1 2 3 4 5 6 7 8 9 10 11 12 13 14 15 16 17 18 19 20 21 22 23
24 25 26 27 28 29 30 31 32 33 34 35 36 37 38 39 40 41 42 43 44
45 46 47 48 49 50 51 52 53 54 55 56 57 58 59 60 61 62 63 64 65 66
1 Ini nga libro nagasugid sang mga palanan-awon nahanungod sa Juda kag Jerusalem nga ginpahayag sang Dios kay Isaias nga anak ni Amoz, sang panahon nga sanday Uzias, Jotam, Acaz, kag Ezequias amo ang mga hari sang Juda.
Ang Dios Nagsabdong sang Iya mga Tawo
2 Ang GINOO nagsiling, "O duta kag langit, pamatii ang ginasiling ko, ang GINOO! Ang mga anak nga akon ginsagod nagbato sa akon.
3 Ang mga baka nakakilala sang ila agalon, kag ang mga asno nakatultol sang pasungan nga ginapakan-an sa ila sang ila agalon. Maayo pa sila sa akon mga tawo nga Israelinhon, kay ang akon mga tawo wala makahangop."
4 Tapos ka na, ikaw nga makasasala nga pungsod. Kamo nga dunot kag malaut nga mga tawo! Ang inyo mga sala nagaguyod sa inyo sa kalainan! Ginsikway kag gintalikdan ninyo ang GINOO, ang balaan nga Dios sang Israel.
5 Ngaa nagapadayon kamo sa pagsumpong sa iya? Luyag pa gid bala kamo nga silutan? O Israel, ang imo ulo nalikupan sing mga pilas, kag ang imo tagipusoon kag hunahona masakiton.
6 Halin sa imo alimpudwan tubtob sa imo dapadapa wala gid sing bahin nga maayo. Puno ikaw sing mga lagob, mga hubag kag mga pilas. Ang imo mga pilas wala mahugasi ukon mabugkosi. Wala ini mabulong.
7 Ang imo pungsod ginlaglag kag ang imo mga siyudad ginsunog. Samtang nagatan-aw ikaw, ang mga dumoluong nag-agaw sang imo duta kag nagpangguba sang tanan nga mga butang.
8 Ang Jerusalem amo lamang ang nabilin, isa ka siyudad nga nakibon--subong sang isa ka mahuyang nga payag nga balantayan sa talamnan sang ubas, ukon isa ka pala-pala sa talamnan sang atimon.
9 Kon ang GINOO nga Makagagahom wala magbilin sing mga tawo nga mabuhi, kuntani ang Jerusalem naguba sing bug-os subong sang Sodoma kag Gomorra.
10 O Jerusalem, ang imo mga pangulo kag ang imo mga pumoluyo kaangay sang sa Sodoma kag Gomorra. Pamatii ang ginasiling sang GINOO sa inyo. Talupangda ang ginatudlo sang aton Dios sa inyo.
11 Nagasiling sia, "Nagahunahona bala kamo nga naluyagan ko ini tanan nga mga halad nga ginadulot ninyo sa akon? Natak-an na ako sang mga karnero nga inyo ginasunog subong mga halad kag sang sapay sang inyo pinatambok nga mga sapat. Wala ako malipay sang dugo sang mga baka nga toro, mga karnero kag mga kanding.
12 Sin-o bala ang nagasiling sa inyo nga dalhon ninyo ini tanan sa inyo pagkari sa pagsimba sa akon? Sin-o bala ang nagsiling sa inyo sa paglibutlibot sa akon Templo?
13 Wala na ako sing kinahanglan sang inyo mga dulot nga wala sing pulos.Ginasum-oran ako sang baho sang insyenso nga inyo ginadulot. Indi na ako makaagwanta sang inyo mga Piesta sa Lati, sang inyo mga Inugpahuway kag sang inyo mga pagtililipon. Ini tanan ginadagtaan tungod sang inyo mga sala.
14 Naakig ako sa inyo mga Piesta sa Lati kag balaan nga mga adlaw. Natak-an na ako sini kag indi na ako makabatas.
15 "Kon magbayaw kamo sang inyo mga kamot sa pagpangamuyo indi ako magsapak sa inyo. Bisan daw ano kadamo sang inyo mga pangamuyo, indi ako magpamati kay ang inyo mga kamot may dagta sang sala.
16 Magpaninlo kamo sang inyo kaugalingon. Untati ninyo ini tanan nga kalautan nga inyo ginahimo sa akon atubangan. Untati na ninyo ang paghimo sing malaut,
17 kag himoa ninyo ang matarong. Pangitaa ninyo ang katarungan--buligi ninyo ang mga ginapigos, ihatag sa mga ilo ang ila mga kinamatarong, kag apini ang mga balo."
18 Ang GINOO nagasiling, "Karon, athagon ta ini nga butang. Nagpula ikaw tungod sang dagta sang sala, pero tinluan ko ikaw nga magputi gid kaayo. Ayhan ang dagta sang sala tama kapula, pero manginmaputi ka subong sang bulbol sang karnero.
19 Kon magtuman ka lamang sa akon, magakaon ka sing maayo nga mga patubas sang duta.
20 Pero kon indi ka magtuman kag magsumpong ka sa akon, mapatay ka. Ako ang GINOO, amo ang naghmbal sini."
Ang Makasasala nga Siyudad
21 Ang siyudad nga sang una anay matutom, karon kaangay na sang isa ka babayi nga nagabaligya sang iya dungog. Sang una ang matarong nga mga tawo nagapuyo didto, pero karon ang mga kriminal lamang amo ang nabilin.
22 O Jerusalem, sang una kaangay ikaw sang pilak, pero karon wala ikaw sing pulos. Sang una pareho ikaw sang maayo nga bino, pero karon tubig ka na lang.
23 Ang imo mga pangulo mga rebelde kag kaupdanan sang mga makawat. Nagabaton sila pirme sing mga regalo kag mga hamham, pero wala nila ginaapini ang mga ilo sa korte, ukon nagapamati kon magpangayo sing tabang ang mga balo.
24 Gani karon, pamatii ang ginasiling sang GINOO nga Makagagahom, ang gamhanan nga Dios sang Israel, "Magatimalos ako sa inyo, kamo nga mga kaaway ko, kag indi na kamo makatublag sa akon.
25 Magasilot ako sa inyo. Tunawon ko kamo subong sang pagpapuraw sang metal, kag kuhaon ko ang inyo mga kahigkuan.
26 Hatagan ko kamo sing mga pangulo kag mga palamangkutan subong sang una. Dayon ang Jerusalem pagatawgon nga matarong kag matutom nga siyudad."
27 Tungod kay ang GINOO matarong, luwason niya ang Jerusalem kag ang tagsatagsa nga nagahinulsol didto.
28 Pero dugmokon niya ang tagsatagsa nga nagapakasala kag nagasumpong sa iya. Pamatyon niya ang tagsatagsa nga nagasikway sa iya.
29 Magakahuya kamo nga nagsimba kamo sa mga kahoy kag nagpahimo sing hardin nga ginasimbahan.
30 Mapatay kamo kaangay sang nagakalaya nga kahoy nga terebinto, pareho sang isa ka hardin nga wala mabunyagi.
31 Subong sang mamala nga kahoy nga masunog sa isa ka agsik sang kalayo, amo man ang gamhanan nga mga tawo malaglag paagi sa ila malaut nga mga binuhatan, kag wala sing isa nga makapauntat sang kalaglagan.
No comments:
Post a Comment