Marso 19, 2021, San Jose, Bana ni Santa Maria

Liturhiya sang Pulong

Nahauna nga Balasahon - 2 Samuel 7:4-5, 12-14, 16

Salmo sa Pagsabat - Mga Salmo 89:2-3, 4-5, 27 kag 29

Ika-2 nga Balasahon - Roma 4:13, 16-18, 22

Sa Wala pa ang Ebanghelyo - Mga Salmo 84:5

Ebanghelyo - Mateo 1:16, 18-21, 24

1. Ang Pagbasa gikan sa Ikaduha nga Libro ni:

Samuel 7:4-5, 12-14, 16

   Sadto nga mga inadlaw: Ang Ginoo nagsiling kay Natan, “Lakat ka kag singgana  ang akon alagad nga si David nga ako nagasiling sa iya, ‘Indi ikaw ang magapatindog sang isa ka templo nga akon pagapuy-an. Kon mapatay ka kag ilubong upod sa imo mga katigulangan, himuon ko ang isa sang imo mga kaliwat nga hari, kag palig-unon ko ang iya ginharian. Magapatindog sia sing isa ka templo para sa akon, kag himuon ko nga ang iya mga kaliwat magagahom sa walay katapusan. Ako mangin-iya amay, kag sia mangin-akon anak. Kon maghimo sia sing malain, ako magasilot sa iya subong sang isa ka amay nga nagasilot sang iya anak. Indi ka mawad-an sing mga kaliwat, kag himuon ko ang imo ginharian nga manginwalay katapusan. Ang imo harianon nga paggahom wala sing katapusan.’”

Salmo sa Pagsabat:

Mga Salmo 89:2-3, 4-5, 27 kag 29

(S) Ang iya kaliwat magapabilin sa walay katapusan.

Nakahibalo ako nga ang imo gugma magapadayon sa walay katapusan, nga ang imo katutom wala sing katapusan subong sang langit. Nagsiling ka, "Naghimo ako sing kasugtanan sa tawo nga akon ginpili; nagsaad ako sa akon alagad nga si David. (S)

Ang isa sang imo mga kaliwat mangin hari sa wala sing katubtoban; tipigan ko ang imo ginharian sa wala sing katapusan." Ang kalangitan nagakanta sang makatilingala nga mga butang nga imo ginahimo; ang mga balaan nagakanta sang imo katutom, O Ginoo. (S)

Pagahimuon ko sia nga akon panganay nga anak nga lalaki, ang labing gamhanan sa tanan nga mga hari. Ang isa sang iya mga kaliwat mangin hari sa gihapon, ang iya ginharian mangin walay katapusan subong sang langit. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 4:13, 16-18, 22

   Mga utod: Ang Dios nagsaad kay Abraham kag sa iya mga kaliwat nga ang kalibutan mangin-iya. Ginhimo ini nga saad, indi kay gintuman ni Abraham ang Kasugoan, kundi kay nagtuo sia, kag ginbaton sia sang Dios subong isa ka matarong nga tawo. 

    Gani, ang saad napasad sa pagtuo, agod nga mangingarantiya ini subong isa ka regalo sang Dios para sa tanan nga mga kaliwat ni Abraham—indi lamang sa mga nagatuman sang Kasugoan, kundi man sa mga nagatuo subong kay Abraham. Kay si Abraham amo ang amay nga espirituhanon naton tanan. Ang kasulatan nagasiling, “Ginhimo ko ikaw nga amay sang madamo nga mga kapungsoran.” Gani, ang saad matuod sa atubangan sang Dios, ang Dios nga gintuohan ni Abraham—ang Dios nga nagabanhaw sang mga minatay, kag sa iya pagmando ginatuga ang mga butang nga wala pa matuga. Si Abraham nagtuo kag naglaom, bisan wala na sing paglaom. Gani, “nangin-amay sia sang madamo nga mga kapungsoran,” subong sang ginasiling sang kasulatan, “Manginsubong sini kadamo ang imo mga kaliwat.” Tungod sini, si Abraham “ginpakamatarong sang Dios,” paagi sa iya pagtuo.

Sa wala pa ang Ebanghelyo:

Mga Salmo 84:5

   Bulahan ang nagapuyo sa imo templo, nga nagakanta sa gihapon sa pagdayaw sa imo.

Ang Pagbasa sang Santos nga Ebanghelyo suno kay:

San Mateo 1:16, 18-21, 24

   Si Jacob amay ni Jose, nga bana ni Maria nga amo ang iloy ni Jesus nga ginatawag Cristo. Amo ini ang pagkatawo ni Jesu-Cristo. Ang iya iloy nga si Maria kalasalon na kay Jose, pero sa wala pa sila makasal nasapwan ni Maria nga nagabusong na sia sa gahom sang Espiritu Santo. Si Jose nga kalasalon sa iya isa ka tawo nga nagahimo sing matarong, pero indi sia luyag nga mahuy-an si Maria sa mga tawo. Gani ginpakamaayo niya ang pagbiya sa iya sa tago lang. Samtang ginabinagbinag ni Jose ini nga butang, ang isa ka anghel sang Ginoo nagpakita sa iya sa damgo nga nagasiling, “Jose, kaliwat ni David, indi ka magkahadlok sa pagpangasawa kay Maria, kay ang Espiritu Santo amo ang naglalang sang ginabusong niya. Magaanak sia sing lalaki, kag pagahingalanan mo sia nga Jesus, kay magaluwas sia sang iya mga tawo sa ila mga sala.” 

    Gani sang pagmata ni Jose gintuman niya ang ginsiling sang anghel sang Ginoo, kag iya ginpangasawa si Maria.

Marso 18 | Marso 20

Marso 18, 2021, Huwebes, Ika-4 nga Semana sang Kwaresma

Liturhiya sang Pulong

Nahauna nga Balasahon - Exodo 32:7-14

Salmo sa Pagsabat - Mga Salmo 106:19-20, 21-22, 23

Sa Wala pa ang Ebanghelyo - Juan 3:16

Ebanghelyo - Juan 5:31-47

Ang Pagbasa gikan sa Libro sang:

Exodo 32:7-14

Ang Ginoo nagsiling kay Moises, “Dalidali ka kag magdulhog, kay ang imo mga tawo, nga ginpagwa gikan sa Egipto naghimo sing malaut nga butang. Madali lang nila ginbayaan ang mga pagsulondan nga akon gintudlo sa ila: naghimo sila sing isa ka tinday nga baka gikan sa tinunaw nga bulawan, kag ginsimba nila ini, kag nagdulot sing mga halad sa sini. Nagsiling sila, ‘O Israel, ini amo ang imo dios nga nagpagwa sa imo gikan sa Egipto.’” Ang Ginoo nagsiling kay Moises, “Nakilala ko nga ini nga mga tawo matig-a sing ulo. Karon, sa imo pahanugot, papason ko sila sa akon nagabalingaso nga kaakig. Dayon ako magahimo sa imo kag sa imo mga kaliwat nga mangin-isa ka daku nga pungsod.” 

    Pero si Moises nagpakiluoy sa Ginoo nga iya Dios, nga nagasiling, “O Ginoo, ngaa bala magsilabo ang imo kaakig sa sini nga mga tawo, nga imo ginpagwa gikan sa Egipto sa daku nga kusog kag gahom? Ngaa bala nga hatagan mo sing kahigayunan ang mga Egiptohanon sa pagsiling, ‘Ginpagwa niya sila sa Egipto nga may malain nga tinutoyo sa pagpatay sa ila sa mga kabukiran kag sa paglaglag sa ila sing bug-os?’ Indi pagpadayuna ang imo nagabalingaso nga kaakig, magbaylo ka sing hunahona, kag indi paglaglaga ang imo mga tawo. Dumdoma ang imo mga alagad nga si Abraham, si Isaac, kag si Israel kag kon ano ang imo ginsaad sa ila, nga nagpanumpa sa imo kaugalingon nga ngalan, kag nagsiling sa kadaisa sa ila, ‘Hatagan ko ikaw sing mga kaliwat subong kadamo sang bituon sa langit. Ihatag ko sa imo kaliwat ang bug-os nga duta nga akon ginsaad sa ila kag mangin-ila ini sing dayon.’” Gani ang Ginoo nagbaylo sang iya hunahona, kag wala niya gin-ula ang kalaglagan nga iya ginsiling sa iya mga tawo.

Salmo sa Pagsabat:

Mga Salmo 106:19-20, 21-22, 23

(S) O Ginoo, dumdoma kami tungod sang paghigugma mo sa imo banwa.

Naghimo sila sing tinday nga baka nga bulawan sa Horeb, kag ginsimba nila ini; ginbayluhan nila ang himaya sang Dios, sang larawan sang isa ka sapat nga nagahalab sang hilamon. (S) 

Nalimtan nila ang Dios nga nagluwas sa ila, paagi sa iya gamhanan nga mga buhat didto sa Egipto. Daw ano ka makatilingala ang mga ginhimo niya didto! Daw ano ka makahalangawa ang mga ginhimo niya didto sa Mapula nga Dagat! (S)

Gani nagsiling ang Dios nga iya laglagon ang iya mga tawo; pero si Moises nga iya pinili nga alagad nagpakiluoy sa Dios, sa paglugpay sang kaakig sang Dios, agod indi sila malaglag. (S) 

Sa Wala pa ang Ebanghelyo:

San Juan 3:16

Ginhigugma gid sang Dios ang kalibutan, sa bagay nga ginhatag niya ang iya bugtong nga Anak; ang tagsatagsa nga magtuo sa iya may kabuhi nga wala sing katapusan.

Ang Pagbasa sang Santos nga Ebanghelyo suno kay:

San Juan 5:31-47

Si Jesus nagsiling sa Judio, “Kon ako ang nagasaksi nahanungod sa akon kaugalingon, ang akon pagpanaksi indi mabaton nga matuod. Pero may nagasaksi nahanungod sa akon, kag akon nahibaluan nga ang iya pagpanaksi nahanungod sa akon matuod. May ginpadala kamo sa pagpamangkot kay Juan, kag nagsugid sia sang kamatuoran. Indi kay kinahanglan ko ang panaksi sang tawo, kundi ginahambal ko lamang ini agod nga maluwas kamo. Si Juan kaangay sang isa ka suga nga nasindihan kag nagasiga, kag sa malip-ot nga tion naluyagan ninyo ang pagkalipay sa iya kapawa. Pero may nagasaksi nahanungod sa akon nga labi pa sang panaksi nga ginhatag ni Juan: ang mga buhat nga ginhimo ko, ang mga buhat nga ginhatag sang akon Amay nga himuon ko, ini nagasaksi nahanungod sa akon kag nagapamatuod nga ang Amay nagpadala sa akon. Kag ang Amay nga nagpadala sa akon nagasaksi man nahanungod sa akon. Wala gid ninyo mabatii ang iya tingog, wala ninyo sia makita, gani nga ang iya mga pulong wala sa inyo, tungod kay indi kamo magtuo sa iya ginpadala. Ginatun-an ninyo ang mga Kasulatan kay nagahunahona kamo nga sa ila masapwan ninyo ang kabuhi nga wala sing katapusan. Kag ini sila nagasaksi nahanungod sa akon! Pero indi kamo luyag magkari sa akon sa pag-angkon sang kabuhi. 

    “Wala ako nagapangita nga dayawon ako sang mga tawo. Pero nakilala ko kamo; nahibaluan ko nga sa inyo tagipusoon wala kamo sing paghigugma sa Dios. Nagkari ako nga may awtoridad gikan sa akon Amay, pero wala kamo magbaton sa akon; kon may magkari sa iya kaugalingon nga awtoridad, inyo sia pagabatunon. Luyag kamo nga dayawon sang isa kag isa, pero wala kamo nagatinguha sa pag-agom sang pagdayaw gikan sa isa lamang ka Dios. Gani, paano bala kamo makatuo? Indi kamo maghunahona nga ako ang magasumbong sa inyo sa akon Amay. Si Moises ang magasumbong—si Moises nga ginalauman ninyo amo ang magasumbong sa inyo. Kon matuod nga nagtuo kamo kay Moises, kuntani nagtuo man kamo sa akon, kay nagsulat sia nahanungod sa akon. Pero kay wala kamo magtuo sang iya ginsulat, paano bala ang pagtuo ninyo sa akon mga pulong?”

Marso 17 | Marso 19

Marso 17, 2021, Miyerkules, Ika-4 nga Semana sang Kwaresma

Liturhiya sang Pulong

Nahauna nga Balasahon - Isaias  49:8-15

Salmo sa Pagsabat - Mga Salmo 145:8-9, 13-14, 17-18

Sa Wala pa ang Ebanghelyo - Juan 11:25, 26

Ebanghelyo - Juan 5:17-30

 Ang Pagbasa gikan sa Libro ni:

Isaias nga Propeta 49:8-15

    Ang Ginoo nagasiling sa iya mga tawo, “Kon mag-abot ang tion sa pagluwas sa inyo, ipakita ko sa inyo ang akon kaayo, kag sabton ko ang inyo pagpangayo sing bulig. Ako magabantay kag magaapin sa inyo, kag paagi sa inyo magahimo ako sing kasugtanan sa tanan nga mga katawuhan. 

    Papuy-on ko kamo liwat sa inyo duta nga karon mamingaw. Magasiling ako sa mga binilanggo, ‘Gwa kamo!’ Kag sa mga yara sa kadudolman, ‘Maggwa kamo sa kapawa!’ Manginkaangay sila sang mga karnero nga nagahalab sa mga bakulod; indi na gid sila paggutomon ukon pag-uhawon. Ang init sang adlaw kag desierto indi makahalit sa ila, kay pagatuytoyan sila sang nagahigugma sa ila. Pagadalhon niya sila sa mga tuboran sang tubig. 

    “Magahimo ako sing malapad nga dalan nga magalakbay sa mga kabukiran, kag sang dalan nga pagaagyan sang akon mga tawo. Ang akon mga tawo magaabot halin sa malayo nga mga duog, halin sa aminhan kag sa nakatundan, kag halin sa Syene sa nabagatnan.” 

    O mga langit, magkanta! Magsinggit sa kalipay, O duta! Mag-amba, O mga kabukiran! Ang Ginoo magalipay sa iya mga tawo; magakaluoy sia sa iya mga tawo nga nagaantos. Pero ang mga pumoluyo sang Jerusalem nagsiling, “Ginpabay-an kami sang Ginoo! Ginkalimtan niya kami.” Gani ang Ginoo nagsabat, “Malipat bala ang iloy sa iya kaugalingon nga lapsag kag indi maghigugma sang bata nga iya ginbun-ag? Bisan ang isa ka iloy malipat sa iya anak, pero indi gid ako malipat sa imo.

Salmo sa Pagsabat:

Mga Salmo 145:8-9, 13-14, 17-18

(S) Ang Ginoo mahigugmaon kag maluloy-on.

Ang Ginoo mahigugmaon kag maluloy-on, indi madali mangakig kag puno sang mapinadayunon nga paghigugma. Maayo sia sa tanan kag maluloy-on sa tanan nga iya ginhimo. (S)

Ang Dios matutom sa iya mga saad, kag maayo sa tanan nga iya ginahimo. Ginabuligan niya ang tanan nga yara sa kalisdanan, ginabayaw niya ang tanan nga ginapaubos. (S)

Ang Ginoo matarong sa tanan nga iya ginahimo, maluloy-on sa tanan niya nga mga buhat. Malapit sia sa tanan nga nagapanawag sa iya, nga nagapanawag sa iya sing maminatud-on. (S)

Sa Wala pa ang Ebanghelyo:

San Juan 11:25, 26

Ako amo ang pagkabanhaw kag ang kabuhi siling sang Ginoo; Ang nagatuo sa akon indi gid mapatay.

Ang Pagbasa sang Santos nga Ebanghelyo suno kay:

San Juan 5:17-30

Gani si Jesus nagsabat sa ila, “Ang akon Amay wala nagauntat sa pagpangabudlay kag ako dapat man magpangabudlay.” 

    Tungod sining ginhambal ni Jesus, nagtinguha sing labi pa gid ang mga pangulo sang mga Judio sa pagpatay sa iya; kay indi lamang nga ginlapas niya ang kasugoan sa Adlaw nga Inugpahuway, kundi nagsiling pa sia nga ang Dios amo gid ang iya kaugalingon nga Amay, kag tungod sini nagapakigtupong sia sa Dios. 

    Gani si Jesus nagsabat sa ila, “Nagasiling ako sa inyo sang matuod: wala sing ginahimo ang Anak nga iyaiya lamang, kundi ang iya nakita nga ginahimo sang Amay amo lamang ang iya ginahimo. Ang ginahimo sang Amay amo man ang ginahimo sang Anak. Kay ang Amay nagahigugma sa Anak kag nagapakita sa Anak sang tanan nga iya ginahimo. Dalagku pa gid sa sini nga mga buhat ang ipakita sang Amay sa Anak, kag tanan kamo matingala. Kay subong nga ang Amay nagabanhaw sang mga minatay kag nagahatag sa ila sing kabuhi, subong man ang Anak nagahatag sing kabuhi sa ila nga iya luyag hatagan; wala man nagahukom ang Amay bisan kay sin-o. Ginhatag niya sa Anak ang bug-os nga awtoridad sa paghukom, agod nga padunggan sang tanan ang Anak subong man sang ila pagpadungog sa Amay. Ang wala nagapadungog sa Anak, wala man nagapadungog sa Amay nga nagpadala sa iya. 

    “Nagasiling ako sa inyo sang matuod: ang bisan sin-o nga nagapamati sang akon mga pulong kag nagatuo sa nagpadala sa akon, may kabuhi nga wala sing katapusan. Indi na sia paghukman, kundi nakasaylo na sia halin sa kamatayon pa kabuhi. Nagasiling ako sa inyo sang matuod: ang tion magaabot, kag nag-abot na, nga ang mga patay makabati sang tingog sang Anak sang Dios, kag ang mga nakabati sini magakabuhi. Subong nga ang Amay gid amo ang ginagikanan sang kabuhi, sa amo man nga bagay ginhimo niya nga ang Anak pagagikanan sang kabuhi. Kag ginhatag niya sa Anak ang awtoridad sa paghukom, kay sia amo ang Anak sang Tawo. Indi kamo matingala sini, kay magaabot ang tion nga ang tanan nga mga patay sa lulobngan makabati sang iya tingog, kag magagwa sila sa ila lulobngan. Ang mga nakahimo sang maayo pagabanhawon kag magakabuhi, kag ang nakahimo sang malaut pagabanhawon kag pagasilutan.” 

    “Wala ako sing sarang mahimo kon ako lang. Nagahukom lang ako suno sa ginasiling sang Dios sa akon, gani nga ang akon paghukom matarong tungod kay wala ako nagahimo sang akon luyag, kundi ang luyag sang nagpadala sa akon.

Marso 16 | Marso 18