"Ang Pulong Nangintawo kag Nagpuyo sa Tunga Naton"

Liturhiya sang Pulong

(Martes, Disyembre 31, 2019)

San Silvestre I, Santo Papa

Ang Pagbasa gikan sa Nahauna nga Sulat ni:

San Juan 2:18-21

   Mga anak ko, madali na lang ang katapusan nga panahon! Ginsugiran kamo nga magaabot ang Anti-Cristo, kag karon madamo na nga mga Anti-Cristo ang nagtuhaw, gani aton nahibaluan nga malapit na lang ang katapusan nga panahon. Ini nga mga tawo indi gid matuodtuod nga katapo sang aton grupo, amo gani nga nagbiya sila sa aton. Kon matuod sila nga katapo sang aton grupo, kuntani nagpabilin sila upod sa aton. Pero naghalin sila, kag sa sini nga paagi maathag gid nga indi sila matuodtuod nga katapo sang aton grupo.

   Pero ginbubo sa inyo ni Cristo ang Espiritu Santo, gani tanan kamo nakahibalo sang kamatuoran. Gani nagasulat ako sa inyo, indi tungod kay wala kamo makahibalo sang kamatuoran, kundi kay nakahibalo gid kamo sini, kag nahibaluan man ninyo nga wala gid sing kabutigan nga nagagikan sa kamatuoran.

Salmo sa Pagsabat:

Mga Salmo 96:1-2, 11-12,13

(S) Magkasadya kamo, O langit kag duta!

Magkanta kamo sing bag-o nga ambahanon sa Ginoo! Mag-amba kamo sa Ginoo, O bug-os nga duta! Magkanta kamo sa Ginoo, kag dayawa ninyo sia! Isugid adlaw-adlaw ang maayong balita nga sia nagluwas sa aton! (S)

Magkasadya kamo, O langit kag duta! Magdaguhob ka, O dagat, kag ang tanan nga mga tinuga nga yara sa imo; nnagkasadya kamo, O mga latagon, kag ang tagsa ka butang nga yara sa inyo! Dayon ang mga kahoy sa kagulangan magahinugyaw sa kasadya. (S)

Sa atubang sang Ginoo, kay magaabot sia sa paggahom sang duta. Pagagamhan niya ang tanan nga mga katawhan sang kalibutan sa katarungan kag kamatuoran. (S)

Aleluya:

Juan 1:14, 12

   Ang Pulong nangin tawo kag nagpuyo sa tunga naton. Ang bisan sin-o nga nagabaton sa iya, ginhatagan niya sing kinamatarong nga mangin-anak sang Dios.

Ang Pagbasa sang Santos nga Ebanghelyo suno kay:

San Juan 1:1-18

   Sa wala pa matuga ang kalibutan, yara na ang Pulong. Ang Pulong kaupod sa Dios, kag ang Pulong Dios. Halin gid sa ginsugoran ang Pulong kaupod sa Dios. Paagi sa Pulong gintuga sang Dios ang tanan, kag wala sing may natuga kon indi paagi sa iya. Ang Pulong amo ang ginhalinan sang kabuhi, kag ini nga kabuhi nagdala sing kapawa sa mga tawo. Ang kapawa nagasiga sa kadudolman, kag ang kadudolman wala makadaog sang kapawa.

   Ang Dios nagpadala sang iya manugbalita, ang tawo nga ginahingalanan kay Juan, nga nagkari sa pagsugid sa mga tawo nahanungod sang kapawa. Ginsugiran niya sila agod ang tanan magpamati sang mensahi, kag magtuo. Sia mismo indi amo ang kapawa, kundi nagkari sia sa pagsugid nahanungod sang kapawa. 

   Ang Pulong amo ang matuod nga kapawa nga nagakari sa kalibutan kag nagaiwag sa tanan nga mga tawo. Ang Pulong yara na nga daan sa kalibutan. Ang kalibutan gintuga sang Dios paagi sa iya, pero ang kalibutan wala magkilala sa iya. Nagkari sia sa iya kaugalingon nga banwa, pero ang iya mga kasimanwa wala magbaton sa iya. Pero may yara gid man nga nagbaton kag nagtuo sa iya. Gani ini sila ginhatagan sing kinamatarong nga mangin-anak sang Dios. Nangin-anak sila sang Dios indi sa tawuhanon nga paagi sa bagay nga natawo sila nga may tawuhanon nga amay, kundi ang Dios mismo amo ang ila Amay. 

   Ang Pulong nangintawo kag nagpuyo sa tunga naton. Nakita naton ang iya himaya nga puno sang grasya kag kamatuoran; ini amo ang himaya nga nabaton niya subong bugtong nga Anak sang Amay. 

   Nagpanaksi si Juan nahanungod sa iya, kag nagsinggit, “Amo ini sia ang akon ginsiling sa inyo nga magakari nga ulihi lang sa akon, pero labaw pa sia sa akon, kay sa wala pa ako matawo, yara na sia!” 

   Gikan sa kabuganaan sang iya manggad ginhatagan niya kita tanan sang nagadinasundason nga mga bugay. Ang Kasugoan ginhatag sang Dios paagi kay Moises, pero ang grasya kag kamatuoran nag-abot sa aton paagi kay Jesu-Cristo. Wala sing bisan sin-o nga nakakita sa Dios, kundi ang bugtong nga Anak nga Dios, nga yara sa luyo sang Amay, amo gid lamang ang nakakita sa Dios. Sia amo ang nagpahayag sa iya.

Disyembre 30 | Enero 1

"Ginakilala ni Ana ang Pag-abot ni Kristo kag Nagpasalamat sa Dios"

Liturhiya sang Pulong

(Lunes, Disyembre 30, 2019)

Ang Pagbasa gikan sa Nahauna nga Sulat ni:

San Juan 2:12-17

   Nagasulat ako sa inyo, mga anak ko, kay ang inyo mga sala ginpatawad tungod sa ngalan ni Cristo. Nagasulat ako sa inyo, mga amay, kay kamo nakakilala sa iya nga amo na nga daan halin pa sa ginsugoran. Nagasulat ako sa inyo, mga pamatan-on nga lalaki, kay nadaog ninyo ang Yawa. 

   Nagasulat ako sa inyo, mga anak, kay nakilala ninyo ang Amay. Nagasulat ako sa inyo, mga amay, kay nakakilala kamo sa iya nga amo na nga daan halin pa sa ginsugoran. Nagasulat ako sa inyo, mga pamatan-on nga lalaki, kay mga mabakod kamo. Ang pulong sang Dios nagakabuhi sa inyo kag nadaog ninyo ang Yawa. 

   Indi ninyo paghigugmaa ang kalibutan ukon ang mga butang nga iya sang kalibutan. Kon ginahigugma ninyo ang kalibutan, wala kamo nagahigugma sa Amay. Kay ang tanan nga iya sang kalibutan—ang ginahandom sang makasasala nga kinaugali, ang ginakaibugan sang mata, kag ang tanan nga mga butang sa sining kalibutan nga ginapabugal sang mga tawo—ini sila wala nagagikan sa Amay, kundi sa kalibutan. Ang kalibutan kag ang tanan nga mga butang nga ginahandom sang mga tawo nagataliwan, pero ang nagatuman sang kabubot-on sang Dios nagakabuhi sa gihapon.

Salmo sa Pagsabat:

Mga Salmo 96:7-8, 8-9, 10

(S) Magkasadya kamo, O langit kag duta!

Dayawa ninyo ang Ginoo, tanan kamo nga katawuhan sang duta! Dayawa ninyo ang iya himaya kag gahom! Dayawa ninyo ang mahimayaon nga ngalan sang Ginoo! (S)

Magdala kamo sing dulot kag magsulod sa iya Templo. Magyaub kamo sa atubangan sang Balaan kon magpahayag sia; magkurog ka sa iya atubangan, O bug-os nga duta! (S)

Singgana ang tanan nga mga kapungsoran, “Ang Ginoo amo ang hari!” Ang duta napahamtang sing malig-on kag indi mauyog; sia magahukom sang tanan nga katawuhan sa katarungan. (S)

Aleluya:
   Isa ka balaan nga adlaw nagsanag sa aton; Kari kamo mga pungsod; magsimba kamo sa Ginoo. Kay karon nga adlaw isa ka daku nga kasanag ang nagbanaag sa duta.

Ang Pagbasa sang Santos nga Ebanghelyo suno kay:

San Lucas 2:36-40

   May propeta nga babayi nga si Ana nga anak ni Fanuel gikan sa tribo ni Aser. Ini sia isa ka tigulang nga pito ka tuig lang ang ila pagpuyo sang iya bana kag mabalo sia. Otsentay kuwatro na ka tuig nga nabalo sia kag sa sini nga kalawigon wala gid sia makagwa sa templo. Sa adlaw kag gab-i nagaalagad sia sa Dios kag nagapuasa kag nagapangamuyo. Sa sadto gid nga takna nag-abot sia kag nagpasalamat sa Dios, kag nagpanugid sia nahanungod sang bata sa tanan nga mga tawo nga nagahulat sang pagtubos sang Dios sa Jerusalem.

   Sang natuman na nila ang tanan nga ginasiling sang kasugoan sang Ginoo, nagbalik sila sa Galilea sa ila kaugalingon nga banwa nga Nazaret. Ang bata nagdaku kag nagbakod, nga napun-an sang kaalam, kag ang grasya sang Dios yara sa iya. 

Disyembre 29 | Disyembre 31

"Ang Anghel sang Ginoo Nagpakita kay Jose sa Damgo"

Liturhiya sang Pulong

(Domingo, Disyembre 29, 2019)

Ang Sagrada Familia: Jesus, Maria kag Jose

Ang Pagbasa gikan sa Libro ni:

Sirac 3:2-6, 12-14

   Kay ang Ginoo nagapasidungog sa isa ka amay 

   paagi sa iya mga anak, 

   kag ang katarungan sang isa ka iloy 

   ginakilala sang iya mga anak. 

   Ang nagatahod sa iya amay 

   nagaangkon sang kapatawaran sang iya mga sala. 

   Kag ang pagpasidungog sang iya iloy kaangay sang isa 

   nga nagatipon sing manggad. 

   Ang nagatahod sa iya amay 

   magakalipay upod sa iya kaugalingon nga mga anak 

   kag pagapamatian sia sa adlaw nga sia magpangamuyo. 

   Ang mga nagapasidungog sang iya amay magakabuhi 

   sing malawig. 

   Sia nga nagabulig sa iya iloy nagatuman sa Ginoo. 

   Anak ko, tatapa ang imo amay 

   sa iya katigulangon, 

   kag indi sia pagpaugtasa samtang sia nagakabuhi. 

   Bisan nga wala na sia sa iya husto nga panghunahuna, 

   buligan mo sia, 

   kag indi sia pagtamaya 

   samtang mabakod kag maayo ang imo lawas. 

   Kay ang kaayo sa isa ka amay indi gid malimtan, 

   ini manginbayad sa imo mga sala.

Salmo sa Pagsabat:

Mga Salmo 128:1-2, 3,4-5

(S) Bulahan ang mga nagakahadlok sa Ginoo; kag nagasunod sang iya mga banas!

Malipayon ang mga nagatuman sa Ginoo, nga nagakabuhi suno sa iya mga sugo. Ang imo kinabudlayan mangintuman sa imo mga kinahanglanon, manginmalipayon ka kag manginmainuswagon. (S)

Ang imo asawa manginkaangay sang mabinungahon nga ubas sa imo balay, kag ang imo mga anak nga lalaki manginkaangay sang linghod nga kahoy nga olivo sa pmbot sang imo lamisa. (S)

Ang tawo nga nagatuman sa Ginoo pagabendisyunan gid kaangay sini. Kabay nga ang Ginoo nga yara sa Sion magbendisyon sa imo! Kabay nga makita mo ang Jerusalem nga gauswag sa bug-os nga mga inadlaw sang imo kabuhi! (S)

2. Ang Pagbasa gikan sa Sulat ni San Pablo nga Apostol, sa mga:

Taga-Colosas 3:12-21

   Mga utod: Mga tawo kamo sang Dios. Ginhigugma niya kamo kag ginpili nga mangin-iya kaugalingon. Gani isuklob ninyo ang pagkamaluloy-on, ang pagkamaayo, ang pagkamapainuboson, ang pagkalulo kag ang pagkamapinasensyahon. Magbinuligay kamo, kag magpinatawaray kamo kon may aligutgot kamo sa isa kag isa. Magpinatawaray kamo subong nga ang Ginoo nagpatawad sa inyo. Kag sa sini tanan idugang ang gugma nga nagahugpong sang tanan sa himpit nga paghiusa. Kag ang paghidait nga ginahatag ni Cristo magahari sa inyo mga tagipusoon, kay sa sini nga paghidait gintawag kamo sang Dios sing tingob, agod mangin-isa ka lawas. Kag magmapinasalamaton kamo. Ang pulong ni Cristo sa iya kabuganaan dapat magpuyo sa inyo mga tagipusoon. Magtudloanay kag maglinaygayay kamo sa bug-os nga kaalam. Magkanta kamo sang mga salmo, mga ambahanon kag balaan nga mga kalantahon. Magkanta kamo sa Dios nga may pagpasalamat sa inyo mga tagipusoon. Gani, ang tanan nga inyo ginahimo kag ginahambal, himoa ninyo sa ngalan ni Ginoong Jesus kag magpasalamat kamo sa Dios nga Amay paagi sa iya.

   Mga asawa tumana ang inyo mga bana, kay amo ini ang dapat ninyo nga pagahimuon subong nga mga Cristohanon. Mga bana, higugmaa ang inyo mga asawa kag indi ninyo sila pagpintasan. Mga anak, tumana gid ang inyo mga ginikanan sa tanan nga butang, kay amo ini ang inyo Cristohanon nga katungdanan kag nahamut-an ini sang Dios. Mga ginikanan, indi pagpaakiga ang inyo mga kabataan, kay basi madulaan sila sing paglaom.

Aleluya:

Colosas 3:15, 16

   Ang paghidait ni Kristo maghari unta sa inyo mga tagipusoon; ang mensahi ni Kristo magpuyo unta upod sa inyo.

Ang Pagbasa sang Santos nga Ebanghelyo suno kay:

San Mateo 2:13-15, 19-23

   Sang makahalin na sila, ang anghel sang Ginoo nagpakita kay Jose sa damgo kag nagsiling, “Bangon ka, dalha ang bata kag ang iya iloy kag magpalagyo kamo pa Egipto. Pabilin kamo didto tubtob magsiling ako sa inyo nga magbalik na kamo, kay si Herodes magapangita sang bata sa pagpatay sa iya.” 

   Gani sa sina gid nga gab-i si Jose nagbangon kag gindala ang bata kag ang iya iloy pa Egipto, sa diin sia nagpuyo tubtob nga si Herodes napatay. 

   Ini nahanabo agod matuman ang ginsiling sang Ginoo paagi sa propeta, “Gintawag ko ang akon anak nga lalaki halin sa Egipto.”

   Sang mapatay na si Herodes, ang anghel sang Ginoo nagpakita kay Jose sa damgo didto sa Egipto kag nagsiling, “Bangon ka, dalha ang bata kag ang iya iloy kag balik ka sa duta sang Israel kay patay na ang mga nagahingabot sa kabuhi sang bata.” Gani si Jose nagbangon, gindala ang bata kag ang iya iloy, kag nagbalik sa duta sang Israel. 

   Pero sang pagkabati ni Jose nga si Arquelao amo ang nagbulos kay Herodes nga iya amay subong hari sang Judea, nahadlok sia magkadto didto. Sa tapos sia mapaandaman sa damgo, nagkadto sia sa duta sang Galilea. Didto sia nagpuyo sa banwa nga ginatawag Nazaret, agod matuman ang ginsiling sang mga propeta, “Pagatawgon sia nga Nazareno.”

Disyembre 28 | Disyembre 30

"Si Raquel Nagahibi tungod sa iya mga Kabataan"

Liturhiya sang Pulong

(Sabado, Disyembre 28, 2019)

Ang mga Santos Inosentes, mga Martires

Ang Pagbasa gikan sa Nahauna nga Sulat ni:

San Juan 1:5—2:2

   Karon amo ini ang balita nga amon nabatian gikan sa iya Anak kag amon ginabantala sa inyo: ang Dios kapawa kag wala gid sing kadudolman sa iya. Gani, kon magsiling kita nga may pagpakighiusa kita sa iya, pero nagakabuhi kita gihapon sa kadudolman, nagabutig kita sa aton mga ginahambal kag mga ginahimo. Pero kon kita nagakabuhi sa kapawa, subong nga ang Dios yara sa kapawa, ti may paghiliusa kita sa isa kag isa, kag ang dugo ni Jesus nga iya Anak nagatinlo sa aton sa tanan nga mga sala.

   Kon magsiling kita nga wala kita sing sala, ginadayaan naton ang aton kaugalingon kag ang kamatuoran wala sa aton. Pero, kon ituad ta ang aton mga sala sa Dios, tumanon niya ang iya ginsaad kag himuon niya ang nagakaigo: patawaron niya ang aton mga sala, kag tinluan niya kita sang tanan naton nga kalautan. Kon magsiling kita nga wala gid kita makasala, ginahimo naton ang Dios nga butigon, kag ang iya pulong wala sa aton. 

   Ginasulat ko ini sa inyo, mga anak ko, agod nga indi kamo magpakasala. Pero kon may yara nga makasala, may mananabang kita sa atubangan sang Amay, si Jesu-Cristo, ang matarong. Kay si Cristo mismo amo ang paagi nga mapatawad ang aton mga sala, kag indi lang ang aton mga sala, kundi ang mga sala man sang tanan nga mga tawo.

Salmo sa Pagsabat:

Mga Salmo 124:2-3, 4-5, 7-8

(S) Nakapalagyo kita kaangay sang isa ka pispis sa manugsiod.

“Kon ang Ginoo wala magdampig sa aton,sang pagsalakay sa aton sang aton mga kaaway, kuntaniila kita ginlamon nga buhi, sa ila nagabalingaso nga kaakig batok sa aton. (S)

Dayon kuntani gindala nila kita palayo subong sang baha,ginlapawan nila kita kuntani subong sang tubig, ang nagasagana nga baha naglumos na kuntani sa aton. (S)

Ang siod nabugto; kag nahilway kita! Ang aton bulig nagahalin sa Ginoo, nga naghimo sang langit kag duta. (S)

Aleluya:

   Nagadayaw kami sa Imo nga Dios, nagabantala kamisa Imo nga Ginoo, ang Imo ginpili nga mangin martir nagadayawsa Imo, O Ginoo.

Ang Pagbasa sang Santos nga Ebanghelyo suno kay:

San Mateo 2:13-18

   Sang makahalin na sila, ang anghel sang Ginoo nagpakita kay Jose sa damgo kag nagsiling, “Bangon ka, dalha ang bata kag ang iya iloy kag magpalagyo kamo pa Egipto. Pabilin kamo didto tubtob magsiling ako sa inyo nga magbalik na kamo, kay si Herodes magapangita sang bata sa pagpatay sa iya.”

   Gani sa sina gid nga gab-i si Jose nagbangon kag gindala ang bata kag ang iya iloy pa Egipto, sa diin sia nagpuyo tubtob nga si Herodes napatay. 

   Ini nahanabo agod matuman ang ginsiling sang Ginoo paagi sa propeta, “Gintawag ko ang akon anak nga lalaki halin sa Egipto.” 

   Sang mahibal-an ni Herodes nga ginpalapaw sia sang mga dumoloaw gikan sa sidlangan, naakig gid sia. Nagmando sia nga pamatyon ang tanan nga mga bata nga lalaki sa Betlehem kag sa iya sini palibot nga mga banwa halin sa duha ka tuig paidalom, suno sa tion nga iya nahibal-an sa mga dumoloaw. 

   Sa sini natuman ang ginsiling ni Jeremias nga propeta: “Isa ka tingog ang nabatian sa Rama, ang tingog sang pagpanalambiton kag paghinibi. Si Raquel nagahibi tungod sa iya mga kabataan, nagahibi sia kag indi gid malugpayan, kay sila tanan nagkalamatay.”

Disyembre 27 | Disyembre 29

Nakita ni Juan nga ang Pulong sang Dios Nangintawo kag Nagtuo

Liturhiya sang Pulong

(Biyernes, Disyembre 27, 2019)

San Juan, Apostol kag Ebanghelista

Ang Pagbasa gikan sa Nahauna nga Sulat:

San Juan 1:1-4

Nagasulat kami sa inyo nahanungod sang Pulong sang kabuhi nga yara na nga daan halin pa sa ginsugoran. Amon ini nabatian, kag nakita sang amon mga mata. Huo, amon ini nakit-an, kag nakaptan sang amon mga kamot. Sang ginpahayag ini nga kabuhi, amon ini nakita. Gani nagahambal kami nahanungod sini kag nagasugid sa inyo nahanungod sang kabuhi nga wala sing katapusan nga upod anay sa Amay, kag ginpahayag ini sa amon. Ang amon nakit-an kag nabatian ginasugid man namon sa inyo, agod kamo makabuylog sa amon sa pagpakighiusa upod sa Amay kag sa iya Anak nga si Jesu-Cristo. Ini amon ginasulat, agod nga ang amon kalipay manginbug-os.

Salmo sa Pagsabat:

Mga Salmo 97:1-2, 5-6, 11-12

(S) Magkalipay kamo sa Ginoo tanan nga mga matarong.

Ang Ginoo amo ang hari! Magkalipay ka, O duta! Magkalipay kamo, tanan nga mga isla sang kadagatan! Ang mga panganod kag kadudolman yara sa palibot Niya; mg Iya ginharian napasad sa, katarungan kag hustisya. (S)

Ang mga bakulod nagakatunaw subong sang kandila sa atubangan sang Ginoo, sa atubangan sang Ginoo sang bug-os nga duta. Ang kalangitan nagabantala sang Iya pagkamatarong, kag ang tanan nga katawohan nakakita sang Iya himaya. (S)

Ang kapawa nagasilak sa mga matarong, kag ang kalipay sa maayo nga mga tawo. Magkalipay kamo, tanan nga mga matarong, tungod sang ginhimo sang Ginoo! Dumdoma ang ginhimo sang Balaan nga Dios, kag magpasalamat kamo sa iya! (S)

Aleluya:

   Nagadayaw kami sa Imo nga Dios, nagabantala kami sa Imo nga Ginoo; ang Imo ginpili nga mangin martir nagadayaw sa Imo, O Ginoo.

Ang Pagbasa sang Santos nga Ebanghelyo suno kay:

San Juan 20:1, 2-8

   Aga pa gid sang nahauna nga adlaw sang simana sang madulomdulom pa, si Maria Magdalena nagkadto kay Simon Pedro kag sa gintuton-an nga hinigugma ni Jesus, kag ginsugiran sila, “Ginkuha nila ang Ginoo sa lulobngan, kag wala kami makahibalo kon diin nila sia ginbutang!” 

   Dayon si Pedro kag yadtong isa ka gintuton-an nagkadto sa lulobngan. Nagdalagan sila nga duha, pero yadtong isa ka gintuton-an madasig pa sa kay Pedro kag una sia nakaabot sa lulobngan. Nagsid-ing sia kag nakita niya ang tela nga lino, pero wala sia magsulod. Si Simon Pedro nga nagasunod sa iya, nag-abot man, kag nagsulod sia dayon sa lulobngan. Nakita niya ang tela nga lino nga nahamtang didto, kag ang tela nga ginsambod sa ulo ni Jesus. Wala ini nahamtang upod sa mga tela nga lino, kundi nabalulon. Dayon yadtong gintuton-an nga una nag-abot sa lulobngan nagsulod man. Nakakita sia kag nagtuo.

Disyembre 26 | Disyembre 28

"Ang Nagapadayon tubtob sa Katapusan Maluwas"

Liturhiya sang Pulong

(Huwebes, Disyembre 26, 2019)

San Esteban, Nahauna nga Martir

Ang Pagbasa gikan sa mga:

Binuhatan sang mga Apostoles 6:8-10; 7:54-59

   Si Esteban, isa ka tawo nga puno sang bugay sang Dios kag gahom, naghimo sing mga milagro kag katingalahan nga mga buhat sa mga tawo. Pero may mga katapo sang sinagoga nga ginatawag Hilway nga mga Tawo nga nagpamatok sa iya. Ini sila mga Judio halin sa Cirene kag Alejandria. Sila kag ang iban nga mga Judio halin sa Cilicia kag Asia nakigsuay sa kay Esteban. Pero indi nila madaog si Esteban kay ang Espiritu naghatag sa iya sing kaalam sa paghambal.
   Samtang nagapamati ang mga katapo sang Konsilyo sa kay Esteban naakig gid sila kag nagpabagrot sila sang ila mga ngipon sa kaakig. Pero si Esteban, nga puno sang Espiritu Santo, nagtangla sa langit kag nakita niya ang himaya sang Dios kag si Jesus nga nagatindog sa tuo sang Dios. Nagsiling sia, “Tan-awa ninyo! Nakita ko ang langit nga ginbuksan kag ang Anak sang Tawo nga nagatindog sa tuo sang Dios!”
   Nagsilinggit sila, dungan ang pagtabon sang ila mga dulonggan, kag nagdinaguso sila pakadto sa iya. Dayon ginpagwa nila sia sa siyudad kag didto ginbato. Ginbilin sang mga saksi ang ila mga kunop sa isa ka pamatan-on nga ginahingalanan kay Saulo. Kag sang ginabato nila si Esteban, nagpanawag sia sa Ginoo, “Ginoong Jesus, batuna ang akon espiritu!”

Salmo sa Pagsabat:

Mga Salmo 31:3-4, 6 kag 8, 16 kag 17, 21

(S) Sa imo nga kamut ginatugyan ko ang akon kaugalingon, O Ginoo.

Ikaw ang akon dalangpan nga magaapin sa akon, ang akon mangangapin nga magaluwas sa akon. Ikaw ang akon dalangpan kag mangangapin, ubayi kag tuytoyi ako suno sa imo ginsaad. (S)
Sa imo mga kamot ginatugyan ko ang akon kaugalingon, ikaw, O Ginoo, ang magaluwas sa akon, Dios ikaw nga masaligan. Tungod sang imo mapinadayunon nga gugma, magakalipay ako kag magkasadya. (S)
Yara ako sa gihapon sa imo mga kamot, luwasa ako sa akon mga kaaway kag sa mga nagahingabot sa akon. Ako imo alagad, ipakita ang imo kaayo sa akon, luwasa ako tungod sang imo mapinadayunon nga gugma! (S)

Aleluya:

Mga Salmo 118:26, 27

   Bulahan ang nagakari sa ngalan sang Ginoo; Ang Ginoo amo ang Dios, nangin maayo sia sa aton.

Ang Pagbasa sang Santos nga Ebanghelyo suno kay:

San Mateo 10:17-22

   Mag-andam kamo kay may mga tawo nga magadakop kag magadala sa inyo sa hukmanan, kag pagabunalon kamo nila sa ila mga sinagoga. Isumbong kamo sa atubangan sang mga pangulo kag mga hari tungod sa akon, sa pagsugid sang Maayong Balita sa ila kag sa mga Gentil. Samtang ginasumbong nila kamo, indi kamo magpalibog kon ano ang inyo inugsabat ukon paano ang inyo pagsabat, kay kon mag-abot ina nga tion pagatudloan kamo sang inyo isiling. Kay ang inyo ihambal indi inyo kundi iya sang Espiritu sang inyo Amay nga magahambal paagi sa inyo.
   “Ang utod magapapatay sang iya utod, ang amay magapapatay sang iya anak, kag ang anak magabato sa iya ginikanan kag magapapatay sa ila. Pagadumtan kamo sang tanan nga mga tawo tungod sa akon, pero ang nagapadayon tubtob sa katapusan maluwas.

Disyembre 25 (Misa sa Adlaw) | Disyembre 27

"Ang Pulong Nangintawo kag Nagpuyo sa Tunga Naton"

Liturhiya sang Pulong

(Miyerkules, Disyembre 25, 2019)

Ang Pagkatawo sang Ginoo
Misa sa Adlaw

1. Ang Pagbasa gikan sa Libro ni:

Isaias nga Propeta 52:7-10

   Daw ano katahom nga tan-awon
   ang mensahero nga nagapakari
   nga nagalakbay sa mga kabukiran,
   nagadala sang maayong balita,
   ang balita sang paghidait!
   Ginapahibalo niya ang pagdaog,
   kag nagasiling sa Sion,
   “Ang imo Dios hari!”
   Ang mga nagabantay sang siudad nagahinugyaw,
   nagahinugyaw sing tingob sa kalipay!
   Makita nila sang ila kaugalingon nga mga mata
   ang pagbalik sang Ginoo sa Sion!
   Magsinggit kamo sa kalipay,
   mga naguba nga duog sang Jerusalem!
   Ang Ginoo naglipay sang iya mga tawo;
   ginluwas niya ang iya siyudad.
   Ang Ginoo naggamit sang iya balaan nga gahom;
   ginluwas niya ang iya mga tawo,
   kag ang bug-os nga kalibutan nakakita sini.

Salmo sa Pagsabat:

Mga Salmo 98:1,2, 3-4,5-6

(S) Ang tanan nga katawohan bisan diin nakakita sang pagdaog sang aton Dios.

Magkanta sing bag-o nga ambahanon sa Ginoo kay nakahimo sia sang makatilingala nga mga butang! Paagi sa iya kaugalingon nga gahom kag balaan nga kusog, nagdaog sia. (S)

Ginbantala sang Ginoo ang iya pagdaog, ginpakilala niya sa mga pungsod ang iya gahom sa pagluwas. (S)

Ang tanan nga katawohan bisan diin nakakita sang pagdaog sang aton Dios! Magkanta kamo sa kalipay sa Ginoo, O bug-os nga duta; Dayawa sia sa mga ambahanon kag mga paghinugyaw! (S)

Magkanta kamo sing mga pagdayaw sa Ginoo nga ginaupdan sang mga arpa, magtukar kamo sang sonata sa mga arpa; upod sa mga trumpeta kag mga korneta, maghinugyaw kamo sa atubangan sang Ginoo, ang hari! (S)

2. Ang Pagbasa gikan sa Sulat sa mga:

Hebreo 1:1-6

   Sang una nga panahon ang Dios naghambal sa aton mga katigulangan paagi sa mga propeta sa madamo nga mga beses kag sa sarisari nga mga paagi. Pero sa sining ulihi nga mga inadlaw naghambal sia sa aton paagi sa iya Anak. Paagi sa iya gintuga sang Dios ang bug-os nga kalibutan, kag sia man ang ginpili sang Dios nga manginmanunobli sang tanan nga mga butang sa katapusan. Sia nagasilak sa kasanag sang himaya sang Dios, kag sia ang matuod nga laragway sang kinaugali sang Dios. Ginapadayon niya ang tanan nga mga butang sa sining kalibutan paagi sa iya gamhanan nga pulong. Sang matinluan niya ang mga tawo sang ila mga sala, naglingkod sia sa tuo sang Dios nga Labing Gamhanan didto sa langit.
   Ang Anak nanginlabaw pa sa mga anghel, subong nga ang ngalan nga ginhatag sang Dios sa iya labaw sa ila mga ngalan. Kay ang Dios wala gid magsiling sa bisan isa sang iya mga anghel:
     “Ikaw ang akon anak
     Karon nga adlaw
     Ako nangin-imo Amay.”
   Kag wala man sing anghel nga ginsingganan sang Dios:
     “Ako mangin-iya Amay,
     Kag sia mangin-akon Anak.”
   Sang buot na ipadala sang Dios ang iya panganay nga Anak sa kalibutan, nagsiling man sia:
   “Ang tanan nga mga anghel sang Dios
   Dapat magsimba sa iya."

Aleluya:

   Nagsubang sa aton ang isa ka santos nga adlaw; kari kamo, mga kapungsoran, simbaha ninyo ang Ginoo tungod kay karon nga adlaw nagpanaog sa duta ang daku nga kapawa.

Ang Pagbasa sang Santos nga Ebanghelyo suno kay:

San Juan 1:1-18

   Sa wala pa matuga ang kalibutan, yara na ang Pulong. Ang Pulong kaupod sa Dios, kag ang Pulong Dios. Halin gid sa ginsugoran ang Pulong kaupod sa Dios. Paagi sa Pulong gintuga sang Dios ang tanan, kag wala sing may natuga kon indi paagi sa iya. Ang Pulong amo ang ginhalinan sang kabuhi, kag ini nga kabuhi nagdala sing kapawa sa mga tawo. Ang kapawa nagasiga sa kadudolman, kag ang kadudolman wala makadaog sang kapawa.
   Ang Dios nagpadala sang iya manugbalita, ang tawo nga ginahingalanan kay Juan, nga nagkari sa pagsugid sa mga tawo nahanungod sang kapawa. Ginsugiran niya sila agod ang tanan magpamati sang mensahi, kag magtuo. Sia mismo indi amo ang kapawa, kundi nagkari sia sa pagsugid nahanungod sang kapawa.
   Ang Pulong amo ang matuod nga kapawa nga nagakari sa kalibutan kag nagaiwag sa tanan nga mga tawo. Ang Pulong yara na nga daan sa kalibutan. Ang kalibutan gintuga sang Dios paagi sa iya, pero ang kalibutan wala magkilala sa iya. Nagkari sia sa iya kaugalingon nga banwa, pero ang iya mga kasimanwa wala magbaton sa iya. Pero may yara gid man nga nagbaton kag nagtuo sa iya. Gani ini sila ginhatagan sing kinamatarong nga mangin-anak sang Dios. Nangin-anak sila sang Dios indi sa tawuhanon nga paagi sa bagay nga natawo sila nga may tawuhanon nga amay, kundi ang Dios mismo amo ang ila Amay.
   Ang Pulong nangintawo kag nagpuyo sa tunga naton. Nakita naton ang iya himaya nga puno sang grasya kag kamatuoran; ini amo ang himaya nga nabaton niya subong bugtong nga Anak sang Amay.
   Nagpanaksi si Juan nahanungod sa iya, kag nagsinggit, “Amo ini sia ang akon ginsiling sa inyo nga magakari nga ulihi lang sa akon, pero labaw pa sia sa akon, kay sa wala pa ako matawo, yara na sia!”
   Gikan sa kabuganaan sang iya manggad ginhatagan niya kita tanan sang nagadinasundason nga mga bugay. Ang Kasugoan ginhatag sang Dios paagi kay Moises, pero ang grasya kag kamatuoran nag-abot sa aton paagi kay Jesu-Cristo. Wala sing bisan sin-o nga nakakita sa Dios, kundi ang bugtong nga Anak nga Dios, nga yara sa luyo sang Amay, amo gid lamang ang nakakita sa Dios. Sia amo ang nagpahayag sa iya.

Disyembre 25 (Misa sa Kaagahon) | Disyembre 26

Ang mga Manugbantay sang Karnero Naghimaya sa Dios tungod sang Tanan nga ila Nakit-an

Liturhiya sang Pulong

(Miyerkules, Disyembre 25, 2019)

Ang Pagkatawo sang Ginoo
Misa sa Kaagahon

1. Ang Pagbasa gikan sa Libro ni:

Isaias nga Propeta 62:11-12

   Ang Ginoo nagabantala sa bug-os nga duta,
   “Sugiri ang mga pumoluyo sang Jerusalem
   ang Ginoo nga inyo manluluwas magaabot,
   nga nagadala upod sa iya
   sang mga tawo nga iya ginluwas!”
   Pagatawgon kamo “Balaan nga mga tawo sang Dios,”
   “Mga tawo nga ginluwas sang Ginoo!”
   Ang Jerusalem pagatawgon
   nga "Ang Siyudad nga ginahigugma sang Dios,"
   "Ang Siyudad nga Wala Ginsikway sang Dios.”

Salmo sa Pagsabat:

Mga Salmo 97:1 kag 6, 11-12

(S) Magasilak karon ang kapawa sa aton; kay natawo para sa aton ang Ginoo.

Ang Ginoo amo ang hari! Magkalipay ka, O duta! Magkalipay kamo, tanan nga mga isla sang kadagatan! Ang kalangitan nagabantala sang iya pagkamatarong. Kag ang tanan nga katawohan nakakita sang iya himaya. (S)

Ang kapawa nagasilak sa mga matarong kag ang kalipay sa maayo nga mga tawo. Magkalipay kamo, tanan nga mga matarong, tungod sang ginhimo sang Ginoo! Dumdoma ang ginhimo sang Balaan nga Dios, kag magpasalamat kmo sa iya! (S)

2. Ang Pagbasa gikan sa Sulat ni San Pablo nga Apostol, kay:

Tito 3:4-7

   Labing hinigugma nakon: Pero sang pagpahayag sang kaayo kag gugma sang Dios nga aton Manlulowas, iya kita ginluwas. Indi tungod sang maayo nga mga buhat nga aton ginhimo, kundi tungod sang iya kaluoy ginluwas niya kita paagi sa paghugas, nga paagi sini ginahatagan kita sang Espiritu Santo sang bag-o nga pagkatawo kag bag-o nga kabuhi. Kay ginhatag sang Dios sa aton sing bugana ang Espiritu Santo, paagi kay Jesu-Cristo nga aton Manlulowas, agod nga tungod sang iya grasya mapakamatarong kita sa atubangan sang Dios, kag makaangkon sang kabuhi nga wala sing katapusan nga aton ginalauman.

Aleluya:

Lucas 2:14

   Himaya sa Dios sa kahitaasan; kag sa duta paghidait sa mga tawo nga maayo sing kabubut-on.

Ang Pagbasa sang Santos nga Ebanghelyo suno kay:

San Lucas 2:15-20

   Sang makahalin na ang mga anghel pabalik sa langit, ang mga manugbantay sang karnero nagsinilingay, “Dali makadto kita sa Betlehem kag tan-awon ta ining hitabo nga ginpahayag sang Ginoo sa aton.” Gani, nagdalidali sila sa pagkadto sa Betlehem kag nakita nila si Maria kag si Jose, kag ang bata nga nagahigda sa isa ka pasungan. Sang makita nila ang bata, ginpanugid nila ang ginhambal sa ila sang anghel nahanungod sini nga bata. Ang tanan nga nakabati sini natingala gid sang ginpanugid sa ila sang mga manugbantay sang karnero. Pero gintipigan ni Maria ini nga mga butang kag ginpamalandungan sa iya kaugalingon. Ang mga manugbantay sang karnero nagbalik nga nagahimaya kag nagadayaw sa Dios tungod sang tanan nga ila nabatian kag nakit-an; subong gid ini sang ginhambal sa ila sang anghel.

Disyembre 25 (Misa sa Tungang Gab-i) | Disyembre 25 (Misa sa Adlaw)

"Karon gid nga Gab-i Natawo ang Inyo Manlulowas, Cristo nga Ginoo"

Liturhiya sang Pulong

(Miyerkules, Disyembre 25, 2019)

Ang Pagkatawo sang Ginoo
Misa sa Tungang Gab-i

1. Ang Pagbasa gikan sa Libro ni:

Isaias nga Propeta 9:1-6

   Ang duta sang tribo ni Zabulon kag ni Neftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagapuyo ang mga dumoluong.

   Ang mga tawo nga nagalakat 

   sa kadudolman nakakita 

   sing daku nga kapawa! 

   Nagapuyo sila sa duta sang mga landong, 

   pero karon ang kapawa nagasilak sa ila. 

   O Ginoo, ginhatagan mo sila sing daku nga kalipay; 

   ginhimo mo nga magmalipayon sila. 

   Maghugyaw sila sa Imo ginhimo, subong sang 

   paghinugyaw sang mga tawo nga nagaani, 

   ukon magpartida sila 

   sang inagaw nga mga manggad. 

   Kay ginbali mo ang gota nga nagapabug-at sa ila 

   kag ang baston nga naghanot sang ila mga abaga. 

   Ikaw, O Ginoo, ang naglutos sang pungsod 

   nga nagpigos kag nagpamintaha sang Imo mga tawo 

   subong sang imo paglutos sadto anay sang 

   mga hangaway sang Midian. 

   Ang mga botas sang nagpanggubat nga mga hangaway, 

   kag ang tanan nila nga mga bayu 

   nga nabulit sang dugo, 

   pagasunogon sa kalayo! 

   Ang isa ka bata matawo sa aton! 

   Ang isa ka anak ginhatag sa aton! 

   Kag sia ang aton mangin pangulo. 

   Pagatawgon sia,"Maalam nga Manuglaygay," 

   “Gamhanan nga Dios,” 

   “Amay nga wala sing Katubtoban,” 

   “Amay sang Paghidait.”

Salmo sa Pagsabat:

Mga Salmo 96:1-2, 2-3,11-12,13

(S) Sa karon gid nga gab-i natawo para sa aton ang Manluluwas, si Kristo nga Ginoo.

Magkanta kamo sing bag-o nga ambahanon sa Ginoo! Mag-amba kamo sa Ginoo, O bug-os nga duta! Magkanta kamo sa Ginoo, kag dayawa ninyo Sia! (S)

Isugid adlaw-adlaw ang maayong balita nga sia nagluwas sa aton! Ibantala ang iya himaya sa mga kapungsoran. Ang iya gamhanan nga mga binuhatan sa tanan nga katawohan. (S)

Magkasadya kamo, O langit kag duta! Magdaguhob ka, O dagat, kag ang tanan nga mga tinuga nga yara sa imo; magkasadya kamo, O mga latagon, kag ang tagsa ka butang nga yara sa inyo! Dayon ang mga kahoy sa kagulangan magahinugyaw sa kasadya sa atubangan sang Ginoo. (S)

Kay nagakari sia sa paggahom sang duta. Pagagamhan niya ang tanan nga katawohan sang kalibutan sa katarungan kag kamatuoran. (S)

2. Ang Pagbasa gikan sa Sulat ni San Pablo nga Apostol, kay:

Tito 2:11-14

   Labing hinigugma ko: Kay ginpahayag sang Dios ang iya grasya para sa kaluwasan sang tanan nga mga tawo. Ina nga grasya nagatudlo sa aton sa pagsikway sang pagkabuhi nga di-diosnon kag sang kalibutanon nga mga kailigbon, kag sa pagkabuhi sa sining kalibutan nga may pagpugong sang kaugalingon, matarong kag diosnon, samtang nagapaabot kita sang bulahan nga Adlaw nga aton ginalauman, nga ang himaya sang aton gamhanan nga Dios kag Manlulowas nga si Jesu-Cristo magapakita. Gintugyan niya ang iya kaugalingon tungod sa aton, agod maluwas kita sa tanan nga mga kalautan kag manginputli nga mga tawo nga iya kaugalingon kag nagahandom sa paghimo sing maayo.

Aleluya:

Lucas 2:10-11

   Nagadala ako sa inyo sing isa ka daku nga kalipay. Sa karon gid nga gab-i natawo para sa aton ang Manluluwas, si Kristo nga Ginoo.

Ang Pagbasa sang Santos nga Ebanghelyo suno kay:

San Lucas 2:1-14

   Sadto nga panahon ang Emperador nga si Augusto nagmando nga ang tanan nga ginsakpan sang Emperyo magpalista sang ila kaugalingon para sa senso. Ining nahauna nga pagpanglista ginhimo sang si Cirenio ang gobernador sang Siria. Gani ang tagsatagsa nagpauli sa iya kaugalingon nga banwa sa pagpalista. Halin sa banwa sang Nazaret sa Galilea, si Jose nagpauli sa Judea, sa banwa nga ginatawag Betlehem, sa diin natawo si Haring David. Nagkadto sia didto kay sia kaliwat ni David. Nagpalista sia upod kay Maria nga ginsaad nga mangin-asawa niya. Nagabusong na si Maria, kag samtang didto sila sa Betlehem nag-abot ang tion nga inugbata na niya. Nagbata sia sang iya panganay nga lalaki. Ginputos niya ini sang lampin kag ginpahigda sa isa ka pasungan kay wala na sing lugar para sa ila sa balay nga dalayunan.

   Sa sadto nga duog may mga manugbantay sang karnero nga nagapulaw sa latagon sa bilog nga gab-i sa pagbantay sang ila mga hayop. Ang isa ka anghel sang Ginoo nagpakita sa ila, kag ang himaya sang Ginoo nagsilak sa ila. Hinadlukan gid sila, pero ang anghel sang Ginoo nagsiling sa ila, “Indi kamo magkahadlok! kay nagkari ako sa pagdala sa inyo sing Maayong Balita nga magahatag sing daku nga kalipay sa tanan nga mga tawo. Karon gid nga gab-i natawo sa banwa ni David ang inyo Manlulowas, ang Cristo nga Ginoo! Amo ini ang tanda para sa inyo: makita ninyo ang isa ka bata nga naputos sang lampin kag nagahigda sa isa ka pasungan.” Sa hinali nagpakita ang isa ka guban sang mga anghel sang langit kag nagbuylog sa sadto nga anghel kag nagkanta sila sini nga mga pagdayaw sa Dios: 

   “Himaya sa Dios sa kahitaasan! 

   Kag paghidait sa duta 

   Sa mga tawo nga iya nahamut-an!”

Disyembre 24 (Misa sa Bisperas sang Pagkatawo) | Disyembre 25 (Misa sa Kaagahon)

“Magaluwas Sia sang Iya mga Tawo sa ila mga Sala”

Liturhiya sang Pulong

(Martes, Disyembre 24, 2019)

Misa sa Bisperas sang Pagkatawo

1. Ang Pagbasa gikan sa Libro ni:

Isaias nga Propeta 62:1-5

   Magahambal ako sa pagpaisog sa Jerusalem;

   indi ako maghipos 

   tubtob nga indi sia maluwas, 

   kag ang iya pagdaog magadabdab 

   kaangay sang isa ka sulo sa kagab-ihon. 

   O Jerusalem, ang mga kapungsoran 

   makakita sa imo nga madinalag-on! 

   Ang tanan nila nga mga hari 

   makakita sang imo himaya. 

   Pagatawgon Ikaw sa bag-o nga ngalan, 

   isa ka ngalan nga ang Ginoo gid ang naghatag. 

   Mangin kaangay ikaw sang isa 

   ka matahom nga korona para sa Ginoo. 

   Indi na ikaw pagtawgon nga "Sinikway,” 

   ukon ang imo duta pagtawgon 

   nga "Ang Binayaan nga Asawa!" 

   Ang imo bag-o nga ngalan pagatawgon 

   “Ang Dios Nalipay sa Imo!” 

   ang imo duta pagatawgon 

   nga "Nakasal sing Malipayon,” 

   tungod kay ang Ginoo nalipay sa imo, 

   kag manginkaangay sia 

   sang isa ka bana sa imo duta. 

   Ang Ginoo magakuha sa imo subong iya asawa, 

   kag manginmalipayon kamo nga duha 

   subong ka malipayon sang isa ka asawa kag bana.

Salmo sa Pagsabat:

Mga Salmo 89:4-5; 16-17; 26 kag 29

(S) O Ginoo, magakanta ako gihapon nahanungod sang imo mapinadayunon nga gugma.

Nagsiling ka, "Naghimo ako sing kasugtanan sa tawo nga akon ginpili; nagsaad ako sa akon alagad nga si David, ang isa sang imo mga kaliwat manginhari sa wala sing katubtoban; tipigan ko ang imo ginharian sa wala sing katapusan." (S)

Bulahan ang mga tawo nga nagasimba sa imo sa mga ambahanon, nga nagakabuhi sa kapawa sang imo kaayo. Tungod sa imo nagakalipay sila sa bug-os nga adlaw, kag nagadayaw sa imo tungod sang imo kaayo. (S)

Magasiling sia sa akon, ‘Ikaw ang akon Amay kag akon Dios; Ikaw ang akon Mangangapin kag Manluluwas.' Pagahimuon ko sia nga akon panganay nga anak nga lalaki, ang Iabing gamhanan sa tanan nga mga hari. (S)

2. Ang Pagbasa gikan sa mga:

Binuhatan sang mga Apostoles 13:16-17; 22-25

   Nagtindog si Pablo, nagsinyas sa ila nga maghipos kag nagsiling:

   “Mga kasimanwa ko nga mga Israelinhon kag tanan nga mga Gentil nga yari diri nga nagasimba sa Dios, pamatii ninyo ako! Ang Dios sining mga tawo sang Israel nagpili sang aton mga katigulangan kag nagpadaku sa ila samtang nga didto sila nagapuyo subong nga mga dumoluong sa Egipto. Ginpagwa sila sang Dios sa Egipto paagi sa iya daku nga gahom. 

   Sang mapahalin sia, ginhimo sang Dios si David nga hari nila. Amo ini ang ginsiling sang Dios nahanungod sa iya, ‘Si David nga anak ni Jese amo ang tawo nga akon naluyagan, kay isa sia ka tawo nga nagatuman sang tanan nga ginasugo ko sa iya.’ Si Jesus, isa sang mga kaliwat ni David, amo ang ginhimo sang Dios nga Manlulowas sang Israel suno sa iya ginsaad. Sa wala pa makasugod si Jesus sang iya bulohaton, nagwali si Juan sa tanan nga mga tawo sa Israel nga magbiya sila sa ila mga sala kag magpabautiso. Kag sang nagahingapos na si Juan sang iya bulohaton, nagsiling sia sa mga tawo, ‘Sa inyo abi, sin-o bala ako? Indi ako ang ginapaabot ninyo. Pero tandai ninyo! Nagakari sia nga ulihi lang sa akon, pero indi ako takos sa paghubad sang higot sang iya mga sandalyas.’

Aleluya:
   Buas, pagapanason ang kalainan sang duta; kag magahari sa aton ang Manluluwas sang kalibutan.

Ang Pagbasa sang Santos nga Ebanghelyo suno kay:

San Mateo 1:1-25 

   Amo ini ang lista sang mga katigulangan ni Jesu-Cristo nga kaliwat ni David nga kaliwat man ni Abraham.

   Si Abraham amay ni Isaac; si Isaac amay ni Jacob; si Jacob amay ni Juda kag sang iya mga utod nga lalaki. Si Juda amay ni Fares kag ni Zara nga ang ila sini iloy si Tamar. Si Fares amay ni Esrom; si Esrom amay ni Aram. Si Aram amay ni Aminadab; si Aminadab amay ni Naason; si Naason amay ni Salmon; si Salmon amay ni Booz kag ang iya sini iloy si Rahab. Si Booz amay ni Obed kag ang iya sini iloy si Rut. Si Obed amay ni Jese; si Jese amay ni Haring David. 

   Si David amay ni Salomon kag ang iya sini iloy amo ang asawa anay ni Urias; si Salomon amay ni Roboam; si Roboam amay ni Abias; si Abias amay ni Asa; si Asa amay ni Josafat; si Josafat amay ni Joram; si Joram amay ni Ozias; si Ozias amay ni Joatam; si Joatam amay ni Acas; si Acas amay ni Ezequias. Si Ezequias amay ni Manases; si Manases amay ni Amon; si Amon amay ni Josias; si Josias amay ni Jeconias kag sang iya mga utod nga lalaki, sang panahon nga ang mga taga-Israel ginbihag pa Babilonia.
   Sa tapos mabihag ang mga taga-Israel sa Babilonia, amo pa ini ang mga katigulangan ni Jesus: si Jeconias amay ni Salatiel; si Salatiel amay ni Zorobabel; si Zorobabel amay ni Abiud; si Abiud amay ni Eliaquim; si Eliaquim amay ni Azor; si Azor amay ni Sadoc; si Sadoc amay ni Aquim; si Aquim amay ni Eliud; si Eliud amay ni Eleazar; si Eleazar amay ni Matan; si Matan amay ni Jacob; si Jacob amay ni Jose, nga bana ni Maria nga amo ang iloy ni Jesus nga ginatawag Cristo.
   Gani may katorse ka mga kaliwatan halin kay Abraham tubtob kay David, kag may katorse man ka mga kaliwatan halin kay David tubtob sang pagbihag sang mga taga-Israel pa Babilonia, kag katorse pa gid ka kaliwatan halin sa pagdala sang mga taga-Israel sa Babilonia tubtob sa pagkatawo sang Cristo.
   Amo ini ang pagkatawo ni Jesu-Cristo. Ang iya iloy nga si Maria kalasalon na kay Jose, pero sa wala pa sila makasal nasapwan ni Maria nga nagabusong na sia sa gahom sang Espiritu Santo. Si Jose nga kalasalon sa iya isa ka tawo nga nagahimo sing matarong, pero indi sia luyag nga mahuy-an si Maria sa mga tawo. Gani ginpakamaayo niya ang pagbiya sa iya sa tago lang. Samtang ginabinagbinag ni Jose ini nga butang, ang isa ka anghel sang Ginoo nagpakita sa iya sa damgo nga nagasiling, “Jose, kaliwat ni David, indi ka magkahadlok sa pagpangasawa kay Maria, kay ang Espiritu Santo amo ang naglalang sang ginabusong niya. Magaanak sia sing lalaki, kag pagahingalanan mo sia nga Jesus, kay magaluwas sia sang iya mga tawo sa ila mga sala.”
   Karon ini tanan nahanabo agod mapamatud-an ang ginhambal sang Ginoo paagi sa propeta, “Ang isa ka ulay magabusong kag magaanak sang isa ka bata nga lalaki, kag pagatawgon sia nga Emanuel” (nga kon sayuron, “Ang Dios kaupod naton”).
   Gani sang pagmata ni Jose gintuman niya ang ginsiling sang anghel sang Ginoo, kag iya ginpangasawa si Maria. Pero wala si Jose magtandog kay Maria tubtob nga nag-anak sia sing lalaki, kag ginhingalanan ni Jose ang bata nga Jesus.

Disyembre 24 (Misa de Aguinaldo)| Disyembre 25 (Misa sa Tungang Gab-i)

Wala sing Imposible sa Dios

Liturhiya sang Pulong

(Martes, Disyembre 24, 2019)

Misa de Aguinaldo

Ang Pagbasa gikan sa Ikaduha nga Libro ni:

Samuel 7:1-5, 8-12, 14, 16

   Karon malig-on na ang paggahom ni David sa iya ginharian, kag ang Ginoo nag-apin sa iya sa tanan niya nga mga kaaway. Dayon ang hari nagsiling kay Natan nga propeta, “Tan-awa! Ako iya nagapuyo sa palasyo nga nahimo sa kahoy nga sedro, pero ang Kaban sang Kasugtanan sang Dios yara lang sa tolda!” 

   Si Natan nagsabat, “Himoa ang tanan nga luyag mo, kay ang Ginoo nagaupod sa imo.” Pero sa sadto nga gab-i ang Ginoo nagsiling kay Natan, “Lakat ka kag singgana  ang akon alagad nga si David nga ako nagasiling sa iya, ‘Indi ikaw ang magapatindog sang isa ka templo nga akon pagapuy-an. 

   Gani singgana ang akon alagad nga si David nga ako, ang Ginoo nga Makagagahom nagasiling sa iya, ‘Halin sa pagkamanugbantay sang mga karnero sa latagon, ginpili ko ikaw nga manginpangulo sang akon mga tawo nga Israel. Gin-updan ko ikaw bisan diin ikaw magkadto, kag ginlutos ko ang tanan mo nga mga kaaway sa atubangan mo. Himuon ko ikaw nga gamhanan subong ka gamhanan sa labing gamhanan nga mga pangulo sang duta. Magapili ako sing isa ka duog para sa akon mga tawo nga Israel kag paestaron ko sila didto, sa diin magapuyo sila nga indi na gid pagtublagon. Sugod sang ila pagsulod sa sini nga duta, ginsalakay sila sang mapintas nga mga tawo, pero indi na ini matabo liwat sa ila. Nagasaad ako nga apinan ko kamo nga indi maano batok sa tanan ninyo nga mga kaaway, kag hatagan ko ikaw sing mga kaliwat. Kon mapatay ka kag ilubong upod sa imo mga katigulangan, himuon ko ang isa sang imo mga kaliwat nga hari, kag palig-unon ko ang iya ginharian. Ako mangin-iya amay, kag sia mangin-akon anak. Kon maghimo sia sing malain, ako magasilot sa iya subong sang isa ka amay nga nagasilot sang iya anak. 

   Indi ka mawad-an sing mga kaliwat, kag himuon ko ang imo ginharian nga manginwalay katapusan. Ang imo harianon nga paggahom wala sing katapusan.’”

Salmo sa Pagsabat:

Mga Salmo 89:2-3, 4-5, 27 kag 29

(S) Magaamba ako sa gihapon, O Ginoo, sang imo malig-on nga paghigugma.
O Ginoo, magakanta ako sa gihapon nahanungod sang imo mapinadayunon nga gugma, sa tanan nga tion ibantala ko ang Imo katutom. Nakahibalo ako nga ang imo gugma magapadayon sa walay katapusan, nga ang imo katutom wala sing katapusan subong sang langit. (S)
Nagsiling ka, "Naghimo ako sing kasugtanan sa tawo nga akon ginpili; nagsaad ako sa akon alagad nga si David, 'Ang isa sang imo mga kaliwat manginhari sa wala sing kambtoban; tipigan ko ang imo ginharian sa wala sing katapusan." (S)
Pagahimuon ko sia nga akon panganay nga anak nga lalaki, ang labing gamhanan sa tanan nga mga hari. Pagatumanon ko sa gihapon ang saad sa iya. Ang isa sang iya mga kaliwat manginhari sa gihapon, ang iya ginharian manginwalay katapusan subong sang langit. (S)

Aleluya:
   O Kabugwason nga masanag kag adlaw sang katarungan, kari ka kag pasanagi ang mga nagapuyo sa kadudolman.

Ang Pagbasa sang Santos nga Ebanghelyo suno kay:

San Lucas 1:67-79

   Si Zacarias nga iya amay napun-an sang Espiritu Santo kag nagtagna sang masunod: 

   “Dayawon ta ang Ginoo, 

   ang Dios sang Israel! 

   Kay iya ginduaw kag gintubos 

   ang iya mga tawo. 

   Ginbangon niya 

   ang isa ka gamhanan nga Manlulowas 

   para sa aton, 

   ang isa nga kaliwat ni David 

   nga iya alagad. 

   Amo ini ang iya ginsiling sang una 

   paagi sa iya balaan nga mga propeta: 

   Nagsaad sia sa pagluwas sa aton 

   gikan sa aton mga kaaway, 

   kag sa gahom sang tanan 

   nga nagadumot sa aton. 

   Nagsiling sia nga kaluoyan niya 

   ang aton mga ginikanan, 

   kag dumdomon niya 

   ang iya balaan nga kasugtanan. 

   Nagsaad sia sa aton amay nga si Abraham, 

   kag nagsumpa nga luwason niya kita 

   sa aton mga kaaway, 

   kag tugotan kita sa pag-alagad sa iya 

   nga walay kahadlok, 

   nga manginbalaan kag matarong 

   sa iya atubangan, 

   sa tanan nga mga inadlaw sang aton kabuhi. 

   Ikaw, anak ko, 

   pagatawgon nga propeta 

   sang Labing Makagagahom nga Dios, 

   magauna ka sa Ginoo 

   sa pag-aman sang iya dalanon, 

   sa pagsugid sa iya mga tawo 

   nga maluwas sila, 

   paagi sa pagpatawad 

   sang ila mga sala. 

   Kay ang aton Dios maluloy-on kag malulo. 

   Pabutlakon niya ang adlaw sang kaluwasan 

   sa aton, kag pasilakon niya ini 

   gikan sa langit 

   sa tanan nga nagapuyo sa madulom 

   nga landong sang kamatayon, 

   sa pagtuytoy sang aton mga tikang 

   sa dalanon sang paghidait.”

Disyembre 23 | Disyembre 24 (Misa sa Bisperas sang Pagkatawo)

"Mangin-ano ayhan ini nga Bata?"

Liturhiya sang Pulong

(Lunes, Disyembre 23, 2019)

Misa de Aguinaldo

Ang Pagbasa gikan sa Libro ni:

Malaquias nga Propeta 3:1-4, 23-24

   Ang Ginoo nga Makagagahom nagasabat, “Magapadala ako sang akon manugbalita nga magaaman sang dalan para sa akon. Dayon sa hinali ang Ginoo nga inyo ginapangita omagaabot sa iya Templo. Ang manugbalita nga inyo ginahandom nga makita magaabot kag magabantala sang akon kasugtanan.”

   Pero sin-o bala ang sarang makaagwanta sa sadto nga adlaw kon magkari sia? Sin-o bala ang mabuhi kon magpahayag sia? Manginkaangay sia sang maisog nga habon ukon sang kalayo nga nagatunaw sang metal. Magakari sia sa paghukom kaangay sang platero nga nagatunaw kag nagapuraw sang pilak. Subong nga ang platero nga nagapuraw sang pilak kag bulawan, ang mensahero sang Ginoo magapapuraw man sang mga pari, agod magadala sila sa Ginoo sang nagakabagay nga mga dulot. Dayon ang mga dulot nga pagadalhon sa Ginoo sang mga tawo sang Juda kag Jerusalem manginkahalamut-an sa Ginoo subong sang una.

   "Pero sa wala pa mag-abot ang daku kag makakulogmat nga adlaw sang Ginoo, ipadala ko sa inyo si Elias nga propeta. Pasag-ulion niya ang mga ginikanan kag mga anak, kay kon indi, magaabot ako kag laglagon ko ang inyo pungsod."

Salmo sa Pagsabat:

Mga Salmo 25:4-5, 8-9, 10 kag 14

(S) Magtindog kamo kag magbayaw sang inyo mga ulo kay ang inyo kaluwasan malapit na.

Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)

Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubot-on. (S)

Sa gugma kag katutom iya ginatuytoyan ang tanan nga nagatuman sang iya kasugtanan kag mga kasugoan. Ang Ginoo abyan sang tanan nga nagatuman sa iya, kag ginatudloan niya sila sang iya kasugtanan. (S) 

Aleluya:

   O Hari sang mga Pungsod kag sadsaran nga bato sang simbahan, kari ka kag luwasa ang tawo nga imo ginhimo gikan sa yab-ok.

Ang Pagbasa sang Santos nga Ebanghelyo suno kay:

San Lucas 1:57-66

   Nag-abot ang tion nga inugbata na ni Elisabet, kag nagbata sia sing lalaki. Ang iya mga kaingod kag mga paryente nakabati kon daw ano kadaku ang kaluoy sang Ginoo sa iya kag nagkinalipay sila upod sa iya. 

   Sang walo na ka adlaw ang bata, nag-abot sila sa pagtuli sa iya. Kuntani hingalanan nila sia nga Zacarias nga amo ang ngalan sang iya amay. Pero ang iya iloy nagsiling, “Indi! Pagahingalanan sia kay Juan.” 

   Nagsiling sila sa iya, “Pero wala ka gid sing paryente nga amo ina ang ngalan!” Dayon nagsinyas sila sa iya amay sa pagpamangkot kon sin-o ang iya luyag nga ipahingalan sa bata. 

   Nagpangayo si Zacarias sing papel kag nagsulat, “Hingalanan sia kay Juan.” Natingala gid sila tanan. Sa gilayon makahambal na si Zacarias kag nagdayaw sia sa Dios. Ang ila mga kaingod hinadlukan gid, kag ang balita nahanungod sining mga hitabo naglapnag sa mga kabaryuhanan sa mga bakulod sang Judea. Ang mga nakabati sini nga mga hitabo nagpamalandong kag nagpamangkot, “Mangin-ano ayhan ini nga bata?” Kag maathag nga ang gahom sang Ginoo yara sa iya.

Disyembre 22 | Disyembre 24

"Luwason Niya ang Iya mga Tawo sa ila mga Sala"

Liturhiya sang Pulong

(Domingo, Disyembre 22, 2019)

Misa de Aguinaldo

1. Ang Pagbasa gikan sa Libro ni:

Isaias nga Propeta 7:10-14

   Ang Ginoo nagpadala sing isa pa gid ka mensahi kay Acaz: “Pangayo ka sa Ginoo nga imo Dios sing isa ka tanda. Ayhan magahalin ini sa kadadalman sa kalibutan sang mga patay ukon halin sa langit sa ibabaw.”

   Si Acaz nagsabat, “Indi ako magpangayo sing isa ka tanda. Indi ko pagtilawan ang Ginoo.”

   Tungod sini sa Isaias nagsiling, “Karon, kaliwat ni David, pamati ka. Indi maayo para sa imo ang pagpaugtas sa mga tawo—paugtason man bala nimo ang Dios? Karon ang Ginoo mismo magahatag sa imo sang isa ka tanda. May isa ka dalaga nga nagabusong. Magabata sia sing isa ka anak nga lalaki kag pagatawgon sia nga ‘Emmanuel.’ 

Salmo sa Pagsabat:

Mga Salmo 24:1-2, 3-4, 5-6 

(S) Magasulod ang Ginoo, sia ang hari nga gamhanan.

Ang kalibutan kag ang tanan nga yara sa iya, iya sang Ginoo, iya man ang duta kag ang tanan nga nagakabuhi sa duta. Iya ini gintukod sa madalom nga mga tubig sa idalom sang duta, ginpasad niya ang iya mga sadsaran sa kadadalman sang dagat. (S)

Sin-o bala ang makataklad sa bukid sang Ginoo? Sin-o bala ang makasulod sa iya balaan nga Templo? Ang may matinlo nga binuhatan kag paghunahona, nga wala nagasimba sa mga dios-dios, kag wala nagasaad sang kabutigan. (S)

Pagabendisyunan sia sang Ginoo, kag ang Dios nga iya manlulowas magapakilala nga wala sia sing sala. Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 1:1-7

   Pag-abiabi halin kay Pablo, alagad ni Cristo Jesus, kag isa ka pinili nga apostol kag gintawag sang Dios sa pagwali sang Maayong Balita. 

   Ining Maayong Balita ginsaad sang Dios sang una pa gid paagi sa iya mga propeta, kag nasulat sa Balaan nga mga Kasulatan. Nahanungod ini sa iya Anak, ang aton Ginoong Jesu-Cristo: kon nahanungod sa iya pagkatawo, kaliwat sia ni David; kag kon nahanungod sa iya diosnon nga pagkabalaan, ginpakita nga sia Anak sang Dios kag may gahom, paagi sa iya pagkabanhaw. Paagi sa iya, ginhatag sang Dios sa akon ang pribilihiyo nga mangin-isa ka apostol bangod lamang kay Cristo, agod nga matuytoyan ko ang mga tawo sa bug-os nga kalibutan sa pagtuo kag sa pagtuman; lakip man kamo nga yara dira sa Roma, nga gintawag sang Dios agod mangin-iya ni Jesu-Cristo. 

   Gani, nagasulat ako sa inyo tanan nga yara sa Roma nga ginahigugma sang Dios kag gintawag nga mangin-iya kaugalingon nga mga tumoluo. 

   Kabay nga ang Dios nga aton Amay kag si Ginoong Jesu-Cristo maghatag sa inyo sang grasya kag paghidait. 

Aleluya:

Mateo 1:23

   Ang isa ka ulay magabusong kag magaanak sang isa ka bata nga lalaki, kag pagatawgon sia nga Emanuel” (nga kon sayuron, “Ang Dios kaupod naton”). 

Ang Pagbasa sang Santos nga Ebanghelyo suno kay:

San Mateo 1:18-24 

   Amo ini ang pagkatawo ni Jesu-Cristo. Ang iya iloy nga si Maria kalasalon na kay Jose, pero sa wala pa sila makasal nasapwan ni Maria nga nagabusong na sia sa gahom sang Espiritu Santo. Si Jose nga kalasalon sa iya isa ka tawo nga nagahimo sing matarong, pero indi sia luyag nga mahuy-an si Maria sa mga tawo. Gani ginpakamaayo niya ang pagbiya sa iya sa tago lang. Samtang ginabinagbinag ni Jose ini nga butang, ang isa ka anghel sang Ginoo nagpakita sa iya sa damgo nga nagasiling, “Jose, kaliwat ni David, indi ka magkahadlok sa pagpangasawa kay Maria, kay ang Espiritu Santo amo ang naglalang sang ginabusong niya. Magaanak sia sing lalaki, kag pagahingalanan mo sia nga Jesus, kay magaluwas sia sang iya mga tawo sa ila mga sala.” 

   Karon ini tanan nahanabo agod mapamatud-an ang ginhambal sang Ginoo paagi sa propeta, “Ang isa ka ulay magabusong kag magaanak sang isa ka bata nga lalaki, kag pagatawgon sia nga Emanuel” (nga kon sayuron, “Ang Dios kaupod naton”). 

   Gani sang pagmata ni Jose gintuman niya ang ginsiling sang anghel sang Ginoo, kag iya ginpangasawa si Maria. 

Disyembre 21 | Disyembre 23

Malipayon nga Pagpaabot sang Mesias

Liturhiya sang Pulong

(Sabado, Disyembre 21, 2019)

Misa de Aguinaldo

Ang Pagbasa gikan sa mga:

Ambahanon ni Salomon 2:8-14

   Nabatian ko ang tingog sang akon kahagugma.

   Nagapakari sia nga nagadalagan sa mga kabakuloran, 

   nga nagapanglakbay sa mga kabakuloran pakadto sa akon. 

   Ang akon kahagugma subong sang gasela, 

   subong sang torite nga usa. 

   Yara sia nagatindog sa likod sang amon dingding.

   Nagasid-ing sia sa mga bintana kag nagatan-aw 

   sa akon sa berha. 

   Ang akon kahagugma naghagad sa akon. 

   Kari ka, palangga ko, upod ka sa akon, hinigugma ko.

   Ang tigtulognaw nagligad na, kag ang tingulan tapos na, 

   sa mga latagon ang mga bulak nagapamukadkad.

   Tion ini sang mga pagkanta, ang mga kalantahon sang 

   mga tukmo mabatian sa mga kaumhan. 

   Ang mga higos bagnas na, kag nagapangamyon 

   ang nagapamulak nga mga ubas. 

   Gani kari, palangga ko, upod ka sa akon, hinigugma ko. 

   Nagapanago ikaw subong sang alimukon 

   sa gikab sang bato. 

   Patan-awa ako sang imo magayon 

   nga nawong kag pabatia ako sang imo malulo nga tingog.

Salmo sa Pagsabat:

Mga Salmo 33:2-3, 11-12, 20-21

(S) O mga Matarong, isinggit ang inyo kalipay sa Ginoo; kantahi ninyo sia sing bag-o nga ambahanon.

Magpasalamat kamo sa Ginoo paagi sa pagtukar sing arpa, magkanta kamo sa iya nga ginaupdan sang mga instrumento nga may kuwerdas, kantahi ninyo sia sing bag-o nga ambahanon, tukara sing maayo ang arpa, kag magkanta sing tudo! (S)
Pero ang iya mga plano nagapadayon sa walay katapusan, ang iya mga tinutoyo nagapabilin nga wala sing katapusan. Bulahan ang pungsod nga ang iya Dios amo ang Ginoo; bulahan ang mga tawo nga ginpili sang Ginoo nga mangin-iya kaugalingon! (S)
Ang aton paglaum yara sa Ginoo; sia ang aton manugbulig kag mangangapin. Nagakalipay kita tungod sa iya; sa iya balaan nga ngalan nagasalig kita. (S)

Aleluya:

   O Emmanuel, hari kag tagdala sang kasugoan, kari ka sa pagluwas sa amon, O Ginoo kag Dios namon.

Ang Pagbasa sang Santos nga Ebanghelyo suno kay:

San Lucas 1:39-45

   Sa tapos sadto si Maria nanghimos kag nagdalidali sa pagkadto sa isa ka banwa sa kabakuloran sang Judea. Nagkadto sia sa balay ni Zacarias kag iya gin-abiabi si Elisabet. Sang pagkabati ni Elisabet sang pag-abiabi ni Maria, nagkibo ang bata sa iya tiyan. Napun-an si Elisabet sang Espiritu Santo, kag sa mabaskog nga tingog naghmbal, "Bulahan ikaw sa tanan nga mga babayi! Bulahan ang bata nga imo ginadala! Ngaa matabo ining daku nga butang sa akon, nga ang iloy sang akon Ginoo magduaw sa akon? Kay sang pagkabati ko gid sang imo pag-abiabi, ang bata sa akon tiyan nagkibo sa kalipay. Bulahan ikaw nga nagtuo nga matuman sa imo ang ginsiling sang Ginoo."

Disyembre 20 | Disyembre 22

"Magkalipay ka, Ikaw nga labing Nahamut-an, ang Ginoo yara sa Imo!"

Liturhiya sang Pulong

(Biyernes, Disyembre 20, 2019)

Ang Pagbasa gikan sa Libro ni:

Isaias nga Propeta 7:10-14

   Ang Ginoo nagpadala sing isa pa gid ka mensahi kay Acaz: “Pangayo ka sa Ginoo nga imo Dios sing isa ka tanda. Ayhan magahalin ini sa kadadalman sa kalibutan sang mga patay ukon halin sa langit sa ibabaw.”

   Si Acaz nagsabat, “Indi ako magpangayo sing isa ka tanda. Indi ko pagtilawan ang Ginoo.”

   Tungod sini sa Isaias nagsiling, “Karon, kaliwat ni David, pamati ka. Indi maayo para sa imo ang pagpaugtas sa mga tawo—paugtason man bala nimo ang Dios? Karon ang Ginoo mismo magahatag sa imo sang isa ka tanda. May isa ka dalaga nga nagabusong. Magabata sia sing isa ka anak nga lalaki kag pagatawgon sia nga ‘Emmanuel.’

Salmo sa Pagsabat:

Mga Salmo 24:1-2, 3-4, 5-6

(S) Ang Ginoo magasulod; sia ang hari sang himaya.

Ang kalibutan kag ang tanan nga yara sa iya, iya sang Ginoo, iya man ang duta kag ang tanan nga nagakabuhi sa duta. Iya ini gintukod sa madalom nga mga tubig sa idalom sang duta, ginpasad niya ang iya mga sadsaran sa kadadalman sang dagat. (S)

Sin-o bala ang makataklad sa bukid sang Ginoo? Sin-o bala ang makasulod sa iya balaan nga Templo? Ang may matinlo nga binuhatan kag paghunahona, nga wala nagasimba sa mga dios-dios, kag wala nagasaad sang kabutigan. (S)

Pagabendisyunan sia sang Ginoo, kag ang Dios nga iya manlulowas magapakilala nga wala sia sing sala. Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob. (S)

Aleluya:

   O Yabi ni David nga nagabukas sang puwerta sang walay katapusan nga ginharian; kari ka, kag hilwaya kami gikan sa pagkabilanggo sang sala.

Ang Pagbasa sang Santos nga Ebanghelyo suno kay:

San Lucas 1:26-38

   Sa ikan-om nga bulan sang pagbusong ni Elisabet ginpadala sang Dios si Gabriel nga anghel didto sa banwa sang Galilea nga ginatawag Nazaret. Ang anghel may dala nga mensahi para sa isa ka ulay nga dalaga nga kalasalon sa isa ka tawo nga ginhingalanan kay Jose nga kaliwat ni Haring David. Ang ngalan sang dalaga amo si Maria. Ang anghel nagpakita sa iya kag nagsiling, “Magkalipay ka! Ikaw nga labing nahamut-an, ang Ginoo yara sa imo!” 

   Sang pagkabati ni Maria sang ginsiling sang anghel natublag gid sia, kag nagpalibog kon ano ang kahulogan sang ginhambal sang anghel. Nagsiling ang anghel sa iya, “Indi ka magkahadlok, Maria, kay nahamut-an ka sang Dios. Yari karon, magabusong ka kag magaanak sang isa ka bata nga lalaki, kag pagahingalanan mo sia kay Jesus. Mangindaku sia kag pagatawgon nga Anak sang Labing Makagagahom nga Dios. Ang Ginoong Dios magahimo sa iya nga hari subong sang iya amay nga si David, kag manginhari sia sing dayon sa mga kaliwat ni Jacob kag ang iya ginharian wala sing katapusan.” 

   Si Maria nagsabat sa anghel, “Ano ang pagkahimo sini, kay ulay ako nga babayi?”

   Ang anghel nagsabat, “Ang Espiritu Santo magakunsad sa imo, kag ang gahom sang Dios magalikop sa imo. Tungod sini ang balaan nga bata nga matawo sa imo pagatawgon nga Anak sang Dios. Dumdoma bala ang imo paryente nga si Elisabet. Bisan tigulang na sia kag baw-as, nagabusong na sing anom ka bulan sang isa ka bata nga lalaki. Kay sa Dios wala sing bisan ano nga indi mahimo.” 

   Si Maria nagsiling, “Alagad ako sang Ginoo. Kabay nga matuman ini sa akon suno sa imo ginsiling.” 

   Kag ang anghel nagbiya sa iya. 

Disyembre 19 | Disyembre 21

"Madamo ang Magakalipay sa Iya Pagkatawo"

Liturhiya sang Pulong

(Huwebes, Disyembre 19, 2019)

Misa de Aguinaldo

Ang Pagbasa gikan sa Libro sang:

Mga Hukom 13:2-7, 24-25

   May isa ka tawo nga ginhingalanan kay Manoa, nga taga-Sora, kag isa sia ka katapo sang tribo ni Dan. Ang iya asawa wala gid makapamata. Nagpakita ang anghel sang Ginoo sa iya kag nagsiling, "Wala gid ikaw makapamata, pero sa indi madugay magabusong ikaw kag magaanak sing isa ka bata nga lalaki. Tandaan mo nga indi ka gid mag-inom sing bino ukon makahulobog nga ilimnon, ukon magkaon sang ginadilian nga mga pagkaon, kay karon magabusong ka kag magaangkon sang isa ka anak nga Ialaki. Indi mo sia pagguntingan sang iya buhok, kay sa adlaw sang iya pagkatawo, pagaihalad sia sa Dios subong isa ka Nazareo. Sia ang magasugod sa pagluwas sa Israel gikan sa mga Filistinhon." Nian nagkadto ang babayi sa iya bana kag ginsugiran sia, "Nagkadto sa akon ang isa ka tawo sang Dios, nga ang iya dagway makakulogmat pareho sang anghel sang Dios. Wala ako magpamangkot sa iya kon diin sia maghalin, kag wala man sia magsugid sa akon sang iya ngalan. Pero nagsiling sia nga magabusong ako kag makaangkon sing anak nga lalaki. Ginsingganan niya ako nga indi mag-inom sing bino ukon makahulobog nga ilimnon, ukon magkaon sang ginadilian nga mga pagkaon, kay ang bata pagaihalad sa Dios subong isa ka Nazareo halin sa iya pagkatawo tubtob mapatay sia."

   Ang babayi nag-anak sang isa ka bata nga lalaki, kag ginhingalanan niya sia kay Samson. Nagdaku ang bata kag ginbendisyunan sia sang Ginoo. Kag ang espiritu sang Ginoo nagsugod sa pagpanghikot sa iya, samtang didto sia sa kampamento sang Dan, sa gin-utlan sang Sora kag Estaol.

Salmo sa Pagsabat:

Mga Salmo 71:3-4, 5-6, 16-17

(S) Pun-a ang akon bibig sang imo pagdayaw agod mag-amba sang imo himaya.

Ikaw mangindalangpan ko nga mapag-on, kag malig-on nga pamakod sa pag-apin sa akon, ikaw ang akon dalangpan kag mangangapin. O Dios ko, luwasa ako sa malaut nga mga tawo, gikan sa gahom sang mapintas kag malain nga mga tawo. (S)

Ang akon paglaom, O Ginoo, yara sa imo, nagsalig ako sa imo halin sang pamatan-on pa ako. Nagsalig ako sa imo sa bug-os ko nga kabuhi, gin-apinan mo ako halin pa sang akon pagkatawo. Magadayaw ako sa imo sa gihapon! (S)

Dayawon ko ang imo gahom, O Ginoong Dios, ibantala ko ang imo lamang pagkamatarong. Gintudloan mo ako halin sang pamatan-on pa ako, kag tubtob karon ginasugid ko ang imo makatilingala nga mga binuhatan. (S) 

Aleluya:

   O Gamot ni Jese nga mangin tanda sa tunga sang mga katawohan, kari ka sing may pagdali sa pagluwas sa amon.

Ang Pagbasa sang Santos nga Ebanghelyo suno kay:

San Lucas 1:5-25

   Sang si Herodes amo ang hari sa Judea, may isa ka pari nga ginhingalanan kay Zacarias sa linya sang pagkapari ni Abias. Ang iya asawa si Elisabet nga kaliwat man sang panimalay sang mga pari. Nagkabuhi sila sing matarong sa atubangan sang Dios, kag nagtuman sang tanan nga mga kasugoan kag mga pagsulondan sang Ginoo. Wala sila sing bata kay si Elisabet baw-as kag tigulang na sila. 

   Isa ka adlaw, turno na ni Zacarias ang pag-alagad subong pari sa atubangan sang Dios sa bahin sang iya grupo. Suno sa kinabatasan sang mga pari, nahanabo nga natuon sa iya ang pagsunog sang insyenso sa altar. Gani nagsulod sia sa templo sang Ginoo, samtang ang madamo nga mga tawo nagapangamuyo sa gwa sa tion nga ginasunog ang insyenso. Dayon may nagpakita sa iya nga isa ka anghel sang Ginoo nga nagatindog sa tuo nayon sang altar sa diin ginasunog ang insyenso. Sang pagkakita ni Zacarias sa anghel natublag sia kag hinadlukan gid. Pero ang anghel nagsiling sa iya, “Zacarias, indi ka magkahadlok! Ginpamatian sang Dios ang imo pangamuyo kag si Elisabet nga imo asawa magaanak sing isa ka bata nga lalaki. Pagahingalanan mo sia kay Juan. Magamalipayon kag masinadyahon ka tungod sa iya, kag madamo ang magakalipay sa iya pagkatawo! Kay mangindaku sia sa atubangan sang Ginoo. Indi sia mag-inom sing bino ukon ilimnon nga makahulobog. Mapun-an sia sang Espiritu Santo halin sa iya pagkatawo. Pabalikon niya ang madamo nga mga tawo sang Israel sa Ginoo nga ila Dios. Magauna sia sa iya nga may kusog kag gahom kaangay kay Elias nga propeta. Pabalikon niya ang maayo nga kaangtanan sang mga ginikanan kag mga kaanakan. Palisuon niya ang mga di-masinulondon sa panghunahona sang mga matarong. Amanon niya ang mga tawo para sa Ginoo.” 

   Si Zacarias nagsiling sa anghel, “Ano ang pagkahibalo ko kon matuod ini? Tigulang na ako kag subong man ang akon asawa.” 

   Ang anghel nagsabat sa iya, “Ako si Gabriel nga nagatindog sa atubangan sang Dios. Ginpadala niya ako sa paghambal kag sa pagsugid sa imo sining maayong balita. Pero tungod kay wala ka magpati sang akon ginsugid sa imo nga matuman sa nagakaigo nga tion, magaapa ka tubtob sa adlaw nga matuman ining ginsiling ko.” 

   Sa pihak nga bahin, ang mga tawo naghinulat kay Zacarias. Natingala sila nga nadugayan sia sa sulod sang templo. Sang paggwa niya indi na sia makahambal. Gani nahangpan nila nga nakakita sia sing palanan-awon sa templo. Nagsinyas na lang sia sa ila kay indi na sia makahambal. 

   Sang matapos niya ang iya turno sa pag-alagad sa templo nagpauli sia. Sang ulihi ang iya asawa nga si Elisabet nagbusong kag wala sia magguwagowa sa ila balay sa sulod sang lima ka bulan. Nagsiling sia, “Sa sining paagi ginbuligan gid man ako sang Ginoo kag ginkuha niya ang akon kahuloy-an sa atubangan sang mga tawo.” 

Disyembre 18 | Disyembre 20