"Ang Akon Paghidait Ginahatag Ko sa Inyo"

Liturhiya sang Pulong

(Domingo, Mayo 26, 2019)

1. Ang Pagbasa gikan sa mga:

Binuhatan sang mga Apostoles 15:1-2, 22-29

   May mga tawo halin sa Judea nga nagkadto sa Antioquia kag nagtudlo sa mga utod nga indi sila maluwas kon indi sila magpatuli, suno sa ginatudlo sang Kasugoan ni Moises. Mainit ang pagpakigbais ni Pablo kag ni Bernabe batok sa ila nahanungod sini, gani ginpakamaayo sang mga kautoran nga palakton si Pablo kag si Bernabe sa Jerusalem nga updan sang iban nga taga-Antioquia, agod nga mapakigkitaan nila ang mga apostoles kag ang mga katigulangan sang iglesia nahanungod sini nga butang. 

   Karon ang mga apostoles kag ang mga katigulangan sang iglesia kag ang bug-os nga iglesia, naghisugot sa pagpili sang pila sa ila nga ipadala sa Antioquia upod kay Pablo kag kay Bernabe. Ginpili nila si Judas nga ginahingalanan si Barsabas kag si Silas. Ini sila nga duha ginataha gid sang mga kautoran. Amo ini ang sulat nga ginpadala paagi sa ila:
   “Kami nga mga apostoles kag ang mga katigulangan sang iglesia, nga inyo mga utod, nagapadala sang ila pag-abiabi sa tanan nga mga kautoran nga mga Gentil nga nagapuyo sa Antioquia, Siria kag Cilicia. Nakabati kami nga may mga tawo gikan sa amon nga nagkadto sa inyo nga naggamo kag nagtublag sa inyo tungod sang ila mga ginpanghambal. Wala kami magsugo sa ila sa paghimo sini. Gani nagsinapol kami kag naghisugot sa pagpili sang mga tawo nga ipadala sa inyo. Maupod sila sa aton pinalangga nga mga abyan nga si Bernabe kag si Pablo nga nagtaya sang ila kabuhi sa pag-alagad sa aton Ginoong Jesu-Cristo. Gani, amon ginapadala sa inyo si Judas kag si Silas nga magasugid sa inyo sang amo man nga mga butang nga natugon sa sini nga sulat. Kay ginpakamaayo sang Espiritu Santo kag ginpakamaayo man namon nga indi pagdugangan ang inyo ginapas-an luas sa sining kinahanglanon nga mga pagsulondan. Indi kamo magkaon sang pagkaon nga nahalad sa mga diosdios. Indi kamo magkaon sang dugo. Indi kamo magkaon sang mga sapat nga napatay paagi sa kuga. Indi kamo magpakighilawas. Maayo gid sa inyo kon maglikaw kamo sa paghimo sini nga mga butang. Paalam sa inyo.” 

Salmo sa Pagsabat:

Mga Salmo 67:2-3, 5, 6, 8

(S) Dayawon ka, O Dios, sang mga kapungsoran.

Kaluoyi man kami, O Dios, kag bendisyoni kami; ipakita ang Imo kaayo sa amon, agod mahibaluan sang bug-os nga kalibutan ang imo kabubut-on; kag ang tanan nga kapungsoran makakilala sang imo kaluwasan! (S) 

Kabay nga magkasadya ang mga kapungsoran kag magkanta sa kalipay, kay ikaw nagahukom sing matarong sa mga katawohan; kag nagtuytoy sa tanan nga mga kapungsoran. (S) 

Kabay ang mga katawohan magdayaw sa imo, O Dios, kabay ang tanan nga mga katawohan magdayaw sa imo! Ang Dios naghatag sa aton sing mga kaayuhan, kabay nga ang tanan nga mga tawo bisan diin magtahod sa iya. (S)

2. Ang Pagbasa gikan sa:

Bugna sa kay San Juan 21:10-14, 22-23

   Gingamhan ako sang Espiritu, kag gindala ako sang anghel sa putokputokan sang mataas kaayo nga bukid. Ginpakita niya sa akon ang Jerusalem, ang Balaan nga Siyudad, nga nagapanaog halin sa langit gikan sa Dios, nga nagabanaag sang himaya sang Dios. Ang siyudad nagabanaag subong sang malahalon nga bato, kaangay sang haspe, nga matin-aw subong sang kristal. Ginalibutan ini sang daku kag mataas nga pader, nga may 12 ka mga puwerta, kag ginabantayan sang 12 ka mga anghel. Sa mga puwerta nasulat ang mga ngalan sang 12 ka mga tribo sang Israel. May tatlo ka mga puwerta sa tagsa ka kilid: tatlo sa sidlangan, tatlo sa nabagatnan, tatlo sa aminhan, kag tatlo sa nakatundan. Ang pader sang siyudad napasad sa 12 ka mga bato, nga nasulatan sang mga ngalan sang 12 ka mga apostoles sang Cordero. Wala ako sing nakita nga templo sa siyudad, kay ang iya templo amo ang Ginoong Dios, ang Makagagahom, kag ang Cordero. Ang siyudad wala na kinahanglan nga silakan pa sang adlaw kag bulan, kay ang himaya sang Dios nagasilak sa iya, kag ang Cordero amo ang iya suga. 

Aleluya:

Juan 14:23

Ang nagahigugma sa Akon magatuman sang Akon pulong, siling sang Ginoo; kag ang Akon Amay magahigugma sa iya kag kami magakadto sa iya.

Ang Pagbasa sang Santos nga Ebanghelyo suno kay:

San Juan 14:23-29

   Si Jesus nagsabat sa iya, “Ang nagahigugma sa akon magatuman sang akon pulong, kag ang akon Amay magahigugma sa iya kag kami magakadto sa iya kag magakabuhi upod sa iya. Ang wala nagahigugma sa akon, wala nagatuman sang akon mga pulong. Ang mga pulong nga inyo nabatian indi akon, kundi nagikan sa Amay nga nagpadala sa akon. 

   “Ginasugid ko ini samtang yari pa ako upod sa inyo. Ang Mananabang, ang Espiritu Santo nga ipadala sang Amay sa akon ngalan, magatudlo sa inyo sang tanan nga mga butang, kag magapahanumdom sia sa inyo sang tanan nga akon ginsiling sa inyo. 

   “Ang paghidait ginabilin ko sa inyo, ang akon paghidait ginahatag ko sa inyo. Ginahatag ko ini sa inyo indi subong sang paghatag sang kalibutan. Indi kamo magpalibog kag magkatublag, indi kamo magkahadlok. Nabatian ninyo nga nagsiling ako sa inyo, ‘Ako magalakat, pero magabalik man ako sa inyo.’ Kon ginahigugma ninyo ako, magakalipay kamo nga ako magakadto sa Amay, kay sia gamhanan pa sa akon. Karon ginasugid ko ini sa inyo sa wala pa mahanabo, agod nga kon mahanabo ini, magtuo kamo. 

Mayo 25 | Mayo 27