"Ang Isa Kuhaon kag ang Isa Ibilin"

Liturhiya sang Pulong

(Biyernes, Nobyembre 15, 2019)

San Alberto Magno, Obispo kag Doktor sang Simbahan

Ang Pagbasa gikan sa Libro sang:

Kaalam ni Salomon 13:1-9

   Ang bisan sin-o nga wala nagakilala sa Dios isa ka buangbuang. Ini nga mga tawo nagatan-aw sang maayo nga mga butang sa ila palibot pero indi nila makita ang buhi nga Dios. Ila ginton-an ang mga butang nga iya ginhimo, pero wala nila ginakilala ang nagbuhat sini nga mga butang. Sa baylo, nagapati sila nga ang mga dios nga nagagahom sa kalibutan amo ang kalayo ukon hangin ukon bagyo ukon ang nagalibot nga mga bitoon, ukon nagadaganas nga mga tubig ukon ang mga bagay sa kalangitan. Nalipay gid ang mga tawo sa pagtan-aw sing katahuman sining mga butang kag nagahunahona sila nga ini mga dios, pero ila kuntani talupangdon nga ini nga mga butang may agalon nga labaw sang sa ila tanan, tungod kay sia amo ang tagtuga sang katahom kag sang tanan nga mga butang. Tungod kay ang mga tawo nagkatingala sa gahom sini nga mga butang kag sang ila pagbinatasan, kuntani ang mga tawo magtuon paagi sa ila nga ang ila tagtuga sini mas gamhanan pa. Sa pagtalupangod naton sang pagkalapad kag sang pagkatahom sining mga tinuga, nagatuon man kita sang Manunuga sining mga butang. 

   Ayhan tuman ka estrikto sa aton sa sini nga mga tawo. Ayhan luyag man nila masalapuan, ang Dios pero indi nila sia sarang makita. Nalikupan sila sang mga hinimuan sang Dios nga sa bagay nga padayon ang ila pagtulok sa sini nga mga butang tubtob nga sang ulihi nahaylo sila nga ini nga mga butang amo ang mga dios. Tungod kay ang mga butang nga ila makita tama katahom. Pero sa gihapon ining mga tawo wala sing rason agod nga indi sila mabasol kon may ikasangkol sila sa paghibalo kag sa pagtukib nahanungod sang kinaugali sang kalibutan. Ngaa bala nga wala gid nila masalapui ang Ginoo sang tanan nga mga butang.

Salmo sa Pagsabat: 

Mga Salmo 19:2-3, 4-5

(S) Ang himaya sang Ginoo ginapahayag sang kalangitan.

Ang himaya sang Dios ginapahayag sing maathag sang kalangitan! Ang langit nagapakita sang iya mga binuhatan! Ang tagsa ka adlaw nagasugid sini sa madason nga adlaw, ang tagsa ka gab-i nagasulit sini sa madason nga gab-i. (S)

Wala sing pulong ukon mga tinuga nga ginagamit, wala sing gahod nga mabatian, pero ang ila tingog nagatugob sa bug-os nga kalibutan, ang ila mga pulong nagalambot sa mga ukbong sang duta. (S)

Aleluya:

Lucas 21:28

   Magtindog kamo kag magbayaw sang inyo mga ulo, kay ang inyo kaluwasan malapit na.

Ang Pagbasa sang Santos nga Ebanghelyo suno kay:

San Lucas 17:26-37

   Subong sang natabo sa mga adlaw ni Noe, amo man ang matabo sa inadlaw sang Anak sang Tawo. Ang tanan nagkalaon kag nag-ininom, ang mga lalaki nagpalangasawa kag ang mga babayi nagpalamana, tubtob sa adlaw nga si Noe nagsulod sa arka kag ang anaw nag-abot kag naglumos sa ila tanan. Amo man ang natabo sa mga inadlaw ni Lot. Nagkalaon kag nag-ininom sila, nagpamakal kag nagpamaligya sila, nagpananom sila kag nagpatindog sang mga balay. Pero sa adlaw nga si Lot nakagwa sa Sodoma, nag-ulan sing kalayo kag asupre didto sa Sodoma kag nagkalamatay ang tanan nga mga tawo. Manginkaangay man sini sa adlaw nga ipahayag ang Anak sang Tawo. 

   “Sa sadto nga adlaw ang tawo nga yara sa atop sang iya balay indi na magpanaog sa pagkuha sang iya pagkabutang nga yara sa sulod sang balay. Sa amo man nga bagay, ang tawo nga yara sa iya uma indi na magpauli. Dumdoma ninyo ang asawa ni Lot. Ang nagatinguha sa pagluwas sang iya kabuhi madula niya ini, kag ang bisan sin-o nga nagadula sang iya kabuhi maluwas niya ini. Nagasiling ako sa inyo, sa sina nga gab-i may duha ka tawo nga magatulog sa isa ka higdaan, ang isa kuhaon kag ang isa ibilin. May duha ka babayi nga nagagaling, ang isa kuhaon kag ang isa ibilin. May duha ka tawo sa latagon, ang isa kuhaon kag ang isa ibilin.” 

   Ang mga gintuton-an nagpamangkot sa iya, “Diin bala, Ginoo?” 

   Si Jesus nagsabat, “Kon diin ang lawas nga patay, didto man magatipon ang mga uwak.”

Nobyembre 14 | Nobyembre 16

Ang Pag-abot sang Ginharian ni Cristo

Liturhiya sang Pulong

(Huebes, Nobyembre 15, 2018)

San Alberto Magno, Obispo kag Doktor sang Simbahan

Ang Pagbasa gikan sa Sulat ni San Pablo nga Apostol, kay:

Filemon 7-20

Hinigugma ko nga utod, ang imo gugma naglipay gid sa akon sing daku kag nagpaisog sa akon! Imo ginlipay ang mga tagipusoon sang tanan nga mga tumoluo. Tungod sini makapangisog kuntani ako, subong imo utod kay Cristo, sa pagsugo sa imo sang dapat mo himuon. Pero sa baylo sini, nagapangabay ako sa imo tungod sa gugma. Ginahimo ko ini bisan pa nga ako si Pablo, embahador ni Cristo Jesus, kag isa man karon ka binilanggo tungod sa iya. Gani nagapangabay ako sa imo tungod kay Onesimo nga akon gid anak kay Cristo. Kay sang nabilanggo ako, nangin-espirituhanon niya ako nga amay. Sang una anay indi mo sia mapuslan, pero karon mapuslanon na sia sa imo kag sa akon man. Ginapabalik ko sia karon sa imo kag ang akon tagipusoon nagaupod sa iya. Luyag ko kuntani nga hawiran sia diri upod sa akon, samtang ginabilanggo ako tungod sang Maayong Balita, agod nga makabulig sia sa akon subong nga tal-os mo. Pero indi ako luyag magpilit sa imo sa pagbulig sa akon, kundi luyag ko kuntani nga imo ina himuon sa imo kaugalingon nga kabubot-on. Gani indi ako maghimo sang bisan ano kon indi ka magsugot. Ayhan nagpalayo sa imo si Onesimo sa malip-ot nga tion agod nga magbalik sia sa imo sing dayon. Kag karon indi lang sia isa ka ulipon, kundi labaw pa sa isa ka ulipon kay isa na sia ka hinigugma nga utod kay Cristo. Daw ano ang akon pagpakamahal sa iya! Kag daw ano pa gid ang imo pagpakamahal sa iya, subong isa ka ulipon kag isa ka utod sa Ginoo! Gani, kon ginakabig mo ako subong imo kaupod, batuna sia liwat subong sang imo pagbaton sa akon.

Batuna sia liwat. (17)

Kon nakasayop ukon nakautang sia sa imo, isipa ina nga utang ko. Ako gid ang nagasulat sini: Ako, si Pablo, magabayad sa imo. (Indi na kinahanglan nga pahanumdomon ko pa ikaw, nga utang mo sa akon ang imo kabuhi.) Gani, utod ko, himoa man ini para sa akon tungod sa Ginoo. Lipaya ang akon tagipusoon subong isa ka utod kay Cristo.

Salmo sa Pagsabat:

Mga Salmo 146:7, 8-9, 9-10

(S) Bulahan ang tawo nga ginabuligan sang Dios ni Jacob.

Ginatuman gid niya sa gihapon ang iya mga saad; nagahukom sia pabor sa mga ginapigos, kag nagahatag Sia sing kalan-on sa mga ginagutom. Ang Ginoo nagahilway sang mga binilanggo. (S)
Ang Ginoo nagaayo sang mga bulag, ginabayaw niya ang mga ginapaubos, ginahigugma niya ang iya matarong nga mga tawo. Ginaapinan niya ang mga dumoluong nga nagapuyo sa duta. (S)
Ginabuligan Niya ang mga balo nga babayi kag mga ilo, pero ginaguba Niya ang mga plano sang mga malaut. Ang Ginoo magahari sa walay katubtoban! Ang Imo Dios, O Sion, magagahom sa tanan nga panahon! (S)

Aleluya:

Juan 15:5

Ako amo ang puno sang ubas, kamo ang mga sanga, siling sang Ginoo; ang nagapabilin sa akon, kag ako sa iya, magapamunga sing madamo. 

Ang Pagbasa sang Santos nga Ebanghelyo suno kay:

San Lucas 17:20-25

May mga Fariseo nga nagpamangkot kay Jesus kon san-o magaabot ang Ginharian sang Dios. Nagsabat sia sa ila, “Indi mahibal-an ang pag-abot sang Ginharian sang Dios. Wala sing makasiling, ‘Tan-awa ninyo, yari diri!’ ukon ‘Yadto didto!’ kay ang Ginharian sang Dios yara sa inyo.” Dayon nagsiling sia sa mga gintuton-an, “Magaabot ang mga inadlaw nga magahandom kamo sa pagtan-aw sang isa sang mga inadlaw sang Anak sang Tawo, pero indi ninyo ini makita. May magasiling sa inyo, ‘Tan-awa, yadto didto!’ ukon, ‘Tan-awa, yari diri.’ Pero indi kamo magkadto sa pagpangita sini. Subong nga ang kilat nagaidlab kag nagapasanag sang langit halin sa pihak tubtob sa pihak, mangin-amo man ang Anak sang Tawo sa iya pag-abot. Ugaling dapat sia anay mag-antos sing madamo kag pagasikwayon sang mga tawo sa sini nga panahon. 

Nobyembre 14 | Nobyembre 16