HULOBATON - Kapitulo 1

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31

Ang Kapuslanan sang mga Hulobaton

1 Ang mga hulobaton ni Salomon nga anak ni David kag hari sang Israel.

2 Paagi sini makahibalo ka sang kaalam kag sang maayo nga laygay, kag makahangop sang mga pulong nga may madalom sing kahulogan.

3 Ini sila makatudlo sa imo sa pagkabuhi sing maalamon, maminatud-on, matarong, kag wala sing pinilian.

4 Makatudlo ini sing kaalam sa wala sing tinun-an, kag makahatag sing ihibalo sa mga pamatan-on.

5 Ini nga mga hulobaton makadugang sing kaalam sa mga maalam, kag makatuytoy sa mga edukado,

6 agod makahangop sila sang madalom nga kahulogan sang mga hulobaton, kag sang mga paktakon sang maalam nga mga tawo.

Laygay sa mga Pamatan-on nga Lalaki

7 Ang pagtahod sa GINOO amo ang ginsugoran sang kaalam. Pero ang buangboang nagahikay sang kaalam kag pagtudlo.

8 Toto, pamatii ang ginatudlo sang imo amay kag tumana ang ginasiling sang imo iloy.

9 Ang ila pagtudlo magapatahom sang imo pamatasan subong sang pagpatahom sa imo sang isa ka turban ukon kulintas.

10 Toto, indi ka magpadaladala sa mga pagsulay sang mga makasasala

11 kon magsiling sila, “Upod ka sa amon; mangita kita sing palatyon; banggaan ta ang tawo nga wala sing sala!

12 Ayhan buhi pa sila kag mabakod sang aton pagkakita sa ila, pero kon maagyan ta sila tapos gid sila.

13 Makakita kita sing madamo nga manggad, kag pun-on ta ang aton mga balay sang aton mga inagaw.

14 Dali, upod ka sa amon, kag partihon naton ang aton kinawatan.”

15 Toto, indi ka mag-upod sa mga tawo nga kaangay sini. Palayo ka sa ila.

16 Maabtik sila sa paghimo sing kalainan kag nagakalam gid ang ila kamot sa pagpatay sing tawo.

17 Wala sing pulos ang paghabyog mo sang sapyod kon ang pispis nga dalakpon mo nagatan-aw.

18 Pero ini nga mga tawo nagabutang sing siod para sa ila kaugalingon, kag sila man lang ang madakpan sang ila kaugalingon nga siod.

19 Ang makawat masunson nagakapatay sa pagpangawat. Amo ini ang masami nagakatabo sa tawo nga nagakabuhi paagi sa pagpangawat.

Ang Kaalam Nagasinggit

20 Pamatii ninyo! Ang kaalam nagasinggit sa mga kalsada kag mga plasa.

21 Nagasinggit sia sing mabaskog sa mga puwerta sang siyudad, kag sa bisan diin nga ginatipunan sang mga tawo.

22 Amo ini ang ginasinggit niya: “Mga buangboang! Tubtob san-o pa bala nga luyag kamo manginbuangboang? Tubtob san-o pa bala ang inyo pagyaguta sang ihibalo? Indi gid bala kamo matudloan?

23 Magpamati kamo kon sabdungon ko kamo. Laygayan ko kamo sing maayo kag tudloan ko kamo sang akon ihibalo.

24 Nagpanawag ako sa inyo sa pag-agda sa inyo, pero indi kamo magpamati. Wala kamo magsapak sa akon.

25 Wala ninyo pagsapaka ang tanan ko nga mga laygay, kag indi kamo luyag magpatudlo sa akon.

26 Gani, kon yara kamo sa kalisod kadlawan ko kamo. Magauligyat ako sa inyo kon mag-abot ang kakugmat,

27 kaangay sang mabaskog nga bagyo nga nagadala sing mga kahalitan, kag yara kamo sa pag-antos kag sa kasubo.

28 Kon magpanawag kamo sa akon, indi ako magsabat sa inyo. Kon magpangita kamo sa akon, indi ninyo ako makita.

29 Kay ginhikayan ninyo ang ihibalo, kag wala gid kamo magtahod sa GINOO.

30 Indi gid kamo luyag magpalaygay sa akon, kag wala kamo magsapak sang akon pagsabdong sa inyo.

31 Gani, pagaagumon ninyo ang nagakabagay sa inyo, kag kamo ang magaantos sang inyo mga pahito.

32 Ang wala sing tinun-an nga mga tawo nagakamatay tungod kay ginsikway nila ang kaalam. Ang mga buangboang nagakalaglag tungod sang ila pagpasapayan.

33 Pero ang nagapamati sa akon magakabuhi nga may kalig-unan. Indi sia maano kag wala sia sing dapat kahadlukan.”

MGA SALMO - Kapitulo 150 <<<   >>> HULOBATON - Kapitulo 2