Pagpahayag Sang Gugma

1. Akon nga kantahon kabuhi sa uma,

Hayop kag hilamon masinadyahon

Dapya sang hangin nga mabugnaw,

akon nga kantahon kag ihugyaw.

Ang paghigugma sang Manugtuga,

ginapahayag sang tanum sa uma.

2. Akon nga kantahon tubig sa dagat,

palangitan-an sang katawohan;

Sulog sang tubig nga mabugnaw,

akon nga kantahon kag ihugyaw.

Ang paghigugma sang Manugtuga,

ginapahayag sang balud sa laya.

3. Akon nga kantahon talon sa bukid,

Tigbaw kag talahib sa akon dalan;

Ilig sang tubig sa may busay;

akon nga kantahon kag isaysay.

Ang paghigugma sang Manugtuga,

ginapahayag sa tigbaw kag banas.

4. Akon nga kantahon tubig sang bunyag,

kabuhi sa altar ani sa duta;

Halad sa Imo, amon Amay,

paagi kay Jesus manunubos;

Ang paghigugma sang Manugtuga,

Ginapahayag sang Anak sa Amay.