"Karon gid nga Gab-i Natawo ang Inyo Manlulowas, Cristo nga Ginoo"

Liturhiya sang Pulong

(Martes, Disyembre 25, 2018)

Ang Pagkatawo sang Ginoo

Misa sa Tungang Gab-i

1. Ang Pagbasa gikan sa Libro ni:

Isaias nga Propeta 9:1-6

Ang duta sang tribo ni Zabulon kag ni Neftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagapuyo ang mga dumoluong. Ang mga tawo nga nagalakat sa kadudolman nakakita sing daku nga kapawa! Nagapuyo sila sa duta sang mga landong, pero karon ang kapawa nagasilak sa ila. O Ginoo, ginhatagan mo sila sing daku nga kalipay; ginhimo mo nga magmalipayon sila. Maghugyaw sila sa Imo ginhimo, subong sang paghinugyaw sang mga tawo nga nagaani, ukon magpartida sila sang inagaw nga mga manggad. Kay ginbali mo ang gota nga nagapabug-at sa ila kag ang baston nga naghanot sang ila mga abaga. Ikaw, O Ginoo, ang naglutos sang pungsod nga nagpigos kag nagpamintaha sang Imo mga tawo subong sang imo paglutos sadto anay sang mga hangaway sang Midian. Ang mga botas sang nagpanggubat nga mga hangaway, kag ang tanan nila nga mga bayu nga nabulit sang dugo, pagasunogon sa kalayo! Ang isa ka bata matawo sa aton! Ang isa ka anak ginhatag sa aton! Kag sia ang aton mangin pangulo. Pagatawgon sia,"Maalam nga Manuglaygay," “Gamhanan nga Dios,” “Amay nga wala sing Katubtoban,” “Amay sang Paghidait.”

Salmo sa Pagsabat:

Mga Salmo 96:1-2, 2-3,11-12,13

(S) Sa karon gid nga gab-i natawo para sa aton ang Manluluwas, si Kristo nga Ginoo.

Magkanta kamo sing bag-o nga ambahanon sa Ginoo! Mag-amba kamo sa Ginoo, O bug-os nga duta! Magkanta kamo sa Ginoo, kag dayawa ninyo Sia! (S)

Isugid adlaw-adlaw ang maayong balita nga sia nagluwas sa aton! Ibantala ang iya himaya sa mga kapungsoran. Ang iya gamhanan nga mga binuhatan sa tanan nga katawohan. (S)

Magkasadya kamo, O langit kag duta! Magdaguhob ka, O dagat, kag ang tanan nga mga tinuga nga yara sa imo; magkasadya kamo, O mga latagon, kag ang tagsa ka butang nga yara sa inyo! Dayon ang mga kahoy sa kagulangan magahinugyaw sa kasadya sa atubangan sang Ginoo. (S)

Kay nagakari sia sa paggahom sang duta. Pagagamhan niya ang tanan nga katawohan sang kalibutan sa katarungan kag kamatuoran. (S)

2. Ang Pagbasa gikan sa Sulat ni San Pablo nga Apostol, kay:

Tito 2:11-14

Labing hinigugma ko: Kay ginpahayag sang Dios ang iya grasya para sa kaluwasan sang tanan nga mga tawo. Ina nga grasya nagatudlo sa aton sa pagsikway sang pagkabuhi nga di-diosnon kag sang kalibutanon nga mga kailigbon, kag sa pagkabuhi sa sining kalibutan nga may pagpugong sang kaugalingon, matarong kag diosnon, samtang nagapaabot kita sang bulahan nga Adlaw nga aton ginalauman, nga ang himaya sang aton gamhanan nga Dios kag Manlulowas nga si Jesu-Cristo magapakita. Gintugyan niya ang iya kaugalingon tungod sa aton, agod maluwas kita sa tanan nga mga kalautan kag manginputli nga mga tawo nga iya kaugalingon kag nagahandom sa paghimo sing maayo.

Aleluya:

Lucas 2:10-11

Nagadala ako sa inyo sing isa ka daku nga kalipay. Sa karon gid nga gab-i natawo para sa aton ang Manluluwas, si Kristo nga Ginoo.

Ang Pagbasa sang Santos nga Ebanghelyo suno kay:

San Lucas 2:1-14

Sadto nga panahon ang Emperador nga si Augusto nagmando nga ang tanan nga ginsakpan sang Emperyo magpalista sang ila kaugalingon para sa senso. Ining nahauna nga pagpanglista ginhimo sang si Cirenio ang gobernador sang Siria. Gani ang tagsatagsa nagpauli sa iya kaugalingon nga banwa sa pagpalista. Halin sa banwa sang Nazaret sa Galilea, si Jose nagpauli sa Judea, sa banwa nga ginatawag Betlehem, sa diin natawo si Haring David. Nagkadto sia didto kay sia kaliwat ni David. Nagpalista sia upod kay Maria nga ginsaad nga mangin-asawa niya. Nagabusong na si Maria, kag samtang didto sila sa Betlehem nag-abot ang tion nga inugbata na niya. Nagbata sia sang iya panganay nga lalaki. Ginputos niya ini sang lampin kag ginpahigda sa isa ka pasungan kay wala na sing lugar para sa ila sa balay nga dalayunan. Sa sadto nga duog may mga manugbantay sang karnero nga nagapulaw sa latagon sa bilog nga gab-i sa pagbantay sang ila mga hayop. Ang isa ka anghel sang Ginoo nagpakita sa ila, kag ang himaya sang Ginoo nagsilak sa ila. Hinadlukan gid sila, pero ang anghel sang Ginoo nagsiling sa ila, “Indi kamo magkahadlok! kay nagkari ako sa pagdala sa inyo sing Maayong Balita nga magahatag sing daku nga kalipay sa tanan nga mga tawo. Karon gid nga gab-i natawo sa banwa ni David ang inyo Manlulowas, ang Cristo nga Ginoo! Amo ini ang tanda para sa inyo: makita ninyo ang isa ka bata nga naputos sang lampin kag nagahigda sa isa ka pasungan.” Sa hinali nagpakita ang isa ka guban sang mga anghel sang langit kag nagbuylog sa sadto nga anghel kag nagkanta sila sini nga mga pagdayaw sa Dios: “Himaya sa Dios sa kahitaasan! Kag paghidait sa duta Sa mga tawo nga iya nahamut-an!”

Disyembre 24 (Misa sa Bisperas sang Pagkatawo) | Disyembre 25 (Misa sa Kaagahon)