"Kay ang Nagabuhat sang Luyag sang Dios amo ang Akon Utod nga Lalaki ang Akon Utod nga Babayi"

Liturhiya sang Pulong

(Martes, Enero 29, 2019)

Ang Pagbasa gikan sa Sulat sa mga:

Hebreo 10:1-10

Ang Kasugoan sang mga Judio indi amo ang bug-os kag sibo nga larawan sang matuodtuod nga mga butang, kundi landong lamang sang maayo nga mga butang nga palaabuton. Amo man gihapon nga mga halad ang padayon nga ginahalad tuigtuig. Karon paano bala ang paghimpit sang Kasugoan sang mga tawo nga nagapalapit sa Dios paagi sini nga mga halad? Kon ang mga tawo nga nagasimba sa Dios natinluan sa ila mga sala, kuntani wala na sila sing salabton sa ila mga sala, kag magauntat ang tanan nga mga paghalad. Pero sa baylo sini, ang mga halad nagapahanumdom tuigtuig sa mga tawo sang ila mga sala. Kay ang dugo sang toro nga mga baka kag mga kanding indi gid makakuha sang mga sala. Tungod sini, sang manugkari si Cristo sa kalibutan, nagsiling sia sa Dios: “Indi ka luyag Sang mga halad kag mga dulot Kundi nag-aman ka Sing isa ka lawas para sa akon. Wala ka malipay Sa mga dulot nga mga sapat Nga ginasunog sing bug-os sa altar, Ukon sang mga halad Sa pagkuha sang mga sala. Gani nagsiling ako, ‘Yari ako, O Dios, Sa pagtuman sang imo kabubot-on, Suno sa nasulat nahanungod sa akon Sa libro sang kasugoan.’” Sa nahauna, nagsiling si Cristo, “Wala ka luyag ukon nalipay sang mga halad kag sang mga dulot, ukon sang halad nga mga sapat nga ginasunog sa altar, kag sang mga halad sa pagkuha sang mga sala.” Ginsiling niya ini bisan pa ini tanan nga mga halad ginadulot suno sa Kasugoan. Dayon nagsiling sia, “Yari ako, O Dios, sa pagtuman sang imo kabubot-on.” Gani gindula sang Dios ang tanan nga una nga mga halad, kag gin-ilisan ini sang paghalad ni Cristo sang iya kaugalingon. Tungod kay si Jesu-Cristo nagtuman sang bug-os nga kabubot-on sang Dios, kita tanan natinluan sa sala paagi sa paghalad niya sang iya kaugalingon nga lawas sing makaisa gid lang. 

Salmo sa Pagsabat:

Mga Salmo 40:2 kag 4, 7-8, 10-11 

(S) Yari ako, O Ginoo, sa pagtuman sang lmo kabubut-on.

Ginbatak niya ako gikan sa makatalagam nga buho, gikan sa lunangon nga buho. Ginpahamtang niya ako sa daku nga bato agod indi maano, kag ginpalig-on niya ako. Bulahan ang tawo nga nagasalig sa Ginoo, nga wala nagadangop sa mga diosdios. (S)

Gani nagsabat ako, "Yari ako! Ang lmo mga mando para sa akon yara sa libro sang Kasugoan. Daw ano ang kaluyag ko sa pagtuman sang Imo kabubut-on, O Dios ko! (S) 

Wala ko gintago ang balita sang kaluwasan sa akon kaugalingon; Ang Imo pagkamatutom kag pagbulig ginasugid ko sa gihapon. Sa pagtililipon sang tanan Nimo nga mga tawo, wala ako maghipos nahanungod sang Imo mapinadayunon nga gugma kag pagkamainunongon. (S) 

Ginoo, nakahibalo gid ako nga indi ka mag-untat sa pagkaluoy sa akon! Ang Imo gugma kag pagkamainunongon magatipig sa akon gihapon agod indi ako maano. (S) 

Aleluya:

Mateo 11:25

Dayawon ka, O Amay sang langit kag sang duta, kay ginpahayag Mo sa mga kubos ang mga misteryo sang Imo ginharian.

Ang Pagbasa sang Santos nga Ebanghelyo suno kay:

San Marcos 3:31-35

Dayon ang iloy kag ang mga utod nga lalaki ni Jesus nag-abot. Nagtindog lang sila sa gwa sang balay kag nagpahibalo nga gusto sila magpakigkita kay Jesus. May madamo nga mga tawo nga nagalingkod sa palibot ni Jesus, kag nagsiling sila sa iya, “Hoy, ang iloy mo kag ang imo mga utod yara sa gwa, kag gusto sila magpakigkita sa imo.” Nagsabat si Jesus, “Sin-o bala ang akon iloy? Sin-o bala ang akon mga utod?” Gintulok niya ang mga tawo nga nagalingkod sa palibot niya, kag nagsiling, “Tan-awa ninyo, yari ang akon iloy kag mga utod! Kay ang nagabuhat sang luyag sang Dios, amo ang akon utod nga lalaki, ang akon utod nga babayi, kag ang akon iloy.”

Enero 28 | Enero 30