiling sia sa mga tawo, ‘Sa inyo abi, sin-o bala ako? Indi ako ang ginapaabot ninyo. Pero tandai ninyo! Nagakari sia nga ulihi lang sa akon, pero indi ako takos sa paghubad sang higot sang iya mga sandalyas.’ 

Aleluya: 

Buas, pagapanason ang kalainan sang duta; kag magahari sa aton ang Manluluwas sang kalibutan. 

Ang Pagbasa sang Santos nga Ebanghelyo suno kay:

San Mateo 1:1-25 

Amo ini ang lista sang mga katigulangan ni Jesu-Cristo nga kaliwat ni David nga kaliwat man ni Abraham. Si Abraham amay ni Isaac; si Isaac amay ni Jacob; si Jacob amay ni Juda kag sang iya mga utod nga lalaki. Si Juda amay ni Fares kag ni Zara nga ang ila sini iloy si Tamar. Si Fares amay ni Esrom; si Esrom amay ni Aram. Si Aram amay ni Aminadab; si Aminadab amay ni Naason; si Naason amay ni Salmon; si Salmon amay ni Booz kag ang iya sini iloy si Rahab. Si Booz amay ni Obed kag ang iya sini iloy si Rut. Si Obed amay ni Jese; si Jese amay ni Haring David. Si David amay ni Salomon kag ang iya sini iloy amo ang asawa anay ni Urias; si Salomon amay ni Roboam; si Roboam amay ni Abias; si Abias amay ni Asa; si Asa amay ni Josafat; si Josafat amay ni Joram; si Joram amay ni Ozias; si Ozias amay ni Joatam; si Joatam amay ni Acas; si Acas amay ni Ezequias. Si Ezequias amay ni Manases; si Manases amay ni Amon; si Amon amay ni Josias; si Josias amay ni Jeconias kag sang iya mga utod nga lalaki, sang panahon nga ang mga taga-Israel ginbihag pa Babilonia. Sa tapos mabihag ang mga taga-Israel sa Babilonia, amo pa ini ang mga katigulangan ni Jesus: si Jeconias amay ni Salatiel; si Salatiel amay ni Zorobabel; si Zorobabel amay ni Abiud; si Abiud amay ni Eliaquim; si Eliaquim amay ni Azor; si Azor amay ni Sadoc; si Sadoc amay ni Aquim; si Aquim amay ni Eliud; si Eliud amay ni Eleazar; si Eleazar amay ni Matan; si Matan amay ni Jacob; si Jacob amay ni Jose, nga bana ni Maria nga amo ang iloy ni Jesus nga ginatawag Cristo. Gani may katorse ka mga kaliwatan halin kay Abraham tubtob kay David, kag may katorse man ka mga kaliwatan halin kay David tubtob sang pagbihag sang mga taga-Israel pa Babilonia, kag katorse pa gid ka kaliwatan halin sa pagdala sang mga taga-Israel sa Babilonia tubtob sa pagkatawo sang Cristo. Amo ini ang pagkatawo ni Jesu-Cristo. Ang iya iloy nga si Maria kalasalon na kay Jose, pero sa wala pa sila makasal nasapwan ni Maria nga nagabusong na sia sa gahom sang Espiritu Santo. Si Jose nga kalasalon sa iya isa ka tawo nga nagahimo sing matarong, pero indi sia luyag nga mahuy-an si Maria sa mga tawo. Gani ginpakamaayo niya ang pagbiya sa iya sa tago lang. Samtang ginabinagbinag ni Jose ini nga butang, ang isa ka anghel sang Ginoo nagpakita sa iya sa damgo nga nagasiling, “Jose, kaliwat ni David, indi ka magkahadlok sa pagpangasawa kay Maria, kay ang Espiritu Santo amo ang naglalang sang ginabusong niya. Magaanak sia sing lalaki, kag pagahingalanan mo sia nga Jesus, kay magaluwas sia sang iya mga tawo sa ila mga sala.” Karon ini tanan nahanabo agod mapamatud-an ang ginhambal sang Ginoo paagi sa propeta, “Ang isa ka ulay magabusong kag magaanak sang isa ka bata nga lalaki, kag pagatawgon sia nga Emanuel” (nga kon sayuron, “Ang Dios kaupod naton”). Gani sang pagmata ni Jose gintuman niya ang ginsiling sang anghel sang Ginoo, kag iya ginpangasawa si Maria. Pero wala si Jose magtandog kay Maria tubtob nga nag-anak sia sing lalaki, kag ginhingalanan ni Jose ang bata nga Jesus.

Disyembre 24 (Misa de Aguinaldo) | Disyembre 25 (Misa sa Tungang Gab-i)