Ano Kaangay sang Ginharian sang Dios

Liturhiya sang Pulong

(Biyernes, Enero 31, 2020)

San Juan Bosco, Pari

Ang Pagbasa gikan sa Ikaduha nga Libro ni:

Samuel nga Propeta 11:1-4, 5-10, 13-17

   Sa tapos ang tigtulognaw, sa panahon nga ang mga hari nagalakat sa pagpakig-away, ginpadala ni David si Joab upod ang iya mga opisyales kag ang mga hangaway sang Israel; ginlutos nila ang mga Amonhon kag ginkibon ang siyudad sang Raba. Pero si David nagpabilin sa Jerusalem.

   Isa sadto ka hapon, si David nagbangon gikan sa iya pagpahuway kag nagsaka sia sa atop sang palasyo. Samtang nagadayandayan sia sa atop may nakita sia nga isa ka babayi nga nagapaligo. Matahom sia kaayo. Gani nagpasugo sia sa pag-usisa kon sin-o ini nga babayi, kag nahibal-an niya nga sia amo si Batseba, nga anak nga babayi ni Eliam kag asawa ni Urias nga Hethanon. Si David nagpasugo nga dalhon ini nga babayi sa iya; gindala nila sia kay David, kag ginhuliran sia ni David. Sang ulihi, nasapwan nia nga nagabusong sia, gani ginpahibalo niya si David.

   Dayon si David nagpadala sang mensahi kay Joab, “Papaulia diri sa akon si Urias nga Hethanon.” Gani ginpadala ni Joab si Urias kay David. Sang pag-abot niya, ginpamangkot sia ni David kon kamusta si Joab kag ang mga hangaway, kag kon paano man ang ila inaway. Dayon nagsiling sia kay Urias, “Pauli anay kag magpahuway.” Si Urias naglakat kag ginpadal-an sia ni David sing regalo sa iya balay, pero si Urias wala magpauli; didto sia nagtulog sa puwerta sang palasyo upod sa mga gwardya sang hari. Sang pagkabati ni David nga si Urias wala magpauli, namangkot sia, “Bag-o ka lang mag-abot kag dugay na nga wala ka makapauli, ngaa nga wala ka magpauli sa inyo?”

   Gin-agda sia ni David sa pagpanihapon upod sa iya kag ginhubog sia. Pero sa liwat si Urias wala magpauli; sa baylo nagtulog sia sa kuwarto sang gwardya sa palasyo nga ang iya banig amo lang ang iya habol.

   Sang madason nga adlaw si David nagsulat kay Joab kag ginpadala niya ini kay Urias. Nagsulat sia: “Ibutang si Urias sa nauna nga mga soldado sa diin ang inaway malapuyot kag dayon bayaan ninyo sia agod mapatay.” Gani samtang ginakibon ni Joab ang siyudad, ginbutang niya si Urias sa duog sa diin mabakod ang mga kaaway. Ang mga soldado sang mga kaaway naggwa sa siyudad kag nagpakigsumpong sa mga hangaway ni Joab, kag ginpatay nila ang pila ka opisyales ni David; kag si Urias napatay man.

Salmo sa Pagsabat:

Mga Salmo 51:3-4, 5-6, 6-7, 10-11

(S) Nakasala ako sa imo, O Ginoo, maluoy ka sa akon. 

Nakasala ako sa imo, sa imo gid lang, kag ginhimo ko ang ginapakalain mo. Gani matarong ikaw sa imo paghukom sa akon; may katarungan ikaw sa pagkondenar sa akon. Malaut ako halin sa tion nga ginbun-ag ako, halin pa sang adlaw sang akon pagkatawo nanginmakasasala ako. (S) 

Ang matutom nga tagipusoon amo ang imo ginapangita; pun-a sang imo kaalam ang akon panghunahona. Kuhaa ang akon sala, kag manginmatinlo ako. (S) 

Hugasi ako, kag manginmaputi pa ako sa yelo. Pabatia ako sang mga kinalipay kag kinasadya, kag bisan pa nga ginbatibati kag gindugmok mo ako, magakalipay ako liwat. (S) 

Indi ako pagtabuga sa imo atubangan, indi pagkuhaa sa akon ang imo Espiritu Santo. Iuli sa akon ang kalipay sang imo kaluwasan, kag himoa ang akon espiritu nga magmatinumanon. (S)

Aleluya:

Mateo 11:25

   Dayawon ka, O Amay Ginoo sang langit kag sang duta, kay ginpahayag mo sa mga kubos ang mga misteryo sang imo ginharian.

Ang Pagbasa sang Santos nga Ebanghelyo suno kay:

San Marcos 4:26-34

   Nagsiling pa gid si Jesus, “Ang Ginharian sang Dios kaangay sang tawo nga nagsab-og sang binhi sa iya uma. Nagatulog sia kon gab-i, kag kon adlaw nagaobra sia, samtang ang binhi nagaulhot kag nagatubo, pero wala sia kahibalo kon paano ang pagkahimo sini. Ang duta mismo nagapatubo kag nagapabunga sang mga tanom: nahauna ang dahon, madason ang uhay, kag sa ulihi ang matinggas nga bunga. Kon ang bunga gulang na, nagapadala sia sing manuggarab, kay ang tig-alani nag-abot na.”
   Si Jesus nagpamangkot, “Sa ano bala mapaanggid ang Ginharian sang Dios? Ano nga palaanggiran ang aton gamiton sa pagpaathag sini? Kaangay ini sang isa ka binhi sang mostasa, ang labing diutay nga binhi sa kalibutan. Ginakuha ini sang tawo kag ginatanom sa duta. Dayon nagatubo ini kag nagadaku sing labaw sa mga kahuykahoy. Ang iya mga sanga nagadalagku sa bagay nga ang mga pispis nagapugad sa iya sanga nga mahandong.”
   Paagi sa mga palaanggiran nga kasubong sini, nagwali si Jesus sa mga tawo. Naghambal sia sa ila suno sa ila mahangpan. Indi sia maghambal sa ila kon indi paagi sa mga palaanggiran. Pero kon silahanon lang sang iya mga gintuton-an, ginasaysay niya ang tanan sa ila.

Enero 30 | Pebrero 1

Nagakabuhi sa Kapawa sang Kamatuoran kag Kaalam sang Dios

Liturhiya sang Pulong

(Huwebes, Enero 30, 2020)

Ang Pagbasa gikan sa Ikaduha nga Libro ni:

Samuel nga Propeta 7:18-19, 24-29

   Dayon si Haring David nagsulod sa balaan nga tolda, naglingkod kag nagpangamuyo, "O GINOONG Dios, ako kag ang akon panimalay indi takos sang tanan nga imo ginhimo sa akon. Pero karon, O GINOONG Dios, sobra pa ang imo ginhimo; nagsaad ka nahanungod sa akon mga kaliwat sa palaabuton nga panahon. Kag imo ini ginpakita sa isa ka tawo. O GINOONG Dios!

   Ginhimo mo ang Israel nga mangin-imo kaugalingon nga mga tawo sa walay katubtoban, kag ikaw, O Ginoo, nangin-ila Dios.

   "Kag karon, O GINOONG Dios, tumana sa gihapon ang imo ginsaad sa akon kag sa akon kaliwatan kag himoa ang imo ginsiling. Ang imo pagkabantog magalapnag, kag ang mga tawo magasiling sa walay katapusan, 'Ang Ginoo nga Makagagahom amo ang Dios sa Israel.' Kag himuon mo gid nga ang akon mga kaliwat magahari sa gihapon. O GINOO nga Makagagahom, Dios sang Israel! Tungod kay imo ini ginpahayag sa akon nga imo alagad, nga himuon mo ang akon mga kaliwat nga mga hari, may kaisog ako sa pagpangamuyo sini sa imo.

   ''Kag karon, O GINOONG Dios, ikaw amo ang Dios; ginatuman mo sa gihapon ang imo mga saad, kag ginhimo mo ining makatilingala nga saad sa akon. Karon kon mahimo bendisyuni ang akon mga kaliwat agod sila magapadayon sa pagbaton sang imo mga kaayuhan. Ikaw, O Ginoo nga Gamhanan, ang nagsaad sini, kag kabay ang imo pagpakamaayo sa akon mga kaliwat mangin walay katapusan.”

Salmo sa Pagsabat:

Mga Salmo 132:1-2, 3-5, 11, 12, 13-14 

(S) Ang Ginoong Dios magahimo sa iya nga hari subong sang iya amay nga si David.

O Ginoo, indi pagkalimti si David kag ang tanan niya nga mga binuhatan. Dumdoma, O Ginoo, ang iya ginsaad, ang iya panumpa sa imo, ang Gamhanan nga Dios sang Israel. (S) 

“Indi ako magpauli ukon maghigda; indi ako magpahuway ukon magtulog, tubtob makahatag ako sing duog para sa Ginoo, isa ka puloy-an para sa Gamhanan nga Dios san Israel.” (S) 

Indi mo pagbawion ang imo panumpa kay David, nga nagasiling: “Himuon ko nga hari ang isa sang imo mga anak nga lalaki, kag magahari sia dason sa imo. (S) 

Kon ang imo mga anak nga lalaki magtuman sang akon kasugtanan, kag sa mga sugo nga ginhatag ko sa ila, ang ila man mga anak nga lalaki magahari sa imo trono sa tanan nga panahon. (S)

Ginpili sang Ginoo ang Sion, kay luyag sia maghimo sang iya puloy-an didto; “Diri ako magapuyo sa walay katubtoban, diri ako luyag maggahom. (S)

Aleluya:

Mga Salmo 119:105

   Ang imo pulong isa ka suga nga nagatuytoy sa akon mga tiil, kag kapawa sa akon alagyan.

Ang Pagbasa sang Santos nga Ebanghelyo suno kay:

San Marcos 4:21-25

   Si Jesus nagpadayon: “May nagadala bala sing suga kag nagabutang sini sa idalom sang isa ka sulodlan, ukon sa idalom sang katre? Wala bala niya ini ginabutang sa tulongtongan? Ang bisan ano nga ginatago, igapahayag kag ang bisan ano nga ginatabunan, pagabuksan. Gani, kon sin-o ang luyag magpamati, magpamati sia!” Kag si Jesus nagsiling pa gid sa ila, “Talupangda gid ang inyo ginapamatian! Ang talaksan nga inyo ginagamit sa paghukom sa iban amo man ang pagagamiton sang Dios sa paghukom sa inyo, kag sobra pa sini ang pagahimuon sa inyo. Ang tawo nga may iya na pagahatagan pa gid, kag ang tawo nga wala sing iya, bisan ang diutay nga yara sa iya pagakuhaon pa.”

Enero 29 | Enero 31

Nagpanudlo si Jesus sa mga Tawo sang mga Palaanggiran

Liturhiya sang Pulong

(Miyerkules, Enero 29, 2020)

Ang Pagbasa gikan sa Ikaduha nga Libro ni:

Samuel nga Propeta 7:4-17

   Pero sa sadto nga gab-i ang Ginoo nagsiling kay Natan, “Lakat ka kag singgana ang akon alagad nga si David nga ako nagasiling sa iya, ‘Indi ikaw ang magapatindog sang isa ka templo nga akon pagapuy-an. Halin sang pagpagwa ko sang mga tawo sang Israel sa Egipto tubtob karon nga adlaw,  wala ako magpuyo sa templo; nagpanglakaton ako nga nagapuyo sa isa ka tolda. Sa akon pagpanglakaton upod sa mga tawo sang Israel wala ako magreklamo sa mga pangulo nga akon gintugyanan kon ngaa wala sila magpatindog para sa akon sang templo nga nahimo sa sedro.’ Gani singgana ang akon alagad nga si David nga ako, ang Ginoo nga Makagagahom nagasiling sa iya, ‘Halin sa pagkamanugbantay sang mga karnero sa latagon, ginpili ko ikaw nga manginpangulo sang akon mga tawo nga Israel. Gin-updan ko ikaw bisan diin ikaw magkadto, kag ginlutos ko ang tanan mo nga mga kaaway sa atubangan mo. Himuon ko ikaw nga gamhanan subong kagamhanan sa labing gamhanan nga mga pangulo sang duta. Magapili ako sing isa ka duog para sa akon mga tawo nga Israel kag pa estaron ko sila didto, sa diin magapuyo sila nga indi na gid pagtublagon. Sugod sang ila pagsulod sa sini nga duta, ginsalakay sila sang mapintas nga mga tawo, pero indi na ini matabo liwat sa ila. Nagasaad ako nga apinan ko kamo nga indi maano batok sa tanan ninyo nga mga kaaway, kag hatagan ko ikaw sing mga kaliwat. Kon mapatay ka kag ilubong upod sa imo mga katigulangan, himuon ko ang isa sang imo mga kaliwat nga hari, kag palig-unon ko ang iya ginharian. Magapatindog sia sing isa ka templo para sa akon, kag himuon ko nga ang iya mga kaliwat magagahom sa walay katapusan. Ako mangin-iya amay, kag sia mangin-akon anak. Kon maghimo sia sing malain, ako magasilot sa iya subong sang isa ka amay nga nagasilot sang iya anak. Pero indi ko sia pagpatumbayaan subong sang akon ginhimo kay Saul, nga akon ginsikway agod ikaw manginhari. Indi ka mawad-an sing mga kaliwat, kag himuon ko ang imo ginharian nga manginwalay katapusan. Ang imo harianon nga paggahom wala sing katapusan.’”

   Ginsugid ni Natan kay David ang tanan nga ginpahayag sang Dios sa iya.

Salmo sa Pagsabat:

Mga Salmo 89:4-5, 27-28, 29-30

(S) Pagatumanon ko sa gihapon ang akon saad sa iya. 

Nagsiling ka, “Naghimo ako sing kasugtanan sa tawo nga akon ginpili; nagsaad ako sa akon alagad nga si David, ‘Ang isa sang imo mga kaliwatmanginhari sa wala sing katubtoban; tipigan ko ang imoginharian sa wala sing katapusan.’” (S) 

Magasiling sia sa akon, ‘Ikaw ang akon amay kag akon Dios;ikawang akon mangangapin kag manlulowas.’ Pagahimuon ko sia nga akon panganay nga anak nga lalaki, ang labing gamhanan sa tanan nga mga hari. (S) 

Pagatumanon ko sa gihapon ang akon saad sa iya, kag ang akon kasugtanan sa iya magapadayon sa walay katapusan. Ang isa sang iya mga kaliwat manginhari sa gihapon, ang iya ginharian manginwalay katapusan subong sang langit. (S)

Aleluya:

   Ang binhi amo ang Pulong sang Dios, si Kristo amo ang manugsab-og; ang bisan sin-o nga nagadangop sa iya may kabuhi nga walay katapusan.

Ang Pagbasa sang Santos nga Ebanghelyo suno kay:

San Marcos 4:1-20

   Sa liwat si Jesus nagpanudlo sa higad sang Linaw sang Galilea. Tama gid kadamo ang mga tawo nga nagdulogok sa palibot niya sa bagay nga nagsakay sia sa isa ka sakayan nga nagalutaw sa tubig kag naglingkod sia didto samtang ang madamo nga mga tawo nagpabilin sa bibi sang linaw. Si Jesus naggamit sang mga palaanggiran sa pagtudlo sa ila sang madamo nga mga butang, kag sa iya pagpanudlo nagsiling sia sa ila: “Magpamati kamo! May isa ka tawo nga naglakat sa pagsab-og. Sang pagsab-og niya sang binhi, ang iban nagtupa sa dalan, kag ang mga pispis nagdapo kag nagtuka sini. Ang iban nagtupa sa batuhon nga mga duog, sa diin hapaw lamang ang duta. Sa wala lang madugay nag-ulhot ang binhi tungod kay manabaw ang duta. Sang udto na ang adlaw nalayong ang bag-ong tubo nga binhi, kag bangod kay indi gid madalom ang gamot sini, ang tanom madali nga nalaya. Ang iban nga binhi nagtupa sa mga talungon. Nagtubo ang mga talungon kag naglumos sang tanom, kag wala ini magpamunga. Pero ang iban nga binhi nagtupa sa maayo nga duta, namuhi, nagtubo kag nagpamunga: ang iban sini nagpatubas sing 30 ka pilo, ang iban sini 60 ka pilo, kag ang iban sini 100 ka pilo.” Kag si Jesus nagsiling “Gani, kon sin-o ang luyag magpamati, magpamati sia!” 

   Sang isahanon na lang si Jesus, ang iban nga nakabati sa iya nagpalapit upod sa dose ka mga apostoles kag nagpangabay nga ipaathag niya ang mga palaanggiran. Si Jesus nagsabat sa ila, “Ginhatagan kamo sang tinago sang Ginharian sang Dios, pero ang iban nga yara sa gwa magapamati sini tanan paagi sa mga palaanggiran, agod nga, 

     ‘Magatulok nga magatulok sila, 

     Pero indi makakita, 

     Magapamati nga magapamati sila, 

     Pero indi makahangop, 

     Kay kon makahangop sila 

     Basi magliso sila sa Dios 

     Kag patawaron niya sila.’” 

   Dayon si Jesus nagpamangkot sa ila, “Indi bala kamo makahangop sini nga palaanggiran? Karon, paano abi ang pagkahangop ninyo sang bisan ano nga palaanggiran? Ang manugsab-og nagsab-og sang pulong sang Dios. Ang mga binhi nga nagatupa sa dalan amo ang pulong sang Dios nga sang pagkabati sang mga tawo, sa gilayon nagaabot si Satanas kag nagaagaw sang pulong nga ginsab-og sa ila tagipusoon. Amo man ang ginasab-og sa batuhon nga duta. Kasubong ini sang pulong sang Dios nga sang pagkabati sang mga tawo, sa gilayon ginabaton nila sing malipayon. Pero wala ini nagatudok sa ila tagipusoon, kag wala nagapabilin sing madugay. Gani wala na sila nagapadayon kon mag-abot ang mga kalalat-an ukon mga paghingabot tungod sang pulong sang Dios. Kag ang mga nagatupa sa mga talungon amo ang pulong sang Dios nga nabatian sang mga tawo. Pero ang palaligban sang pangabuhi, ang paghigugma sa manggad, kag ang iban pa gid nga mga handom nagaginutok sa ila mga hunahona kag nagalumos sang pulong sang Dios, kag wala ini nagapamunga. Pero ang nagtupa sa maayo nga duta amo ang pulong sang Dios nga sang pagkabati sang mga tawo ginbaton nila ini, kag nagapamunga: ang iban 30 ka pilo, ang iban 60 ka pilo, kag ang iban 100 ka pilo.”

Enero 28 | Enero 30

"Ang Nagabuhat sang Luyag sang Dios amo ang Akon Utod nga Lalaki kag Babayi"

Liturhiya sang Pulong

(Martes, Enero 28, 2020)

Santo Tomas de Aquino, Pari kag Doktor sang Simbahon

Ang Pagbasa gikan sa Ikaduha nga Libro ni:

Samuel nga Propeta 6:12-15, 17-19

   Nabatian ni Haring David nga tungod sang Kaban sang Kasugtanan, ang Ginoo nagpauswag sang panimalay ni Obed Edom kag sang tanan niya nga pagkabutang; gani ginkuha niya ini sa balay ni Obed Edom kag gindala sa Jerusalem nga may daku nga pagkinalipay. Sang makalakat sing anom katikang ang mga tawo nga nagadala sang Kaban sang Kasugtanan, ginpadulog sila ni David samtang naghalad sia sa Ginoo sang isa ka baka kag isa ka matambok nga karnero. Si David nga nagatampi lamang sing panapton nga lino sa iya hawak, nagsaot sa bug-os niya nga kusog sa pagdayaw sa Ginoo. Gani sia kag ang tanan nga mga Israelinhon nagdala sang Kaban sang Kasugtanan tubtob sa Jerusalem nga nagahinugyaw kag nagapatunog sang mga trumpeta.

   Gindala nila ang Kaban kag ginbutang ini sa tolda nga gin-aman ni David. Dayon nagdulot si David sing mga halad nga sinunog kag mga halad sa paghiambit sa Ginoo. Sa tapos sia makadulot sang mga halad nga sinunog kag mga halad sa paghiambit, ginbendisyunan niya ang mga tawo sa ngalan sang Ginoo nga Makagagahom. Dayon ginhatagan niya ang tagsa kalalaki kag babayi sang isa kabilog nga tinapay, isa ka gulot nga karne nga sinugba, kag mga pasas. Kag ang tagsatagsa nagpauli.

Salmo sa Pagsabat:

Mga Salmo 24:7, 8, 9, 10

(S) Sin-o bala ining Hari nga gamhanan? Sia amo ang Ginoo nga makagagahom.

Abrihi sing daku ang mga ganhaan, buksi ang daan nga mga puwertahan, kay magasulod ang Hari nga gamhanan! (S) 

Sin-o bala ining Hari nga gamhanan? Sia amo ang Ginoo nga makusog kag makagagahom, ang Ginoo nga nagadaog sa inaway! (S) 

Abrihi sing daku ang mga ganhaan, buksi ang daan nga mga puwertahan, kag magasulod ang Hari nga gamhanan! (S) 

Sin-o bala ining Hari nga gamhanan? Sia amo ang Ginoo sang mga hangaway, ang Hari nga gamhanan! (S)

Aleluya:

Mateo 11:25

   Dayawon ka, O Amay, Ginoo sang langit kag sang duta, kay ginpahayag mo sa mga kubos ang mga misteryo sang imo Ginharian.

Ang Pagbasa sang Santos nga Ebanghelyo suno kay:

San Marcos 3:31-35

   Dayon ang iloy kag ang mga utod nga lalaki ni Jesus nag-abot. Nagtindog lang sila sa gwa sang balay kag nagpahibalo nga gusto sila magpakigkita kay Jesus. May madamo nga mga tawo nga nagalingkod sa palibot ni Jesus, kag nagsiling sila sa iya, “Hoy, ang iloy mo kag ang imo mga utod yara sa gwa, kag gusto sila magpakigkita sa imo.” Nagsabat si Jesus, “Sin-o bala ang akon iloy? Sin-o bala ang akon mga utod?” Gintulok niya ang mga tawo nga nagalingkod sa palibot niya, kag nagsiling, “Tan-awa ninyo, yari ang akon iloy kag mga utod! Kay ang nagabuhat sang luyag sang Dios, amo ang akon utod nga lalaki, ang akon utod nga babayi, kag ang akon iloy.”

Enero 27 | Enero 29

Ginaluwas Kita ni Jesus sa Gahom ni Satanas

Liturhiya sang Pulong

(Lunes, Enero 27, 2020)

Santa Angela Merici, Birhen

1. Ang Pagbasa gikan sa Ikaduha nga Libro ni:

Samuel nga Propeta 5:1-7, 10 

   Karon ang bug-os nga tribo sang Israel nagkadto kay David sa Hebron kag nagsiling sa iya, “Mga kasimanwa mo kami. Sang una sang si Saul ang amon hari, ikaw ang nagpangulo sang mga tawo sang Israel sa inaway. Kag ang Ginoo nagsiling sa imo nga ikaw ang magapangulo sang iya mga tawo kag mangin-ila manugdumala.” Gani ang tanan nga mga pangulo sang Israel nagkadto kay Haring David sa Hebron. Naghimo sia sing kasugtanan sa ila, kag ginhaplas nila sia nga hari sang Israel. Si David nagaedad sing 30 ka tuig sang iya paghari kag naggahom sia sa sulod sing 40 ka tuig. Didto sa Hebron naghari sia sa bug-os nga Juda sa sulod sang pito ka tuig kag tunga, kag sa Jerusalem sa bug-os nga Israel kag Juda sa sulod sang 33 ka tuig.

   Si Haring David kag ang iya mga tinawo nagsalakay sa Jerusalem. Ang mga Jebusnon nga nagapuyo didto naghunahona nga si David indi sarang makaagaw sang siyudad. Gani nagsiling sila sa iya, “Indi gid ikaw makasulod diri; bisan ang mga bulag kag ang mga piang sarang makatabog sa imo.” (Pero gin-agaw ni David ang pamakod sang Sion, kag nangin-siyudad ini ni David.) Naggamhanan sia nga naggamhanan, kay ang Ginoong Dios nga Makagagahom nagaupod sa iya.

Salmo sa Pagsabat:

Mga Salmo 89:20, 21-22, 25-26

(S) Pagahigugmaon kag pagaunongan ko sia sa gihapon. 

Sa isa ka palanan-awon sang una nagsiling ikaw sa imo matutom nga mga alagad, “Ginkoronahan ko ang isa ka bantog nga soldado; ginhatag ko ang trono sa isa nga pinili sa mga tawo. (S) 

Ginhimo ko nga hari si David nga akon alagad paagi sa paghaplas sa iya sing balaan nga lana. Ang akon kusog manginyara sa iya sa gihapon, ang akon gahom magapabakod sa iya. (S) 

Pagahigugmaon kag pagaunongan ko sia sa gihapon, padag-on ko sia sa gihapon. Pasangkaron ko ang iya ginharian halin sa Dagat sang Mediteraneo tubtob sa suba sang Eufrates. (S) 

Aleluya:

2 Timoteo 1:10

   Ang aton Manlulowas nga si Cristo Jesus naglaglag sang kamatayon, kag ginpahayag niya ang kabuhi paagi sa Maayong Balita.

Ang Pagbasa sang Santos nga Ebanghelyo suno kay:

San Marcos 3:22-30

   May mga manunodlo sang Kasugoan nga nag-abot gikan sa Jerusalem nga nagsiling, “Yara sa iya si Beelzebul!” Ang iban nagsiling, “Ang pangulo sang mga demonyo amo ang naghatag sa iya sing gahom sa pagtabog sa ila.” Gani gintawag ni Jesus ang mga tawo sa pagpalapit sa iya kag naghambal sia sa ila sing pila ka mga palaanggiran, “Ano bala ang pagtabog ni Satanas kay Satanas? Kon ang isa ka pungsod magbinahinbahinay kag mag-ilinaway, ina nga pungsod magabuloblag. Kon ang isa ka panimalay magbinahinbahinay kag mag-ilinaway, ina nga panimalay magabuloblag. Gani, kon ang ginharian ni Satanas mag-ilinaway, magbinahinbahinay, ina nga ginharian indi magdugay, kundi magabuloblag, kag amo ini ang iya katapusan. “Wala sing bisan sin-o nga makasulod sa balay sang isa ka tawo nga makusog sa pagkuha sang iya pagkabutang, luas kon iya anay gapuson ang tawo nga makusog. Kon mahimo na niya ini sarang na sia makapanguha sa amo nga balay. “Dumdoma ninyo ini! Ang mga tawo sarang mapatawad sang tanan nila nga mga sala kag sang tanan nga mga malain nga ila ginhambal, pero ang tawo nga nagahambal sing malain batok sa Espiritu Santo, indi gid mapatawad, kay sia nakahimo sing sala nga wala sing katapusan.” (Ginhambal ini ni Jesus, kay may iban nga nagsiling, “May malaut nga espiritu sa iya.”)

Enero 26 | Enero 28

Halin sa Kadudolman kag Kamatayon pakadto sa Kasanag kag Kabuhi

Liturhiya sang Pulong

(Domingo, Enero 26, 2020)

San Timoteo kag San Tito, mga Obispo

1. Ang Pagbasa gikan sa Libro ni:

Isaias nga Propeta 8:23-9:3

   Ang duta sang tribo ni Zabulon kag ni Neftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagapuyo ang mga dumoluong.

     Ang mga tawo nga nagalakat

     sa kadudolman nakakita

     sing daku nga kapawa! 

     Nagapuyo sila sa duta sang mga landong, 

     pero karon ang kapawa nagasilak sa ila.

     O Ginoo, ginhatagan mo sila

     sing daku nga kalipay;

     ginhimo mo nga magmalipayon sila.

     Magahugyaw sila sa imo ginhimo, 

     subong sang paghinugyaw sang mga tawo nga nagaani, 

     ukon magpartida sila 

     sang inagaw nga mga manggad.

     Kay ginbali mo ang gota

     nga nagapabug-at sa ila

     kag ang baston

     nga naghanot sang ila mga abaga.

     Ikaw, O Ginoo, ang naglutos sang pungsod

     nga nagpigos kag nagpamintaha 

     sang imo mga tawo 

     subong sang imo paglutos 

     sadto anay sang mga hangaway sang Midian.

Salmo sa Pagsabat:

Mga Salmo 27:1, 4, 13-14

(S) Ang Ginoo amo ang akon kapawa kag kaluwasan.

Ang Ginoo amo ang akon kapawa kag kaluwasan: wala ako sing sin-o nga kahadlukan; ang Ginoo nagaapin sa akon sa tanan nga katalagman; wala ako sing kahadlukan. (S) 

Isa lamang ka butang ang akon ginapangayo sa Ginoo, isa lamang ka butang ang akon naluyagan: sa pagpuyo sa balay sang Ginoo sa bug-os ko nga kabuhi, sa pagpamalandong sang iya kaayo didto, kag sa pagpangayo sang iya pagtuytoy. (S) 

Huo, sa sini nga kinabuhi makakita pa ako sang kaayo sang Ginoo sa iya mga tawo. Magsalig sa Ginoo! Magtuo kag indi magdula sing paglaom. Magsalig sa Ginoo! (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga- Corinto 1:10-13, 17

   Ginapangabay ko sa inyo, mga kautoran, sa ngalan sang aton Ginoong Jesu-Cristo, nga maghilisugot kamo tanan sa inyo ginahambal, agod nga waay sing pagbinahinbahin sa inyo, kundi nga magmangin-isa gid kamo sa painuino kag tinutoyo. Mga kautoran, may mga tawo halin sa panimalay ni Cloe, nga nagsugid sa akon sing maathag nga may pagsinuay sa tunga ninyo. Amo ini ang buot ko silingon: nga nanuhaytohay ang ginasiling sang kada isa sa inyo. Ang isa nagasiling, “Ako sa kay Pablo,” ang isa nagasiling, “Ako sa kay Apolos,” ang isa iya nagasiling, “Ako sa kay Pedro,” kag ang isa pa gid nagasiling, “Ako sa kay Cristo.” Nabahinbahin bala si Cristo? Si Pablo bala ang ginlansang sa krus tungod sa inyo? Ginbautisohan bala kamo subong nga mga sumolunod ni Pablo? 

   Si Cristo wala magpadala sa akon sa pagbautiso. Ginpadala niya ako sa pagbantala sang Maayong Balita, kag sa pagsugid sini indi paagi sa tawuhanon nga abilidad sa paghambal, kay basi ina magakuha sang gahom sang kamatayon ni Cristo sa krus.

Aleluya:

Mateo 4:23

   Si Jesus nagwali sang Maayong Balita kag nagpang-ayo sang mga balatian sang mga tawo. 

Ang Pagbasa sang Santos nga Ebanghelyo suno kay:

San Mateo 4:12-23

   Sang mabatian ni Jesus nga ginbilanggo si Juan, nagpa-Galilea sia. Si Jesus naghalin sa Nazaret kag nagkadto sa pagpuyo sa Capernaum, ang banwa sa higad sang Linaw sang Galilea nga sakop sang Zabulon kag Neftali. Nahanabo ini agod matuman ang ginsiling ni Isaias nga propeta:

     “O duta sang Zabulon, 

     O duta sang Neftali, 

     Sa higad sang baybayon, 

     Sa tabok sang Jordan, 

     Galilea sang mga Gentil!

     Ang mga tawo nga yara sa kadudolman 

     Makakita sang daku nga kapawa! 

     Sa mga nagapuyo 

      Sa madulom nga duta sang kamatayon 

      Ang kapawa magasilak!”

   Sugod sadto nga panahon si Jesus nagbantala sang iya mensahi, “Magbiya kamo sang inyo mga sala kay ang Ginharian sang langit malapit na!”

   Sang nagalakat si Jesus sa higad sang Linaw sang Galilea, may nakita sia nga duha ka mag-utod nga mangingisda. Ini sila amo sanday Simon nga ginatawag Pedro kag si Andres nga iya utod, nga nagaladlad sang ila sahid sa pagpangisda. Si Jesus nagsiling sa ila, “Upod kamo sa akon kay tudloan ko kamo sa pagpanahid sang mga tawo sa Dios.” Sa gilayon ginbayaan nila ang ila sahid kag nag-upod sa iya.

   Naglakat pa gid si Jesus sa unhan kag nakita naman niya ang duha ka mag-utod nga si Santiago kag si Juan, mga anak ni Zebedeo. Didto sila sa ila sakayan kaupod sang ila amay nga si Zebedeo nga nagapamuna sang ila sahid. Gintawag sila ni Jesus, kag sa gilayon ginbayaan nila ang ila sakayan kag ang ila amay kag nag-upod sila kay Jesus.

   Si Jesus naglibot sa bug-os nga Galilea; nagpanudlo sa mga sinagoga, nagwali sang Maayong Balita sang Ginharian, kag nagpang-ayo sang tanan nga sahi sang mga masakit kag balatian sang mga tawo. 

Enero 25 | Enero 27

"Lakat Kamo sa Bug-os nga Kalibutan kag Ibantala ang Maayong Balita"

Liturhiya sang Pulong

(Sabado, Enero 25, 2020)

Sa Pagkonbertir kay San Pablo, Apostol

Ang Pagbasa gikan sa mga:

Binuhatan sang mga Apostoles 22:3-16

   “Isa ako ka Judio nga natawo sa Tarso sang Cilicia, pero diri ako nagdaku sa Jerusalem kag nagtuon ako sa idalom sang pagtudlo ni Gamaliel. Natun-an ko sing maid-id ang Kasugoan sang aton mga katigulangan, kag kaangay sa inyo karon nagmaukod ako sa mga bulohaton sang Dios. Ginhingabot ko kag ginpamatay ang nagasunod sa sini nga Dalan. Ginpangdakop ko ang mga lalaki kag mga babayi kag ginpabilanggo sila. Sarang makapamatuod ang Pinakamataas nga Pari kag ang tanan nga katapo sang Konsilyo nga nagahambal ako sing matuod. Ginhatagan nila ako sing mga sulat nga akon gindala sa mga utod nga Judio sa Damasco agod nga makapangdakop ako sini nga mga tawo kag madala ko sila pabalik sa Jerusalem nga nagapos sang kadena agod silutan.” 

   “Nagahingudto gid ang adlaw sang nagapanglakaton ako kag nagahilapit na sa Damasco, kag sa hinali may masilaw nga silak halin sa langit nga naglikop sa akon. Natumba ako sa duta kag may nabatian ako nga tingog nga nagasiling sa akon, ‘Saulo, Saulo! Ngaa ginahingabot mo ako?’ Nagpamangkot ako, ‘Sin-o ka bala, Ginoo?’ Nagsiling sia sa akon, ‘Ako amo si Jesus nga taga-Nazaret, nga imo ginahingabot.’ Nakita sang akon mga kaupdanan ang silak, pero wala sila makabati sang tingog nga nagahambal sa akon. Nagpamangkot ako, ‘Ano ang himuon ko, Ginoo?’ kag ang Ginoo nagsabat sa akon, ‘Bangon ka kag magkadto sa Damasco, kag pagasugiran ka didto sang tanan nga ginpat-od sang Dios nga ipahimo sa imo.’ Nabulag ako tungod sang kasilaw, gani gintuytoyan ako sang akon mga kaupdanan pakadto sa Damasco. 

   “May isa didto ka tawo nga ginahingalanan kay Ananias. Isa sia ka tawo nga matinumanon sa aton Kasugoan. Ini sia ginatahod gid sang tanan nga mga Judio nga nagapuyo sa Damasco. Nagkadto sia sa akon kag nagtindog sa luyo ko kag nagsiling sia, ‘Utod Saulo, makakita ka na liwat!’ Kag sadto gid nga tion nakakita ako kag gintulok ko sia. Nagsiling sia, ‘Ang Dios sang aton mga katigulangan nagpili sa imo agod mahibaluan mo ang iya kabubot-on, kag makita mo ang iya matarong nga Alagad, kag makabati ka sang iya kaugalingon nga tingog. Kay manginsaksi ka niya sa pagsugid sa tanan nga mga tawo sang imo nakita kag nabatian. Kag karon, ano pa ang ginahulat mo? Tindog ka kag magpabautiso, kag hugasi ang imo mga sala paagi sa pagpanawag sa iya ngalan.’ ” 

Salmo sa Pagsabat:

Mga Salmo 117:1, 2

(S) Lakat kamo sa bug-os nga kalibutan kag ibantala ang Maayong Balita.

Dayawa ninyo ang Ginoo, tanan nga mga kapungsoran! Dayawa ninyo sia, tanan nga mga katawohan! (S) 

Ang iya mapinadayunon nga gugma para sa aton malig-on, kag ang lya katutom wala sing katapusan. Dayawa ang Ginoo! (S) 

Aleluya:

Juan 15:16

   Ako ang nagpili sa inyo gikan sa kalibutan agod nga maglakat sa pagpamunga sing madamo, ang sahi sang bunga nga nagapadayon. 

Ang Pagbasa sang Santos nga Ebanghelyo suno kay:

San Marcos 16:15-18

   Nagsiling sia sa ila, “Lakat kamo sa bug-os nga kalibutan kag ibantala ang Maayong Balita sa tanan nga mga tawo. Ang bisan sin-o nga magtuo kag mabautisohan, maluwas; ang indi magtuo, kondenahon. Ang mga tumoluo pagahatagan sining masunod nga mga gahom: magatabog sila sang mga yawa sa akon ngalan, magahambal sila sang iban nga mga hambal, kag kon mag-uyat sila sang mga man-og ukon makainom sang bisan ano nga hilo, indi sila mahalitan. Magatungtong sila sang ila mga kamot sa mga masakiton, kag ini sila magaayo.” 

Enero 24 | Enero 26

"Nagpili si Jesus sang Dose nga Mag-upod sa Iya"

Liturhiya sang Pulong

(Biyernes, Enero 24, 2020)

San Francisco de Sales, Obispo kag Doktor sang Simbahan

Ang Pagbasa gikan sa Nahauna nga Libro ni:

Samuel nga Propeta 24:3-21

   Si Saul nagdala sing 3,000 ka pinili nga mga hangaway gikan sa Israel kag naglakat sa pagpangita kay David kag sa iya mga tinawo sa nasidlangan sang mga Bato sang mga Kanding nga Talunon. Nag-abot sia sa kuweba malapit sa mga toril sang mga karnero sa higad sang dalan, kag nagsulod sia sa pagpahuway. Si David kag ang iya mga tinawo yadto didto sa sulod gid nga bahin sang kuweba nga nagapanago. Nagsiling sila sa iya, "Amo na ini ang imo kahigayunan! Ang Ginoo nagsiling sa imo nga iya itugyan sa imo kamot ang imo kaaway kag mahimo mo sa iya ang imo luyag himuon."Si David nagkamang pakadto kay Saul kag naggutrab sang bahin sang bayu ni Saul nga wala niya mabatyagi. Pero ang konsensya ni David nagtublag sa iya, kag nagsiling sia sa iya mga tinawo, "Kabay ang GINOO indi magtugot sa akon sa paghimo sang malain sa akon agalon, nga ginpili sang Ginoo subong nga hari! Indi ako maghimo sing malain sa iya, tungod kay sia ang hari nga ginpili sang Ginoo!" Gani ginpunggan ni David ang iya mgatinawo nga indi sila magsalakay kay Saul. 

   Nagtindog si Saul, naggwa sa kuweba, kag naglakat. Dayon si David nagsunod sa iya pa gwa kag nagtawag sa iya, "Mahal nga hari!" Nagliso si Saul kag si David nagsaludo sa pagtahod kag nagsiling, "Ngaa nagapati ka sa mga tawo nga nagasiling nga nagatinguha ako sa pagpatay sa imo? Nakita mo gid nga karon nga adlaw ang Ginoo nagtugyan sa imo sa akon didto sa sulod sang kuweba. Ang iban nagsiling sa akon nga patyon ikaw pero naluoy ako sa imo, kag nagsiling nga indi ako mag-ano sa imo, tungod kay ikaw ang ginpili sang GINOO nga hari. Tan-awa, amay ko, tan-awa ang bahin sang imo bayu nga ginauyatan ko! Gingutrab ko ini, pero wala ko ikaw pagpatya. Ini magapamatuod sa imo nga wala ako sing handom sa pagsupak kag pagpatay sa imo. Wala ako sing malain nga nahimo sa imo, pero nagatinguha ka sa pagpatay sa akon. Kabay ang GINOO maghukom sa aton kon sin-o ang may sayop! Kabay sia magsilot sa imo tungod sang imo mga ginhimo sa akon, kay indi ako maghimo sing bisan ano nga malain sa imo. Nahibaluan nimo ang hulobaton, 'Ang malaut ginahimo sang malaut lang nga mga tawo.' Pero indi ako mag-ano sa imo. Tan-awa kon ano ang ginahingabot sang hari sang Israel nga patyon! Tan-awa kon ano ang iya ginalagas! Isa ka patay nga ido, isa ka bitik! Ang Ginoo magahukom, kag magpat-od kon sin-o sa aton nga duha angmay sayop. Kabay nga magtalupangod sia sining butang, mag-apin sa akon, kag magluwas sa akon gikan sa imo.”

   Sang pagkatapos ni David hambal, nagsiling si Saul, "Ikaw gid bala ina, David, anak ko?" Kag naghibi sia. Dayon nagsiling sia kay David, "Husto ikaw, kag sala ako. Nanginmaayo ikaw sa akon, pero ako naghimo sing malain sa imo! Ginpakita mo karon nga adlaw kon daw ano ang imo kaayo sa akon, tungod kay wala mo ako pagpatya bisan ang Ginoo nagtugyan sa akon sa imo kamot. Talagsa lang ang isa katawo nga indi magpatay sang iya kaaway nga nadakpan na niya. Kabay nga balusan ka sang Dios tungod sang imo ginhimo nga maayo sa akon karon nga adlaw. Karon nahibaluan ko sing pat-od nga ikaw manginhari sa Israel, kag ang ginharian magapadayon sa imo paggahom. Pero magsaad ka sa akon sa ngalan sang Ginoo nga indi mo pagpamatyonang akon mga kaliwat, agod ang akon ngalan, kag ang ngalan sang akon panimalay indi gid madula."

Salmo sa Pagsabat:

Mga Salmo 57:2, 3-4, 6, 11

(S) Kaluoyi ako, O Dios, kaluoyi man ako.

Kaluoyi ako, O Dios, kaluoyi man ako, kay nagapalapit ako sa imo agod indi ako maano. Sa landong sang imo mga pakpak magapanago ako, tubtob nga wala na ang tanan nga katalagman. (S) 

Nagapanawag ako sa Dios, ang Labing Mataas, sa Dios nga nagahatag sang tanan ko nga kinahanglanon. Gikan sa langit pagasabton niya ako kag Iuwason, pagalutoson niya ang mga nagasalakay sa akon. Ang Dios magapakita sa akon sang iya mapinadayunon nga gugma kag pagkatutom. (S) 

Ipakita sa langit ang imo pagkagamhanan, O Dios, kag ang imo himaya sa bug-os nga duta! Ang imo mapinadayunon nga gugma nagalambot sa kalangitan, ang imo katutom sa kahawaan. (S)

Aleluya:

2 Corinto 5:19

   Ang Dios nagahimo sang tanan nga mga tawo nga iya mga abyan paagi kay Cristo; kag naghatag sia sa amon sang mensahi kon paano niya sila mahimo nga mga abyan. 

Ang Pagbasa sang Santos nga Ebanghelyo suno kay:

San Marcos 3:13-19

   Dayon si Jesus nagtaklad sa isa kabakulod kag gintawag niya ang mga tawo nga iya naluyagan. Nagpalapit sila sa iya, kag nagpili sia sang dose nga gintawag niya nga mga apostoles. Si Jesus nagsiling sa ila, “Ginpili ko kamo nga mag-upod sa akon. Ipadala ko kamo sa pagwali, kag magaangkon kamo sang gahom sa pagtabog sang mga yawa.” Ang dose nga ginpili niya amo ang masunod: si Simon (nga ginhingalanan ni Jesus kay Pedro); si Santiago kag si Juan, mga anak ni Zebedeo (nga ginhingalanan ni Jesus nga Boanerges, nga kon sayuron “Mga Anak sang Daguob”); si Andres, si Felipe, si Bartolome, si Mateo, si Tomas, si Santiago nga anak ni Alfeo, si Tadeo, si Simon nga patriota, kag si Judas Iscariote nga nangintraidor. 

Enero 23 | Enero 25

Ang Tanan Nagpanagil-ot sa kay Jesus agod Makatandog sa Iya

Liturhiya sang Pulong

(Huwebes, Enero 23, 2020)

Ang Pagbasa gikan sa Nahauna nga Libro ni:

Samuel nga Propeta 18:6-9; 19:1-7

    Sang pagbalik ni David upod sa mga hangaway sa tapos niya mapatay si Goliat, naggwa ang mga babayi sa tagsa ka banwa sang Israel sa pagsugata kay Haring Saul. Nagakinanta sila sing masinadyahon, nagasinaot, kag nagatinukar sing mga bumbo kag mga lira. Amo ini ang ila ginkanta:

     "Si Saul nagpatay sing mga linibo, 

     pero si David nagpatay sing mga 

     tig-napulo ka libo."

   Wala ini maluyagi ni Saul kag naakig gid sia. Nagsiling sia,"Kay David ginpahanungod nila ang linaksa, pero sa akon linibo lamang. Ang kulang na lamang sa iya amo ang pagkahari!" Kag halin sadto nagpanilag sia kay David.

   Ginsugiran ni Saul si Jonatan ngaiya anak nga lalaki kag ang tanan niya nga mga opisyales nga nagaplano sia sa pagpatay kay David. Pero si David palangga gid ni Jonatan, gani ginsugiran niya si David,"Ang akon amay nagatinguha sa pagpatay sa imo. Gani buas sa aga mag-andam ka, magpanago ka sa duog nga indi mahibal-an kag magpabilin ka didto. Magalakat ako kag magatindog sa tupad sang akon amay sa uma sa diin ikaw nagapanago kag hambalon ko sia nahanungod sa imo. Kon ano ang mahibal-an ko, sugiran ko ikaw."

   Karon gindayaw ni Jonatan si David sa kay Saul kag nagsiling,"Tatay, indi ka maghimo sing malain sa imo alagad nga si David. Wala sia sing nahimo nga sayop sa imo, sa baylo ang tanan nga iya ginhimo nakahatag sing daku nga kaayuhan sa imo. Gintaya niya ang iya kabuhi sang pagpatay niya kay Goliat, kag ang Ginoo naghatag sing daku nga kadalag-an sa Israel. Nakita mo ini kag nagkasadya ikaw. Ngaa, karon himuan mo sing malain ang isa ka tawo nga wala sing sala kag patyon si David nga wala gid sing kabangdanan?" 

   Nagpamati si Saul sa ginsiling ni Jonatan kag nagsumpa sa ngalan sang GINOO nga indi niya pag-ipapatay si David. Gani gintawag ni Jonatan si David kag ginsugiran sia sang tanan, dayon gindala niya sia kay Saul, kag si David nag-alagad sa hari subong sang pag-alagad niya sang una.

Salmo sa Pagsabat:

Mga Salmo 56:2-3, 9-10, 10-12, 13-14

(S) Nagasalig ako sa Ginoo, kag indi na ako magkahadlok.

Kaluoyi ako, O Dios, kay ginagubat ako; wala untat ang paghingabot sa akon sang akon mga kaaway! Sa bug-os nga adlaw ginagubat ako sang akon mga kasumpong. Madamo ang mga nagaaway sa akon. (S) 

Nakahibalo ikaw kon daw ano ang akon pagkatublag, gintandaan mo ang akon mga paghibi. Sa adlaw nga magpanawag ako sa imo, magaisol ang akon mga kaaway.  (S) 

Nahibaluan ko ini, kay ang Dios nagadampig sa akon! Nagasalig ako sa Dios kag nagadayaw sang iya saad, pagadayawon ko ang saad sang Ginoo. (S)

Nagasalig ako sa iya, kag indi na ako magkahadlok. Ano ang mahimo sa akon sang ahaw nga tawo? Ihalad ko sa imo, O Dios, ang akon ginsaad, ihatag ko sa imo ang akon halad sa pagpasalamat. (S)

Aleluya:

2 Timoteo 1:10

   Gindula ni Kristo ang gahom sang kamatayon, kag paagi sa Maayong Balita Iya ginpahayag ang kabuhi nga wala sing katapusan.

Ang Pagbasa sang Santos nga Ebanghelyo suno kay:

San Marcos 3:7-12

   Si Jesus kag ang iya mga gintuton-an nagkadto sa Linaw sang Galilea, kag ginsunod sia sang madamo nga mga tawo. Ini sila halin sa Galilea, sa Judea, sa Jerusalem, sa kadutaan sang Idumea, sa kadutaan sa tabok sang Jordan kag sa palibot sang mga siyudad sang Tiro kag Sidon. Ini nga mga tawo nagdugok kay Jesus, kay nakabati sila sang mga butang nga iya ginapanghimo. Tungod sang tama kadamo nga mga tawo, si Jesus nagsugo sa iya mga gintuton-an sa pag-aman sang sakayan para sa iya, agod indi sia maipit sang mga tawo.

. . . tama kadamo nga mga tawo. (3:9)

Madamo nga mga tawo ang iya gin-ayo, kag tungod sini ang tanan nga may balatian nagpanagil-ot sa pagpalapit kay Jesus, agod makatandog sa iya. Kag kon makita sia sang mga tawo nga may malaut nga mga espiritu, nagahapa sila sa atubangan niya kag nagasinggit, “Ikaw ang Anak sang Dios!” Ginpaandaman gid ni Jesus ang malaut nga mga espiritu nga indi magpanugid kon sin-o sia. 

Enero 22 | Enero 24

"Ano ang Ginatugot sang aton Kasugoan... Ang Magluwas bala sang Kabuhi sang Isa ka Tawo ukon ang Magpatay?"

Liturhiya sang Pulong

(Miyerkules, Enero 22, 2020)

San Vicente, Diakono kag Martir

Ang Pagbasa gikan sa Nahauna nga Libro ni:

Samuel nga Propeta 17:32-33, 37, 40-51

   Si David nagsiling kay Saul, "Mahal nga hari, wala sing isa nga dapat magkahadlok sini nga Filistinhon! Ako ang magapakig-away sa iya.”

   Nagsabat si Saul, "Indi ka makasarang sa pag-away sa iya! Bata pa ikaw, kag sia dugay na nanginsoldado!”

   Ang Ginoo nagluwas sa akon sa mga leon kag mga oso kag magaluwas man sia sa akon sa sini nga Filistinhon.”

   Ginkuha niya ang iya sungkod, kag dayon nagpulot sia sing lima ka matipulon nga bato sa sapa kag ginsulod ini sa iya puyo. Naglakat sia nga handa na sa iya kamot ang iya labyog sa pagpakig-away kay Goliat.

   Ang Filistinhon nag-abanse pakadto kay David, nga nagauna sa iya ang iya manugdala sing taming. Nagpadayon sia sa pag-abanse, kag sang mamulalongan niya si David, ginhikayan niya sia, kay bata pa sia kag guwapo lang tulokon. Nagsiling sia kay David, "Para sa ano bala inang imo sungkod? Ano bala ang dumdom mo sa akon, ido?"Kag ginpakamalaut niya si David paagi sa iya dios. Ginsingganan niya si David, ''Sigi palapit, kay ihatag ko ang imo lawas nga kalan-on sang mga pispis kag sang mga sapat."

   Nagsabat si David,"Nagapalapit ka sapagpakig-away sa akon nga may espada, bangkaw kag sumbiling, pero ako nagapalapit sa pagpakig-away sa imo sa ngalan sang Ginoo nga Makagagahom, ang dios sang mga hangaway nga Israelinhon, nga imo ginahangkat. Sa sini gid nga adlaw ang Ginoo magatugyan sa imo sa akon kamot. Lutoson ko ikaw, utdon ko ang imo ulo, kag ihatag ko ang mga lawas sang mga soldado nga mga Filistinhon nga manginkalan-on sa mga pispis kag mga sapat. Ang bug-os nga pungsod magakilala nga ang Israel may Dios, kag ang tanan diri makahibalo nga wala sia nagakinahanglan sang mga espada ukon mga bangkaw sa pagluwas sang iya mga tawo. Madinalag-on sia sa inaway kag itugyan niya kamo tanan sa idalom sang amon gahom."

   Sa liwat nagsugod si Goliat sa pagpalapit kay David, kag si David maabtik nga dumalagan padulong sa Filistinhon sa pag-away sa iya. Nagkuot si David sa iya puyo kag nagkuha sing isa ka bilog nga bato, kag iya ginlabyog ini kay Goliat. Nag-igo ini sa iya agtang kag nagdulot. Si Goliat natumba nga hapaon sa duta. Gani, si David nga wala sing espada kundi labyog lamang kag isa ka bilog nga bato, naglutos kag nagpatay kay Goliat! Nagdalagan si David pakadto sa iya, nagtungtong sa iya, gingabot niya ang espada ni Goliat, ginpunggol ang iya ulo sa pagpatay sa iya. 

   Sang makita sang mga Filistinhon nga ang ila ginasaligan patay na, nagpalagyo sila.

Salmo sa Pagsabat:

Mga Salmo 114:1, 2, 9-10

(S) Dayawon ang Ginoo nga akon mangangapin.

Dayawon ang Ginoo nga akon mangangapin; ginahanas niya ako para sa pagpakig-away, kag ginahanda niya ako para sa inaway. (S) 

Sia ang akon mangangapin kag mananabang, akon palalipdan kag manlulowas, sa iya nagasalig ako nga indi ako maano. Ginatugyan niya ang mga pungsod sa akon paggahom. (S) 

Magaamba ako sa imo sing isa ka bag-o nga ambahanon, O Dios, magatukar ako sang arpa kag magakanta sa imo. Ginapadaog mo ang mga hari, kag ginatabangan mo ang imo alagad nga si David. (S)

Aleluya:

Mateo 4:23

   Si Jesus nagwali sang Maayong Balita sang Ginharian, kag nagpang-ayo sang tanan nga sahi sang mga masakit kag balatian sang mga tawo.

Ang Pagbasa sang Santos nga Ebanghelyo suno kay:

San Marcos 3:1-6

   Dayon nagbalik si Jesus sa sinagoga sa diin may tawo nga may naitus nga kamot. May mga tawo didto nga nagabantay kay Jesus kon ayuhon niya ang tawo sa Adlaw nga Inugpahuway, agod may isumbong sila batok sa iya. Si Jesus nagsiling sa tawo nga naitus ang kamot, “Magpalapit ka diri sa atubangan.” Dayon nagpamangkot sia sa mga tawo: “Ano ang ginatugot sang aton Kasugoan nga himuon ta sa Adlaw nga Inugpahuway? Ang magbulig bala ukon ang maghalit? Ang magluwas bala sang kabuhi sang isa ka tawo ukon ang magpatay?” 

   Pero naghipos sila. Gintulok sila ni Jesus nga may kaakig, pero nagkasubo sia tungod sang katig-a sang ila tagipusoon. Dayon nagsiling sia sa tawo nga naitus ang kamot, “Untaya ang imo kamot.” Gin-untay niya kag nag-ayo ini. Gani ang mga Fariseo naggwa sa sinagoga kag naghimbon kaupod sa mga sumolunod ni Herodes kon paano mapatay nila si Jesus. 

Enero 21 | Enero 23

"Ang Anak sang Tawo amo ang Ginoo sang Adlaw nga Inugpahuway"

Liturhiya sang Pulong

(Martes, Enero 21, 2020) 

Santa Ines, Birhen kag Martir

Ang Pagbasa gikan sa Nahauna nga Libro ni:

Samuel nga Propeta 16:1-13

   Ang Ginoo nagsiling kay Samuel, “Daw ano pa kalawig ang imo pagpangasubo tungod kay Saul? Ginsikway ko sia subong hari sang Israel. Kuha ka sing lana sang olibo kag dalha ini, kay pakadtuon ko ikaw sa Betlehem sa isa ka tawo nga ginahingalanan kay Jese. Ginpili ko ang isa sang iya mga anak nga lalaki nga manginhari."

   Nagpamangkot si Samuel,"Paano ang paghimo ko sina? Kon mabatian ini ni Saul, pagapatyon niya ako!" 

   Ang Ginoo nagsabat, "Dala ka sing tinday nga baka kag magsiling, 'Nagkari ako sa pagdulot sang halad sa Ginoo.' Agdaha si Jese sa imo paghalad, kag tudloan ko ikaw sang imo pagahimuon. Haplason mo subong hari ang tawo nga isiling ko sa imo.”

   Gintuman ni Samuel ang ginsiling sa iya sang Ginoo kag nagkadto sia sa Betlehem, sa diin ginsugata sia sang mga pangulo sang siyudad nga nagakurog kag nagpamangkot, "Nagkari ka bala sa paghidait?"

   Nagsabat sia, “Huo, nagkari ako sa pagdulot sing halad sa Ginoo. Magpakabalaan kamo sang inyo kaugalingon kag mag-upod sa akon." Ginpakabalaan man niya si Jese kag ang iya mga anak nga lalaki, kag gin-agda sila sa paghalad.

   Sang mag-abot sila, nakita ni Samuel ang anak nga lalaki ni Jese nga si Eliab, kag nagsiling sia sa iya kaugalingon, "Ini nga tawo nga nagatindog sa atubangan sang Ginoo amo gid ang ginpili niya." Pero ang Ginoo nagsiling sa iya, "Indi ang iya kataas ukon ka guwapo ang imo tan-awon. Ginsikway ko sia, kay ang akon pagtan-aw indi pareho sang pagtan-aw sang tawo. Ang tawo nagatulok sa gwa nga dagway pero ako nagatulok sa tagipusoon.”

   Dayon gintawag ni Jese ang iya anak nga si Abinadab kag gindala kay Samuel. Pero si Samuel nagsiling,"Ang Ginoo wala magpili sa iya." Dayon gindala ni Jese si Sama. Si Samuel nagsiling, "Ang Ginoo wala man magpili sa iya.” Sa sini nga paagi gindala ni Jese ang iya pito ka mga anak nga lalaki sa kay Samuel, kag si Samuel nagsiling sa iya, “Ang Ginoo wala sing may ginpili sa ila." Kag ginpamangkot sia ni Samuel, "May iban pa bala ikaw nga mga anak nga lalaki?" 

   Nagsabat si Jese, "May ara pa, angkamanghuran, pero wala sia diri kay nagabantay sia sang mga karnero.”

   Nagsabat si Samuel, "Pakadtoa sia diri, kay indi kita magdulot sang halad tubtob indi sia mag-abot." Gani ginpatawag sia ni Jese. Guwapo sia, maayo sing lawas kag manayanaya sing nawong. Ang Ginoo nagsiling kay Samuel, "Amo ina sia, haplasa sia!” Ginkuha ni Samuel ang lana sang olibo kag ginhaplas niya si David sa atubangan sang iya mga utod nga lalaki. Ang espiritu sang GINOO naggahom kay David kag nagpabilin sa iya sugod sadto nga adlaw. Dayon nagbalik si Samuel sa Rama.

Salmo sa Pagsabat:

Mga Salmo 89:20, 21-22, 27-28

(S) Ginhimo ko nga hari si David nga akon alagad.

Sa isa ka palanan-awon sang una nagsiling ikaw sa imo matutom nga mga alagad, “Ginkoronahan ko ang isa ka bantog nga soldado; ginhatag ko ang trono sa isa nga pinili sa mga tawo. (S) 

Ginhimo ko nga hari si David nga akon alagadpaagi sa paghaplas sa iya sing balaan nga lana. Ang akon kusog manginyara sa iya sa gihapon, ang akon gahom magapabakod sa iya.  (S)

Magasiling sia sa akon, ‘Ikaw ang akon amay kag akon Dios;ikawang akon mangangapin kag manlulowas.’ Pagahimuon ko sia nga akon panganay nga anak nga lalaki, ang labing gamhanan sa tanan nga mga hari. (S)

Aleluya:

Efeso 1:17-18

    Nagapangamuyo ako sa Dios sang aton Ginoong Jesukristo, ang mahimayaon nga Amay, nga Iya ihatag sa inyo ang Espiritu, nga amo ang magahatag sa inyo sing kaalam kag magapahayag sa inyo sang Dios, agod nga makilala ninyo Sia.

Ang Pagbasa sang Santos nga Ebanghelyo suno kay:

San Marcos 2:23-28

   Sang isa ka Adlaw nga Inugpahuway, si Jesus nag-agi sa tunga sang kaumhan sang trigo. Sang nagalakat ang iya mga gintuton-an upod sa iya, nagsugod sila sa pagpangutol sang mga uhay. Gani ang mga Fariseo nagsiling kay Jesus, “Hoy, kontra sa aton Kasugoan ang ginahimo sang imo mga gintuton-an sa Adlaw nga Inugpahuway!” Si Jesus nagsabat sa ila, “Wala gid bala ninyo mabasahi ang ginhimo ni David sang nagkinahanglan sia sing pagkaon? Sia kag ang iya mga tinawo gingutom, gani nagsulod sia sa balay sang Dios kag nagkaon sang tinapay nga nahalad sa Dios. Natabo ini sang si Abiatar ang Pinakamataas nga Pari. Suno sa aton Kasugoan ang mga pari lang amo ang makakaon sini nga tinapay, pero si David nagkaon sini, kag ginhatagan pa niya ang iya mga tinawo.” Kag si Jesus nagsiling pa gid, “Ang Adlaw nga Inugpahuway ginhimo para sa kaayuhan sang tawo kag ang tawo wala paghimoa para sa Adlaw nga Inugpahuway. Gani, ang Anak sang Tawo amo ang Ginoo bisan pa sang Adlaw nga Inugpahuway.”

Enero 20 | Enero 22

"Nagapuasa ukon Nagapiyesta?"

Liturhiya sang Pulong

(Lunes, Enero 20, 2020)

San Sebastian, Martir

1. Ang Pagbasa gikan sa Nahauna nga Libro ni:

Samuel nga Propeta 15:16-23

   Nagsiling si Samuel, "Maghipos ka, kay sugiran ko ikaw sang ginsiling sang Ginoo sa akon kagab-i.”
   Nagsiling si Saul, "Sugiri ako."

   Nagsabat si Samuel, "Bisan ginkabig mo ang imo kaugalingon nga indi importante, pero ikaw ang pangulo sang mga tribo sang Israel. Ang Ginoo naghaplas sa imo nga manginhari sang Israel, kag nagsugo sa imo nga laglagon yadtong mga malaut nga mga tawo sang Amalek. Ginsingganan niya ikaw sa pagpakig-away tubtob nga mapamatay nimo sila tanan. Karon, ngaa bala nga wala ka magtuman sa iya? Ngaa bala nga nagdinaguso kamo sa pag-agaw sang ila mga pagkabutang, kag naghimo sang kontra sa Ginoo?”

   Nagsabat si Saul, "Nagtuman ako sa Ginoo. Naglakat ako suno sa iya ginsiling, kag gindala ko diri si Haring Agag, kag ginpamatayang tanan nga mga Amaleknon. Pero ang akon mga tinawo wala magpamatay sang pinakamaayo nga mga karnero kag mga baka nga ila gin-agaw, sa baylo gindala nila ini diri sa Gilgal agod idulot subong halad sa GINOO nga imo Dios."

   Nagsiling si Samuel, "Ano bala ang ginapasulabi sang Ginoo? Ang pagtuman bala ukon ang mga dulot kag mga halad? Labing maayo pa ang pagtuman sa iya sang sa paghalad sa iya sang pinakamaayo nga karnero. Ang pagsupak sa iya pareho kalain sang pagkababaylan, kag ang pagkadi-matinumanon pareho kalaut sang pagsimba sa mga diosdios. Tungod kay ginsikway mo ang mga sugo sang Ginoo, ginsikway ka man niya subong hari."

Salmo sa Pagsabat:

Mga Salmo 50:8-9, 16-17, 21 kag 23

(S) Luwason ko gid ang tanan nga nagatuman sa akon.

Wala ako nagasaway sa imo tungod sang imo mga halad kag sang mga halad nga sinunog nga imo pirme ginahalad sa akon. Wala ako kinahanglan sang toro nga mga baka gikan sa inyo mga pastuhan, ukon mga kanding gikan sa inyo mga kahayupan. (S) 

Pero nagasiling ang Dios sa malaut, “Ngaa bala ginapabutyag mo ang akon mga sugo? Ngaa bala nagahambal ka nahanungod sang akon kasugtanan? Indi ka magpatudlo sa akon, ginasikway mo ang akon mga sugo. (S) 

Ini tanan ginhimo mo, kag naghipos lang ako, gani nagpanghunahona ka nga kaangay ako sa imo. Pero karon sabdungon ko ikaw, kag ipaathag ini nga butang sa imo. Ang mga pagpasalamat amo ang halad nga nagapadungog sa akon, kag luwason ko gid ang tanan nga nagatuman sa akon.” (S) 

Aleluya:

Hebreo 4:12

     Ang pulong sang Dios gamhanan; kag nagausisa sang mga hunahona kag mga tinutuyo sang mga tagipusoon. 

Ang Pagbasa sang Santos nga Ebanghelyo suno kay:

San Marcos 2:18-22

   Isa ka bes ang mga sumolunod ni Juan Bautista kag ang mga Fariseo nagapuasa. May mga tawo nga nagpalapit kay Jesus kag nagpamangkot sa iya, “Ngaa bala nga nagapuasa ang mga gintuton-an ni Juan Bautista kag ang mga gintuton-an sang mga Fariseo, pero ang imo mga gintuton-an wala nagapuasa?” Si Jesus nagsabat, “Nagapaabot bala kamo nga ang mga inagda sa kasal magapuasa samtang yara pa ang nobyo kaupod nila? Indi sila makahimo sina! Pero magaabot ang adlaw nga ang nobyo pagakuhaon sa ila, kag amo na yadto ang ila pagpuasa. “Wala sing bisan sin-o nga nagagamit sing bag-o nga panapton sa pagtukap sa daan nga bayu. Kon himuon niya ini, ang bag-o nga tukap magagisi sang daan nga bayu kag mangindaku pa gid ang tulokapan. Wala man sing bisan sin-o nga nagasulod sing bag-o nga bino sa daan nga sulodlan nga panit. Kon himuon niya ini, ang bino magabusdik sang daan nga panit, kag ang bino kag ang panit nga sulodlan indi na mapuslan. Pero ang bag-o nga bino ginasulod sa bag-o nga sulodlan!”

Enero 19 | Enero 21