Liturhiya sang Pulong
San Francisco de Asis
Nahauna nga Balasahon - Isaias nga Propeta 5:1-7
Salmo sa Pagsabat - Mga Salmo 80:9, 12, 13-14, 15-16, 19-20
Ikaduha nga Balasahon - Filipos 4:6-9
Aleluya - Juan 15:16
Ebanghelyo - Mateo 21:33-43
Ang Bato nga Ginsikway sang mga Manunokod
1. Ang Pagbasa gikan sa Libro ni:
Isaias nga Propeta 5:1-7
Pamati kamo Samtang nagakanta ako sa inyo Sini nga ambahanon, Isa ka ambahanon sang akon abyan Kag sang talamnan sang ubas. Ang akon abyan May isa ka talamnan sang ubas Sa ibabaw sang isa Ka mapatubason nga bakulod.
Salmo sa Pagsabat:
Mga Salmo 80:9, 12, 13-14, 15-16, 19-20
(S) Ang Israel amo ang talamnan sang ubas.
Naghawan ikaw sing isa ka duog, agod ini magtubo, nagpanggamot ini sing madalom, kag nagpangalapkap sa bug-os nga duta. (S)
Ngaa bala ginguba mo ang mga kudal sa palibot niya? Karon ang bisan sin-o nga nagaagi makapanguha sang iya mga bunga. (S)
Ang mga baboy nga talunon nagatasak sini, kag ginakaon ini sang tanan nga mga sapat nga talunon. Talupangda kami, O Dios nga Makagagahom! Gikan sa langit, tamda kami; kari kag luwasa ang imo balagon sang ubas! (S)
Kari kag luwasa ining balagon nga ikaw gid ang nagtanom, ining linghod nga balagon nga ginpatubo mo sing mabakod! Gintutdan ini sang amon mga kaaway, kag ila gintapas, tuloka sila sing masakit kag laglaga sila! (S)
Indi na gid kami magbiya liwat sa imo; buhia kami, kag magadayaw kami sa imo. Pabalika kami, O Ginoong Dios nga Makagagahom! Ipakita sa amon ang imo gugma, kag maluwas kami! (S)
2. Ang Pagbasa gikan sa Sulat ni San Pablo nga Apostol, sa mga:
Taga-Filipos 4:6-9
Indi kamo magpalibog sang bisan ano, kundi sa inyo mga pagpangamuyo, magpangayo kamo sa Dios sang inyo kinahanglanon nga nagapasalamat sa gihapon. Kag ang paghidait sang Dios nga indi matungkad sang paghangop sang tawo, magatipig sang inyo mga tagipusoon kag mga panghunahona paagi kay Cristo Jesus. Sa katapusan, mga kautoran, pun-a ang inyo mga panghunahona sining maayo kag dalayawon nga mga butang: mga butang nga matuod, halangdon, matarong, putli, hiligugmaon, kag dungganon. Ibutang ninyo sa buhat ang tanan nga inyo natun-an kag nabaton sa akon paagi sa mga pulong kag mga binuhatan. Kag ang Dios nga nagahatag sa aton sing paghidait manginkaupod ninyo.
Aleluya:
San Juan 15:16
Ginpili ko kamo sa kalibutan agod magpamunga kamo, ang sahi sang bunga nga nagapadayon, siling sang Ginoo.
Ang Pagbasa sang Santos nga Ebanghelyo suno kay:
San Mateo 21:33-43
Si Jesus nagsiling, “Pamatii ninyo ang isa pa ka palaanggiran: may isa ka tag-iya sang talamnan nga nagpatanom sang ubas. Iya ini ginkudalan palibot, nagpakutkot sia sing buho para pulogaan sang ubas kag nagpatindog sia sing mataas nga balantayan. Iya ini ginpaagsahan kag nagpanglakaton. Sang tion na sa pagpamupo sang ubas, ginpadala niya ang iya mga suloguon sa mga agsador sa pagkuha sang iya parti.
Gindakop sang mga agsador ang iya mga suloguon: ang isa ginbunal nila, ginpatay ang isa, kag ang isa pa gid ginbato nila. Liwat iya ginpakadto ang iban niya nga mga suloguon nga madamo pa sang sa nahauna, kag amo man ang ginhimo sang mga agsador sa ila. Sa katapusan ginpadala niya sa ila ang iya anak. Nagasiling sia, ‘Tahuron gid nila ang akon anak.’ Pero sang pagkakita sang mga agsador sang anak, nagsinilingay sila, ‘Amo ini ang manunobli. Dali kamo, patyon naton sia, kag mangin-aton ang iya palanublion!’ Gani gindakop nila sia, ginhaboy sa gwa sang talamnan sang ubas, kag ginpatay.”
Nagpamangkot si Jesus, “Karon, kon mag-abot ang tag-iya sang talamnan, ano ang iya himuon sa sadtong mga agsador?”
Nagsabat sila, “Pamatyon gid niya ining malain nga mga tawo nga wala sing luoyluoy, kag ipaagsa niya ang iya talamnan sa iban nga mga agsador nga magahatag sa iya sang iya parti sa tagsa ka patubas.”
Si Jesus nagsiling sa ila, “Wala bala ninyo mabasahi ang ginasiling sang mga Kasulatan?
‘Ang bato
Nga ginsikway sang mga manunokod
Nanginpamakod nga bato.
Ang Ginoo amo ang naghimo sini,
Daw ano ini ka makatilingala!’ ”
Si Jesus nagsiling pa gid, “Gani nagasiling ako sa inyo, ang Ginharian sang Dios kuhaon sa inyo, kag ihatag sa mga tawo nga magapatubas sang nagakaigo nga mga bunga.
No comments:
Post a Comment