"Nangingintuton-an sang Ginharian sang Langit"

Liturhiya sang Pulong

(Huwebes, Agosto 1, 2019)

San Alfonso Maria de Ligorio, Obispo kag Doktor sang Simbahan

Ang Pagbasa gikan sa Libro sang:

Exodo 40:16-21, 34-38

   Ginhimo ni Moises ang tanan suno sa ginsugo sang Ginoo sa iya. Gani sa nahauna nga adlaw sang nahauna nga bulan sang ikaduha nga tuig sa tapos sila makagwa sa Egipto ang Tolda nga Tilipunan ginpatindog. Ginpatindog ni Moises ang Tolda nga Tilipunan. Ginpahamtang niya ang iya mga sadsaran, ginbutang ang iya dingding nga mga tapi, gin-angot ang iya mga baral, kag ginpatindog ang iya mga haligi. Ginhumlad niya ang atop sa ibabaw sang Tolda, kag gintaklap niya ang inugsampaw sa atop suno sa ginsugo sang Ginoo sa iya. Dayon ginkuha niya ang mga malapadlapad nga bato sang kasugtanan kag ginsulod ini sa kaban. Gingulo niya ang mga yayungan sa mga dalagku nga mga sulosingsing sang kaban, kag ginbutang ang takop sa ibabaw sini. Dayon ginbutang niya ang kaban sa sulod sang Tolda nga Tilipunan, kag gintakod niya ang nagalipod nga kurtina. Sa sini nga paagi ginlipnan niya ang kaban nga nasudlan sang malapadlapad nga bato sang kasugtanan, suno sa ginsugo sang Ginoo sa iya. Ang panganod nagtabon sang Tolda nga Tilipunan kag ang himaya sang Ginoo nagpuno sa sini. Si Moises indi makasulod sa Tolda nga Tilipunan kay ang panganod nagpabilin sa ibabaw sini, kag ang himaya sang Ginoo nagpuno sa sini. Kon magsaylo ang mga Israelinhon halin sa isa ka kampamento pakadto sa isa, nagahalin lamang sila kon ang panganod maghayaw sa ibabaw sang Tolda nga Tilipunan. Kon indi maghayaw ang panganod, wala sila nagahalin sa ila kampamento, kundi naghulat sila tubtob sa adlaw nga ang panganod maghayaw. Ang panganod nga nagapakita sang presensya sang Ginoo nagapabilin sa ibabaw sang Tolda nga Tilipunan kon adlaw, kag kon gab-i may kalayo nga nagadabdab, nga makita sang mga tawo sang Israel sa tanan nga tion sang ila pagsaylusaylo halin sa isa ka kampamento pakadto sa isa.

Salmo sa Pagsabat:

Mga Salmo 84:3, 4, 5-6 kag 8, 11

(S) O Ginoo, Dios nga Magagahom, daw ano kamahigugmaon ang imo Templo.

Bisan ang mga maya nagahimo sang ila pugad, kag ang mga salimbabatang may kaugalingon nga puloy-an; ginabutang nila ang ila mga boto malapit sa imo mga altar, GINOO nga Makagagahom, akon hari kag akon Dios. (S)
Bulahan ang mga nagapuyo sa imo Templo, nga nagakanta sa gihapon sing pagdayaw sa imo! (S)
Bulahan sila nga ang ila mga kusog nagagikan sa imo, yadtong nagahandom gid sa pagbuylog sa mga mainampuon pakadto sa bukid sang Sion. Sang nagalatas sila sang mamala nga kapatagan sang Baca nanginduog ini sang mga tuboran; Pamatii ang akon pangamuyo, O GINOONG Dios nga Makagagahom. (S)
Ang GINOO aton mangangapin kag mahimayaon nga hari, nga nagahatag sa aton sing kaayuhan kag kadungganan. Wala niya ginadumili ang bisan ano nga maayo nga butang sa mga nagahimo sing matarong. (S)

Aleluya:

Binuhatan 16:14

Abrihi, O Ginoo ang amon tagipusoon agod mahangpan namon ang mga pulong sang imo anak.

Ang Pagbasa sang Santos nga Ebanghelyo suno kay:

San Mateo 13:47-53

   “Subong man, ang Ginharian sang langit kaangay sang isa ka sahid nga ginladlad sa dagat, kag nagakuha sang sarisari nga mga isda. Sang puno na ang sahid ginbutong ini sang mga mangingisda pa higad kag naglingkod sila sa pagpili sang mga isda. Ang mga maayo ginsulod sa batulang kag ang mga malain ginpilak. Manginsubong man ini sa katapusan sang panahon. Ang mga anghel sang Dios magakari kag magapain sang malaut nga mga tawo sa mga matarong, kag ang mga malaut ila itagbong sa kalayo nga nagadabadaba. Didto magahinibi sila kag magabagrot sang ila mga ngipon.”
   Si Jesus nagpamangkot sa ila, “Nahangpan bala ninyo ini tanan?”
   Nagsabat sila, “Huo.”
   Gani si Jesus nagsiling, “Ini nagakahulogan, nga ang tagsa ka manunodlo sang Kasugoan nga nangingintuton-an sang Ginharian sang langit kaangay sang tag-iya sang balay nga nagakuha sang bag-o kag daan nga mga butang sa iya talaguan.”
   Sa tapos si Jesus makahambal sini nga mga palaanggiran.

Hulyo 31 | Agosto 2

"Ang Kalipay sang Pagkakita sang Manggad nga Ginlubong kag Perlas nga Malahalon"

Liturhiya sang Pulong

(Miyerkules, Hulyo 31, 2019)

San Ignacio de Loyola, Pari

Ang Pagbasa gikan sa Libro sang:

Exodo 34:29-35

   Sang pagdulhog ni Moises sa Bukid sang Sinai nga nagadala sang duha ka malapadlapad nga bato sang kasugtanan, wala sia makahibalo nga ang iya nawong nagasilak bangod kay nagpakighambal sia sa Ginoo. Si Aaron kag ang tanan nga mga tawo nagtulok kay Moises, kag nakita nila nga ang iya nawong nagasilak, kag nahadlok sila magpalapit sa iya. Pero gintawag ni Moises si Aaron kag ang tanan nga mga pangulo sang katilingban kag nagbalik sila sa iya. Dayon si Moises naghambal sa ila. Sa tapos sadto, ang tanan nga mga tawo sang Israel nagpalapit kay Moises, kag iya ginhatag sa ila ang tanan nga mga sugo nga ginhambal sang Ginoo sa iya didto sa Bukid sang Sinai. Sa tapos si Moises makahambal sa ila, gintabunan niya ang iya guya. Kon magsulod si Moises sa Tolda sa atubang sang Ginoo sa pagpakighambal sa iya, ginakuha ni Moises ang tabon sa iya guya tubtob maggwa sia. Kon maggwa na sia, ginasugid niya sa mga Israelinhon ang tanan nga ginsugo sang Ginoo sa iya nga isiling, kag ila makita nga ang iya guya nagasilak. Dayon iya tabunan liwat ang iya guya tubtob sa iya madason nga pagpakighambal sa Ginoo.

Salmo sa Pagsabat:

Mga Salmo 99:5, 6, 7, 9

(S) Ang Ginoo nga aton Dios balaan.

Dayawon ang Ginoo nga aton Dios; magsimba sa atubangan sang iya trono! Balaan sia! (S)

Si Moises kag si Aaron iya mga pari kag si Samuel isa sang mga nagsimba sa iya, nagpanawag sila sa Ginoo, kag sianagsabat sa ila. (S)

Naghambal sia sa ila gikan sa haligi nga panganod, gintuman nila ang mga kasugoan kag mga sugo nga iya ginhatag sa ila. (S)

Dayawon ang Ginoo nga aton Dios kag magsimba sa iya balaan nga bukid! Ang Ginoo nga aton Dios balaan! (S)

Aleluya:

Juan 15:15

Ginatawag ko kamo mga abyan, siling sang Ginoo, kay ginsugid ko sa inyo ang tanan nga akon nabatian gikan sa akon Amay.

Ang Pagbasa sang Santos nga Ebanghelyo suno kay:

San Mateo 13:44-46

   “Ang Ginharian sang langit kaangay sang manggad nga ginlubong sa uma. Nasapwan ini sang isa ka tawo kag iya liwat gintampukan. Sa daku nga kalipay naglakat sia kag ginbaligya niya ang tanan niya nga mga pagkabutang, kag nagbalik sa pagbakal sadto nga uma.”

   “Subong man, ang Ginharian sang langit kaangay sang isa ka negosyante nga nagpangita sang malahalon nga perlas. Sang pagkakita niya sang isa ka perlas nga malahalon, naglakat sia kag ginbaligya niya ang tanan niya nga mga pagkabutang kag ginbakal ang perlas.”

Hulyo 30 | Agosto 1

"Ang mga Matarong Magasilak subong sang Adlaw sa Ginharian sang ila Amay"

Liturhiya sang Pulong

(Martes, Hulyo 30, 2019)

San Pedro Crisologo, Obispo kag Doktor sang Simbahan

Ang Pagbasa gikan sa Libro sang:

Exodo 33:7-11; 34:5-9, 28

   Kinabatasan ni Moises ang pagkuha sang tolda kag ang pagpatindog sini sa gwa sang kampamento sa uloonhan. Iya ini ginhingalanan"Ang Tolda nga Tilipunan.” Ang bisan sin-o nga luyag magpangita sa Ginoo dapat sia maggwa sa kampamento kag magkadto sa Tolda nga Tilipunan. Kon maggwa si Moises pakadto sa Tolda, ang tanan nga mga tawo nagatindog, kag ang tagsatagsa nagatindog sa puwertahan sang iya kaugalingon nga tolda kag nagabantay kay Moises tubtob nga makasulod sia sa Tolda. Sa tapos makasulod si Moises sa Tolda, ang haligi nga panganod nagapanaog kag nagapundo sa puwertahan sang tolda, kag ang Ginoo nagahambal kay Moises gikan sa panganod. Kon makita sang tanan nga mga tawo ang haligi nga panganod sa puwertahan sang Tolda, nagatindog sila, kag ang tagsatagsa nagaluhod sa puwertahan sang iya kaugalingon nga Tolda. Ang Ginoo nagahambal kay Moises sing tampad, subong sang isa ka tawo nga nagahambal sa iya abyan. Dayon si Moises nagabalik sa kampamento. Pero ang isa kapamatan-on nga si Josue nga iya alagad, nga anak ni Nun, wala nagahalin sa Tolda.

   Ang Ginoo nagpanaog sa dagway sang panganod, kag nagtindog upod sa iya didto, kag naghambal sang iya ngalan, ang Ginoo. Ang Ginoo nag-agi sa atubangan niya kag nagsiling, “Ako ang Ginoo, ako amo ang Dios nga maluloy-on kag mainawaon, indi madali mangakig kag nagapakita sang malig-on nga gugma kag katutom. Nagatuman ako sang akon saad sa mga linibo, kag nagapatawad ako sang mga kalautan, kalainan, kag sala. Pero indi ko pagpabay-an kundi akon silutan ang mga kaanakan kag mga kaapuhan tubtob sa ikatlo kag ikaapat ka kaliwatan tungod sang mga sala sang ila mga ginikanan." Si Moises nagluhod sa duta kag nagsimba. Nagsiling sia, "Ginoo, kon nahamuot gid ikaw sa akon, ginaampo ko nga mag-upod ka sa amon. Ining mga tawo matig-a gid sang ulo, pero patawara ang amon kalautan, kag kasal-anan, kag batuna kami subong imo kaugalingon nga mga tawo."

   Nagpabilin si Moises upod sa Ginoo sa sulod sang 40 ka adlaw kag 40 ka gab-i, nga wala magkaon ukon mag-inom. Ginsulat niya sa malapadlapad nga bato ang mga pulong sang kasugtanan, ang napulo ka sugo.

Salmo sa Pagsabat:

Mga Salmo 103:6-7, 8-9, 10-11, 12-13

(S) Ang Ginoo maluloy-on kag mahigugmaon.

Ang Ginoo nagahukom sa pag-apin sa mga ginapigos kag nagahatag sa ila sang ila mga kinamatarong. Ginsugid niya ang iya mga plano kay Moises kag ginpakita niya sa mga tawo sang Israel ang iya gamhanan nga mga buhat. (S)

Ang Ginoo maluloy-on kag mahigugmaon, indi dali mangakig, kag puno sing mapinadayunon nga gugma. Wala sia nagasabdong sing dalayon; ang iya pagpangakig wala nagapadayon. (S)

Ang iya silot kulang pa sang nagakabagay sa aton, ukon nagabalos sa aton tungod sang aton mga sala kag kasaypanan. Subong sang kataas sang langit sa ibabaw sang duta, amo man kadaku ang iya paghigugma sa mga nagatahod sa iya. (S)

Subong sang kalayo sang sidlangan sa nakatundan, amo man kalayo ang iya pagpahilayo sang aton mga sala sa aton. Subong nga ang amay maluloy-on sa iya mga kaanakan, amo man ang GINOO maluloy-on sa mga nagatahod sa iya. (S)

Aleluya:

   Ang Pulong sang Dios amo ang binhi, si Kristo ang manugsab-og; ang bisan sin-o nga nakakita sa iya, nagakabuhi sing walay katapusan.

Ang Pagbasa sang Santos nga Ebanghelyo suno kay:

San Mateo 13:36-43

   Dayon ginbayaan ni Jesus ang mga tawo kag nagsulod sia sa balay. Ang iya mga gintuton-an nagpalapit sa iya kag nagsiling, “Sugiri kami kon ano ang kahulogan sang palaanggiran nahanungod sang mga bugang.”

   Si Jesus nagsiling sa ila, “Ang tawo nga nagsab-og sang maayo nga binhi amo ang Anak sang Tawo. Ang uma amo ang kalibutan. Ang maayo nga binhi amo ang mga anak sang Ginharian, kag ang mga bugang amo ang mga anak sang Yawa. Ang kaaway nga nagsab-og sang bugang amo si Satanas. Ang tig-alani amo ang katapusan sang panahon, kag ang mga mangangani amo ang mga anghel. Subong nga ang mga bugang gintipon kag ginsunog sa kalayo, amo man ang mahanabo sa katapusan sang panahon. Ang Anak sang Tawo magapadala sang iya mga anghel kag ila pagatipunon kag pagapagwaon sa iya Ginharian ang tanan nga nanginkabangdanan sang pagpakasala, kag ang tanan nga nagahimo sing malaut. Kag ini sila ihaboy sa nagadabadaba nga kalayo, sa diin magahibi sila kag magabagrot sang ila mga ngipon. Dayon ang mga matarong magasilak subong sang adlaw sa Ginharian sang ila Amay. Gani, magpamati kamo kon may dulonggan kamo!”

Hulyo 29 | Hulyo 31

Nagsabat si Marta, “Nahibaluan ko nga Mabanhaw Sia”

Liturhiya sang Pulong

(Lunes, Hulyo 29, 2019)

Santa Marta

Ang Pagbasa gikan sa Libro sang:

Exodo 32:15-24, 30-34

   Si Moises nagbalik kag nagdulhog sa bukid, nga nagadala sang duha ka malapadlapad nga bato sang kasugtanan, nga nasulatan sa pihak kag pihak. Ini ginhimo sang Dios, kag ang mga sulat sinulat sang Dios, nga ginsinsil sa mga malapadlapad nga bato.
   Nakabati si Josue sang pagsininggit sang mga tawo, kag nagsiling sia kay Moises, "Nabatian ko ang kinagahod sang inaway sa kampamento.” Si Moises nagsiling, "Ina nga ginahod indi singgit sang pagdaog, ukon ginahod sang paglalaw tungod sang pagkalutos. Ang akon nabatian amo ang gahod sang mga pagkinanta."
   Sang malapit na si Moises sa kampamento kag nakita niya ang tinday nga baka kag ang mga tawo nga nagasinaot, naakig gid sia. Ginpusdak niya ang mga malapadlapad nga bato nga iya ginadala kag nabuka ini sa kunsaran sang bukid. Ginkuha niya ang tinday sang baka nga ila ginhimo, ginsunog ini, ginbukbok ini subong sang pulbos, kag ginsabwag niya sa tubig. Dayon ginpainom niya ini sa mga tawo sang Israel. Nagsiling sia kay Aaron, "Ano bala ang ginhimo sini nga mga tawo sa imo, nga imo sila ginpahimo sining daku nga sala?"
   Nagsabat si Aaron, "Sir, indi ka magkaakig sa akon, nahibal-an mo kon daw ano ang huyog sini nga mga tawo sa paghimo sing malaut. Nagsiling sila sa akon, 'Himoi kami sing isa ka dios nga magapangulo sa amon, kay wala kami makahibalo kon ano na ang natabo sa sini nga tawo nga si Moises nga nagpagwa sa amon gikan sa Egipto.' Ginpamangkot ko sila, 'Sin-o bala sa inyo ang may bulawan?’ Ginpanguha nila ang ila alahas nga bulawan kag ginhatag sa akon. Ginhaboy ko ini sa kalayo kag nahimo ini nga tinday sang baka."
   Sa madason nga adlaw si Moises nagsiling sa mga tawo, "Nakahimo kamo sing daku nga sala. Pero karon, matukad ako sa bukid pakadto sa Ginoo, ayhan matigayon ko ang kapatawaran sang inyo mga sala." Nagbalik si Moises sa Ginoo kag nagsiling, "Abaw, daku gid nga sala ang nahimo sini nga mga tawo! Naghimo sila sing isa ka dios nga bulawan para sa ila kaugalingon. Pero karon, kon mahimo patawara ang ila sala. Kon indi, ginaampo ko nga panasa ang akon ngalan sa libro nga imo nasulat."
   Ang Ginoo nagsiling kay Moises, "Ang ngalan sang nakasala batok sa akon amo ang panason ko sa akon libro. Karon Iakat ka, pangulohi ang mga tawo pakadto sa duog nga ginsiling ko sa imo. Dumdoma nga ang akon anghel magtuytoy sa imo, pero kon ako magsilot, silutan ko sila tungod sang ila mga sala.”

Salmo sa Pagsabat:

Mga Salmo 106:19-20, 21-22, 23

(S) Magpasalamat kamo sa Ginoo, kay sia maayo.

Naghimo sila sing tinday nga baka nga bulawan sa Horeb, kag ginsimba nila ini; ginbayluhan nila ang himaya sang Dios, sang larawan sang isa ka sapat nga nagahalab sang hilamon. (S)
Nalimtan nila ang Dios nga nagluwas sa ila, paagi sa iya gamhanan nga mga buhat didto sa Egipto. Daw ano ka makatilingala ang mga ginhimo niya didto! Daw ano ka makahalangawa ang mga ginhimo niya didto sa Mapula nga Dagat! (S)
Gani nagsiling ang Dios nga iya laglagon ang iya mga tawo; pero si Moises nga iya pinili nga alagad nagpakiluoy sa Dios, sa paglupay sang kaakig sang Dios, agod indi sila malaglag. (S)

Aleluya:

   Sa iya kaugalingon nga kabubot-on ginhimo niya kita nga iya mga anak paagi sa pulong sang kamatuoran, agud nga mangin nahauna kita sa tanan niya nga tinuga.

Ang Pagbasa sang Santos nga Ebanghelyo suno kay:

San Juan 11:19-27

   Kag madamo nga mga Judio ang nag-abot sa paglipay kay Marta kag kay Maria tungod sang pagkapatay sang ila utod.
   Sang pagkabati ni Marta nga nagapadulong si Jesus, naggwa sia sa pagsugata sa iya, pero si Maria nagpabilin sa balay. Nagsiling si Marta kay Jesus, “Ginoo, kon yari ka lang diri, wala kuntani mapatay ang akon utod! Pero nahibaluan ko nga bisan subong ang Dios magahatag sa imo sang bisan ano nga imo pangayuon sa iya.”
   Si Jesus nagsiling sa iya, “Mabanhaw ang imo utod.”
   Nagsabat si Marta, “Nahibaluan ko nga mabanhaw sia sa katapusan nga adlaw.”
   Si Jesus nagsiling sa iya, “Ako amo ang pagkabanhaw kag ang kabuhi. Ang nagatuo sa akon, bisan pa nga mapatay sia, magakabuhi; kag ang nagakabuhi kag nagatuo sa akon indi gid mapatay. Nagatuo ka bala sini?”
   Nagsabat sia, “Huo, Ginoo! Nagatuo gid ako nga ikaw amo ang Cristo, ang Anak sang Dios, nga magakari sa kalibutan.” 

Hulyo 28 | Hulyo 30

"Hatagi Kami Adlaw-adlaw sang Kalan-on nga Amon Kinahanglanon"

Liturhiya sang Pulong

(Domingo, Hulyo 28, 2019)

1. Ang Pagbasa gikan sa Libro sang:

Genesis 18:20-32

   Dayon ang GINOO nagsiling kay Abraham, “Tama gid ang mga panumbongon batok sa Sodoma kag sa Gomorra, kag ang ila sala tama gid. Kinahanglan kadtuan ko kag tan-awon kon ang mga panumbongon batok sa ila matuod ukon indi.”
   Dayon ang duha ka tawo naglakat pakadto sa Sodoma, pero ang GINOO nagpabilin upod kay Abraham. Si Abraham nagpalapit sa GINOO kag nagpamangkot, “Pagalaglagon mo gid bala ang mga matarong upod sa mga malaut? Kon may yara nga 50 ka matarong nga mga tawo sa siyudad, pagalaglagon mo bala ang bilog nga siyudad? Indi mo bala pag-ipaiway ang siyudad agod maluwas ang 50? Sa pagkamatuod indi mo pagpatyon ang mga matarong upod sa mga malaut. Indi ina mahimo! Indi mo ina paghimuon. Kay kon amo ina, ang matarong pagasilutan pareho sang mga malaut. Indi ina mahimo. Ang Hukom sang bug-os nga kalibutan dapat maghukom sing matarong.”
   Ang GINOO nagsabat, “Kon makakita ako sing 50 ka matarong nga mga tawo sa Sodoma, indi ko paglaglagon ang bug-os nga siyudad tungod sa ila.”
   Si Abraham naghambal liwat, “Kon mahimo, O Ginoo, patawara ako sang akon kaisog sa pagpadayon sa pagpakighambal sa imo. Tawo lamang ako, kag wala ako kinamatarong sa paghambal sini. Abi may 45 lamang ka matarong nga mga tawo. Laglagon mo bala ang bug-os nga siyudad tungod kay kulang sing lima?” Ang Ginoo nagsabat, “Indi ko paglaglagon ang siyudad kon may makita ako nga 45 ka matarong nga mga tawo.”
   Si Abraham naghambal liwat, “Abi may 40 lang.”
   Nagsabat sia, “Indi ko paglaglagon ang siyudad kon may yara nga 40.”
   Si Abraham nagsiling, “Indi ka lang magkaakig sa akon, O Ginoo, kay indi ko mapunggan ang paghambal liwat. Ti, abi kon may 30 lang?”
   Nagsabat sia, “Indi ko paglaglagon ini kon may makita ako nga 30.”
   Si Abraham nagsiling, “Ginoo, kon mahimo, patawara ako sa akon kaisog sa pagpadayon sa pagpakighambal sa imo. Abi kon may 20 lang?”
   Nagsabat sia, “Indi ko paglaglagon ang siyudad kon may makita ako nga 20.”
   Si Abraham nagsiling, “Abaw, Ginoo, indi ka magkaakig, kag magahambal ako sing kaisa na lang. Abi kon may napulo lang?”
   Nagsiling sia, “Indi ko paglaglagon ini kon may yara nga napulo.”

Salmo sa Pagsabat:

Mga Salmo 138:1-2, 2-3, 6-7, 7-8

(S) Sa bisan ano nga adlaw nga magpanawag ako sa imo, O Ginoo, ginasabat mo ako.

Nagapasalamat ako sa imo, O GINOO, sa bug-os ko nga tagipusoon; nagakanta ako sing pagdayaw sa imo sa atubangan sang mga dios. Nagasimba ako sa atubangan sang imo balaan nga Templo. (S)
Kag nagadayaw sang imo ngalan, tungod sang imo mapinadayunon nga gugma kag katutom, kay nagpahayag ka nga ikaw kag ang imo mga sugo labaw sa tanan. Ginsabat mo ako sang nagpanawag ako sa imo; ginpabakod mo ako sang imo kusog. (S)
Bisan pa nga ang Ginoo yara sa kahitaasan, pero nagakabalaka sia sa mga kubos, kag ang mga bugalon indi makapanago sa iya. Bisan ginalibutan ako sang mga kagamo, ginabantayan mo ako nga indi maano. (S)
Ginasumpong mo ang akon akig nga mga kaaway, kag ginaluwas mo ako paagi sa imo gahom. Tumanon mo ang tanan nga imo ginsaad sa akon, O GINOO, ang imo gugma nagapadayon sa walay katapusan. Tapusa ang hilikuton nga imo ginsugoran. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Colosas 2:12-14

   Kay sang ginbautisohan kamo, ginlubong kamo upod kay Cristo, kag sa pagbautiso sa inyo ginbanhaw kamo upod kay Cristo paagi sa inyo pagtuo sa wala nagauntat nga gahom sang Dios nga amo ang nagbanhaw sa iya gikan sa kamatayon. Sang una, patay kamo sa espiritu tungod sang inyo mga sala kag tungod kay mga Gentil kamo nga wala masakop sa Kasugoan. Pero ginbuhi kamo sang Dios upod kay Cristo! Ginpatawad kita sang Dios sang tanan naton nga mga sala. Ginpanas niya ang lista sang tanan naton nga mga utang, lakip ang iya mga tulomanon nga indi naton matuman, kag ginwala niya ini paagi sa paglansang niya sini sa krus.

Aleluya:

Roma 8:15

   Iya kamo ginahimo nga mga anak sang Dios, kag paagi sa gahom sang Espiritu nagapanawag kita sa Dios, “O Amay, Amay ko!” 

Ang Pagbasa sang Santos nga Ebanghelyo suno kay:

San Lucas 11:1-13

   Isa sadto ka tion si Jesus nagapangamuyo sa isa ka duog. Sang pagkatapos niya, ang isa sang iya mga gintuton-an nagsiling sa iya, “Ginoo, tudloi kami sa pagpangamuyo, subong nga si Juan nagtudlo man sang iya mga gintuton-an.”
   Si Jesus nagsiling sa ila, “Magpangamuyo kamo sing subong sini:
   ‘Amay, Kabay nga magkari ang imo Ginharian.
   Hatagi kami adlaw-adlaw sang kalan-on
   Nga amon kinahanglanon.
   Patawara kami sang amon mga sala,
   Kay ginapatawad man namon
   Ang tanan nga nakasala sa amon.
   Indi kami pag-ipadaog sa mga pagsulay.’ ”
   Kag si Jesus nagsiling sa iya mga gintuton-an, “Abi may isa sa inyo nga magkadto sa balay sang iya amigo sa tungang gab-i kag magsiling sa iya, ‘Abyan, pahulama ako sing tatlo ka bilog nga tinapay, kay may amigo ako nga nagapanglakaton nga nag-abot sa balay kag wala gid ako sing ipakaon sa iya.’ Kag abi, ang imo amigo magsabat didto sa sulod sang iya balay, ‘Indi ako pagtublaga! Nakapanirado na kami, nagahigda na ako kag ang akon kabataan, mabudlay na ang magbangon sa paghatag sa imo sing bisan ano.’ Ti, ano karon? Nagasiling ako sa inyo, bisan nga indi sia magbangon sa paghatag sa imo sing tinapay tungod sang inyo pag-abyanay, pero tungod sang imo pagpamilit nga wala gid huyahoya magabangon sia kag magahatag sa imo sang imo kinahanglanon. Gani nagasiling ako sa inyo: Pangayo kamo, kag kamo magabaton, pangita kamo kag kamo makakita, panuktok kamo kag ang puwertahan pagabuksan sa inyo. Kay ang tagsatagsa nga nagapangayo magabaton, kag ang nagapangita makakita, kag ang puwertahan pagabuksan sa iya nga nagapanuktok.
   Kamo nga mga amay, may isa bala sa inyo nga magahatag sa iya bata sing man-og kon ang iya ginapangayo isda? Hatagan mo bala sia sing iwiiwi kon ang iya ginapangayo itlog? Kon kamo nga mga malaut makahibalo maghatag sing maayo nga butang sa inyo mga kabataan, daw ano pa gid ang inyo Amay nga langitnon. Magahatag sia sang Espiritu Santo sa mga nagapangayo sa iya.”

Hulyo 26 | Hulyo 28

Nagabantay sang Maayo nga Binhi sang Pulong sang Dios sa Aton Tagipusoon

Liturhiya sang Pulong

(Sabado, Hulyo 27, 2019)

Ang Pagbasa gikan sa Libro sang:

Exodo 24:3-8

   Naglakat si Moises, kag ginsugiran ang mga tawo sang tanan nga ginsugo sang Ginoo, kag sang iya mga pagsulondan. Ang tanan nga mga tawo nagsabat sing dungan, “Tumanon namon ang tanan nga ginsiling sang Ginoo.” Ginsulat ni Moises ang tanan nga mga sugo sang Ginoo. Aga pa sang madason nga adlaw nagpatindog sia sa kunsaran sang bukid sing altar, kag sang 12 ka monumento nga mga bato para sa 12 ka tribo sang Israel. Dayon nagpadala sia sing pamatan-on nga mga lalaki sang Israel, nga nagdulot sang mga halad nga sinunog kag nag-ihaw man sang mga toro nga baka agod ihalad sa Ginoo, subong halad sa paghiambit. Ginkuha ni Moises ang katunga sang dugo kag ginbutang ini sa mga yahong, kag ang katunga ginwisik sa altar. Dayon ginkuha niya ang libro sang kasugtanan kag ginbasa ini sing mabaskog sa mga tawo, kag nagsiling sila, “Himuon namon ang tanan nga mga sugo sang Ginoo. Tumanon namon sia.”

   Dayon ginkuha ni Moises ang dugo sa mga yahong kag ginwisik sa mga tawo. Nagsiling sia, “Ini amo ang dugo nga nagasilyo sang kasugtanan nga ginhimo sang Ginoo sa inyo sa paghatag niya sining tanan nga mga sugo.”

Salmo sa Pagsabat:

Mga Salmo 50:1-2, 5-6, 14-15

(S) Ihalad sa Dios ang mga pagpasalamat.

Ang makagagahom nga Dios, ang Ginoo, nagahambal, nagapanawag sia sa bug-os nga duta, halin sa sidlangan pa nakatundan. Ang Dios nagabanaag gikan sa Sion, ang siyudad nga himpit sa iya katahom. (S)

Nagasiling sia, “Tipona sa akon ang matutom ko nga mga tawo, ang mga naghimo sing kasugtanan sa akon paagi sa isa ka halad.” Ginapahayag sang kalangitan nga ang Dios matarong, nga sia gid amo ang hukom! (S)

Ihalad sa Dios ang mga pagpasalamat, kag ihatag sa Makagagahom ang tanan nga dulot nga inyo ginsaad. Tawga ako kon mag-abot ang kalisdanan; luwason ko ikaw, kag dayawon mo ako.” (S)

Aleluya:

Santiago 1:21

Itugyan ang inyo kaugalingon sa Dios kag batuna ninyo ang pulong nga iya ginatanom sa inyo mga tagipusoon, nga sarang makaluwas sa inyo.

Ang Pagbasa sang Santos nga Ebanghelyo suno kay:

San Mateo 13:24-30

   Si Jesus nagsugid sa ila sing isa naman ka palaanggiran, “Ang Ginharian sang langit kaangay sang isa ka tawo nga nagsab-og sang maayo nga binhi sa iya uma. Isa ka gab-i, sang nagakatulog ang mga tawo, nag-abot ang iya kaaway kag ginsab-ugan man sang bugang ang iya uma kag naglakat. Sang nagtubo ang tanom, kag nagpamunga, ang mga bugang nagtubo man. Ang mga suloguon sang tawo nagkadto sa iya kag nagsiling, ‘Sir, maayo nga binhi ang imo ginsab-og sa imo nga uma, pero diin bala maghalin ining mga bugang?’ Nagsabat sia, ‘Ginsab-og ini sang kaaway.’ 

   Nagpamangkot sila, ‘Luyag mo bala nga panggabuton namon ang mga bugang?’ Nagsabat sia, ‘Indi lang, kay basi may magabot man kamo nga mga trigo kaupod sa mga bugang. Pabay-i lang ninyo anay nga magpamuhi ang mga bugang kag ang mga trigo tubtob sa tig-alani, kay kon tig-alani na singganon ko ang mga mangangani: Gabuta anay ninyo ang mga bugang, bugkosa ini kag idap-ong sa kalayo. Dayon tipuna ninyo ang trigo kag isulod sa akon tambubo.’ ”

Hulyo 26 | Hulyo 28

"Ang mga Nagapamati sang Mensahi kag Nagahangop sini"

Liturhiya sang Pulong

(Biyernes, Hulyo 26, 2019)

San Joaquin kag Santa Ana, Ginikanan sang Mahal nga Birhen Maria

Ang Pagbasa gikan sa Sulat sang:

Exodo 20:1-17

   Ang Dios naghambal sini nga mga pulong, “Ako amo ang Ginoo nga imo Dios, nga nagdala sa imo sa pagwa sa Egipto, sa diin gin-ulipon ka.

   “Indi ka maghupot sang iban nga dios, luas sa akon.

   “Indi ka maghimo para sa imo kaugalingon sang isa ka diosdios ukon isa ka larawan sang bisan ano nga tinuga sa langit, ukon sa duta, ukon sa tubig nga yara sa idalom sang duta. Indi ka magluhod ukon magsimba sa bisan ano nga diosdios, kay ako ang Ginoo nga imo Dios, kag maimon ako nga Dios. Sa mga nagadumot sa akonsilutan ko ang ila mga kaanakan tubtob sa ikatlo kag ikaapat ka kaliwatan. Pero sa mga nagahigugma sa akon kag nagabantay sang akon mga sugo, ipakita ko sa ila ang akon malig-on nga paghigugma sa linibo nga mga kaliwatan.

   “Indi mo paggamiton sa wala sing pulos ang ngalan sang Ginoo nga imo Dios, kay ako magasilot sang bisan sin-o nga maggamit sang akon ngalan sa wala sing kapuslanan.

   “Dumdoma ang adlaw nga inugpahuway, kag pakabalaana ini sa Ginoo. Mag-obra ka sa sulod sang anom ka adlaw, pero ang ikapito nga adlaw amo ang adlaw nga inugpahuway nga imo pakabalaanon sa Ginoo nga imo Dios. Indi ka mag-obra sa sina nga adlaw, ikaw, ukon ang imo mga kaanakan, ukon imo mga ulipon, ukon imo mga kahayupan, ukon ang dumoluong nga nagapuyo sa imo mga banwa. Sa sulod sang anom ka adlaw ang Ginoo nagtuga sang langit kag duta, sang dagat, kag sang tanan nga yara sa ila, pero sa ikapito nga adlaw nagpahuway sia. Gani ako, ang Ginoo, nagbendisyon sang adlaw nga inugpahuway kag ginpakabalaan ini para sa akon kaugalingon.

   “Tahura ang imo amay kag iloy, agod nga magkabuhi ka sing malawig sa duta nga ginhatag sang Ginoo nga imo Dios.

   “Indi ka magpatay.

   “Indi ka magpanginbabayi ukon magpanginlalaki.

   “Indi ka magpangawat.

   “Indi ka magsaksi sing binutig sa imo isigkatawo.

   “Indi ka magkaibog sang balay sang imo isigkatawo. Indi ka magkaibog sang iya asawa, ukon sang iya mga ulipon, sang iya baka, ukon sang iya asno, ukon sang bisan ano niya nga butang!”

Salmo sa Pagsabat:

Mga Salmo 19:8, 9, 10, 11

(S) O Ginoo, yara sa imo ang mga pulong nga nagahatag sang kabuhi nga dayon.

Matarong ang mga pagsulondan sang Ginoo, kag ang mga nagatuman sini malipayon, matarong gid ang iya mga sugo, kag nagahatag sing paghangop kag sa hunahona. (S)

Ang pagsimba sa Ginoo maayo; magapadayon ini sa walay katubtoban. Matarong ang mga paghukom sang Ginoo; wala ini sing may ginapasulabi. (S)

Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sa dugos, bisan pa sang sa wala simbog nga dugos. (S)

Ginatudloan nila ako nga imo alagad, tungod sang akon pagtuman sini ginahatagan ako sing balos. (S)

Aleluya:

Lucas 8:15

Bulahan ang nagatipig sang pulong sang Dios sa maayo kag masinulondon nga tagipusoon kag nagapadayon tubtob nga magpamunga sila.

Ang Pagbasa sang Santos nga Ebanghelyo suno kay:

San Mateo 13:18-23

   “Gani, pamatii ninyo kag tun-i kon ano ang kahulogan sang palaanggiran nahanungod sang manugsab-og. Ang mga nagapamati sang mensahi nahanungod sang Ginharian pero wala makahangop, kaangay sila sang binhi nga nagtupa sa alagyan. Nagaabot ang Yawa kag nagaagaw sang ginsab-og sa ila tagipusoon. Ang binhi nga nagtupa sa batuhon nga duta amo ang mga nagapamati kag nagabaton sing malipayon sang pulong. Pero wala ini nagatudok kag nagadugay sa ila. Gani kon mag-abot ang kapipit-an ukon paghingabot tungod sang mensahi nagabiya sila gilayon. Ang binhi nga nagtupa sa mga talungon amo ang nagapamati sang mensahi, pero ang mga palaligban sang pangabuhi, kag ang paghigugma sang manggad nagalumos sang mensahi, kag wala ini nagapamunga. Ang binhi nga nagtupa sa maayo nga duta, amo ang mga nagapamati sang mensahi kag nagahangop sini. Nagapatubas sila sing 100 ka pilo, ang iban 60 ka pilo, kag ang iban 30 ka pilo.”

Hulyo 25 | Hulyo 27

"Wala Magkari agod Alagaron kundi sa Pag-alagad"

Liturhiya sang Pulong

(Huwebes, Hulyo 25, 2019)

Santiago, Apostoles

Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 4:7-15

   Pero kami nga may espirituhanon nga manggad kaangay sang tibod nga duta, sa pagpakita nga ang labing daku nga gahom indi amon, kundi iya sang Dios. Masunson kami ginaipit-ipit sang palaligban, pero wala kami maligsa. Kon kaisa nagapangduhadoha kami, pero wala kami mawad-i sing paglaom. Madamo ang amon mga kaaway, pero wala man kami mawad-i sing abyan. Kag bisan nga kon kaisa nasakit gid kami, pero wala man kami malaglag. Sa tanan nga tion ginadala namon sa amon lawas nga mamalatyon ang kamatayon ni Jesus, agod nga ang iya kabuhi makita man sa amon lawas. Sa bug-os namon nga pagkabuhi yara kami pirme sa katalagman sang kamatayon tungod kay Jesus, agod nga ang iya kabuhi makita sa sining amon mamalatyon nga lawas. Ini nagakahulogan nga ang kamatayon nagapanghikot sa amon, pero ang kabuhi nagapanghikot sa inyo.

   Ang kasulatan nagasiling, “Naghambal ako kay nagtuo ako.” Sa amo man nga espiritu sang pagtuo, nagahambal man kami kay nagatuo kami. Kay nakahibalo kami nga ang Dios, nga nagbanhaw kay Ginoong Jesus, magabanhaw man sa amon upod kay Jesus kag magadala sa amon upod sa inyo sa iya atubangan. Ini tanan para sa inyo, kag sa nagadamo kag nagadamo ang mga tawo nga ginalambot sang grasya sang Dios, magadamo pa gid ang ila pagpangamuyo sang pagpasalamat, sa himaya sang Dios.

Salmo sa Pagsabat:

Mga Salmo 126:1-2, 2-3, 4-5, 6

(S) Ang nagatanom nga nagahilibion, nagatipon sang patubas nga may kasadya.

Sang ginpabalik kita sang Ginoo sa Sion, daw isa lang yadto ka dalamguhanon! Daw ano ang aton pagkinadlaw kag pagkinanta sa kalipay! (S)

Dayon ang iban nga mga pungsod nagsiling nahanungod sa aton,“Ang Ginoo naghimo sing dalagku nga mga butang sa ila!” Matuod gid naghimo sia sing dalagku nga mga butang sa aton, daw ano kita sadto ka malipayon! (S)

O Ginoo, dalha kami pabalik sa amon duta, subong nga ang imo ulan nagadala sang tubig pabalik sa mamala nga mga suba. Himoa man nga yadtong nagtanom Kabay pa nga ang nagsab-og nga nagahilibion, magtipon sang patubas nga may kasadya! (S)

Yadtong mga naghibi samtang nagagowa sila nga nagadala sing binhi magabalik nga nagakanta sa kalipay, nga nagadala sang ila patubas! (S)

Aleluya:

Juan 15:16

   Ako ang nagpili sa inyo gikan sa sining kalibutan agod maglakat sa pagpamunga, ang sahi sang bunga nga nagapadayon, siling sang Ginoo.

Ang Pagbasa sang Santos nga Ebanghelyo suno kay:

San Mateo 20:20-28

   Dayon nagpalapit kay Jesus ang asawa ni Zebedeo upod sa iya mga anak nga lalaki, nagluhod sa iya atubangan, kag may ginpangabay.

   Si Jesus nagpamangkot sa iya, “Ano bala ang luyag mo?” 

   Ang babayi nagsabat, “Ginapangabay ko nga kon maghari ka na, papungkoa ining duha ko ka anak, ang isa sa imo tuo kag ang isa sa imo wala.”

   Si Jesus nagsabat sa ila, “Wala kamo makahibalo sang inyo ginapangayo. Sarang bala kamo makainom sa kupa nga akon pagaimnan sa indi na lang madugay?” 

   Nagsabat sila, “Huo, sarang kami.”

   Nagsiling si Jesus sa ila, “Sarang kamo matuod makainom sa kupa nga akon pagaimnan. Pero ang pagpapungko sa akon tuo ukon sa akon wala, indi ako ang magahatag sina. Ini nga mga pulongkoan para lamang sa ila nga gin-amanan sang akon Amay.”

   Sang pagkabati sini sang napulo ka mga gintuton-an naakig sila sa duha ka mag-utod. Gani gintawag sila tanan ni Jesus kag ginsingganan, “Inyo nahibaluan nga ang mga pangulo may gahom sa ila mga tinawo kag nagapagusto lang sila sang ila himuon sa ila mga tinawo. Pero lain iya ang para sa inyo. Kay kon may isa sa inyo nga luyag magpangulo, dapat sia magmanginsuloguon ninyo. Kag kon may isa sa inyo nga luyag mangin-una, dapat sia mangin-ulipon ninyo. Subong nga ang Anak sang Tawo wala magkari agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.”

Hulyo 24 | Hulyo 26

"Tungod kay Indi gid Madalom ang Gamot ang Tanom Madali nga Nalaya"

Liturhiya sang Pulong

(Miyerkules, Hulyo 24, 2019)

San Sarbelio Makhluf, Pari

Ang Pagbasa gikan sa Libro sang:

Exodo 16:1-5, 9-15

   Ang tanan nga mga pumoluyo sang Israel naghalin sa Elim, kag sa ika-15 nga adlaw sang ikaduha nga bulan sa tapos makagwa sila sa duta sang Egipto nag-abot sila sa desierto sang Sin nga yara sa gin-utlan sang Elim kag sang Sinai. Nagreklamo sila tanan kay Moises kag kay Aaron didto sa desierto kag nagsiling sa ila,"Maayo pa kuntani nga ginpamatay kami sang Ginoo didto sa Egipto. Didto makapungko kami sa luyo sang mga kaldero nga puno sang linuto nga mga karne kag makapagusto kami sing kaon. Pero inyo kami gindala sa sini nga desierto agod pagutoman tubtob magkalamatay kami.”

   Ang Ginoo nagsiling kay Moises, "Karon paulanon ko sa inyo ang tinapay halin sa langit. Ang mga tawo magagwa kag magapanguha kada adlaw sing tinapay nga ila kinahanglanon sa sina nga adlaw. Sa sini nga paagi akon sila nga tilawan kon ila tumanon ang akon mga sugo. Sa ikaanom ka adlaw, magpanguha sila sing tinapay para sa duha ka adlaw, kag amanon nila ini."

   Si Moises nagsiling kay Aaron, "Singgana ang tanan nga mga pumoluyo nga magkari sila kag magtindog sa atubangan sang Ginoo, kay nabatian niya ang ila mga reklamo.” Sang paghambal ni Aaron sa tanan nga mga pumoluyo, nagliso sila kag naglantaw sa desierto kag sa gilayon nagpakita ang himaya sang Ginoo sa isa ka panganod. Ang GINOO nagsiling kay Moises, “Nabatian ko ang mga reklamo sang mga Israelinhon. Amo ini ang isiling mo sa ila, 'Sa kahapunanon may sud-an kamo nga kaunon, kag pagkaaga makapagusto kamo sing pagkaon sang tinapay. Dayon makilal-an ninyo nga Ako, ang Ginoo, amo ang inyo Dios.' "

   Sa kahapunanon nag-abot ang mga pitaw kag nagpuno sang kampamento kag sang pagkaaga may madamol nga tun-og sa palibot sang ila kampamento. Sang magmala na ang tun-og, may nakita sa desierto nga manipis kag malapadlapad nga butang, nga pareho kapino sang ginaling nga yelo. Sang makita ini sang mga Israelinhon wala sila makakilala kon ano yadto kag nagpinamangkutay sila, "Ano bala ini? " Nagsabat si Moises sa ila, “Ini amo ang tinapay nga ginhatag sang Ginoo nga manginkalan-on ninyo.

Salmo sa Pagsabat:

Mga Salmo 78:18-19, 23-24, 25-26, 27-28

(S) Ginhatagan sila sang Ginoo sing kalan-on halin sa langit.

Gintilawan nila sing hungod ang Dios, paagi sa pagpangayo sing kalan-on nga luyag nila. Naghambal sila batok sa Dios, nga nagasiling, “Makahatag bala ang Dios sing pagkaon sa desierto? (S)

Pero ginmanduan niya ang langit sa ibabaw, kag ginsugo nga mag-abri ang iya mga puwertahan; ginhatagan niya sila sing kalan-on halin sa langit, paagi sa pagpadala sa ila sing mana nga ila kaunon. (S)

Gani nagkaon sila sang kalan-on sang mga anghel. Ang Dios naghatag sa ila sang kalan-on nga makapagusto sila sing kaon. Dayon ginpahuyop niya ang salatan, kag sa iya gahom ginbuy-an niya ang habagat. (S)

Kag ginpadalhan niya sila sang mga pispis nga nagadulom subong sang yab-ok, subong kadamo sang mga balas sa baybayon; nagtupa ini sa tunga sang ila kampamento, sa palibot sang ila mga tolda. (S)

Aleluya:

   Ang binhi amo ang Pulong sang Dios, ang manugsab-og amo si Kristo: ang tanan nga nagdangop sa iya, magakabuhi nga walay katapusan.

Ang Pagbasa sang Santos nga Ebanghelyo suno kay:

San Mateo 13:1-9

   Sa amo man nga adlaw naggwa si Jesus sa balay kag nagkadto sa higad sang linaw, kag nagpungko sia didto sa pagpanudlo. Tungod kay gintipunan sia sang madamo nga mga tawo, nagsakay sia sa sakayan kag nagpungko didto, samtang ang mga tawo nagtilindog sa higad sang linaw. Madamo nga mga butang ang gintudlo ni Jesus sa ila paagi sa mga palaanggiran nga subong sini: 

   “May isa ka tawo nga naglakat sa pagsab-og. Sang pagsab-og niya sang binhi, ang iban nagtupa sa dalan, kag ang mga pispis nagdapo kag nagtuka sini. Ang iban nagtupa sa batuhon nga mga duog, sa diin hapaw lamang ang duta. Sa wala lang madugay nag-ulhot ang binhi tungod kay manabaw ang duta. Sang udto na ang adlaw, nalayong ang bag-ong tubo nga binhi, kag tungod kay indi gid madalom ang gamot sini, ang tanom madali nga nalaya. Ang iban nga binhi nagtupa sa mga talungon, kag ang talungon nagtubo kag naglumos sang tanom. Pero ang iban nga binhi nagtupa sa maayo nga duta kag namunga: ang iban sini nagpatubas sang 100 ka pilo, ang iban sini 60 kag ang iban sini 30.”

   Kag si Jesus nagsiling, “Gani, magpamati kamo kon may dulonggan kamo!”

Hulyo 23 | Hulyo 25