"Dayawon ang Nagakari sa Ngalan sang Ginoo"

Liturhiya sang Pulong

(Huwebes, Oktubre 31, 2019)

Ang Pagbasa gikan sa Sulat ni San Pablo nga Apostol, sa mga:

Taga-Roma 8:31-39

   Ano karon ang aton masiling nahanungod sini nga mga butang? Kon ang Dios nagaapin sa aton, sin-o bala ang makapamatok sa aton? Wala niya gani ginpaiway ang iya Anak, kundi nga iya ginhalad para sa aton tanan! Kon ginhatag niya sa aton ang iya Anak, indi bala nga ihatag man niya sa aton sing maalwan ang tanan nga mga butang? Sin-o bala ang magasumbong sang pinili sang Dios? Ang Dios gid nagapahayag nga wala sila sing sala! May makakondenar bala sa ila? Si Cristo Jesus amo ang nagpakamatay, huo, sia amo ang ginbanhaw kag karon yara sa tuo sang Dios. Sia amo ang nagapakiluoy sa Dios para sa aton! Karon, sin-o bala ang makapahamulag sa aton sa gugma ni Cristo? Ang pag-antos bala, ang kapipit-an, ang paghingabot, ang gutom, ang kaimulon, ang katalagman, ukon ang kamatayon? Ang kasulatan nagasiling: “Tungod sa imo Yara kami sa katalagman Sang kamatayon sa bug-os nga adlaw, Ginkabig kami Subong mga karnero nga ilihawon.”
   Wala sing may makapahamulag sa aton! Kay sa sini nga mga butang may bug-os kita nga pagdaog paagi sa iya nga naghigugma sa aton! Kay napat-od ko gid nga wala sing may makapahamulag sa aton sa iya gugma, bisan pa ang kamatayon ukon kabuhi, bisan pa ang mga anghel ukon ang langitnon nga mga punoan ukon mga gahom. Bisan pa ang mga butang sa karon ukon sa palaabuton, ang kalibutan sa ibabaw ukon sa idalom, wala gid sing butang sa tanan nga mga tinuga nga sarang makapahamulag sa aton sa gugma sang Dios nga nangin-aton paagi kay Cristo Jesus nga aton Ginoo.

Salmo sa Pagsabat:

Mga Salmo 109:21-22, 26-27, 30-31

(S) O Ginoo, luwasa ako tungod sang imo mapinadayunon nga gugma!

Pero, O Ginoo nga akon Dios, buligi man ako suno sa imo ginsaad, kag tabangi ako tungod sang kaayo sang imo gugma. Imol ako kag nawad-an; nagakasakit gid ang akon tagipusoon. (S)
Buligi ako, O Ginoo nga akon Dios, luwasa ako tungod sang imo mapinadayunon nga gugma! Ipakilala sa akon mga kaaway nga ikaw ang nagaluwas sa akon. (S)
Magapasalamat ako sa mabaskog nga tingog sa Ginoo; dayawon ko sia sa tunga sang pagtilipon sang mga tawo, kay ginaapinan niya ang makaluluoy nga tawo, sa pagluwas sa iya sa mga nagakondenar sa iya sa kamatayon. (S)

Aleluya:

Lucas 19:38; 2:14

   Dayawon ang Hari nga nagakari sa ngalan sang Ginoo! Paghidait sa langit kag himaya sa Dios!

Ang Pagbasa sang Santos nga Ebanghelyo suno kay:

San Lucas 13:31-35

     Sa amo man nga tion may mga Fariseo nga nagpalapit kay Jesus kag nagsiling sa iya, “Kinahanglan maghalin ka diri kag magkadto sa iban nga duog kay si Herodes buot magpatay sa imo.”
   Si Jesus nagsabat sa ila, “Lakat kag singgani ina nga singgalong: ‘Nagapangtabog ako sing mga yawa kag nagapang-ayo subong kag buas, kag sa ikatlo ka adlaw tapuson ko ang akon hilikuton.’ Pero kinahanglan nga magpadayon ako sa akon paglakat karon kag buas kag sa madason pa gid nga adlaw, kay wala nagakabagay nga ang isa ka propeta mapatay sa iban nga duog luas sa Jerusalem.
   “O Jerusalem, Jerusalem! Ikaw nga nagapamatay sang mga propeta, ikaw nga nagabato sang mga ginpadala sa imo sang Dios. Makapila kuntani nga luyag ko tipunon ang imo mga tawo kaangay sang isa ka munga nga nagatipon sang iya mga piso sa idalom sang iya mga pakpak, pero indi ka luyag. Karon ang imo templo pagapatumbayaan. Nagasiling ako sa imo nga indi na nimo ako makita tubtob mag-abot ang tion nga magsiling ka, ‘Dayawon ang nagakari sa ngalan sang Ginoo.’ ”

Oktubre 30 | Nobyembre 1

"Magtinguha Kamo sa Pagsulod sa Makitid nga Puwertahan"

Liturhiya sang Pulong

(Miyerkules, Oktubre 30, 2019)

Ang Pagbasa gikan sa Sulat ni San Pablo nga Apostol, sa mga:

Taga-Roma 8:26-30

   Sa amo man nga bagay, kita nga mga maluya ginabuligan sang Espiritu. Kay indi kita makahibalo kon paano magpangamuyo, kundi ang Espiritu amo ang nagapakiluoy sa Dios para sa aton sa mga pag-ugayong nga indi masaysay sa mga tinaga. Kag ang Dios nga nagausisa sang tagipusoon sang mga tawo nakahibalo man sang panghunahona sang Espiritu. Kay ang Espiritu nagapakiluoy sa Dios para sa iya mga tumoluo kag suno sa iya kabubot-on.
   Kay nakahibalo kita nga ang tanan nga mga butang ginahimo sang Dios para sa kaayuhan sang mga nagahigugma sa iya, kag sa mga gintawag niya suno sa iya tinutoyo. Kay ang mga ginpili na sang Dios, iya man ginpain, agod manginkaangay sila sang iya Anak, agod nga ang Anak manginpanganay sang madamo nga mga kautoran.
   Gani, gintawag sang Dios ang iya mga ginpain; kag ang iya mga gintawag, iya man sila ginpakamatarong; kag ang iya ginpakamatarong iya man ginpaambit sang iya himaya.

Salmo sa Pagsabat:

Mga Salmo 13:4-5, 6

(S) Nagasalig ako sa imo mapinadayunon nga gugma, O Ginoo.

Tamda kag sabta ako, O Ginoo nga akon Dios. Iuli ang akon kusog, agod nga indi ako mapatay. Dayon ang akon mga kaaway indi makasiling, “Nalutos namon sia”, indi sila makapangalipay sa akon kamusmosan! (S)
Nagasalig ako sa imo mapinadayunon nga gugma, kag magakalipay ako, kay luwason mo ako. Magaamba ako sa Ginoo, kay sa gihapon maayo sia sa akon. (S)

Aleluya:

2 Tesalonica 2:14

   Gintawag kamo sang Dios paagi sa Maayong Balita agod makaambit kamo sang himaya sang aton Ginoong Jesu-Cristo.

Ang Pagbasa sang Santos nga Ebanghelyo suno kay:

San Lucas 13:22-30

     Samtang nagapakadto si Jesus sa Jerusalem nagpanudlo sia sa mga baryo kag mga banwa nga iya gin-agihan. Karon may nagpamangkot sa iya, “Sir, diutay lang bala ang maluwas?” Si Jesus nagsabat sa ila,
   “Magtinguha kamo sa pagsulod sa makitid nga puwertahan. Kay nagasiling ako sa inyo nga madamo ang magatinguha sa pagsulod, pero indi makasulod. Ang pangulo sang balay magabangon kag magapanira sang puwertahan. Ti, kon didto pa kamo sa gwa kag magapanuktok kamo sa puwertahan kag magsiling, ‘Sir, abrihi kami!’ magasabat sia sa inyo, ‘Wala ako makahibalo kon taga-diin kamo.’ Ti, magasabat kamo, ‘Nagkaon kag nag-inom kami upod sa imo kag nagpanudlo ka sa amon banwa.’ Magasiling sia liwat, ‘Wala ako makahibalo kon taga-diin kamo. Palayo kamo sa akon, tanan kamo nga manugbuhat sang kalautan!’ Daw ano ang paghinibi kag pagbinagrot sang mga ngipon, kon makita ninyo si Abraham, si Isaac, kag si Jacob kag ang tanan nga mga propeta sa Ginharian sang Dios, samtang kamo inyo wala pagpasudla. May mga tawo nga magaabot halin sa sidlangan kag nakatundan, halin sa aminhan kag bagatnan, kag magapungko sa pagkaon sa punsyon sa Ginharian sang Dios. Ti, may mga naulihi karon nga mauna, kag may mga nauna karon nga maulihi.”

Oktubre 29 | Oktubre 31

"Ano ang Kaangay sang Ginharian sang Dios?"

Liturhiya sang Pulong

(Martes, Oktubre 29, 2019)

Ang Pagbasa gikan sa Sulat ni San Pablo nga Apostol, sa mga:

Taga-Roma 8:18-25

   Ang mga pag-antos naton sa sini nga panahon ginakabig ko nga indi makatupong sa himaya nga ipahayag sa aton. Ang tanan nga mga tinuga nagahulat sing malinangkagon sa Dios nga magapahayag sang iya mga anak. Kay ang tanan nga mga tinuga nanginwala sing pulos, indi suno sa ila luyag, kundi amo ini ang luyag sang Dios. Pero may yara pa nga paglaom, nga magaabot ang adlaw nga ang tinuga indi na madunot, kundi magaambit sila sang mahimayaon nga kahilwayan sang mga anak sang Dios. Kay nakahibalo kita nga tubtob karon, ang tanan nga mga tinuga nagaugayong sa kasakit, subong sang pagpasakit sang manugbata. Pero indi lamang ang mga tinuga, kundi kita man tanan nga ginhatagan sing una sang Dios sang iya Espiritu, nagaugayong sa kasakit, samtang nagapaabot kita sa Dios nga magahimo sa aton nga iya mga anak kag magahilway sa aton sing bug-os. Kay sa sini nga paglaom naluwas kita. Pero kon makita naton ang aton ginalauman, ti indi na ina paglaom. Kay sin-o bala ang nagalaom sa iya nakita? Pero kon nagalaom kita sa wala pa naton makita, ginahulat naton ini nga may pagpailob.

Salmo sa Pagsabat:

Mga Salmo 126:1-2, 2-3, 4-5, 6

(S) Ang Ginoo naghimo sang dalagku nga mga butang para sa aton.

Sang ginpabalik kita sang Ginoo sa Sion, daw isa lang yadto ka dalamguhanon! Daw ano ang aton pagkinadlaw kag pagkinanta sa kalipay! (S)
Dayon ang iban nga mga pungsod nagsiling nahanungod sa aton, “Ang Ginoo naghimo sing dalagku nga mga butang sa ila!” Matuod gid naghimo sia sing dalagku nga mga butang sa aton, daw ano kita sadto ka malipayon! (S)
O Ginoo, dalha kami pabalik sa amon duta, subong nga ang imo ulan nagadala sang tubig pabalik sa mamala nga mga suba. Himoa man nga yadtong nagtanom nga nagahilibion, magtipon sang patubas nga may kasadya! (S)
Yadtong mga naghibi samtang nagagowa sila nga nagadala sing binhi magabalik nga nagakanta sa kalipay, nga nagadala sang ila patubas! (S)

Aleluya:

Mateo 11:25

   Bulahan ka, O Amay, Ginoo sang langit kag duta kay ginpahayag mo sa mga di-maalam, ang mga misteryo sang Ginharian.

Ang Pagbasa sang Santos nga Ebanghelyo suno kay:

San Lucas 13:18-21

     Si Jesus nagpamangkot, “Ano ang kaangay sang Ginharian sang Dios? Sa ano nga butang ipaanggid ko ini? Kasubong ini sang binhi sang mostasa nga ginkuha sang tawo kag ginpanggas sa iya uma. Ang binhi nagtubo kag nangin-isa ka kahoy, kag ang mga pispis nagpugad sa iya mga sanga.”
   Sa liwat si Jesus nagpamangkot, “Sa ano ko bala ipaanggid ang Ginharian sang Dios? Kaangay ini sang lebadora nga ginkuha sang isa ka babayi kag ginsamo sa tatlo ka sukob nga arina tubtob ang bug-os nga linamas naghabok.”

Oktubre 28 | Oktubre 30

Nagpili si Jesus sang Dose ka Apostoles

Liturhiya sang Pulong

(Lunes, Oktubre 28, 2019)

San Simon kag San Judas, mga Apostoles

Ang Pagbasa gikan sa Sulat ni San Pablo nga Apostol, sa mga:

Taga-Efeso 2:19-22

   Gani karon, kamo nga mga Gentil indi na mga dumoluong ukon mga sumalayo lang, kundi mga kasimanwa sang mga tumoluo, kag mga katapo na kamo sang panimalay sang Dios. Kamo man ginpatindog sa sadsaran nga ginpasad sang mga apostoles kag mga propeta, kag si Cristo Jesus gid amo ang pamusod nga bato. Sia ang nagapaangot sang bug-os nga balay kag iya ini ginapatubo nga manginbalaan nga templo sa Ginoo. Sa inyo paghiusa sa iya, ginpatindog man kamo sing tingob upod sa iban nga mangin-isa ka balay sa diin ang Dios nagakabuhi paagi sa iya Espiritu.

Salmo sa Pagsabat:

Mga Salmo 19:2-3, 4-5

(S) Ang ila tingog nagatugob sa bug-os nga kalibutan.

Ang himaya sang Dios ginapahayag sing maathag sang kalangitan! Ang langit nagapakita sang iya mga binuhatan! Ang tagsa ka adlaw nagasugid sini sa madason nga adlaw, ang tagsa ka gab-i nagasulit sini sa madason nga gab-i. (S)
Wala sing pulong ukon mga tinuga nga ginagamit, wala sing gahod nga mabatian, pero ang ila tingog nagatugob sa bug-os nga kalibutan, ang ila mga pulong nagalambot sa mga ukbong sang duta. (S)

Aleluya:

   Nagadayaw kami sa imo nga Dios, nagabantala kami sa imo nga Ginoo; ang imo ginpili nga mangin martir nagadayaw sa imo, O Ginoo.

Ang Pagbasa sang Santos nga Ebanghelyo suno kay:

San Lucas 6:12-16

     Sa sadto nga tion nagkadto si Jesus sa isa ka bakulod kag didto nagpangamuyo sia sa Dios sa bilog nga gab-i. Sang pagkaaga gintawag niya ang iya mga gintuton-an, kag nagpili sia sing dose nga gintawag niya nga mga apostoles. Ini sila amo ang masunod: si Simon nga ginhingalanan niya kay Pedro kag ang iya utod nga si Andres, si Santiago kag si Juan, si Felipe kag si Bartolome, si Mateo kag si Tomas, si Santiago nga anak ni Alfeo kag si Simon nga gintawag ang patriota, si Judas nga anak ni Santiago kag si Judas Iscariote nga nangintraidor. 

Oktubre 27 | Oktubre 29

"O Dios, Kaluoyi Ako nga Makasasala!"

Liturhiya sang Pulong

(Domingo, Oktubre 27, 2019)

1. Ang Pagbasa gikan sa Libro ni:

Sirac 35:12-14, 16-18

   Indi ka magdulot sa iya sing isa ka hamham, kay indi niya ini pagbatunon, kag indi ka magsalig sa indi matarong nga halad; kay ang Ginoo isa ka hukom nga wala sing pinilian. Wala sia sing pinilian sa kalainan sang imol nga tawo, kundi nagapamati sia sang pangamuyo sang isa ka tawo nga ginadaugdaog. Indi niya pagpatumbayaan ang pag-ampo sang mga ilo kag sang balo kon mag-ula sia sang iya reklamo.
   Ang batunon sang Ginoo, amo ang tawo nga nagaalagad sa iya sa bug-os niya nga tagipusoon kag ang iya pangamuyo magalambot sa mga panganod.
   Ang pangamuyo sang mapainuboson magalapos sa mga panganod, pero indi sia malipay tubtob makaabot ini sa Ginoo. Indi sia mag-untat tubtob nga ang Labing Mataas magsabat sa iya, sa paghatag sang kahilwayan sa mga matarong kag sa pagsilot sang mga nakasala. Ang Ginoo indi magmahinay, indi sia magpailob sa mga malaut, tubtob mabali njya ang mga hawak sang mga wala sing kaluoy kag magatimalos sia sa mga kapungsoran, tubtob mapapas niya ang tanan nga mga mabinatuon, kag maguba ang gahom sang mga di-matarong.

Salmo sa Pagsabat:

Mga Salmo 34:2-3, 17-18, 19, 23

(S) Ang mga makaluluoy nagapanawag kag ang Dios nagasabat sa ila.

Sa gihapon magapasalamat ako sa Ginoo; indi gid ako mag-untat sa pagdayaw sa iya. Dayawon ko sia tungod sang iya mga binuhatan; kabay nga ang mga ginapigos magpamati kag magkalipay! (S)
Pero ginasumpong niya ang mga nagahimo sing malaut, sa bagay nga bisan ang ila mga kasimanwa nagakalipat sa ila. Ang mga matarong Nagapanawag sa Ginoo kag nagapamati sia, kag ginaluwas niya sila sa tanan nila nga mga kalisdanan. (S)
Ang Ginoo malapit sa mga napaslawan; ginaluwas niya ang mga nadulaan sing paglaom. Ang Ginoo magaluwas sang iya mga alagad; ang mga nagadangop sa iya indi maano. (S)

2. Ang Pagbasa gikan sa Ikaduha nga Sulat ni San Pablo nga Apostol, sa kay:

Timoteo 4:6-8, 16-18

   Nahanungod sa akon, ang tion nag-abot nga ako ihalad na, kag tion na ini nga magataliwan ako sa sini nga kabuhi. Nahimo ko na ang akon masarangan sa palumba, nadalagan ko na ang bug-os nga dalaganon kag natipigan ko ang pagtuo. Karon, ang padya sang pagdaog nagahulat sa akon, ang korona sang pagkamatarong nga ihatag sa akon sang Ginoo, ang matarong nga Hukom, sa sadto nga Adlaw—kag indi lamang sa akon, kundi sa tanan man nga nagahulat nga may paghigugma sang iya pagpahayag.
   Wala gid sing may nag-unong sa akon sa nahauna ko nga pagpangapin sang akon kaugalingon. Tanan sila nagbiya sa akon. Kabay nga indi ini pag-isipon sang Dios batok sa ila! Pero ang Ginoo nag-upod sa akon kag iya ako ginhatagan sing kusog, sa bagay nga nabantala ko ang bug-os nga pulong sang Dios agod makabati ang tanan nga mga Gentil, kag ginluwas ako sa baba sang leon. Ang Ginoo magaluwas sa akon sa tanan nga kalautan, kag iya ako dalhon nga indi maano didto sa iya langitnon nga Ginharian. Sa iya ang himaya sa wala sing katapusan! Kabay pa.

Aleluya:

2 Corinto 5:19

   Ang Dios nagahimo sang tanan nga mga tawo nga iya mga abyan paagi kay Cristo kag naghatag sia sa amon sang mensahi kon paano niya sila mahimo nga mga abyan. 

Ang Pagbasa sang Santos nga Ebanghelyo suno kay:

San Lucas 18:9-14

     Sa mga tawo nga nagakabig sang ila kaugalingon nga matarong kag nagatamay sa iban, si Jesus nagsugid man sini nga palaanggiran. “May duha ka tawo nga nagkadto sa templo sa pagpangamuyo. Ang isa Fariseo kag ang isa manugsokot sang buhis. Ang Fariseo nagtindog kag nagpangamuyo sing subong sini, ‘Nagapasalamat ako sa imo, O Dios, nga indi ako subong sang iban nga mga tawo nga sakon, mga madaya, mga babayidor, ukon subong sining manugsokot sang buhis. Nagapuasa ako sing makaduha sa isa ka simana, kag nagahatag ako sa imo sang ikapulo sang tanan ko nga kinitaan.’ Pero ang manugsokot sang buhis nagtindog sa malayo, kag indi gani sia magtangla sa langit, kundi nagpamukpok sang iya dughan kag nagsiling, ‘O Dios, kaluoyi ako nga makasasala!’ Nagasiling ako sa inyo nga ining tawo nagpauli sa iya balay nga ginpakamatarong sang sa isa. Kay ang nagapakataas sang iya kaugalingon pagapaubson, kag ang nagapaubos sang iya kaugalingon pagapataason.”

Oktubre 26 | Oktubre 28

"Kon Indi Kamo Magbiya sa Pagpakasala - Mapatay man Kamo"

Liturhiya sang Pulong

(Sabado, Oktubre 26, 2019)

Ang Pagbasa gikan sa Sulat ni San Pablo nga Apostol, sa mga:

Taga-Roma 8:1-11

   Karon, indi na pagsilutan ang mga nahiusa kay Cristo Jesus. Kay ang kasugoan sang Espiritu nga nagahatag sa aton sing kabuhi sa aton paghiusa kay Cristo Jesus, naghilway sa akon sa kasugoan sang sala kag kamatayon. Tungod kay ang kinaugali sang tawo maluya, ang indi mahimo sang Kasugoan, ginhimo sang Dios. Ginlaglag niya ang gahom sang sala sa kinaugali sang tawo paagi sa pagpadala niya sang iya Anak, nga nagkari nga may kinaugali subong sang makasasala nga kinaugali sang tawo, sa pagdula sang sala. Ginhimo ini sang Dios, agod nga ang mga matarong nga ginapatuman sang Kasugoan matuman sa aton nga nagakabuhi suno sa Espiritu, kag indi suno sa tawuhanon nga kinaugali. Kay ang mga nagakabuhi suno sa ginatudlo sa ila sang ila tawuhanon nga kinaugali, ang ila mga panghunahona ginagamhan sang luyag sang ila tawuhanon nga kinaugali. Ang mga nagakabuhi suno sa ginatudlo sa ila sang Espiritu, ang ila mga panghunahona ginagamhan sang luyag sang Espiritu. Kon ang inyo mga panghunahona ginagamhan sang tawuhanon nga kinaugali, ang resulta sini amo ang kamatayon. Pero kon ang inyo mga panghunahona ginagamhan sang Espiritu, ang resulta sini amo ang kabuhi kag paghidait. Gani, ang isa ka tawo manginkaaway sang Dios kon ang iya panghunahona ginagamhan sang tawuhanon nga kinaugali, kay wala sia nagatuman sang kasugoan sang Dios, kag matuod gid nga indi sia makatuman sini. Ang mga nagatuman sang ila tawuhanon nga kinaugali indi makapahamuot sa Dios. Pero wala na kamo nagakabuhi suno sa ginatudlo sa inyo sang inyo tawuhanon nga kinaugali, kundi nagakabuhi kamo suno sa ginatudlo sang Espiritu, kon matuod nga ang Espiritu sang Dios nagakabuhi sa inyo. Ang tawo nga wala sa iya ang Espiritu ni Cristo indi iya ni Cristo. Pero kon si Cristo nagakabuhi sa inyo, bisan pa nga ang inyo mga lawas mapatay tungod sang sala, pero ang Espiritu nagakabuhi sa inyo tungod kay ginpakamatarong kamo sa atubangan sang Dios. Kon ang Espiritu sang Dios nga nagbanhaw kay Jesus nagakabuhi sa inyo, ti sia nga nagbanhaw kay Cristo magahatag man sing kabuhi sa inyo mamalatyon nga lawas, paagi sa iya Espiritu nga yara sa inyo.

Salmo sa Pagsabat:

Mga Salmo 24:1-2, 3-4, 5-6

(S) O Ginoo, amo ini ang mga kaliwat nga nagapangita sa imo.

Ang kalibutan kag ang tanan nga yara sa iya, iya sang Ginoo, iya man ang duta kag ang tanan nga nagakabuhi sa duta. Iya ini gintukod sa madalom nga mga tubig sa idalom sang duta, ginpasad niya ang iya mga sadsaran sa kadadalman sang dagat. (S)
Sin-o bala ang makataklad sa bukid sang Ginoo? Sin-o bala ang makasulod sa iya balaan nga Templo? Ang may matinlo nga binuhatan kag paghunahona, nga wala nagasimba sa mga dios-dios, kag wala nagasaad sang kabutigan. (S)
Pagabendisyunan sia sang Ginoo, kag ang Dios nga iya manlulowas magapakilala nga wala sia sing sala. Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob. (S)

Aleluya:

Ezequiel 33:11

   Wala ako nagakalipay sa kamatayon sang makasasala, siling sang Ginoo, ang luyag ko nga mag-untat sia sa pagpakasala kag magkabuhi.

Ang Pagbasa sang Santos nga Ebanghelyo suno kay:

San Lucas 13:1-9

     Sa sadto nga tion may mga tawo didto nga nagsugid kay Jesus nahanungod sang mga taga-Galilea nga ginpapatay ni Pilato samtang nagadulot sila sang ila mga halad sa Dios. Si Jesus nagsabat sa ila, “Tungod kay ini nga mga taga-Galilea ginpamatay sa sini nga paagi, nagahunahona bala kamo nga labi sila ka makasasala sang sa iban nga mga taga-Galilea? Indi! Nagasiling ako sa inyo nga kon indi kamo magbiya sa pagpakasala mapatay man kamo tanan subong sa ila. Ano karon yadtong mga 18 ka mga tawo sa Siloe nga napatay sang natumbahan sila sang tore? Nagahunahona bala kamo nga labi pa sila kalain sang sa tanan nga mga tawo nga nagapuyo sa Jerusalem? Indi! Nagasiling ako sa inyo nga kon indi kamo magbiya sa pagpakasala, mapatay man kamo tanan subong sang sa ila.”
   Dason si Jesus nagsugid sa ila sining palaanggiran, “May higera sa katamnan sang isa ka tawo. Ang tawo nagkadto sa pagpangita sing bunga sa sina nga higera, pero wala gid sia sing may nakita nga bunga. Gani nagsiling sia sa iya manugtatap, ‘Abi dumdoma, tatlo na ka tuig ang pagbalikbalik ko diri sa pagpangita sing bunga sa sini nga higera, pero wala gid ako sing nakita nga bunga. Tapsa na lang ini! Ngaa magpadayon ini sa pagpalamgod sang duta?’ Pero ang manugtatap nagsabat, ‘Amoy, pabay-i lang anay sa sini nga tuig. Kutkotan ko ang palibot sini kag abunohan. Kon ini nga kahoy magpamunga sa madason nga tuig, ti, maayo; kon indi gani, ti, ipatapas mo na lang ini.’ ”

Oktubre 25 | Oktubre 27

Pamatian ang Panimad-on sang Panahon Bag-o Maulihi ang Tanan

Liturhiya sang Pulong

(Biyernes, Oktubre 25, 2019)

Ang Pagbasa gikan sa Sulat ni San Pablo nga Apostol, sa mga:

Taga-Roma 7:18-25

   Nakahibalo ako nga wala sing maayo nga yari sa akon, kon sayuron, sa akon tawuhanon nga kinaugali. Kay bisan pa luyag ako maghimo sing maayo, indi ako makahimo sini. Wala ko ginahimo ang maayo nga luyag ko himuon, kundi ginahimo ko ang malaut nga indi ko luyag himuon. Kon ginahimo ko ang indi ko luyag himuon, ini nagakahulogan nga indi na ako ang nagahimo sini, kundi ang sala nga yari sa akon. Gani, nasapwan ko nga ini nga kasugoan nagapanghikot: kon luyag ko himuon ang maayo, ang malaut amo ang ginahimo ko. Ang akon kaugalingon nagakalipay sa kasugoan sang Dios, pero lain nga kasugoan ang nasapwan ko nga nagapanghikot sa akon lawas—isa ka kasugoan nga nagasupak sa kasugoan sang akon hunahona. Ini nagabilanggo sa akon sa kasugoan sang sala nga nagapanghikot sa akon lawas. Kailo man ako nga tawo! Sin-o bala ang magahilway sa akon sa sining lawas nga nagadala sa akon sa kamatayon? Salamat sa Dios tungod kay Jesu-Cristo nga aton Ginoo! Gani, amo ini ang akon kahimtangan: sa akon kaugalingon sarang ako makaalagad sa kasugoan sang Dios sa akon lamang hunahona, samtang ang akon kinaugali nga tawuhanon nagaalagad sa kasugoan sang sala.

Salmo sa Pagsabat:

Mga Salmo 119:66, 68, 76, 77, 93, 94

(S) O Ginoo, tudloi ako sang imo mga sugo.

Hatagi man ako sing kaalam kag ihibalo, kay nagasalig ako sa imo mga sugo. (S)
Daw ano kaayo kag kamaluloy-on sa imo; tudloi ako sang imo mga sugo! (S)
Lipaya ako sang imo mapinadayunon nga gugma, suno sa imo ginsaad sa akon nga imo alagad. (S)

Kaluoyi ako, kag ako magakabuhi, kay nagakalipay ako sa imo kasugoan. (S)
Indi ko gid pagpatumbayaan ang imo mga pagsulondan, kay paagi sa ila ginbuhi mo ako. (S)
Imo ako—gani luwasa ako! Gintinguhaan ko ang pagtuman sang imo mga sugo. (S)

Aleluya:

Mateo 11:25

   Bulahan ka, O Amay, Ginoo sang langit kag duta kay ginpahayag mo sa mga di-maalam, ang mga misteryo sang Ginharian.

Ang Pagbasa sang Santos nga Ebanghelyo suno kay:

San Lucas 12:54-59

     Si Jesus nagsiling pa gid sa mga tawo, “Kon makita gani ninyo nga nagadulom ang gal-om sa nakatundan, nagasiling kamo dayon, ‘Magaulan,’ kag nagaulan. Kag kon mabatyagan ninyo ang habagat nga nagahuyop, nagasiling kamo, ‘Magasingkal ang init,’ kag nagainit. Mga salimpapaw! Makapanimad-on kamo sang palaabuton paagi sa pagtan-aw ninyo sang langit kag duta, kag ngaa bala nga indi kamo makahibalo sang kahulogan sining panahon?” “Ngaa nga indi kamo inyo makahibalo magbinagbinag kon ano ang maayo himuon? Pareho abi, kon may isa ka tawo nga magsumbong sa imo sa korte, tinguhai ang pagpakighusay sa iya sa nagapadulong pa lang kamo sa korte agod nga indi na niya ikaw pagdalhon sa hukom. Kay kon madala ikaw sa hukom, ang hukom magatugyan sa imo sa pulis, kag ang pulis magabilanggo sa imo. Nagasiling ako sa imo nga indi ka makagwa sa bilangguan tubtob nga mabayaran mo ang tanan mo nga multa.”

Oktubre 24 | Oktubre 26

"Nagkari Ako sa Pagdala sing Kalayo sa Duta"

Liturhiya sang Pulong

(Huwebes, Oktubre 24, 2019)

San Antonio Maria Claret, Obispo

Ang Pagbasa gikan sa Sulat ni San Pablo nga Apostol, sa mga:

Taga-Roma 6:19-23

   Mahapos nga mga tinaga ang gingamit ko, kay mahuyang pa kamo. Sang una anay gintugyan ninyo sing bug-os ang inyo kaugalingon subong mga ulipon sang kailigbon kag kalautan para sa malaut nga mga tinutoyo. Sa amo man nga bagay dapat ninyo itugyan sing bug-os ang inyo kaugalingon subong mga ulipon sang pagkamatarong para sa balaan nga mga tinutoyo.
   Sang mga ulipon pa kamo sang sala, ang pagkamatarong wala nagagahom sa inyo. Ti, ano nga kaayuhan ang inyo nakuha sang paghimo ninyo sang mga butang nga inyo karon ginakahuya? Ang resulta sini nga mga butang amo ang kamatayon! Pero karon, nahilway na kamo sa sala kag mga ulipon na kamo sang Dios; ang kaayuhan nga inyo nabaton amo ang kabuhi nga nahalad sing bug-os sa Dios, kag ang resulta sini amo ang kabuhi nga dayon. Kay ang kamatayon amo ang bayad sang sala, pero ang regalo sang Dios amo ang kabuhi nga wala sing katapusan sa paghiusa kay Cristo Jesus nga aton Ginoo.

Salmo sa Pagsabat:

Mga Salmo 1:1-2, 3, 4 kag 6

(S) Bulahan ang tawo nga nagasalig sa Ginoo.

Bulahan ang tawo nga nagasikway sang laygay sang mga malaut, nga wala nagasunod sa ginahimo sang mga makasasala, nga wala nagabuylog sa mga nagayaguta sa Dios. Sa baylo, naluyag sia magbasa sang kasugoan sang Ginoo, kag nagatuon sini sa adlaw kag gab-i. (S)
Kaangay sia sang kahoy nga nagatubo sa higad sang sapa, nagapamunga ini sa nagakaigo nga panahon, kag ang iya mga dahon wala nagakalaya. Matigayon niya ang tanan nga iya ginahimo! (S)
Pero indi kaangay sini ang mga malaut! Kaangay sila sang labhang nga ginapalid sang hangin. Ang Ginoo nagatuytoy kag naga-apin sang matarong nga mga tawo, pero ang malaut nagapadulong sa ila kalaglagan. (S)

Aleluya:

Filipos 3:8-9

   Ginasikway ko ang tanan, kag ginakabig ko nga basura, agod maangkon ko si Cristo, kag agod nga mangin-isa kami sing bug-os.

Ang Pagbasa sang Santos nga Ebanghelyo suno kay:

San Lucas 12:49-53

     “Nagkari ako sa pagdala sing kalayo sa duta, kag luyag ko kuntani nga nagadabdab na ini! May bautiso ako nga pagabatunon, kag indi gid ako mapahamtang sa wala pa ini matapos! Nagahunahona bala kamo nga nagkari ako sa pagdala sing paghidait sa kalibutan? Wala ako magkari sa pagdala sing paghidait, kundi pagbinahinbahin. Sugod karon ang panimalay nga may lima ka katapo magabinahinbahin, ang tatlo batok sa duha, ang duha batok sa tatlo. Ang mga amay manginkasumpong sang ila mga anak nga lalaki kag ang mga anak nga lalaki manginkasumpong sang ila mga amay. Ang mga iloy manginkasumpong sang ila mga anak nga babayi, kag ang mga anak nga babayi manginkasumpong sang ila mga iloy. Ang mga ugangan nga babayi manginkasumpong sang ila mga umagad nga babayi kag ang mga umagad nga babayi manginkasumpong sang ila mga ugangan nga babayi.”

Oktubre 23 | Oktubre 25

"Maghanda sa Pagsabat - ang Ginoo Nagapalapit"

Liturhiya sang Pulong

(Miyerkules, Oktubre 23, 2019)

San Juan de Capistrano, Pari

Ang Pagbasa gikan sa Sulat ni San Pablo nga Apostol, sa mga:

Taga-Roma 6:12-18

   Ang sala indi na dapat maggahom sa inyo mamalatyon nga lawas, agod indi ninyo matuman ang inyo lawasnon nga mga kailigbon. Indi man ninyo pag-itugyan ang bisan ano nga bahin sang inyo lawas sa sala, agod gamiton para sa malaut nga mga tinutoyo. Sa baylo, itugyan ninyo ang inyo bug-os nga kaugalingon sa Dios, subong mga tawo nga ginbuhi gikan sa mga minatay, kag itugyan ang inyo bug-os nga lawas, agod gamiton para sa matarong nga mga tinutoyo. Kay ang sala indi dapat maggahom sa inyo. Wala kamo nagakabuhi sa idalom sang kasugoan, kundi sa idalom sang grasya sang Dios.
   Ano karon? Magapakasala bala kita, kay indi na kita sa idalom sang kasugoan, kundi sa idalom sang grasya sang Dios? Indi man! Kay nakahibalo gid kamo nga kon ginatugyan ninyo ang inyo kaugalingon subong mga ulipon sa pagtuman sang isa ka agalon, matuod gid nga mga ulipon kamo sang inyo ginatuman—ayhan sang sala, nga ang resulta sini amo ang kamatayon, ukon sang pagkamatinumanon, nga ang resulta sini amo ang pagpakamatarong sa atubangan sang Dios. Pero salamat sa Dios! Kay sang una anay mga ulipon kamo sang sala, pero karon gintuman ninyo sa inyo bug-os nga tagipusoon ang mga kamatuoran nga yara sa pagtulon-an nga inyo nabaton. Ginhilway na kamo sa sala kag nangin-ulipon kamo sang pagkamatarong.

Salmo sa Pagsabat:

Mga Salmo 124:1-3, 4-6, 7-8

(S) Ang aton bulig nagagikan sa Ginoo.

Ano na alang abi kon ang Ginoo wala magdampig sa aton? Magsabat ka, O Israel! “Kon ang Ginoo wala magdampig sa aton, sang pagsalakay sa aton sang aton mga kaaway, kuntani ila kita ginlamon nga buhi, sa ila nagabalingaso nga kaakig batok sa aton. (S)
Gin-anod kita kuntani sang baha, nalumos kita kuntani sang tubig, ang nagasagana nga baha naglumos na kuntani sa aton." Magpasalamat kita sa Ginoo, nga wala magtugot nga laglagon kita sang aton mga kaaway. (S)
Nakapalagyo kita kaangay sang isa ka pispis sa manugsiod; ang siod nabugto, kag nahilway kita! Ang aton bulig nagagikan sa Ginoo, nga naghimo sang langit kag duta. (S)

Aleluya:

Mateo 24:42, 44

   Magbantay kag maghanda kamo, kay sa takna nga wala ninyo ginapaabot, ang Anak sang Tawo magakari.

Ang Pagbasa sang Santos nga Ebanghelyo suno kay:

San Lucas 12:39-48

    Dumdoma ninyo ini! Kon ang tag-iya sang balay nakahibalo kon ano nga oras magaabot ang makawat, magabantay gid sia agod indi makasulod sa iya balay ang makawat. Gani, kamo man maghanda kay ang Anak sang Tawo magaabot sa oras nga wala ninyo sia ginapaabot.”
   Si Pedro nagsiling, “Ginoo, kami lang bala ang ginatumod mo sini nga palaanggiran ukon ang tanan?” Ang Ginoo nagsabat, “Karon sin-o bala ang masaligan kag maalam nga suloguon? Sia amo ang pagatugyanan sang agalon sa pagdumala sang iya panimalay kag sa paghatag sa iban nga suloguon sang ila pagkaon sa nagakaigo nga tion. Bulahan ina nga suloguon kon makita sia sang iya agalon nga nagahimo sang gintugyan sa iya sa pag-abot niya. Matuod gid, nagasiling ako sa inyo, ang agalon magatugyan sa sina nga suloguon sang tanan niya nga pagkabutang. Pero kon ina nga suloguon magsiling sa iya kaugalingon, ‘Dugay pa mag-abot ang akon agalon,’ kag ginasakit niya ang iban nga mga suloguon nga lalaki kag babayi, kag dayon nagakaon, nagainom kag nagapahuboghubog sia. Ti, magabalik ang agalon sa adlaw nga wala sia ginapaabot sang suloguon kag sa tion nga wala niya mahibaloi. Ang agalon magahatukhatok sa iya kag magasilot upod sa mga malalison.
   “Ang suloguon nga nakahibalo sang luyag ipahimo sa iya sang iya agalon, pero daw wala lang sa buot niya ang paghimo sini, pagahanuton sing tudo-tudo. Pero ang suloguon nga wala makahibalo sang ginapahimo sa iya sang iya agalon, kag nagahimo sing mga butang nga dapat sia hanuton, pagahanuton sia sing diutay lang. Ang tawo nga ginhatagan sing madamo, madamo man ang ginapaabot sa iya. Ang tawo nga ginhatagan sing madamo pa gid, madamo pa gid ang ginapaabot sa iya.”

Oktubre 22 | Oktubre 24

"Kon ang Amoy Magpanuktok - sa Gilayon Abrihan"

Liturhiya sang Pulong

(Martes, Oktubre 22, 2019)

Ang Pagbasa gikan sa Sulat ni San Pablo nga Apostol, sa mga:

Taga-Roma 5:12, 15, 17-19, 20-21

   Ang sala nagsulod sa kalibutan paagi sa isa ka tawo, kag ang iya sala nagdala sing kamatayon. Gani, ang kamatayon nagaabot sa tanan nga mga tawo, kay ang tanan nga mga tawo nagpakasala.
   Pero sila nga duha indi pareho. Kay ang regalo sang Dios indi mapaanggid sa sala ni Adam. Matuod gid nga tungod sang sala sadtong isa ka tawo, madamo ang napatay. Pero ang grasya sang Dios sobra pa sini kag amo man ang iya bugana nga regalo para sa madamo nga mga tawo, paagi sa grasya sang isa ka tawo nga amo si Jesu-Cristo.
   Matuod gid nga paagi sa sala sadtong isa ka tawo, ang kamatayon nagsugod sa paggahom tungod sadtong isa ka tawo. Pero daw ano pa gid kadaku ang nahimo sang isa ka tawo, si Jesu-Cristo! Ang tanan nga nagabaton sang bugana nga grasya sang Dios kag sang regalo sang iya pagkamatarong magagahom sa kabuhi paagi kay Cristo. Gani, tungod sang isa ka sala nakondenar ang tanan nga mga tawo, subong man tungod sang isa ka matarong nga buhat nahilway ang tanan nga mga tawo, kag nahatagan sila sing kabuhi. Kag subong nga madamo nga mga tawo ang nanginmakasasala tungod sang paglapas sang isa ka tawo, sa amo man nga bagay madamo ang pakamatarungon sa atubangan sang Dios tungod sang pagtuman sang isa ka tawo.
   Ang Kasugoan nag-abot agod magdugang ang mga paglapas. Pero sa pagdugang sang sala, ang grasya sang Dios nagdugang pa gid. Gani, subong nga ang sala naggahom paagi sa kamatayon, sa amo man nga bagay ang grasya sang Dios nagagahom paagi sa pagkamatarong, kag nagatuytoy sa aton padulong sa kabuhi nga wala sing katapusan, paagi kay Jesu-Cristo nga aton Ginoo.

Salmo sa Pagsabat:

Mga Salmo 40:7-8, 8-9, 10, 17

(S) Yari nagkari ako, O Ginoo, sa pagtuman sang imo kabubot-on.

Gani nagsabat ako, “Yari ako! Ang imo mga mando para sa akon yara sa libro sang Kasugoan. Daw ano ang kaluyag ko sa pagtuman sang imo kabubot-on, O Dios ko! (S)
Ginahuptan ko ang imo pagtulon-an sa akon tagipusoon.” Sa mga pagtililipon sang tanan nimo nga mga tawo, O Ginoo, ginasugid ko ang maayong balita nga ikaw nagaluwas. Ikaw nakahibalo nga indi ako mag-untat sa pagsugid sini. (S)
Wala ko gintago ang balita sang kaluwasan sa akon kaugalingon; ang imo pagkamatutom kag pagbulig ginasugid ko sa gihapon. Sa pagtililipon sang tanan nimo nga mga tawo, wala ako maghipos nahanungod sang imo mapinadayunon nga gugma kag pagkamainunongon. (S)

Maluya ako kag wala sing mahimo, pero ginadumdom mo ako, O Ginoo. Ikaw ang akon manugbulig kag Manlulowas, indi ka magpadugay, O Dios ko! (S)

Aleluya:

Lucas 21:36

   Magbantay kag magpangamuyo kamo pirme agod nga makatindog kamo sa atubangan sang Anak sang Tawo.

Ang Pagbasa sang Santos nga Ebanghelyo suno kay:

San Lucas 12:35-38

    “Maghanda kamo para sa bisan ano nga magaabot, nga nawagkusan ang inyo mga hawak kag nasindihan ang inyo mga suga, subong sang mga suloguon nga nagahulat sang ila agalon nga magapauli halin sa punsyon sa kasal. Kon mag-abot sia kag magpanuktok, sa gilayon abrihan nila sia. Bulahan yadto nga mga suloguon nga masapwan sang ila agalon nga nagamata kag handa sa pag-abot niya! Nagasiling ako sa inyo nga magawagkos sia sang iya tampi, papungkoon niya sila kag sirbehan. Daw ano ka malipayon sa ila kon iya sila maabtan nga nagahulat, bisan nga tungang gab-i ukon kaagahon na sia mag-abot. 

Oktubre 21 | Oktubre 23

Magtipon sang Matuod nga Manggad

Liturhiya sang Pulong

(Lunes, Oktubre 21, 2019)

Ang Pagbasa gikan sa Sulat ni San Pablo nga Apostol, sa mga:

Taga-Roma 4:20-25

   Nagpadayon sia sa iya pagtuo kag wala sia magpangduhadoha sa saad sang Dios. Ang iya pagtuo nagpalig-on sa iya, kag nagdayaw sia sa Dios. Kay nagsalig gid sia nga ang Dios may gahom sa pagtuman sang iya ginsaad. Tungod sini, si Abraham “ginpakamatarong sang Dios,” paagi sa iya pagtuo. Ini nga mga pulong “ginpakamatarong sia sang Dios” ginsulat indi lamang para sa iya, kundi para man sa aton nga ginpakamatarong paagi sa aton pagtuo sa Dios nga nagbanhaw kay Jesus nga aton Ginoo. Gintugyan sia nga patyon tungod sang aton mga sala, kag ginbanhaw sia, agod nga mapakamatarong niya kita sa atubangan sang Dios.

Kalantahon sa Pagsabat:

Lucas 1:69-70, 71-72, 73-75

(S) Dayawon ta ang Ginoo, ang Dios sang Israel, kay iya ginduaw ang iya mga tawo.

Ginbangon niya ang isa ka gamhanan nga Manlulowas para sa aton, ang isa nga kaliwat ni David nga iya alagad. Amo ini ang iya ginsiling sang una paagi sa iya balaan nga mga propeta. (S)
Nagsaad sia sa pagluwas sa aton gikan sa aton mga kaaway, kag sa gahom sang tanan nga nagadumot sa aton. Nagsiling sia nga kaluoyan niya ang aton mga ginikanan, kag dumdomon niya ang iya balaan nga kasugtanan. (S)
Nagsaad sia sa aton amay nga si Abraham, kag nagsumpa nga luwason niya kita sa aton mga kaaway, kag tugotan kita sa pag-alagad sa iya nga walay kahadlok, nga manginbalaan kag matarong sa iya atubangan, sa tanan nga mga inadlaw sang aton kabuhi.  (S)

Aleluya:

Mateo 5:3

   Bulahan ang mga nagakilala sang kinahanglanon sang ila mga kalag, kay ila ang Ginharian sang langit!

Ang Pagbasa sang Santos nga Ebanghelyo suno kay:

San Lucas 12:13-21

    Isa sang mga tawo nagsiling sa iya, “Manunodlo, singgana ang akon utod nga lalaki nga partihan niya ako sang amon palanublion.”
   Si Jesus nagsabat sa iya, “Hoy, sin-o bala ang naghimo sa akon nga hukom ukon manugparti sang inyo pagkabutang?” Kag nagsiling sia sa ila tanan, “Mag-andam kamo kag maglikaw sa tanan nga sahi sang kahakog. Kay ang matuod nga kabuhi sang tawo wala nasandig sa kadamuon sang iya mga pagkabutang, bisan daw ano ka manggaranon sa iya.”
   Dayon si Jesus nagsugid sa ila sining palaanggiran, “May isa ka manggaranon nga tawo nga maayo ang patubas sang iya duta. Nagpainuino sia kon ano ang iya himuon kay wala na sia sing butangan sang iya patubas. Nagsiling sia sa iya kaugalingon, ‘Amo ini ang himuon ko: Gub-on ko ang akon mga tambubo kag magpatindog sing dalagku pa gid nga mga tambubo nga akon pagabutangan sang akon patubas kag sang iban ko nga mga pagkabutang. Magasiling ako sa akon kaugalingon: Mapalaron ka! May madamo ka nga maayo nga mga pagkabutang para sa malawig nga mga tinuig. Magpatawhay ka lang, magkaon, mag-inom kag magpangalipay.’ Pero ang Dios nagsiling sa iya, ‘Buangboang! Karon gid nga gab-i mapatay ka. Ti sin-o karon ang makapulos sining mga pagkabutang nga gintigana mo para sa imo kaugalingon?’
   “Subong man sina ang nagatipon sing manggad para sa iya kaugalingon, pero indi manggaranon sa atubangan sang Dios.”

Oktubre 20 | Oktubre 22

"Magpangamuyo Pirme kag Indi Magpakaluya"

Liturhiya sang Pulong

(Domingo, Oktubre 20, 2019)

1. Ang Pagbasa gikan sa Libro sang:

Exodo 17:8-13

   Ang mga Amaleknon nag-abot kag nagsalakay sa mga lsraelinhon sa Refidim. Si Moises nagsiling kay Josue, "Magpili ka sing mga tawo, kag maglakat buas sa pagpakig-away sa mga Amaleknon. Magatindog ako sa ibabaw sang bakulod kag magauyat sang sungkod nga ginhatag sang Dios sa akon." Gintuman ni Josue ang ginsiling ni Moises sa iya kag naggwa sila sa pagpakig-away sa mga Amaleknon, samtang si Moises, si Aaron, kag si Hur nagtaklad sa bakulod. Samtang ginabayaw ni Moises ang iya mga kamot, nagadaog ang mga Israelinhon, pero kon iya gani ipaidalom ang iya mga kamot nagadaog ang mga Amaleknon. Sang kapuyan na ang kamot ni Moises, si Aaron kag si Hur nagkuha sang bato, kag ginpapungkoan kay Moises, samtang nagatindog sila sa luyo niya kag ginabayaw nila ang iya kamot. Ginpadayon nila ini tubtob magtunod ang adlaw, kag ginlutos ni Josue ang tanan nga mga Amaleknon.

Salmo sa Pagsabat:

Mga Salmo 121:1-2, 3-4, 5-6, 7-8

(S) Ang aton bulig nagagikan sa Ginoo nga naghimo sang langit kag duta.

Magatulok ako sa mga bukid; diin bala magagikan ang akon bulig? Ang akon bulig nagagikan sa Ginoo, nga naghimo sang langit kag duta. (S)
Indi niya pag-itugot nga matumba ikaw. Ang imo mangangapin permi nagamata. Ang mangangapin sang Israel wala ginatuyo ukon nagatulog!  (S)
Ang Ginoo magabantay sa imo; yara sia sa luyo mo sa pag-apin sa imo. Ang adlaw indi magsakit sa imo sa kaadlawon, ukon ang bulan sa kagab-ihon. (S)
Ang Ginoo magaapin sa imo sa tanan nga katalagman; sia magatipig sa imo agod indi ka maano. Ang Ginoo magabantay sa imo paglakat kag pagbalik, sugod karon tubtob sa walay katubtoban. (S)

2. Ang Pagbasa gikan sa Ikaduha nga Sulat ni San Pablo nga Apostol, kay:

Timoteo 3:14-4:2

   Pero ikaw imo, magpadayon sa mga kamatuoran nga gintudlo sa imo kag imo ginatuohan sing malig-on. Kay nakahibalo ka kon sin-o ang imo mga manunodlo, kag dumdoma nga sugod sang bata pa ikaw, nakahibalo na ikaw sang Balaan nga mga Kasulatan, nga makahatag sa imo sing kaalam padulong sa kaluwasan paagi sa pagtuo kay Cristo Jesus. Kay ang bug-os nga Kasulatan ginbugna sang Dios kag mapuslanon sa pagtudlo sang kamatuoran, sa pagsabdong sang sala, sa pagtadlong sang mga sayop, kag sa pagtudlo sang matarong nga pagkabuhi, agod nga ang tawo nga nagaalagad sa Dios masangkapan kag mangintakos sa paghimo sang tanan nga sahi sang maayo nga buhat.
   Sa atubangan sang Dios kag ni Cristo Jesus nga magahukom sang tanan nga mga tawo nga buhi kag patay, tungod sang iya pagkari kag sang iya Ginharian, ginasugo ko ikaw sa pagwali sang pulong sang Dios. Magmaukod ka sa pagsugid sini sa nagakaigo ukon sa wala nagakaigo nga panahon. Konbensiha ang mga tawo, sabdunga, kag palig-una sila nga nagapanudlo nga may bug-os nga pagpasensya. 

Aleluya:

Hebreo 4:12

   Ang pulong sang Dios buhi kag gamhanan. Ini nagatungkad sang mga panghunahona kag mga handom sang tagipusoon sang mga tawo. 

Ang Pagbasa sang Santos nga Ebanghelyo suno kay:

San Lucas 18:1-8

    Dayon si Jesus nagsugid sa ila sining palaanggiran, sa pagtudlo sa ila nga dapat sila magpangamuyo pirme kag indi magpakaluya. “Sa isa ka banwa may isa ka hukom nga wala nagakahadlok sa Dios ukon nagatahod sa mga tawo. Kag may babayi nga balo sa sadto man nga banwa nga wala patay ang kadto sa iya kag nagasiling, ‘Buligi ako batok sa akon kasumpong.’ Sa malawig nga tinion indi gid magbulig ang hukom, pero sang ulihi nagsiling sia sa iya kaugalingon, ‘Bisan nga wala ako nagakahadlok sa Dios kag wala man nagatahod sa tawo, pero tungod sang iya kasabad tinguhaan ko nga mabuligan sia, basi kon matak-an ako sang iya pagbalikbalik diri.’ ”
   Kag ang Ginoo nagpadayon sa pagsiling, “Pamatii ninyo ang ginsiling sang hukom nga di-matarong. Karon, indi bala nga ang Dios magaapin sa iya kaugalingon nga mga tawo nga nagapangayo sa iya sing bulig sa adlaw kag gab-i? Magapabuyanboyan bala sia sa pagbulig sa ila? Nagasiling ako sa inyo, magaapin sia sa ila sa gilayon. Pero kon magkari ang Anak sang Tawo, makakita bala sia sing pagtuo diri sa duta?”

Oktubre 19 | Oktubre 21

"Ang Espiritu Santo Magatudlo sa Inyo kon ano ang Ihambal"

Liturhiya sang Pulong

(Sabado, Oktubre 19, 2019)

San Pablo De la Cruz, Pari

Ang Pagbasa gikan sa Sulat ni San Pablo nga Apostol, sa mga:

Taga-Roma 4:13, 16-18

   Ang Dios nagsaad kay Abraham kag sa iya mga kaliwat nga ang kalibutan mangin-iya. Ginhimo ini nga saad, indi kay gintuman ni Abraham ang Kasugoan, kundi kay nagtuo sia, kag ginbaton sia sang Dios subong isa ka matarong nga tawo.
   Gani, ang saad napasad sa pagtuo, agod nga mangingarantiya ini subong isa ka regalo sang Dios para sa tanan nga mga kaliwat ni Abraham—indi lamang sa mga nagatuman sang Kasugoan, kundi man sa mga nagatuo subong kay Abraham. Kay si Abraham amo ang amay nga espirituhanon naton tanan. Ang kasulatan nagasiling, “Ginhimo ko ikaw nga amay sang madamo nga mga kapungsoran.” Gani, ang saad matuod sa atubangan sang Dios, ang Dios nga gintuohan ni Abraham—ang Dios nga nagabanhaw sang mga minatay, kag sa iya pagmando ginatuga ang mga butang nga wala pa matuga. Si Abraham nagtuo kag naglaom, bisan wala na sing paglaom.
   Gani, “nangin-amay sia sang madamo nga mga kapungsoran,” subong sang ginasiling sang kasulatan, “Manginsubong sini kadamo ang imo mga kaliwat.”

Salmo sa Pagsabat:

Mga Salmo 105:6-7, 8-9, 42-43

(S) Pagatumanon sang Ginoo sa gihapon ang iya kasugtanan.

Kamo nga mga kaliwat ni Abraham nga iya mga alagad, kamo nga mga kaliwat ni Jacob nga iya mga pinili: dumdoma ninyo ang iya gamhanan kag makatilingala nga mga milagro, kag ang mga paghukom sa iya ginhatag. Ang Ginoo amo ang aton Dios; ang iya mga sugo para sa bug-os nga kalibutan. (S)
Pagatumanon niya sa gihapon ang iya kasugtanan, ang iya mga saad tubtob sa isa ka libo ka mga kaliwatan, ang kasugtanan nga iya ginhimo kay Abraham, kag ang iya saad kay Isaac. (S)
Gindumdom niya ang iya balaan nga saad kay Abraham nga iya alagad. Gani glnpangulohan niya ang iya mga tawo sa paggwa nga nagakanta, ang iya pinili nga mga tawo nga nagahinugyaw. (S)

Aleluya:

Juan 15:26, 27

   Ang Espiritu sang kamatuoran ipadala gikan sa Amay, siling sang Ginoo; sia magasaksi nahanungod sa akon. 

Ang Pagbasa sang Santos nga Ebanghelyo suno kay:

San Lucas 12:8-12

    “Nagasiling ako sa inyo, ang tagsatagsa nga nagakilala sa akon sa atubangan sang mga tawo, ang Anak sang Tawo magakilala man sa iya sa atubangan sang mga anghel sang Dios. Pero ang nagapanghiwala sa akon sa atubangan sang mga tawo, ang Anak sang Tawo magapanghiwala man sa iya sa atubangan sang mga anghel sang Dios.
   “Ang bisan sin-o nga nagahambal batok sa Anak sang Tawo mapatawad, pero ang nagapasipala sa Espiritu Santo indi mapatawad.
   “Kon dalhon nila kamo agod hukman sa mga sinagoga ukon sa atubangan sang mga gobernador, ukon mga pangulo, indi kamo magpalibog kon ano ang pagtabang ninyo sang inyo kaugalingon ukon ano ang inyo isabat. Kay ang Espiritu Santo magatudlo sa inyo sa sina nga tion kon ano ang inyo dapat ihambal.”

Oktubre 18 | Oktubre 20