HEBREO - Kapitulo 1

1 2 3 4 5 6 7 8 9 10 11 12 13

Ang Pulong sang Dios paagi sa Iya Anak

1 Sang una nga panahon ang Dios naghambal sa aton mga katigulangan paagi sa mga propeta sa madamo nga mga beses kag sa sarisari nga mga paagi.

Pero sa sining ulihi nga mga inadlaw, naghambal siya sa aton paagi sa iya Anak. Paagi sa iya, ginhimo sang Dios ang bug-os nga kalibutan, kag siya man ang iya ginpili nga mangin tag-iya sang tanan nga mga butang. 3 Sa iya mismo makita ang gahom sang Dios nga nagasilak, kag kon ano ang Dios amo man siya. Siya amo ang nagabuot sang tanan nga mga butang sa bug-os nga kalibutan paagi sa iya makagagahom nga pulong. Pagkatapos nga nalimpyuhan niya kita sa aton mga sala, nagpungko siya didto sa langit, sa tuo sang Makagagahom nga Dios. Mas Labaw ang Anak sang Dios sang sa mga Anghel 4 Gani mas labaw ang Anak sang Dios kag mas halangdon ang iya ngalan sang sa mga anghel. 5 Kay wala gid sing anghel nga ginsilingan sang Dios nga, "Ikaw ang akon Anak, kag karon ipakilala ko nga ako ang imo Amay." Kag wala man nagsiling ang Dios parte sa bisan kay sin-o nga anghel nga, "Ako mangin iya Amay, kag siya mangin akon Anak." 6 Kag sang buot na ipadala sang Dios ang iya bugtong nga Anak diri sa kalibutan, nagsiling man siya nga, "Ang tanan nga mga anghel sang Dios dapat magsimba sa iya." 7 Amo ini ang ginsiling sang Dios parte sa mga anghel, "Ang mga anghel akon lang mga suluguon, kag puwede ko sila nga himuon nga pareho sa hangin ukon pareho sa kalayo nga nagadabdab kon gusto ko." 8 Pero kon parte sa iya Anak, nagsiling siya, "Ang imo ginharian, O Dios, wala gid sing katapusan, kag matarong ang imo pagdumala sa imo ginharian. 9 Nalipay ikaw sa mga nagahimo sang matarong, pero naugot ka sa nagahimo sang malain. Gani ginpili ikaw sang Dios, nga imo Dios, kag ginhatagan ikaw sang kalipay nga labaw sang sa ginhatag niya sa imo mga kaupdanan." 10 Kag nagsiling pa gid siya sa iya Anak, "Ikaw, Ginoo, amo ang naghimo sang kalibutan, kag ang langit ginhimo man sang imo mga kamot. 11 Ang tanan nga ini magakalawala, pero ikaw magapadayon sa gihapon. Ang tanan magagabok pareho sa mga bayo. 12 Kag pareho man sa mga bayo, piuron mo ini tanan kag ilisan mo dayon. Pero ikaw iya amo lang sa gihapon, wala nagatigulang kag wala sing kamatayon." 13 Halin pa sang una, wala gid sing anghel nga ginsilingan sang Dios nga, "Pungko ka sa akon tuo, hasta mapaampo ko sa imo ang imo mga kaaway." 14 Ti, indi bala ang mga anghel mga espiritu lang nga ginasugo sang Dios nga magbulig sa mga tawo nga magabaton sang kaluwasan?

FILEMON - Kapitulo 1 <<<   >>> HEBREO - Kapitulo 2