Enero 2, 2021, San Basilio kag San Gregorio Nasianceno, Mga Obispo kag Doktor sang Simbahan

Liturhiya sang Pulong

Nahauna nga Balasahon - 1 Juan 2:22-28

Salmo sa Pagsabat - Mga Salmo 98:1, 2-3, 3-4

Aleluya - Hebreo 1:1-2

Ebanghelyo - Juan 1:19-28

Ang Pagbasa gikan sa Nahauna nga Sulat ni:

San Juan nga Apostol 2:22-28

   Labing Hinigugma: Sin-o karon ang butigon? Ang nagasiling nga si Jesus indi amo ang Cristo. Ini amo ang Anti-Cristo, sia nga nagasikway sang Amay kag sang Anak. Ang nagasikway sang Anak, nagasikway man sang Amay, kag ang nagabaton sang Anak nagabaton man sang Amay.

   Gani pat-ura gid nga matipigan sa inyo mga tagipusoon ang mga pulong nga inyo nabatian halin sa ginsugoran. Kon ang inyo ginatuman amo ang inyo nabatian halin sa ginsugoran, ti magakabuhi kamo sa gihapon nga nahiusa sa Anak kag sa Amay. Kag amo ini ang ginsaad ni Cristo nga ihatag sa aton—ang kabuhi nga wala sing katapusan.

   Ginasulat ko ini sa inyo nahanungod sang mga nagatinguha sa pagpatalang sa inyo. Pero kamo inyo ginbuboan ni Cristo sang iya Espiritu. Samtang nga ang iya Espiritu yara sa inyo, wala kamo kinahanglan sang bisan sin-o nga magtudlo sa inyo. Kay ang iya Espiritu nagatudlo sa inyo nahanungod sang tanan nga mga butang, kag ang iya ginatudlo matuod, kag indi butig. Gani tumana ang ginatudlo sang Espiritu, kag magpabilin kay Cristo.

   Karon, mga anak ko, magpabilin kamo sa iya, agod indi kita magkahadlok kon sia magpahayag, kag indi kita kinahanglan magpanago sa iya sa kahuya sa Adlaw sang iya pagkari.

Salmo sa Pagsabat:

Mga Salmo 98:1, 2-3, 3-4

(S) Ang tanan nga mga ukbong sang duta nakakita sang Manluluwas nga ginpadala sang Dios.

Magkanta sing bag-o nga ambahanon sa Ginoo kay nakahimo sia sang makatilingala nga mga butang! Paagi sa iya kaugalingon nga gahom kag balaan nga kusog, nagdaog Sia. (S)

Ginbantala sang Ginoo ang Iya pagdaog, ginpakilala niya sa mga pungsod, ang iya gahom sa pagluwas. Gintuman niya ang iya saad sa mga tawo sang Israel, nga may mapinadayunon nga gugma kag pag-unong sa ila. (S)

Ang tanan nga katawuhan bisan diin nakakita sang pagdaog sang aton Dios! Magkanta kamo sa kalipay sa Ginoo, O bug-os nga duta; dayawa sia sa mga ambahanon kag mga paghinugyaw! (S)

Aleluya:

Hebreo 1:1-2

   Sang una nga panahon, ang Dios naghambal sa aton mga katigulangan paagi sa mga propeta, sining ulihi nga mga inadlaw, naghambal Sia sa aton paagi sa Iya Anak.

Ang Pagbasa sang Santos nga Ebanghelyo suno kay:

San Juan 1:19-28

   Ang mga pangulo sang mga Judio sa Jerusalem nagpadala sing mga pari kag mga Levita sa pagpamangkot kay Juan kon sin-o sia. Si Juan nagsabat kag nagpahayag nga wala sing lipudlipod, “Indi ako ang Cristo.”

   Ginpamangkot nila sia, “Kon amo, sin-o ka? Ikaw bala si Elias?”

   Nagsabat si Juan, “Indi ako si Elias.”

   Nagpamangkot sila, “Ikaw bala ang Propeta?”

   Nagsabat si Juan, “Indi.”

   Nagsiling sila, “Sugiri kami kon sin-o ka agod may isabat kami sa mga nagpadala sa amon. Ano ang masiling mo nahanungod sa imo kaugalingon?”

     Si Juan nagsabat:

     “Ako amo ‘ang tingog sang isa

     Nga nagasinggit sa desierto:

     Maghimo kamo sing tadlong nga dalan

   Nga pagaagyan sang Ginoo!’”

   (Amo ini ang ginsiling ni Isaias nga propeta.) Ini nga mga sinugo ginpadala sang mga Fariseo. Ginpamangkot nila si Juan, “Kon indi ikaw ang Cristo, ukon si Elias ukon ang Propeta, ngaa bala nga nagapangbautiso ka?”

   Nagsabat si Juan, “Ako nagapangbautiso sa tubig, pero sa tunga ninyo may isa nga wala ninyo makilala. Ulihi lang sia sa akon, pero indi ako takos sa paghubad sang higot sang iya sandalyas.”

   Ini tanan nahanabo sa Betania, sa tabok sang suba sang Jordan sa diin nagapangbautiso si Juan.

Enero 1 | Enero 3

Disyembre 8, 2020, Ang Walay Dagta nga Pagpanamkon kay Santa Maria Birhen

 Liturhiya sang Pulong

Nahauna nga Balasahon - Genesis 3:9-15, 20

Salmo sa Pagsabat - Mga Salmo 98:1, 2-3, 3-4

Ikaduha nga Balasahon - Efeso 1:3-6, 11-12

Aleluya - Lucas 1:28

Ebanghelyo - Lucas 1:26-38

"Kay sa Dios Wala sing bisan ano nga Indi Mahimo"

1. Ang Pagbasa gikan sa Libro sang:

Genesis 3:9-15, 20

   Pero gintawag sang GINOONG Dios ang lalaki, “Diin ka?”

   Ang lalaki nagsabat, “Nabatian ko ikaw sa katamnan. Nahadlok ako kag nagpanago ako sa imo kay hubo ako.”

   Ang Dios nagpamangkot, “Sin-o ang nagsiling sa imo nga hubo ka? Nagkaon ka bala sang bunga sang kahoy nga ginsiling ko sa inyo nga indi ninyo pagkaunon?” Ang lalaki nagsabat, “Ang babayi nga ginhimo mo para sa akon amo ang naghatag sa akon sang bunga sang kahoy kag nagkaon ako.”

   Ginpamangkot sang GINOONG Dios ang babayi, “Ngaa bala ginhimo mo ini?” Nagsabat sia, “Ang man-og nagganyat sa akon sa pagkaon sadto.”

   Karon ang GINOONG Dios nagsiling sa man-og, “Pagasilutan ka tungod sini. Ikaw lamang sa tanan nga mga sapat ang magaantos sini nga silot. Sugod karon magasaog ka sa imo tiyan, kag yab-ok ang imo pagakaunon samtang nagakabuhi ka. Ikaw kag ang babayi magadumtanay. Ang mga tawo kag ang mga man-og manginkaaway sa wala sing katubtoban. Ang mga tawo magadugmok sang imo ulo, kag magabuntog ka sang ila mga tikod.”

   Ginhingalanan ni Adam ang iya asawa kay Eva kay sia ang iloy sang bug-os nga katawuhan.

Salmo sa Pagsabat:

Mga Salmo 98:1, 2-3, 3-4

(S) Magkanta sing bag-o nga ambahanon sa Ginoo kay nakahimo sia sang makatilingala nga mga butang.

Magkanta sing bag-o nga ambahanon sa Ginoo kay nakahimo sia sang makatilingala nga mga butang! Paagi sa iya kaugalingon nga gahom kag balaan nga kusog, nagdaog sia. (S)

Ginbantala sang Ginoo ang iya pagdaog, ginpakilala niya sa mga pungsod ang iya gahom sa pagluwas. Gintuman niya ang iya saad sa mga tawo sang Israel, nga may mapinadayunon nga gugma kag pag-unong sa ila. (S)

Ang tanan nga katawuhan bisan diin nakakita sang pagdaog sang aton Dios! Magkanta kamo sa kalipay sa Ginoo, O bug-os nga duta; dayawa sia sa mga ambahanon kag mga paghinugyaw! (S)

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 1:3-6, 11-12

   Magpasalamat kita sa Dios kag Amay sang aton Ginoong Jesu-Cristo! Kay iya kita ginbugayan sa aton paghiusa kay Cristo, paagi sa paghatag sa aton sang tagsa ka espirituhanon nga mga bugay gikan sa kalangitan. Sa wala pa matuga ang kalibutan, ginpili na kita sang Dios nga mangin-iya sa kay Cristo, agod manginbalaan kita kag wala sing kasawayan sa iya atubangan.

   Tungod sang iya gugma, ang Dios nagpat-od na nga daan nga paagi kay Jesu-Cristo, kita mangin-iya mga anak. Amo ini ang iya nahamut-an kag kabubot-on. Dayawon ta ang Dios tungod sang iya mahimayaon nga grasya, nga iya ginhatag sa aton paagi sa iya hinigugma nga Anak! 

   Ang tanan nga mga butang natuman suno sa ginplano kag ginpat-od sang Dios. Ginpili kita sang Dios nga mangin-iya mga tawo sa paghiusa kay Cristo tungod sang iya kaugalingon nga tinutoyo, suno sa iya na nga daan ginpat-od halin sa ginsugoran. Gani, kita nga amo ang nahauna nga naglaom sa kay Cristo, magdayaw sang himaya sang Dios! 

Aleluya:

San Lucas 1:28

   Maghimaya ka Maria, napuno ka sing grasya. Ang Ginoo yara sa imo; ginadayaw ka labi sa babayi nga tanan.

Ang Pagbasa sang Santos nga Ebanghelyo suno kay:

San Lucas 1:26-38

   Sa ikan-om nga bulan sang pagbusong ni Elisabet ginpadala sang Dios si Gabriel nga anghel didto sa banwa sang Galilea nga ginatawag Nazaret. Ang anghel may dala nga mensahi para sa isa ka ulay nga dalaga nga kalasalon sa isa ka tawo nga ginhingalanan kay Jose nga kaliwat ni Haring David. Ang ngalan sang dalaga amo si Maria. Ang anghel nagpakita sa iya kag nagsiling, “Magkalipay ka! Ikaw nga labing nahamut-an, ang Ginoo yara sa imo!”

   Sang pagkabati ni Maria sang ginsiling sang anghel natublag gid sia, kag nagpalibog kon ano ang kahulogan sang ginhambal sang anghel. Nagsiling ang anghel sa iya, “Indi ka magkahadlok, Maria, kay nahamut-an ka sang Dios. Yari karon, magabusong ka kag magaanak sang isa ka bata nga lalaki, kag pagahingalanan mo sia kay Jesus. Mangindaku sia kag pagatawgon nga Anak sang Labing Makagagahom nga Dios. Ang Ginoong Dios magahimo sa iya nga hari subong sang iya amay nga si David, kag manginhari sia sing dayon sa mga kaliwat ni Jacob kag ang iya ginharian wala sing katapusan.”

   Si Maria nagsabat sa anghel, “Ano ang pagkahimo sini, kay ulay ako nga babayi?”

   Ang anghel nagsabat, “Ang Espiritu Santo magakunsad sa imo, kag ang gahom sang Dios magalikop sa imo. Tungod sini ang balaan nga bata nga matawo sa imo pagatawgon nga Anak sang Dios. Dumdoma bala ang imo paryente nga si Elisabet. Bisan tigulang na sia kag baw-as, nagabusong na sing anom ka bulan sang isa ka bata nga lalaki. Kay sa Dios wala sing bisan ano nga indi mahimo.”

   Si Maria nagsiling, “Alagad ako sang Ginoo. Kabay nga matuman ini sa akon suno sa imo ginsiling.” Kag ang anghel nagbiya sa iya.

Disyembre 7 | Disyembre 9