"Wala sing Tawo nga Nagabulobalikid"

Liturhiya sang Pulong

(Domingo, Hunyo 30, 2019)

1. Ang Pagbasa gikan sa Nahauna nga Libro sang:

Mga  Hari 19:16, 19-21

   "Haplasa man si Eliseo nga anak ni Safat gikan sa Abelmeholasa pagbulos sa imo subong propeta.

   Si Elias naglakat kag nakita niya si Eliseo nga nagaarado sang dose ka paris nga mga baka. May onse ka paris sa unaniya kag nagaarado sia sang katapusan nga pari. Gin-uba ni Eliasang iya kunop kag gintaklap kay Eliseo. Dayon ginbayaan ni Eliseo ang iya mga baka, kag naglagas kay Elias kag nagsiling, “Mahalok anay ako sa akon amay kag iloy sa pagpaalam sa ila, kag dayon magaupod ako sa imo.”
   Si Elias nagsabat, “Sigi, balik ka. Wala ako nagapugong sa imo!” Dayon si Eliseo nagbalik sa iya mga baka, gin-ihaw niya ini kag gingamit niya ang mga gota nga gatong sa pagluto sang karne.Ginhatag niya ang linuto sa mga tawo kag ginkaon nila ini. Dayon naglakat sia kag nagsunod kay Elias subong iya kabulig.

Salmo sa Pagsabat:

Mga Salmo 16:1-2, 5, 7-8, 9-10, 11

(S) Ikaw, O Ginoo, ang bahin sang akon panublion.

Apini ako, O Dios, kay nagadangop ako sa imo agod indi maano. Nagasiling ako sa Ginoo, "Ikaw ang akon Ginoo, kag ang tanan ko nga kaayuhan nagikan sa imo." (S)
Ikaw, O Ginoo, ang tanan para sa akon kag imo ginhatagan sang tanan ko nga mga kinahanglanon, yara ako sa Imo mga kamot ang akon kabuhi. (S)
Nagadayaw ako sa Ginoo, tungod kay gintuytoyan niya ako, kag sa kagab-ihon ang akon konsyensya nagapa-andam sa akon. Ginadumdom ko ang Ginoo sa tanan nga tion nga yara sia sa tupad nakon, malapit ang Ginoo sa akon sa tanan nga-tion, malapit sia kag wala gid sing may makatublag sa akon. (S)
Gani puno ako sing kalipay kag kasadya, kag pat-od gid nga may kalig-unan ako sa tanan nga tion, tungod kay ginaapinan mo ako gikan sa gahom sang kamatayon. Nag-alagad ako sa imo nga may katutom, kag indi mo ako pagpabay-an sa kalibutan sang mga patay. (S)
Ipakita mo sa akon ang dalan nga nagapadulong sa kabuhi, ang imo presensya nagapuno sa akon sing kalipay, kag nagahatag sa akon sing kasadya nga wala sing katapusan. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Galacia 5:1, 13-18

   May kahilwayan na kita! Si Cristo amo ang naghilway sa aton! Gani, magpakalig-on kamo subong hilway nga mga tawo kag indi na kamo magpaulipon liwat.

   Nahanungod sa inyo, mga kautoran ko, gintawag kamo agod manginhilway. Pero indi ninyo paggamita ang inyo kahilwayan nga balibad sa pagpatuyang sang inyo unodnon nga handom. Sa baylo, mag-alagaray kamo tungod sa gugma. Kay ang bug-os nga Kasugoan natingob sa isa ka sugo: “Higugmaa ang imo isigkatawo subong sang imo kaugalingon.” Pero kon magsinakitay kag mag-inupas kamo subong sang mga sapat, ti mag-andam kamo, kay basi kon maglaglaganay kamo.

   Amo ini ang ginasiling ko: magkabuhi kamo suno sa pagtuytoy sang Espiritu, kag indi ninyo pagpasugti ang mga handom sang tawuhanon nga kinaugali. Kay ang luyag sang aton tawuhanon nga kinaugali batok sa luyag sang Espiritu, kag ang luyag sang Espiritu batok sa luyag sang tawuhanon nga kinaugali. Ining duha nagasumponganay, kag nagakahulogan ini nga indi ninyo mahimo ang luyag ninyo himuon. Kon ang Espiritu nagatuytoy sa inyo, ti indi kamo sa idalom sang Kasugoan.

Aleluya:

1 Samuel 3:9; Juan 6:68

Maghambal ka, O Ginoo, kay ang Imo alagad nagapamati; yara sa Imo ang pulong sang kabuhi nga wala sing katapusan.

Ang Pagbasa sang Santos nga Ebanghelyo suno kay:

San Lucas 9:51-62

   Sang malapit na lang ang mga inadlaw nga si Jesus pagadalhon sa langit, nagpamat-od sia sa pagkadto sa Jerusalem. May mga ginsugo sia sa pagkadto sing una sa isa ka baryo sang Samaria sa pag-aman sang tanan para sa iya. Pero ang mga tawo didto indi magbaton sa iya tungod kay nasat-uman gid nila nga ang iya tuyo amo ang pagkadto sa Jerusalem. Sang pagkahibalo sini sang mga gintuton-an nga si Santiago kag si Juan, nagsiling sila kay Jesus, “Ginoo, luyag mo bala nga magpangayo kami sang kalayo gikan sa langit kag sunogon sila?”

   Si Jesus nagbalikid kag nagsaway sa ila, kag nagpadayon sila sa isa na man ka baryo. Sang nagapadayon sila sa paglakat, may isa ka tawo nga nagsiling kay Jesus, “Maupod ako sa imo bisan diin ka magkadto.”

   Si Jesus nagsiling sa iya, “Ang mga singgalong may mga buho, kag ang mga pispis may mga pugad, pero ang Anak sang Tawo wala gid sing hiligdaan kag palahuwayan.” Nagsiling si Jesus sa isa na man ka tawo, “Upod ka sa akon.” Pero ang tawo nagsiling, “Ginoo, tugoti anay ako sa pagpauli kag paglubong sang akon amay.”

   Si Jesus nagsabat, “Pabay-i ang mga patay sa paglubong sang ila mga minatay. Lakat ka kag ibantala ang Ginharian sang Dios.”

   Ang isa pa gid ka tawo nagsiling, “Maupod ako sa imo, Ginoo, pero tugoti ako anay sa pagpaalam sa akon panimalay.” Si Jesus nagsiling sa iya, “Ang tawo nga nagaarado kag nagabulobalikid wala sing pulos sa Ginharian sang Dios.”

Hunyo 29 | Hulyo 1

"Ikaw ang Cristo - ang Anak sang Dios nga Buhi"

Liturhiya sang Pulong

(Sabado, Hunyo 29, 2019)

San Pedro kag San Pablo, mga Apostoles

1. Ang Pagbasa gikan sa mga:

Binuhatan sang mga Apostoles 12:1-11

   Sa sini man nga tion, ang hari nga si Herodes nagsugod sa paghingabot sa pila ka mga katapo sang iglesia. Ginpapatay niya si Santiago nga utod ni Juan paagi sa espada. Sang makita niya nga nalipay ang mga Judio sang iya ginhimo, ginpadakop pa gid niya si Pedro. Ini natabo sa tion sang Piesta sang Tinapay nga wala sing Lebadora. Sang madakop nila si Pedro, ginsulod nila sia sa bilangguan kag ginpagwardyahan sang apat ka hut-ong sang mga soldado nga ang tagsa ka hut-ong may apat ka soldado. Si Herodes nagplano nga ipaatubang sia sa mga Judio sa tapos ang Piesta sang Pascua. Gani, ginhunong si Pedro sa bilangguan, pero ang mga katapo sang iglesia nagpangamuyo sa Dios sing hanuot gid para sa iya.
   Isa sadto ka gab-i sa wala pa ang adlaw nga ginplano ni Herodes nga ipaatubang niya si Pedro sa mga tawo, nagtulog si Pedro sa tunga sang duha ka gwardya. Nahigtan sia sang duha ka kadena kag may mga gwardya sa puwerta sang bilangguan. Sa hinali nagpakita ang isa ka anghel sang Ginoo, kag nagsanag ang bilangguan. Gin-uyog sang anghel ang abaga ni Pedro kag ginpukaw sia nga nagasiling, “Dali! Bangon ka!” Kag sa gilayon nahukas ang mga kadena nga nagagapos sang iya mga kamot. Kag ang anghel nagsiling sa iya, “Hugta ang imo paha kag higti ang imo mga sandalyas.” Gintuman ini ni Pedro. Ang anghel nagsiling sa iya, “Magpangunop ka kag magsunod sa akon.” Ginsunod sia ni Pedro pa gwa sa bilangguan. Pero wala sia makahibalo nga matuod ining ginhimo sang anghel; naghunahona sia nga ini isa lamang ka palanan-awon. Ginligaran nila ang nahauna nga balantayan sang mga gwardya kag ang ikaduha kag nakalambot sila sa salsalon nga puwerta nga nagapadulong sa siyudad. Nag-abri ang puwerta sa iya lamang kaugalingon kag naggwa sila. Nag-agi sila sa isa ka dalan kag sa gilayon ginbayaan sang anghel si Pedro.

   Dayon nakamarasmas si Pedro kon ano ang natabo sa iya, kag nagsiling sia, “Karon natalupangdan ko nga matuod gid nga ginpadala sang Ginoo ang iya anghel, kag iya ginluwas ako sa gahom ni Herodes kag sa tanan nga buhaton kuntani sang mga Judio sa akon.”

Salmo sa Pagsabat:

Mga Salmo 34:2-3, 4-5, 6-7, 8-9

(S) Ang Ginoo nagkuha sang tanan ko nga mga kahadlok.

Sa gihapon magapasalamat ako sa Ginoo; indi gid ako mag-untat sa pagdayaw sa iya. Dayawon ko sia tungod sang iya mga binuhatan; kabay nga ang mga ginapigos magpamati kag magkalipay! (S)
Isugid ta ang pagkadaku sang Ginoo; dayawon ta sing tingob ang iya ngalan! Nagpangamuyo ako sa Ginoo kag ginsabat niya ako; ginkuha niya ang tanan ko nga mga kahadlok. (S)
Ang mga ginapigos nagsalig sa iya kag nagakalipay sila; indi gid sila mapaslawan. Ang mga makalulooy nagapanawag sa iya, kag nagasabat sia sa ila; ginaluwas niya sila sa tanan nila nga mga kalalat-an. (S)
Ang Anghel sang Ginoo nagabantay sa tanan nga nagatahod sa Iya, kag Iya sila ginaluwas sa katalagman. Tilawi kag tan-awon ninyo kon daw ano kaayo sang Ginoo! Malipayon ang tawo nga nagadangop sa iya! (S)

2. Ang Pagbasa gikan sa Ikaduha nga Sulat ni San Pablo nga Apostol, sa kay:

Timoteo 4:6-8, 17-18

   Nahanungod sa akon, ang tion nag-abot nga ako ihalad na, kag tion na ini nga magataliwan ako sa sini nga kabuhi. Nahimo ko na ang akon masarangan sa palumba, nadalagan ko na ang bug-os nga dalaganon kag natipigan ko ang pagtuo. Karon, ang padya sang pagdaog nagahulat sa akon, ang korona sang pagkamatarong nga ihatag sa akon sang Ginoo, ang matarong nga Hukom, sa sadto nga Adlaw—kag indi lamang sa akon, kundi sa tanan man nga nagahulat nga may paghigugma sang iya pagpahayag.

Ang padya sang pagdaog nagahulat sa akon. (4:8)

Pero ang Ginoo nag-upod sa akon kag iya ako ginhatagan sing kusog, sa bagay nga nabantala ko ang bug-os nga pulong sang Dios agod makabati ang tanan nga mga Gentil, kag ginluwas ako sa baba sang leon. Ang Ginoo magaluwas sa akon sa tanan nga kalautan, kag iya ako dalhon nga indi maano didto sa iya langitnon nga Ginharian. Sa iya ang himaya sa wala sing katapusan! Kabay pa.

Aleluya:

Mateo 16:18

Ikaw si Pedro kag sa sini nga bato pagatukoron ko ang akon Simbahan kag ang gahom sang kamatayon indi makadaog sa iya.

Ang Pagbasa sang Santos nga Ebanghelyo suno kay:

San Mateo 16:13-19

   Nagkadto si Jesus sa kadutaan sang Cesarea Filipo sa diin nagpamangkot sia sa iya mga gintuton-an, “Sin-o bala ang Anak sang Tawo suno sa mga tawo?”

   Nagsabat sila, “May nagasiling nga si Juan Bautista. May iban nga nagasiling nga si Elias kag may iban pa gid nga nagasiling nga si Jeremias ukon iban nga mga propeta.”

   Si Jesus nagpamangkot sa ila, “Pero suno sa inyo, sin-o bala ako?”

   Si Simon Pedro nagsabat, “Ikaw ang Cristo, ang Anak sang Dios nga buhi.”

   Si Jesus nagsabat, “Bulahan ka, Simon, anak ni Juan! Kay ini nga kamatuoran wala ginpahayag sa imo sang tawo, kundi sang akon Amay sa langit. Kag ako nagasiling sa imo, ikaw si Pedro nga kon sayuron ‘Bato’ kag sa sini nga bato pagatukoron ko ang akon iglesia. Bisan ang gahom sang kamatayon indi makadaog sa iya. Ihatag ko sa imo ang mga yabi sang Ginharian sang langit, kag kon ano ang imo ginadumilian sa duta pagadumilian man didto sa langit, kag kon ano ang imo ginatugotan sa duta pagatugotan man didto sa langit.”

Hunyo 28 | Hunyo 30

"Magkalipay, Nakita Nakon ang Nadula Ko nga Karnero"

Liturhiya sang Pulong

(Biyernes, Hunyo 28, 2019)

Ang Labing Santos nga Kasingkasing ni Jesus

1. Ang Pagbasa gikan sa Libro ni:

Ezequiel nga Propeta 34:11-16

   "Ako, ang Ginoo nga Gamhanan, nagasiling sa inyo nga ako gid ang magausisa kag magatatap sang akon mga karnero subong sang pagtatap sang manugbantay sang iya karnero nga nag-alaplaag kag gintipon liwat. Pabalikon ko sila halin sa tanan nga mga duog sa diin sila nag-alaplaag sa sadtong madulom kag makatalagam nga adlaw. Kuhaon ko sila sa iban nga mga kapungsoran, tipunon ko sita sing tingob, kag pabalikon ko sila sa ila kaugalingon nga duta. Pahalbon ko sila sa mga kabukiran sang Israel, sa luyo sang mga tuboran, kag sa tagsa ka duog sa diin ang mga tawo nagapuyo. Pahalbon ko sila nga wala sing katalagman sa mga kabukiran nga madamol ang hilamon kag sa mga
kapatagan kag sa tanan nga duog nga madamol ang halalbon sa duta sang Israel. Ako gid ang magabantay sang akon karnero, kag pangitaan ko sila sing duog nga palahuwayan. Ako, ang Ginoo, amo ang naghambal sini.
   "Pangitaon ko ang mga nagkaladula, pabalikon ko ang mga nagtalang, bugkosan ko ang mga may bali, ayuhon ko ang mga nagamasakit, kag pamatyon ko ang mga matambok kag mga mabakod, kay ako amo ang manugbantay nga nagahimo sing matarong.

Salmo sa Pagsabat:

Mga Salmo 23:1-3, 3-4, 5, 6

(S) Ang Ginoo amo ang akon manugbantay; yara ang tanan nga ginakinahanglan ko.

Ang Ginoo amo ang akon manugbantay; yara ang tanan nga ginakinahanglan ko. Iya ako ginapapahuway sa mga latagon nga may malagtom nga hilamon, kag iya ako ginatuytoyan sa mga tubig nga malinaw. Ginahatagan niya ako sing bag-o nga kusog. (S)
Ginatuytoyan niya ako sa husto nga dalanon, suno sa iya ginsaad. Bisan pa nagaagi ako sa dalan nga tama kadulom, indi gid ako mahadlok, O Ginoo, kay ikaw nagaupod sa akon! Ang imo baston kag ang imo sungkod nagaapin sa akon. (S)
Ginahandaan mo ako sa lamisa sing madamo nga pagkaon, sa diin makit-an ako sang tanan ko nga mga kaaway, ginaabi-abi mo ako subong sang pinasidunggan nga bisita, kag ginapuno mo ang akon kupa. (S)
Sa pagkamatuod, ang Imo kaayo kag gugma magaupod sa akon sa bug-os ko nga kabuhi, kag ang imo balay mangin-akon balay samtang ako nagakabuhi. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 5:5-11

   Tungod kay ang Dios nagapuno sang aton mga tagipusoon sang iya gugma paagi sa Espiritu Santo, nga amo ang dulot sang Dios sa aton.

   Kay sang wala pa kita sing sarang mahimo, si Cristo nagpakamatay tungod sa mga makasasala, sa nagakaigo nga tion nga gintalana sang Dios. Mabudlay kaayo para sa isa ka tawo nga magpanginmatay tungod sa matarong nga tawo. Ayhan may yara man nga manginmatay tungod sa maayo nga tawo. Pero ang Dios nagpakita kon daw ano ang iya paghigugma sa aton. Sang mga makasasala pa kita, nagpakamatay si Cristo tungod sa aton! Paagi sa iya pagpakamatay, ginpakamatarong kita sa atubangan sang Dios. Gani, daw ano pa gid ang pagluwas niya sa aton sa kaakig sang Dios. Mga kaaway kita anay sang Dios, pero paagi sa pagpakamatay sang iya Anak, ginhimo niya kita nga iya mga abyan. Kag karon nga kita mga abyan na sang Dios, daw ano pa gid ang pagluwas niya sa aton paagi sa kabuhi ni Cristo! Kag indi lamang amo ina! Nagakalipay kita sa Dios tungod sa aton Ginoong Jesu-Cristo, nga karon naghimo sa aton nga mga abyan na sang Dios.

Aleluya:

Mateo 11:29

Ako amo ang maayo nga manugbantay, siling sang Ginoo, nakilala Ko ang Akon mga karnero, kag sila nakakilala sa Akon.

Ang Pagbasa sang Santos nga Ebanghelyo suno kay:

San Lucas 15:3-7

   Gani si Jesus naghambal sa ila sining palaanggiran:

   “Abi kon ang isa sa inyo may 100 ka karnero kag madula ang isa sa ila, ano bala ang iya himuon? Bayaan niya ang 99 sa halalban kag magalakat sia sa pagpangita sang nadula nga karnero tubtob makita niya ini. Kon makita niya ini malipayon gid sia sa pagpas-an kag sa pagdala pauli. Dayon tipunon niya ang iya mga abyan kag mga kaingod kag magasiling sa ila, ‘Magkalipay kamo upod sa akon kay nakita nakon ang nadula ko nga karnero!’ Nagasiling ako sa inyo, nga sa amo man nga bagay, may labi pa nga kalipay sa langit tungod sa isa ka makasasala nga nagahinulsol, sang sa 99 nga matarong nga wala nagakinahanglan sing paghinulsol.”

Hunyo 27 | Hunyo 29

"Ang Maalam nga Tawo nga Nagpatindog sang Ila Balay sa Bato"

Liturhiya sang Pulong

(Huwebes, Hunyo 27, 2019)

San Cirilo de Alejandria, Obispo kag Doktor sang Simbahan

Ang Pagbasa gikan sa Libro sang:

Genesis 16:1-12, 15-16

   Karon si Sarai nga asawa ni Abram wala makapamata sa kay Abram. Si Sarai may ulipon nga babayi nga Egiptohanon nga ginhingalanan kay Agar. Si Sarai nagsiling kay Abram, “Tan-awa bala, ang Ginoo wala maghatag sa akon sing kabataan. Ngaa indi ka na lang maghulid sa akon ulipon? Ayhan makabata sia para sa akon.” Si Abram nagpasugot sa ginsiling ni Sarai. Gani ginhatag ni Sarai si Agar kay Abraham subong nga asawa. (Natabo ini satapos nakapuyo si Abram sa Canaan sing napulo ka tuig.) Sang nakahulid si Abram kay Agar, nagbusong sia. Sang mahibaluan ni Agar nga nagabusong na sia, nagbugalon sia kag gintamay niya si Sarai.

   Dayon si Sarai nagsiling kay Abram, “Imo gid ini sala nga ginatamay ako ni Agar. Ako pa gani ang naghatag sa iya sa imo, pero halin sang pagkahibalo niya nga nagabusong na sia ginatamay na niya ako. Kabay ngahukman kita sang Ginoo kon sin-o ang husto sa aton.”

   Si Abram nagsabat, “Ti, ulipon mo man sia gihapon kag sa idalom sia sang imo gahom. Himoa ang luyag mo sa iya.” Dayon ginpintasan ni Sarai si Agar, kag naglayas sia.

   Ang anghel sang Ginoo nagsugata sa iya sang didto sia sa tuboran sa desierto, sa dalanon pa Sur, kag nagsiling sa iya, “Agar, ulipon ni Sarai, diin ka maghalin kag diin ka makadto?” 
   Nagsabat sia, “Nagapalagyo ako sa akon ama.”

   Nagsiling ang anghel, “Magbalik ka sa iya kag magtuman sa iya.” Kag nagsiling pa gid sia, “Hatagan ko ikaw sing mga kaliwat nga indi sarang maisip. Madali ka na lang magbata sing isa ka lalaki, nga pagahingalanan mo kay Ismael,kay ginpamatiansang Ginoo ang imo pagpanawag sa imo pag-antos. Pero ang imo anak magakabuhi subong sang isa ka talunon nga asno. Manginbatok sia sa tanan, kag ang tanan manginbatok sa iya. Magapalayo sia sa iya mga kaparyentihan.”

   Si Agar nagbata sing lalaki kay Abram kag ginhingalanan ni Abram ang bata kay Ismael. Sa sadto nga tion si Abram 86 na ka tuig.

Salmo sa Pagsabat:

Mga Salmo 106:1-2, 3-4, 4-5

(S) Magpasalamat kamo sa Ginoo, kay maayo sia.

Magpasalamat kamo sa Ginoo, tungod kay maayo sia, ang iya paghigugma wala sing katapusan. Sin-o bala ang makasugid sang gamhanan nga mga buhat sang Ginoo? Sin-o bala ang makadayaw sa iya sing tuman'? (S)
Malipayon ang mga nagatuman sang iya sugo, nga nagahimo sing matarong sa tanan nga tion! Dumdoma ako, O Ginoo, kon ikaw magbulig sa imo mga tawo. (S)
lndi ako pagkalimti kon ikaw magluwas sa ila. Ipakita man sa akon ang pag-uswag sang imo mga tawo, kag paambita man ako sang kalipay sang imo pungsod, sa malipayon nga pagpabugal sang imo mga tawo. (S)

Aleluya:

Juan 14:23

Ang nagahigugma sa akon magatuman sang akon pulong, siling sang Ginoo, kag ang akon Amay magahigugma sa iya kag kami magakadto sa iya kag magakabuhi upod sa iya.

Ang Pagbasa sang Santos nga Ebanghelyo suno kay:

San Mateo 7:21-29

   “Indi ang tanan nga nagatawag sa akon ‘Ginoo, Ginoo,’ makasulod sa Ginharian sang langit, kundi ang nagatuman lamang sang kabubot-on sang akon Amay nga yara sa langit. Kon mag-abot yadto nga Adlaw, madamo ang magatawag sa akon ‘Ginoo, Ginoo! Sa imo ngalan nagwali kami, sa imo ngalan nagtabog kami sang mga yawa kag naghimo sang madamo nga mga milagro!’ Dayon magasiling ako sa ila, ‘Wala ako makakilala sa inyo. Palayo kamo sa akon, kamo nga manugbuhat sang malaut!’ ”

   “Gani, ang nagapamati sang akon mga pulong kag nagatuman sini kaangay sia sang isa ka maalam nga tawo nga nagpatindog sang iya balay sa bato. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Pero wala ini matumba kay napasad ini sa bato.

   “Ang nagapamati sang akon mga pulong kag wala nagatuman sini, kaangay sia sa tawo nga buangboang nga nagpatindog sang iya balay sa balas. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Natumba ini kag daw ano ang pagragamak sini!”

   Sa tapos mahambal ni Jesus ini nga mga butang, ang mga tawo natingala gid sa iya pagpanudlo. Indi sia kaangay sang ila mga manunodlo sang Kasugoan, kay ang iya pagpanudlo may awtoridad.

Hunyo 26 | Hunyo 28

"Makilala Ninyo ang Indi Matuod nga mga Propeta sa Ila mga Buhat"

Liturhiya sang Pulong

(Miyerkules, Hunyo 26, 2019)

Ang Pagbasa gikan sa Libro sang:

Genesis 15:1-12, 17-18

   Sa tapos sini, si kay Abram may isa ka palanan-awon kag nabatian niya ang Ginoo nga nagahambal sa iya, “Indi ka mahadlok, Abram. Apinan ko ikaw sa katalagman kag hatagan ko ikaw sing daku nga balos.”

   Pero si Abram nagsiling, “O Ginoo nga Dios, ano bala ang pulos sang imo balos kay wala man ako sing mga kabataan? Ang akon manunobli amo gid lang si Eliezer nga taga-Damasco. Wala mo ako paghatagi sing mga kabataan, gani ang isa sang akon mga ulipon magapanubli sang akon pagkabutang.”

   Dayon nabatian niya ang Ginoo nga nagahambal sa iya liwat, “Ini nga ulipon indi makapanubli sang imo pagkabutang, kundi ang imo gid kaugalingon nga anak amo ang imo manunobli.” Gindala sia sang Ginoo sa gwa kag ang Ginoo nagsiling sa iya, “Tangla ka bala sa langit kag  isipa ang mga bituon, kon maisipan mo. Ang imo mga kaliwat manginsubong sa ila kadamo.” Si Abram nagtuo sa Ginoo, kag tungod sini ang Ginoo nalipay sa iya kag ginbaton sia.

   Dayon ang Ginoo nagsiling sa iya, “Ako ang Ginoo nga nagtuytoy sa imo halin sa Ur sang Babilonia agod mahatag ko sa imo ining duta nga mangin-imo kaugalingon.

   Pero si Abram nagsiling, “O Ginoong Dios, ano ang pagkahibalo ko nga mangin-akon ini?”

   Nagsabat sia, “Dalhi ako diri sing isa ka tinday nga baka, isa ka kanding, kag isa ka karnero nga lalaki  nga tagtatlo ka tuig ang edad, kag isa man ka tukmo kag isa ka pating.” Si Abram nagdala sa Dios sini nga mga hayop, ginpamihak niya sila, kag ginbutang niya ang mga pinihak sa duha ka kubay nga nagaatubangay. Ang mga pispis wala niya pagpamihaka. Ang mga uwak naghugpa sa mga lawas sang mga hayop, pero ginpanabog niya sila.

   Sang nagahinunod na ang adlaw, si Abram natulogan sing mahamuok gid, kag may kakugmat kag kahadlok nga dumapo sa iya.

   Sang matunod na ang adlaw kag madulom na, sa hinali may isa ka nagaaso nga horno kag ang isa ka sulo nga nagadabdab nga nagpakita kag nag-agi sa tunga sang mga pinihak nga mga sapat. Sa sadto gid nga tion kag duog ang Ginoo naghimo sing kasugtanan kay Abram, nga nagasiling, “Nagasaad ako nga ihatag koini tanan nga duta sa imo mga kaliwat, ining duta halin sa suba sa dulonan sang Egipto pakadto sa daku nga suba sang Eufrates,

Salmo sa Pagsabat:

Mga Salmo 105:1-2, 3-4, 6-7, 8-9

(S) Pagatumanon sang Ginoo ang iya kasugtanan sa gihapon.

Magpasalamat kamo sa Ginoo, isugid ninyo ang iya pagkagamhanan, ipabutyag sa mga kapungsoran ang iya mga binuhatan! Mag-amba kamo sing mga pagdayaw sa Ginoo, isugid ninyo ang iya tanan nga makatilingala nga mga binuhatan. (S)
Magakalipay kamo kay iya kita; ang tanan nga nagasimba sa iya magkalipay! Magdangop kamo sa Ginoo agod buligan; magsimba kamo sa iya sa gihapon. (S)
Kamo nga mga kaliwat ni Abrahan nga iya alagad, kamo nga mga kaliwat ni Jacob nga iya pinili: Ang Ginoo amo ang aton Dios, ang iya mga sugo para sa bug-os nga kalibutan. (S)
Pagatumanon niya sa walay katubtoban ang iya kasugtanan, ang iya mga saad tubtob sa isa ka libo ka mga kaliwatan, ang kasugtanan nga iya ginhimo kay Abraham, kag ang iya saad kay Isaac. (S)

Aleluya:

Juan 15:4, 5

Magpabilin kamo sa Akon kag Ako magapabilin sa inyo, siling sang Ginoo ang nagapabilin sa Akon kag Ako sa iya, magapamunga sing madamo.

Ang Pagbasa sang Santos nga Ebanghelyo suno kay:

San Mateo 7:15-20

   “Andam kamo sa indi matuod nga mga propeta. Nagakadto sila sa inyo nga daw mga karnero, pero sa sulod subong sila sang mapintas nga mga lobo. Makilala ninyo sila sa ila mga pagginawi. Ang mga sapinit wala nagapamunga sing ubas, kag ang talungon wala nagapamunga sing mga higos. Ang maayo nga kahoy nagapamunga sing maayo; ang malain nga kahoy nagapamunga sing malain. Ang maayo nga kahoy indi makapamunga sing malain nga bunga, kag ang malain nga kahoy indi makapamunga sing maayo nga bunga. Ang tagsa ka kahoy nga wala nagapamunga sing maayo nga bunga ginatapas kag ginahaboy sa kalayo. Gani, makilala ninyo ang indi matuod nga mga propeta sa ila mga buhat.”

Hunyo 25 | Hunyo 27

"Indi Pag-ihaboy ang mga Perlas sa Atubangan sang mga Baboy"

Liturhiya sang Pulong

(Martes, Hunyo 25, 2019)

Ang Pagbasa gikan sa Libro sang:

Genesis 13:2, 5-18

   Si Abram manggaranon kaayo. May mga karnero sia, mga kanding, mga baka, kag subong man mga pilak kag mga bulawan.

   Si Lot nga nag-upod kay Abram may mga karnero man, mga kanding, kag mga baka wala labot sang iya kaugalingon nga panimalay kag mga tinawo. Tungod kay sila nga duha may madamo nga mga kahayupan indi sila makapadayon sa pagpuyo sing tingob kay ang palahalban indi makaigo sa ila. Gani ang ila mga tinawo nga nagaatipan sang ila mga kahayupan nagainaway. (Sa sadto nga tion ang mga Canaanhon kag mga Pereznon nagapuyo pa sa sadto nga duta.)

   Gani si Abram nagsiling kay Lot, “Hinablos ko ikaw, kag indi dapat nga mag-inaway ang aton mga tinawo. Kinahanglan magbulagay kita. Pilia ang bisan diin nga bahin sang duta nga imo naluyagan. Kon mapatuo ka, mapawala ako, kag kon mapawala ka, mapatuo ako.”

   Gani si Lot nagpanghulonghulong kag nakita niya ang kapatagan sang Jordan tubtob sa Zoar may bugana nga tubig kasubong sang Hardin sang Eden, ukon kasubong sang duta sang Egipto. (Ini sang wala pa malaglag sang Ginoo ang siyudad sang Sodoma kag Gomorra.) Si Lot nagpili para sa iya kaugalingon sang bug-os nga kapatagan sang Jordan, kag nagpasidlangan sia. Amo ini ang ila pagbulagay. Si Abram nagpabilin sa duta sang Canaan kag si Lot nagpuyo sa mga siyudad sang kapatagan kag nagpatindog sang iya mga tolda malapit sa Sodoma, nga ang mga tawo sini malaut kag nagpakasala batok sa Ginoo.

   Sang nakahalin na si Lot, ang Ginoo nagsiling kay Abram, “Halin sa imo ginatindugan lantawa sing maayo ang imo palibot. Ihatag ko sa imo kag sa imo mga kaliwat ang tanan nga mga duta nga malambot sang imo panulok, kag ini mangin-imo sa wala sing katubtoban. Hatagan ko ikaw sing madamo nga mga kaliwat, nga wala sing may makaisip sa ila tanan, subong nga wala sing may makaisip sang yab-ok sa duta. Karon lakat ka kag latasa ang bug-os nga duta, kay ihatag ko ini tanan sa imo.” Gani ginhalin ni Abram ang iya mga tolda kag nagpuyo sia malapit sa balaan nga mga kahoy sang Mamre sa Hebron, kag didto naghimo sia sing altar para sa Ginoo.

Salmo sa Pagsabat:

Mga Salmo 15:2-3, 3-4, 5

(S) O Ginoo, sin-o bala ang makapuyo sa imo Templo?

Ang tawo nga nagatuman sa Dios sa tanan nga bagay kag nagahimo sa gihapon sing matarong, nga nagahambal sing matuod kag tinagipusoon, kag wala nagabutangbutang sa iban. (S)
Wala sia nagahimo sing malain sa iya mga abyan, kag wala nagapatupato sing malain sa iya isigkatawo. Ginatamay niya ang mga ginasikway sang Dios, pero iya ginapasidunggan ang nagatuman· sa Ginoo. Ginatuman niya sa gihapon ang iya ginasaas, bisan mabudlay ini tumanon. (S)
Nagapahulam sia nga wala nagapasaka, kag indi sia mahamhaman sa pagpanaksi batok sa wala sing sala. Ang tawo nga nagahimo sini nga mga butang indi gid malingkang. (S)

Aleluya:

Juan 8:12

Ako amo ang kapawa sang kalibutan, siling sang Ginoo; ang magsunod sa Akon indi na gid maglakat sa kadudolman kundi may kapawa sang kabuhi.

Ang Pagbasa sang Santos nga Ebanghelyo suno kay:

San Mateo 7:6, 12-14

   “Indi pag-ihatag ang balaan nga mga butang sa mga ido, kay balikdon ka nila kag kadton. Indi pag-ihaboy ang mga perlas sa atubangan sang mga baboy kay pagatasakon lamang nila ini.”

   “Himoa sa iban ang luyag ninyo nga pagahimuon sa inyo. Amo ini ang kahulogan sang Kasugoan ni Moises kag ang pagtudlo sang mga propeta.”

   “Sulod kamo sa puwerta nga makitid, kay masangkad ang puwerta kag mahapos ang dalan pakadto sa kalaglagan, kag madamo ang nagaalagi sa sini. Pero makitid ang puwerta kag mabudlay ang dalan pakadto sa kabuhi, kag diutay gid lang ang nakatultol sini.”

Hunyo 24 | Hunyo 26

"Ang Gahom sang Ginoo yara sa Iya"

Liturhiya sang Pulong

(Lunes, Hunyo 24, 2019)

Ang Pagkatawo ni San Juan Bautista

1. Ang Pagbasa gikan sa Libro ni:

Isaias nga Propeta 49:1-6

   Pamati kamo sa akon, mga kapungsoran sa malayo,kamo nga mga tawo nga nagapuyo sa malayo nga mgaduog! Sa wala pa ako matawo, ang Ginoo nagpili sa akon, kag naghimo sa akon nga mangin-iya alagad. Ginhimo niya ang akon mga pulong nga matalom subong sang espada; gin-apinan niya ako sang iya kaugalingon nga kamot. Ginhimo niya ako kaangay sang baslay, matalom kag handa nga gamiton. Nagsiling sia sa akon, “Israel, ikaw ang akon alagad. Tungod sa imo, ang mga tawo magadayaw sa akon.”

   Nagsiling ako, “Nagpangabudlay ako, pero wala sing pulos ini. Naurot na ang akon kusog, pero wala gid ako sing nahimo.” Wala sapayan makasalig ako sa Ginoo nga nagatadlong sang tanan nga mga butang; hatagan niya ako sing balos sang akon ginhimo.

   Sa wala pa ako matawo, ang Ginoo nagpili sa akon; ginhimo niya ako nga iya alagad sa pagpabalik sang iya mga tawo, sa pagpabalik sang nag-alaplaag nga mga tawo sang Israel. Ang Ginoo nagpadungog sa akon; sia ang ginahalinan sang akon kusog.

   Ang Ginoo nagsiling sa akon, “May daku ako nga bulohaton para sa imo, alagad ko: Indi lamang nga ipabalik mo sa pagkagamhanan ang mga tawo sang Israel nga nagkalabilin nga buhi, kundi himuon ko man ikaw nga isa ka kapawa sa mga kapungsoran—agod ang bug-os nga kalibutan maluwas.”

Salmo sa Pagsabat:

Mga Salmo 139:1-3, 13-14, 14-15

(S) Ginadayaw ko ikaw kay ang tanan mo nga ginhimo makatalanhaga kag makatilingala.

O Ginoo, gin-usisa mo ako, kag nakilala mo ako, nahibaluan mo ang tanan nga ginahimo ko; gikan sa malayo nahangpan mo ang akon mga panghunahona. Makita mo ako, bisan naga-obra ukon nagapahuway ako, nahibaluan mo ang tanan ko nga ginahimo. (S)
Ginhimo mo ang tanan nga mga bahin sang akon lawas, gindihon mo ako sa tiyan sang akon iloy. Ginadayaw ko ikaw tungod kay dapat ka tahuron ang tanan mo nga ginahimo makatalanhaga kag makatilingala. (S)
Nahibal-an ko ini sa bug-os ko nga tagipusoon. Nakita mo ang pagdihon sang akon mga tul-an, nga gintaod sing mainandamon sa tiyan sang akon iloy, sang nagatubo ako didto nga indi makita.

2. Ang Pagbasa gikan sa mga:

Binuhatan sang mga Apostoles 13:22-26

   Sang mapahalin sia, ginhimo sang Dios si David nga hari nila. Amo ini ang ginsiling sang Dios nahanungod sa iya, ‘Si David nga anak ni Jese amo ang tawo nga akon naluyagan, kay isa sia ka tawo nga nagatuman sang tanan nga ginasugo ko sa iya.’ Si Jesus, isa sang mga kaliwat ni David, amo ang ginhimo sang Dios nga Manlulowas sang Israel suno sa iya ginsaad. Sa wala pa makasugod si Jesus sang iya bulohaton, nagwali si Juan sa tanan nga mga tawo sa Israel nga magbiya sila sa ila mga sala kag magpabautiso. Kag sang nagahingapos na si Juan sang iya bulohaton, nagsiling sia sa mga tawo, ‘Sa inyo abi, sin-o bala ako? Indi ako ang ginapaabot ninyo. Pero tandai ninyo! Nagakari sia nga ulihi lang sa akon, pero indi ako takos sa paghubad sang higot sang iya mga sandalyas.’

   “Mga utod, mga kaliwat ni Abraham, kag tanan kamo nga mga Gentil nga nagasimba sa Dios: sa aton ginpadala ining balita sang kaluwasan!

Aleluya:

Lucas 1:76

Ikaw, anak ko, pagatawgon nga propeta sang Labing Makagagahom nga Dios magauna ka sa Ginoo sa pag-aman sang iya dalanon.

Ang Pagbasa sang Santos nga Ebanghelyo suno kay:

San Lucas 1:57-66, 80

   Nag-abot ang tion nga inugbata na ni Elisabet, kag nagbata sia sing lalaki. Ang iya mga kaingod kag mga paryente nakabati kon daw ano kadaku ang kaluoy sang Ginoo sa iya kag nagkinalipay sila upod sa iya.

   Sang walo na ka adlaw ang bata, nag-abot sila sa pagtuli sa iya. Kuntani hingalanan nila sia nga Zacarias nga amo ang ngalan sang iya amay. Pero ang iya iloy nagsiling, “Indi! Pagahingalanan sia kay Juan.”

   Nagsiling sila sa iya, “Pero wala ka gid sing paryente nga amo ina ang ngalan!” Dayon nagsinyas sila sa iya amay sa pagpamangkot kon sin-o ang iya luyag nga ipahingalan sa bata.

   Nagpangayo si Zacarias sing papel kag nagsulat, “Hingalanan sia kay Juan.” Natingala gid sila tanan. Sa gilayon makahambal na si Zacarias kag nagdayaw sia sa Dios. Ang ila mga kaingod hinadlukan gid, kag ang balita nahanungod sining mga hitabo naglapnag sa mga kabaryuhanan sa mga bakulod sang Judea. Ang mga nakabati sini nga mga hitabo nagpamalandong kag nagpamangkot, “Mangin-ano ayhan ini nga bata?” Kag maathag nga ang gahom sang Ginoo yara sa iya.

   Ang bata nagdaku kag nagtubo sa lawas kag espiritu. Nagpuyo sia sa desierto tubtob sa adlaw nga sia magapakita na sa mga taga-Israel.

Hunyo 23 | Hunyo 25

"Nagkalaon Sila Tanan kag Nagkalabusog"

Liturhiya sang Pulong

(Domingo, Hunyo 23, 2019)

Ang Labing Santos nga Lawas kag Dugo ni Kristo 

1. Ang Pagbasa gikan sa Libro sang:

Genesis 14:18-20

   Kag si Melquisedec nga hari sang Salem kag pari sang Labing Mataas nga Dios, nagdala sing kalan-on kag bino kay Abram, kag ginbendisyunan niya kag nagsiling, “Kabay nga ang Labing Mataas nga Dios nga naghimo sang langit kag duta magbendisyon kay Abram. Kabay nga pagdayawon ang Labing Mataas nga Dios nga nagpadaog sa imo batok sa imo mga kaaway.” Kag si Abram naghatag sa iya sang ikapulo nga bahin sang tanan nga iya nakuha.

Salmo sa Pagsabat:

Mga Salmo 110:1, 2, 3, 4

(S) Mangin pari Ikaw sa walay katubtoban, suno sa pagsulondan sang pagkapari ni Melquisedec.

Ang Ginoo nagsiling sa akon Ginoo nga hari, "Pungko ka diri sa akon tuo, tubtob mabutang Ko ang imo mga kaaway sa idalom sang imo mga tiil." (S)
Gikan sa Sion ang Ginoo magapasangkad sang imo harianon nga gahom. Nagasiling Sia, "Maggahom ka sa imo mga kaaway." (S)
Sa adlaw nga awayon mo ang imo mga kaaway ang imo mga tawo magabulig sing kinabubot-on. Kaangay sang tun-og sa kaagahon, ang imo pamatan-on nga mga lalaki magakadto sa imo sa balaan nga mga bakulod. (S)
Ang Ginoo nagsumpa, kag indi Niya ini pagbawion; Manginpari Ikaw sa walay katubtoban, suno sa linya sang pagkapari ni Melquisedec." (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 11:23-26

   Kay ginbaton ko halin sa Ginoo ang pagtulon-an nga ginpaalinton ko man sa inyo: nga si Ginoong Jesus, sang gab-i nga gintugyan sia, nagkuha sing tinapay, nagpasalamat sa Dios, nagpamihakpihak sini kag nagsiling, “Ini amo ang akon lawas para sa inyo. Himoa ninyo ini sa akon handumanan.” Sa amo man nga bagay ginkuha niya ang kupa sa tapos ang panihapon kag nagsiling, “Ini nga kupa amo ang bag-o nga kasugtanan nga ginsilyuhan sang akon dugo. Sa inyo pag-inom sini, himoa ninyo ini sa akon handumanan.”

   Kay sa tagsa ninyo ka pagkaon sini nga tinapay kag pag-inom sa sini nga kupa, ginabantala ninyo ang kamatayon sang Ginoo tubtob nga magkari sia.

Sekwensya:

Tan-awa ang tinapay sang mga Angheles
nahimo nga kalan-on sang mga nagapanglakaton;
matuod nga kalan-on sang mga anak
nga wala ginhaboy sa mga ido
subong ang tanda, ginpat-in ini nga daan dira sa paghalad
kay Isaac, Ang Kordero Paskwal gintalana
sa paghatag sing Mana sa kaliwatan.
Maayo nga manugbantay, matuod nga tinapay O Jesus,
maluoy ka sa amon,
pahalba kami, tamda kami,
buhata nga makita man ikaw,
sa duta sang mga nagakabuhi.
Ikaw nga nakahibalo sang tanan
kag nagahatag kaayuhan sa tanan,
ikaw nga nagatatap sa mga mamalatyon:
Buhata nga magkaon kami upod sa imo,
sa imo nga pinili kag mga manunobli
sa bangkete sang mga Santos.

Aleluya:

Juan 6:51

Ako amo ang buhi nga tinapay nga naghalin sa langit, siling sang Ginoo, ang bisan sin-o nga magkaon sini nga tinapay magakabuhi sing dayon.

Ang Pagbasa sang Santos nga Ebanghelyo suno kay:

San Lucas 9:11-17

   Ginbaton niya sila kag naghambal sa ila nahanungod sang Ginharian sang Dios. Gin-ayo niya ang mga nagakinahanglan sang pag-ayo.

   Sang nagahinunod na ang adlaw, ang dose ka mga apostoles nagkadto sa iya kag nagsiling, “Palakta na ang mga tawo agod nga makakadto sila sa mga baryo kag kaumhan sa palibot sa pagpangita sing kalan-on kag dalayunan kay baw-ing ini nga duog.” Pero si Jesus nagsiling sa ila, “Kamo ang magpakaon sa ila.” 
   Nagsabat sila, “Lima gid lang ka bilog ang aton tinapay kag duha lang ang aton isda. Luyag mo bala nga maglakat kami sa pagbakal sing pagkaon para sa sining mga tawo?” (Mga 5,000 ang mga tawo didto.) 
   Si Jesus nagsiling sa iya mga gintuton-an, “Papungkoa ninyo sila sing hinut-ong nga tag-singkuwenta kada hut-ong.”

   Gintuman ini sang mga gintuton-an kag ginpapungko sila tanan. Ginkuha ni Jesus ang lima ka bilog nga tinapay kag ang duha ka isda, nagtangla sia sa langit, nagpasalamat sa Dios, ginpamihakpihak ini, kag ginhatag sa mga gintuton-an agod ipanagtag sa mga tawo. Nagkalaon sila tanan kag nagkalabusog. Ang mga gintuton-an nakatipon sing dose ka alat sang nagkalabilin sang ginkaon sang mga tawo.

Hunyo 22 | Hunyo 24

"Ngaa bala Magpalibog Kamo - Unaha Ninyo ang Pagpangita sang Ginharian"

Liturhiya sang Pulong

(Sabado, Hunyo 22, 2019)

San Paulino de Nola, Obispo

Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 12:1-10

   Kinahanglan ako magpabugal, bisan nga wala ini sing kapuslanan. Pero karon magahambal ako nahanungod sang mga palanan-awon kag sang mga ginpahayag sa akon sang Ginoo. May nakilala ako nga isa ka Cristiano nga sang 14 na ka tuig nga nagligad ginsabnit pakadto sa pinakamataas nga langit. (Wala ako makahibalo kon nadala ang iya lawas ukon ang iya lang espiritu—ang Dios lang ang nakahibalo.) Nakahibalo ako nga ini nga tawo gindala sa Paraiso (liwat nagasiling ako nga wala ako makahibalo kon nadala ang iya lawas ukon ang iya espiritu—ang Dios lang ang nakahibalo), kag didto nabatian niya ang mga pulong nga indi mahambal, mga butang nga indi tugot sa tawo ang pagbungat. Gani ipabugal ko ini nga tawo, pero indi ang akon kaugalingon, luas lamang sang mga butang nga nagapakita kon daw ano ako kaluya.

   Kon luyag ako magpabugal, indi gid man ako manginbuangboang, kay kamatuoran man ang ginasugid ko. Pero indi ako magapabugal, kay indi ako luyag nga ang bisan sin-o nga tawo maghunahona sing sobra sang sa iya nakita nga ginahimo ko kag nabatian niya nga akon ginahambal.  Pero agod indi ako magpabugal sing sobra tungod sang makatilingala nga mga butang nga akon nakita, ginhatagan ako sing masakit nga balatian, nga amo ang paagi ni Satanas sa pagsakit sa akon agod indi ako magpabugal. Katatlo gid ako magpangamuyo sa Ginoo nga kuhaon niya ini. Pero nagsabat sia, “Ang akon grasya amo ang kinahanglan mo, kay ang akon gahom mabatyagan mo sing labi kon ikaw maluya.” Gani labi ako ka malipayon sa pagpabugal sang bisan ano nga kaluyahon, agod nga akon mabatyagan ang gahom ni Cristo nga yari sa akon. Gani nagakalipay ako sa mga kaluyahon, sa mga pasipala, sa mga kabudlayan, sa mga paghingabot, sa mga kapiutan tungod kay Cristo. Kay kon maluya ako, ti mabakod ako.

Salmo sa Pagsabat:

Mga Salmo 34:8-9, 10-11, 12-13

(S) Tilawi kag tan-awa ninyo kon daw ano kaayo ang Ginoo.

Ang anghel sang Ginoo nagabantay sa tanan nga nagapasidungog sa iya, kag iya sila ginaluwas sa katalagman. Tilawi kag tan-awon ninyo kon daw ano kaayo ang Ginoo! Malipayon ang tawo nga nagadangop sa iya! Pasidunggi ninyo ang Ginoo, tanan kamo nga iya mga tawo, kay ang mga nagatuman sa iya indi mawad-an sang tanan nila nga mga kinahanglanon. (S)
Bisan pa ang mga leon ginakulang sing pagkaon kag ginagutman, pero ang nagatuman sa Ginoo indi gid makulangan sang maayo nga mga butang. Dali, mga abyan ko nga pamatan-on, pamatii ninyo ako, kag tudloan ko kamo sa pagpasidungog sa Ginoo. (S)
Luyag bala kamo magkasadya sa kabuhi? Luyag bala kamo magkabuhi sing malawig kag magmalipayon? Gani likawi ninyo ang paghambal sing malaut. Kag ang mga pagbinutig. (S)

Aleluya:

2 Corinto 8:9

Si Jesukristo bisan manggaranon Sia, nagpakaimol tungod sa inyo, agod nga paagi sa iya kaimulon manginmangaranon kamo.

Ang Pagbasa sang Santos nga Ebanghelyo suno kay:

San Mateo 6:24-34

   “Wala sing tawo nga makaalagad sa duha ka agalon. Kay kontrahon niya ang isa kag higugmaon niya ang isa, ukon magadampig sia sa isa kag magatamay sa isa. Indi kamo makaalagad sing dungan sa Dios kag sa manggad. “Amo ini ang kabangdanan kon ngaa nagasiling ako sa inyo nga indi kamo magpalibog kon ano ang inyo pagakaunon kag pagaimnon agod kamo mabuhi, ukon ano ang inyo isuksok sa inyo lawas. Indi bala ang kabuhi labi pa sa kalan-on kag ang lawas labi pa sa panapton? Tan-awa bala ang mga pispis nga nagalupadlopad sa palibot. Wala sila nagasab-og sing binhi ukon nagaani, ukon nagatipon sang ila mga patubas sa mga tambubo, pero ang inyo Amay sa langit nagapakaon sa ila! Indi bala mahal pa kamo sa ila? Sin-o bala sa inyo ang makadugang sing mga tinuig sa iya kabuhi paagi sa pagpalibog tungod sini?

   “Ngaa bala magpalibog kamo nahanungod sang inyo mga bayu? Tan-awa bala kon daw ano ang pagtubo sang mga bulak sa latagon; wala sila nagapangabudlay ukon nagahimo sang ila mga bayu. Pero nagasiling ako sa inyo nga bisan pa si Salomon sa iya kamanggaran wala makasuksok sing bayu nga subong katahom sini nga mga bulak. Ang Dios amo ang nagapabayu sang hilamon nga nagatubo karon kag buas idap-ong lamang sa kalayo. Indi bala sia magpabayu sa inyo? Ay kadiutay sang inyo pagtuo! Gani indi kamo magpalibog nga nagasiling, ‘Diin bala kita makuha sang aton kaunon, ukon sang aton ilimnon, ukon sang aton mga bayu?’ (Amo ini nga mga butang ang ginapaligban pirme sang mga Gentil.) Ang inyo Amay sa langit nakahibalo nga kinahanglan ninyo ini nga mga butang. Sa baylo sini, unaha ninyo ang pagpangita sang Ginharian sang Dios kag ang iya katarungan kag hatagan niya kamo sini tanan nga mga butang. Gani indi kamo magpalibog nahanungod sang buas, kay ang buas may iya man nga kaugalingon nga palaligban. Wala sing kinahanglan nga dugangan pa ang palaligban nga nagaabot sa tagsa ka adlaw.”

Hunyo 21 | Hunyo 23