Ang Bata nga si Jesus sa Templo

Liturhiya sang Pulong

(Domingo, Enero 20, 2019)

Piesta ni Señor Santo Niño

1. Ang Pagbasa gikan sa Libro ni:

Isaias nga Propeta 9:1-6

Ang duta sang tribo ni Zabulon kag niNeftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagapuyo ang mga dumoluong. Ang mga tawo nga nagalakat sa kadudolman nakakita sing daku nga kapawa! Nagapuyo sila sa duta sang mga landong, pero karon ang kapawa nagasilak sa ila. O Ginoo, ginhatagan mo sila sing daku nga kalipay; ginhimo mo nga magmalipayon sila. Magahugyaw sila sa imo ginhimo, subong sang paghinugyaw sang mga tawo nga nagaani, ukon magpartida sila sang inagaw nga mga manggad. Kay ginbali mo ang gota nga nagapabug-at sa ila kag ang baston nga naghanot sang ila mga abaga. Ikaw, O Ginoo, ang naglutos sang pungsod nga nagpigos kag nagpamintaha sang imo mga tawo subong sang imo paglutos sadto anay sang mga hangaway sang Midian. Ang mga botas sang nagpanggubat nga mga hangaway, kag ang tanan nila nga mga bayu nga nabulit sang dugo, pagasunogon sa kalayo! Ang isa ka bata matawo sa aton! Ang isa ka anak ginhatag sa aton! Kag sia ang aton manginpangulo. Pagatawgon sia, “Maalam nga Manuglaygay,” “Gamhanan nga Dios,” “Amay nga wala sing Katubtoban,” “Amay sang Paghidait.”

Salmo sa Pagsabat:

Mga Salmo 97:1, 2-3, 3-4, 5-6 

(S) Ang Ginoo amo ang hari! Magkalipay ka, O duta!

Ang Ginoo amo ang hari! Magkalipay ka, O duta! Magkalipay kamo, tanan nga mga isla sang kadagatan! (S) 

Ang mga panganod kag kadudohnan yara sa palibot niya; ang iya ginharian napasad sa katarungan kag hustisya. (S) 

Ang kalayo nagauna sa iya, kag nagasunog sa iya mga kaaway sa palibot niya. (S) 

Ang iya kilat nagapasanag sang kalibutan; ang duta nakakita sini kag nagakurog. (S) 

Ang mga bakulod nagakatunaw subong sang kandila sa atubangan sang Ginoo, sa atubangan sang Ginoo sang bug-os nga duta. (S) 

Ang kalangitan nagabantala sang iya pagkamatarong, kag ang tanan nga katawohan nakakita sang iya himaya. (S) 

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 1:3-6, 15-18

Magpasalamat kita sa Dios kag Amay sang aton Ginoong Jesu-Cristo! Kay iya kita ginbugayan sa aton paghiusa kay Cristo, paagi sa paghatag sa aton sang tagsa ka espirituhanon nga mga bugay gikan sa kalangitan. Sa wala pa matuga ang kalibutan, ginpili na kita sang Dios nga mangin-iya sa kay Cristo, agod manginbalaan kita kag wala sing kasawayan sa iya atubangan. Tungod sang iya gugma, ang Dios nagpat-od na nga daan nga paagi kay Jesu-Cristo, kita mangin-iya mga anak. Amo ini ang iya nahamut-an kag kabubot-on. Dayawon ta ang Dios tungod sang iya mahimayaon nga grasya, nga iya ginhatag sa aton paagi sa iya hinigugma nga Anak! Sa sini nga kabangdanan, halin sang pagkabati ko nahanungod sang inyo pagtuo kay Ginoong Jesus kag sang inyo gugma sa mga tumoluo, wala ako mag-untat sa pagpasalamat sa Dios tungod sa inyo. Ginadumdom ko kamo sa akon mga pangamuyo, kag nagapangayo ako sa Dios sang aton Ginoong Jesu-Cristo, ang mahimayaon nga Amay, nga iya ihatag sa inyo ang Espiritu, nga amo ang magahatag sa inyo sing kaalam kag magapahayag sa inyo sang Dios, agod nga makilala ninyo sia. Nagapangayo ako nga ang inyo mga hunahona mabuksan kag makita ninyo ang iya kapawa, agod inyo mahibaluan kon ano ang paglaom sang iya pagtawag sa inyo, kon daw ano ka bugana ang makatilingala nga mga panublion nga iya ginasaad sa iya mga tumoluo.

Aleluya:

Dayawon ang Imo labing santos nga ngalan; himaya-on kag bansagon Ikaw sa gihapon.

Ang Pagbasa sang Santos nga Ebanghelyo suno kay:

San Lucas 2:41-52

Tuigtuig ang mga ginikanan ni Jesus nagakadto sa Jerusalem sa Piesta sang Pascua. Sang dose na ka tuig ang edad ni Jesus nagpamiesta sila subong sang kinaandan nga ginahimo nila. Sang tapos na ang piesta nagpauli sila, pero ang bata nga si Jesus nagpabilin sa Jerusalem nga wala matalupangdi sang iya ginikanan. Naghunahona sila nga yara man lang sia upod sa ila mga kaupdanan kag sang nakapanglakaton na sila sing isa ka adlaw ginpangita nila sia sa ila mga paryente kag mga abyan. Wala nila sia makita, gani nagbalik sila sa Jerusalem sa pagpangita sa iya. Sa ikatlo nga adlaw nakita nila sia sa templo nga nagapungko upod sa mga manunodlo nga Judio nga nagapamati kag nagapamangkot sa ila.

Nakita nila sia . . . nga nagapamati kag nagapamangkot. (2:46)

Ang tanan nga nakabati sa iya natingala gid sa iya kaalam kag mga sabat. Natingala ang iya ginikanan sang makita nila sia, kag ginsingganan sia sang iya iloy, “Noy, ngaa man nga ginhimo mo ini sa amon? Tan-awa bala, nalisdan kami ni tatay mo sa pagpangita sa imo.” Nagsabat sia sa ila, “Ngaa bala nga ginapangita gid ninyo ako? Wala bala kamo makahibalo nga kinahanglan nga yara ako sa balay sang akon Amay?” Pero wala sila makahangop sang ginhambal niya sa ila. Gani si Jesus nag-upod sa ila pabalik sa Nazaret, sa diin nagmatinumanon sia sa ila. Ang iya iloy nagtipig sini tanan sa iya tagipusoon. Si Jesus nagdaku kag nagtubo sa kaalam kag nahamut-an sia sang Dios kag sang mga tawo.

Enero 19 | Enero 21