Liturhiya sang Pulong
(Domingo, Enero 27, 2019)
1. Ang Pagbasa gikan sa Libro ni:
Nehemias nga Propeta 8:2-4, 5-6, 8-10
Sadto nga mga inadlaw: Ginkuha ni Esdras ang Libro sang Kasugoan kag gindala ini sa diin nagatipon ang mga lalaki, mga babayi kag mga kabataan nga sarang na makahangop. Didto sa plasa sa atubangan sang puwerta ginbasa niya ang iya mga kasugoan halin sa kaagahon tubtob sa udto, kag nagpamati sila sang maayo gid. Sang pagbasa ni Esdras nagtindog sila sa plataporma nga tapi nga ginpatindog para gid sa sini nga tinutuyo. Sang nagatindog si Esdras didto sa ibabaw sang plataporma, ang tanan nga mga tawo, nagtulok sa iya. Pagbukas niya sang libro ang tanan nga nagtindog.
Si Esdras nagsiling, "Dayawon ang Ginoo, ang Gamhanan nga Dios!" Ang tanan nga mga tawo nagbayaw sang ila kamot kag nagsiling, "Kabay pa, kabay pa! Dayon nagluhod sila sa pagsimba nga ang ila nawong nagaduot sa duta. Ginbadbad kag ginsaysay nila ang kasugoan sang Dios agod nga mahangpan ini sang mga tawo. Sang mabatian sang mga tawo ang ginasiling sang Kasugoan, natandog gid sila, gani naghinibi sila. Si Nehemias, si Esdras, kag ang mga Levita nga nagasaysay sang Kasugoan nagsiling sa tanan nga mga tawo, “Ini adlaw nga balaan sa Ginoo nga inyo Dios. Indi kamo maglalaw ukon maghibi. Karon mapauli kamo kag maghiwat sing punsyon. Hatagi man ninyo sang inyo pagkaon kag bino ang mga tawo nga wala sing pagkaon kag ilimnon. Karon nga adlaw balaan sa Ginoo, gani indi kamo magkasubo. Ang kalipay nga ginhatag sa inyo sang Ginoo magapabakod sa inyo."
 |
| Sang nagatindog si Esdras . . . ang tanan nagtindog. (8:5) |
Salmo sa Pagsabat:
Mga Salmo 19:8, 9, 10, 15
(S) Ang mga pulong nga ginhambal ko sa inyo amo ang nagahatag sang kabuhi.
Matarong ang mga pagsulondan sang Ginoo, kag ang nagatuman sini malipayon. Matarong gid ang iya mga sugo, kag nagahatag sing paghangop sa hunahuna. (S)
Ang pagsimba sa Ginoo maayo, nagapadayon ini sa walay katubtoban. Matarong ang mga paghukom sang Ginoo; wala ini sing may ginapasulabi. (S)
Halandumon pa ini sang sa bulawan, bisan pa ang pinakapuraw nga bulawan. Matam-is pa sila sang sa dugos bisan pa sang sa wala simbog nga dugos. (S)
Kabay pa nga mabaton mo ang akon mga pulong kag mga panghunahona. O Ginoo nga akon dalangpan kag Manunobos. (S)
2. Ang Pagbasa gikan sa Nahauna nga Sulat ni San Pablo nga Apostol, sa mga:
Taga-Corinto 12:12-30
Kay si Cristo kasubong sang isa ka lawas nga may madamo nga mga bahin. Bisan may madamo ini nga mga bahin, pero isa lang ini ka lawas. Sa amo man nga bagay, kita tanan, Judio ukon Gentil, ulipon ukon hilway, ginbautisohan sang amo nga Espiritu, agod mangin-isa kita ka lawas, kag kita tanan ginpainom sa amo man nga Espiritu. Kay ang lawas indi isa lang ka bahin, kundi may madamo nga mga bahin. Kon ang tiil magsiling, “Tungod kay indi ako kamot, indi ako bahin sang lawas,” ina wala nagahimo sa iya nga indi bahin sang lawas. Kag kon ang dulonggan magsiling, “Tungod kay indi ako mata, indi ako bahin sang lawas,” ina wala nagahimo sa iya nga indi bahin sang lawas. Kon ang bug-os nga lawas mata lamang, ano ang pagkabati sini? Kon ang bug-os nga lawas dulonggan lamang, ano ang pagkasimhot sini? Pero ang Dios nagbutang sang nanuhaytohay nga bahin sa lawas suno sa luyag niya. Kon isa lang ini ka bahin indi ini lawas. Ang kamatuoran amo ini, may madamo nga mga bahin, pero may isa lamang ka lawas. Gani, ang mata indi makasiling sa kamot, “Wala ako sing kinahanglan sa imo!” Indi man makasiling ang ulo sa tiil, “Wala ako sing kinahanglan sa imo!” Sa baylo, ang mga bahin sang lawas nga daw maluya amo ang kinahanglan gid, subong man, nga ang mga bahin sang lawas nga daw indi gid importante amo ang ginapadunggan ta sing labi, kag ang aton mga bahin nga malaw-ay amo ang ginaatipan ta sing labi pa, nga wala ginakinahanglan sang aton mga bahin nga matahom. Ang Dios nagpahamtang sang mga bahin sang lawas sa ila naiguan nga lugar, agod nga mapadunggan ang mga bahin nga daw indi gid importante. Gani wala sing pagbinahinbahin sa lawas, kundi ang nagakalainlain nga mga bahin may kabalaka sa isa kag isa. Kon ang isa ka bahin nagaantos, ang tanan nga mga bahin nagaantos man. Kon ang isa ka bahin ginadayaw, ang tanan nga mga bahin nagaambit man sang iya kalipay. Karon kamo tanan amo ang lawas ni Cristo, kag ang tagsatagsa sa inyo bahin sina nga lawas. Gani, ang Dios nagbutang sa iglesia, nahauna, sang mga apostoles; ikaduha, sang mga propeta; ikatlo, sang mga manunodlo; kag ugaling sang mga manugbuhat sing mga milagro, dason ang mga manugpang-ayo, mga manugtabang, mga manugmando, kag mga manughambal sa iban nga mga hambal. Indi ang tanan mga apostoles, ukon mga propeta, ukon mga manunodlo. Indi ang tanan makahimo sang mga milagro, ukon may gahom sa pagpangayo, ukon sa paghambal sa iban nga mga hambal, ukon sa pagsaysay sang kahulogan sini.
Aleluya:
Lucas 4:18
Ginpili ako sang Ginoo sa pagwali sang Maayong Balita sa mga imol kag sang kahilwayan sa mga bihag.
Ang Pagbasa sang Santos nga Ebanghelyo suno kay:
San Lucas 1:1-4; 4:14-21
Halangdon nga Teofilo, Madamo na ang nagtinguha sa pagsulat nahanungod sang mga nagkalatabo sa tunga namon. Ginsulat nila ang ginsugid sa amon sang mga nakakita sang mga hitabo halin sa ginsugoran kag nagbantala sang mensahi. Gani, halangdon nga Teofilo, tungod kay nausisa ko sing tul-id ining mga hitabo halin sa ila ginsugoran, ginpakamaayo ko ang pagsulat sang pasunod nga kasaysayan sa imo, agod mahibaluan mo ang bug-os nga kamatuoran sadtong mga butang nga natudlo na sa imo. Dayon si Jesus nagbalik sa Galilea, kag ang gahom sang Espiritu Santo yara sa iya. Ang balita nahanungod sa iya naglapnag sa sadto nga mga duog. Nagpanudlo sia sa ila mga sinagoga kag gindayaw sia sang tanan. Dayon si Jesus nagkadto sa Nazaret, sa diin sia nagdaku, kag sang Adlaw nga Inugpahuway nagkadto sia sa sinagoga suno sa iya kinabatasan. Nagtindog sia sa pagbasa sang mga Kasulatan, kag ginhatag sa iya ang libro ni Isaias nga propeta. Ginbukad niya ini kag nakita niya ang bahin diin nasulat ang masunod: “Ang Espiritu sang Ginoo yari sa akon. Kag ginpili niya ako sa pagwali Sang Maayong Balita sa mga imol, Ginpadala niya ako sa pagbantala Sang kahilwayan sa mga bihag, Sa pag-ayo sang mga bulag, Sa paghilway sang mga ginapigos, Sa pagbantala sang tuig nga ang Ginoo Magaluwas sang iya mga tawo.” Gintakop ni Jesus ang libro, gin-uli sa manugbulig, kag naglingkod. Ang tanan sa sinagoga nagtulok sa iya. Nagsugod sia sa paghambal sa ila, “Ini nga dinalan sang kasulatan natuman karon nga adlaw samtang ginapamatian ninyo ang pagbasa sini.”
No comments:
Post a Comment